Hoofstuk 7
Wat God gedoen het om die mensdom te red
1, 2. (a) Hoe het ’n Romeinse hoofman oor honderd tot die besef gekom wie God se Seun is? (b) Waarom het Jehovah toegelaat dat Jesus sterf?
OP ’N lentemiddag nagenoeg 2 000 jaar gelede het ’n Romeinse hoofman oor honderd drie mans ’n stadige, pynlike dood sien sterf. Daardie soldaat het veral een van hulle dopgehou—Jesus Christus. Jesus is aan ’n houtpaal vasgespyker. Die middaghemel het donker geword namate die oomblik van sy dood nader gekom het. Toe hy sterf, het die aarde hewig geskud, en die soldaat het uitgeroep: “Hierdie man was beslis God se Seun.”—Markus 15:39.
2 God se Seun! Daardie soldaat was reg. Hy het pas die allerbelangrikste gebeurtenis aanskou wat ooit op die aarde sou plaasvind. By vorige geleenthede is Jesus deur God self sy geliefde Seun genoem (Matteus 3:17; 17:5). Waarom het Jehovah toegelaat dat sy Seun sterf? Omdat dit God se manier was om die mensdom van sonde en die dood te red.
GEKIES VIR ’N SPESIALE ROL
3. Waarom was dit gepas dat God se enigverwekte Seun gekies is om ’n spesiale rol ten opsigte van die mensdom te speel?
3 Soos ons vroeër in hierdie boek geleer het, het Jesus ’n voormenslike bestaan gehad. Hy word God se “enigverwekte Seun” genoem omdat hy regstreeks deur Jehovah geskep is. God het Jesus daarna gebruik om alle ander dinge te skep (Johannes 3:18; Kolossense 1:16). Jesus was besonder lief vir die mensdom (Spreuke 8:30, 31). Geen wonder dat Jehovah sy enigverwekte Seun gekies het om ’n spesiale rol te speel toe die mensdom onder die veroordeling tot die dood gekom het nie!
4, 5. Wat het die Bybel oor die Messiaanse Saad geopenbaar voor Jesus aarde toe gekom het?
4 Toe God in die tuin van Eden ’n vonnis oor Adam, Eva en Satan uitgespreek het, het hy van die toekomstige Redder as ’n “saad” gepraat. Hierdie Saad, of nakomeling, sou die verskriklike euwels wat Satan die Duiwel, “die oorspronklike slang”, veroorsaak het ongedaan kom maak. Trouens, die beloofde Saad sou Satan en almal wat hom volg, verbrysel.—Genesis 3:15; 1 Johannes 3:8; Openbaring 12:9.
5 Deur die eeue heen het God gaandeweg meer oor die Saad, wat ook die Messias genoem is, geopenbaar. Soos in die tabel op bladsy 37 getoon word, het talle profesieë besonderhede oor baie aspekte van sy lewe op die aarde verstrek. Hy sou byvoorbeeld verskriklike mishandeling moes verduur om sy rol in God se voorneme te vervul.—Jesaja 53:3-5.
WAAROM DIE MESSIAS SOU STERF
6. Wat sou die Messias volgens Daniël 9:24-26 doen, en hoe?
6 Die profesie wat in Daniël 9:24-26 opgeteken is, het voorspel dat die Messias—God se Gesalfde—’n groot voorneme sou vervul. Hy sou aarde toe kom “om die goddeloosheid te voleindig en om die maat van die sondes vol te maak en om die ongeregtigheid te versoen en om . . . geregtigheid aan te bring”, vir ewig. Die Messias sou die veroordeling tot die dood van die getroue mensdom verwyder. Maar hoe sou hy dit doen? Die profesie verduidelik dat hy “uitgeroei”, of doodgemaak, sou word.
7. Waarom het die Jode diereofferandes gebring, en wat het dit voorafgeskadu?
7 Die eertydse Israeliete was vertroud met die gedagte van versoening vir oortreding. In hulle aanbidding onder die Wet wat God deur Moses vir hulle gegee het, het hulle gereeld diereofferandes gebring. Dit het die volk van Israel daaraan herinner dat mense iets nodig het om vir hulle sondes versoening te doen, oftewel dit te bedek. Die apostel Paulus het die beginsel soos volg opgesom: “Tensy bloed uitgestort word, vind geen vergifnis plaas nie” (Hebreërs 9:22). Christene is nie onder die Mosaïese Wet met sy vereistes, soos die offerandes, nie (Romeine 10:4; Kolossense 2:16, 17). Hulle weet ook dat diereofferandes nie blywende en algehele vergifnis van sondes kan voorsien nie. Hierdie offerandes het eerder ’n baie kosbaarder offerande voorafgeskadu—dié van die Messias, of Christus. (Hebreërs 10:4, 10; vergelyk Galasiërs 3:24.) Maar miskien vra jy: ‘Was dit regtig nodig dat die Messias moes sterf?’
8, 9. Watter kosbare dinge het Adam en Eva verloor, en hoe het hulle dade hulle nageslag geraak?
8 Ja, die Messias moes sterf sodat die mensdom gered kon word. Om dit te verstaan, moet ons terugdink aan die tuin van Eden en die enormiteit probeer begryp van wat Adam en Eva verloor het toe hulle teen God in opstand gekom het. Hulle is die ewige lewe voorgehou! As kinders van God het hulle ook ’n regstreekse verhouding met hom geniet. Maar toe hulle Jehovah se heerskappy verwerp het, het hulle dit alles verloor en die sonde en die dood oor die mensdom gebring.—Romeine 5:12.
9 Dit was asof ons eerste ouers ’n ontsaglike fortuin verkwis het en hulle in groot skuld gedompel het. Adam en Eva het daardie skuld aan hulle nakomelinge oorgedra. Omdat ons nie volmaak en sondeloos gebore is nie, is elkeen van ons sondig en sterwend. Wanneer ons siek word of iets kwetsends sê wat ons wens ons kan terugtrek, ervaar ons die gevolge van ons oorgeërfde skuld—menslike onvolmaaktheid (Romeine 7:21-25). Ons enigste hoop is om terug te kry wat Adam verloor het. Ons kan volmaakte menselewe egter nie verdien nie. Aangesien alle onvolmaakte mense sondig, verdien ons almal die dood, nie die lewe nie.—Romeine 6:23.
10. Wat was nodig om terug te koop wat Adam verloor het?
10 Maar kon iets geoffer word in ruil vir die lewe wat Adam verbeur het? God se standaard van geregtigheid vereis gelyke waarde, “lewe vir lewe” (Exodus 21:23). ’n Lewe moes dus geoffer word om te betaal vir die lewe wat verloor is. Nie sommer enige lewe sou voldoende wees nie. Psalm 49:8, 9 sê van onvolmaakte mense: “Niemand kan ooit ’n broer loskoop nie; hy kan aan God sy losprys nie gee nie (want die losprys van hulle lewe is te kosbaar en vir ewig ontoereikend).” Is die situasie dan hopeloos? Nee, glad nie.
11. (a) Wat beteken die woord “losprys” in Hebreeus? (b) Wie alleen kon die mensdom vrykoop, en waarom?
11 In Hebreeus verwys die woord “losprys” na die som wat betaal word om ’n gevangene vry te koop en dui ook gelyke waarde aan. Slegs ’n mens met ’n volmaakte menselewe kon die gelyke waarde offer van wat Adam verloor het. Ná Adam was Jesus Christus die enigste volmaakte mens wat op die aarde gebore is. Gevolglik noem die Bybel Jesus “die laaste Adam” en verseker dit ons dat Christus “homself as ’n ooreenstemmende losprys vir almal gegee het” (1 Korintiërs 15:45; 1 Timoteus 2:5, 6). Terwyl Adam die dood aan sy kinders oorgedra het, is Jesus se nalatenskap die ewige lewe. Eerste Korintiërs 15:22 verduidelik: “Net soos almal in Adam sterf, só sal almal ook in die Christus lewend gemaak word.” Dit is dan gepas dat Jesus “Ewige Vader” genoem word.—Jesaja 9:5, 6.
HOE DIE LOSPRYS BETAAL IS
12. Wanneer het Jesus die Messias geword, en watter lewensweg het hy daarna gevolg?
12 In die herfs van 29 G.J. het Jesus na sy familielid Johannes gegaan om gedoop te word en hom daardeur aan te bied om God se wil uit te voer. By daardie geleentheid het Jehovah Jesus met heilige gees gesalf. So het Jesus die Messias, of Christus, die een wat deur God gesalf is, geword (Matteus 3:16, 17). Toe het Jesus met sy bediening van drie en ’n half jaar begin. Hy het dwarsdeur sy tuisland gereis en oor God se Koninkryk gepreek en getroue volgelinge versamel. Maar soos voorspel is, het teenstand teen hom gou begin toeneem.—Psalm 118:22; Handelinge 4:8-11.
13. Watter gebeurtenisse het tot Jesus se dood as ’n handhawer van onkreukbaarheid gelei?
13 Jesus het die skynheiligheid van die godsdiensleiers onbevrees blootgelê en hulle het hom probeer doodmaak. Hulle het uiteindelik ’n lelike komplot gesmee wat verraad, wederregtelike inhegtenisname, ’n onwettige verhoor en ’n valse aanklag van sedisie ingesluit het. Jesus is geslaan, bespoeg, bespot en met ’n sweep geslaan wat bedoel was om sy vlees te skeur. Die Romeinse goewerneur Pontius Pilatus het hom tot die dood aan ’n folterpaal veroordeel. Hy is aan ’n houtpaal vasgespyker en het regop daar gehang. Elke asemteug was ’n foltering, en dit het ure geduur voor hy gesterf het. Deur die hele beproewing heen het Jesus volmaakte onkreukbaarheid teenoor God gehandhaaf.
14. Waarom het God toegelaat dat sy Seun ly en sterf?
14 Op 14 Nisan 33 G.J. het Jesus dus sy lewe gegee “as ’n losprys in ruil vir baie” (Markus 10:45; 1 Timoteus 2:5, 6). Jehovah kon vanuit die hemel sy geliefde Seun sien ly en sterf. Waarom het God toegelaat dat iets so verskrikliks gebeur? Hy het dit gedoen omdat hy die mensdom liefhet. Jesus het gesê: “God het die wêreld so liefgehad dat hy sy enigverwekte Seun gegee het, sodat elkeen wat geloof in hom beoefen, nie vernietig sal word nie maar die ewige lewe kan hê” (Johannes 3:16). Jesus se dood leer ons ook dat Jehovah ’n God van volmaakte geregtigheid is (Deuteronomium 32:4, NW). Party wonder dalk waarom God nie sy beginsels van geregtigheid wat ’n lewe vir ’n lewe vereis ter syde gestel het en die prys vir Adam se sondige weg geïgnoreer het nie. Die rede is dat Jehovah altyd by sy wette bly en hulle handhaaf, selfs al verg dit ’n groot opoffering van hom.
15. Wat het Jehovah gedoen, aangesien dit onregverdig sou gewees het om toe te laat dat Jesus se bestaan permanent eindig?
15 Jehovah se geregtigheid het ook vereis dat Jesus se dood ’n gelukkige uiteinde moes hê. Want sou geregtigheid geskied het as die getroue Jesus toegelaat is om vir ewig in die dood te slaap? Natuurlik nie! Die Hebreeuse Geskrifte het voorspel dat God se lojale kneg nie in die graf sou bly nie (Psalm 16:10; Handelinge 13:35). Hy het dele van drie dae in die dood geslaap, en toe het Jehovah God hom tot lewe as ’n magtige gees opgewek.—1 Petrus 3:18.
16. Wat het Jesus by sy terugkeer na die hemel gedoen?
16 By sy dood het Jesus vir altyd van sy menselewe afstand gedoen. Toe hy tot lewe in die hemel opgewek is, het hy ’n lewegewende gees geword. Boonop is Jesus, toe hy na die allerheiligste plek in die heelal opgevaar het, met sy geliefde Vader herenig en het hy vir Hom die waarde van sy volmaakte menselewe formeel aangebied (Hebreërs 9:23-28). Die waarde van daardie kosbare lewe kon toe ten behoewe van die gehoorsame mensdom aangewend word. Wat beteken dit vir jou?
CHRISTUS SE LOSPRYS EN JY
17. Hoe kan ons op grond van Christus se losprysofferande vergifnis verkry?
17 Beskou drie maniere waarop jy reeds nou by Christus se losprysofferande baat vind. Eerstens, dit bring vergifnis van sondes. Deur geloof in die vergote bloed van Jesus het ons “die bevryding deur ’n losprys”, ja, “die vergifnis van ons oortredings” (Efesiërs 1:7). Al het ons dus ’n ernstige sonde gepleeg, kan ons God in Jesus se naam om vergifnis vra. As ons waarlik berouvol is, wend Jehovah die waarde van sy Seun se losprysofferande ten behoewe van ons aan. God vergewe ons en skenk ons die seën van ’n goeie gewete in plaas van die doodstraf te voltrek wat ons oor ons bring deur te sondig.—Handelinge 3:19; 1 Petrus 3:21.
18. Hoe bied Jesus se offerande ons hoop?
18 Tweedens, Christus se losprysofferande voorsien die grondslag vir ons toekomshoop. Die apostel Johannes het in ’n visioen gesien dat “’n groot skare, wat geen mens kon tel nie,” die komende rampspoedige einde van hierdie stelsel van dinge sou oorleef. Waarom sal hulle behoue bly wanneer God so baie ander vernietig? ’n Engel het vir Johannes gesê dat die groot skare “hulle lang gewade gewas en dit wit gemaak [het] in die bloed van die Lam”, Jesus Christus (Openbaring 7:9, 14). Solank ons geloof in die vergote bloed van Jesus Christus beoefen en in ooreenstemming met Goddelike beginsels lewe, sal ons in God se oë rein wees en die hoop op die ewige lewe hê.
19. Hoe bewys Christus se offerande dat hy en sy Vader jou liefhet?
19 Derdens, die losprysofferande is die allergrootste bewys van Jehovah se liefde. Christus se dood het die twee grootste liefdedade in die geskiedenis van die heelal beliggaam: (1) God se liefde deur sy Seun te stuur om vir ons te sterf; (2) Jesus se liefde deur homself gewillig as ’n losprys op te offer (Johannes 15:13; Romeine 5:8). As ons waarlik geloof beoefen, is hierdie liefde op ’n ieder en ’n elk van ons van toepassing. Die apostel Paulus het gesê: ‘Die Seun van God het my liefgehad en het homself vir my oorgegee.’—Galasiërs 2:20; Hebreërs 2:9; 1 Johannes 4:9, 10.
20. Waarom moet ons geloof in Jesus se losprysofferande beoefen?
20 Laat ons dus ons waardering toon vir die liefde wat God en Christus bewys het deur geloof in Jesus se losprysofferande te beoefen. Dít lei tot die ewige lewe (Johannes 3:36). Maar ons redding is nie die belangrikste rede vir Jesus se lewe en dood op die aarde nie. Nee, ’n selfs groter geskil, ’n universele geskil, was vir hom die hoofsaak. Soos ons in die volgende hoofstuk sal sien, raak daardie geskil elkeen van ons, want dit toon waarom God toegelaat het dat goddeloosheid en lyding so lank in hierdie wêreld voortduur.
TOETS JOU KENNIS
Waarom moes Jesus sterf om die mensdom te red?
Hoe is die losprys betaal?
Op watter maniere vind jy by die losprys baat?
[Volbladillustrasie op bladsy 67]