Beïnvloed die sterre jou lewe?
AS ’N mens op ’n helder nag en ver van die ligte van mense se teenwoordigheid na die hemel opkyk, lyk dit soos swart fluweel met duisende klein diamantjies wat teen die uitspansel skitter. Dit is eers in die afgelope drie en ’n half eeue dat die mens begin verstaan het hoe ontsaglik groot die sterre is en hoe ver hulle van ons af is. Ons begin maar net om die geweldige kragte te verstaan wat werksaam is in die ontsagwekkende ruimte wat ons heelal is.
Van die vroegste tye af het mense die presiese bewegings van die hemelliggame in die naghemel en die seisoenale veranderinge van hulle liggings in die hemel waargeneem (Genesis 1:14). Baie het soortgelyke gevoelens uitgespreek as dié van koning Dawid van Israel, wat sowat 3 000 jaar gelede geskryf het: “Wanneer ek u hemel sien, die werke van u vingers, die maan en die sterre wat u berei het, wat is die sterflike mens dat u aan hom dink?”—Psalm 8:3, 4.
Maar of ons dit besef of nie, die hemelliggame en hulle bewegings beïnvloed ons lewe op baie meer waarneembare maniere. Die son, die ster waarom die aarde wentel, bepaal die mens se mees basiese eenhede van tyd—die lengte van ons dag en jaar. Die maan is “vir vasgestelde tye” of “om ons die seisoene aan te gee” (Psalm 104:19; Contemporary English Version). En die sterre is betroubare gidse vir navigasie, selfs vir ruimtevaarders wanneer hulle hulle ruimtetuig wil oriënteer. As gevolg hiervan wonder party of die sterre in werklikheid meer vir ons kan doen as om tye en seisoene aan te gee en ons waardering vir God se skeppingswerk te vergroot. Kan hulle ook ons toekoms voorspel of ons teen rampe waarsku?
Die oorsprong en doel van sterrewiggelary
Die gebruik om in die hemel na voortekens te soek om iemand se lewensloop op aarde te rig, het sy oorsprong in eertydse Mesopotamië gehad en kan moontlik tot die derde millennium VHJ teruggevoer word. Die vroeë sterrewiggelaars het die hemel noukeurig waargeneem. Die wetenskap van sterrewiggelary het ontstaan uit hulle pogings om die bewegings van hemelliggame te karteer, posisies van sterre op te teken, kalenders uit te werk en verduisterings te voorspel. Maar sterrewiggelary gaan verder as om die natuurlike invloed van die son en maan op ons omgewing te bestudeer. Dit voer aan dat die ligging van die son, maan, planete, sterre en sterrebeelde en hulle posisies in verhouding tot mekaar nie net belangrike gebeurtenisse op die aarde beïnvloed nie, maar ook ons lewe as individue beheer. Op watter maniere?
Sommige beoefenaars gebruik sterrewiggelary om die hemelliggame te ondersoek vir aanduidings of waarskuwings oor die toekoms, waarvan die ingeligtes gebruik kan maak en waarby hulle op verskeie maniere kan baat vind. Ander voel dat sterrewiggelary in werklikheid toon wat ons voorbeskik is om te doen of dat dit ons kan help om die gunstigste tyd te bepaal om aan sekere aktiwiteite deel te neem of om spesifieke projekte aan te pak. Hierdie inligting word glo verkry deur die posisies van die vernaamste hemelliggame in verhouding tot mekaar waar te neem en hulle interaksie met mekaar en met die aarde te “bereken”. Hulle invloed oor ’n sekere individu hang blykbaar af van die stand van die hemelliggame toe hy gebore is.
Die eerste sterrewiggelaars het gemeen dat die aarde die middelpunt van die heelal is en dat die planete en sterre vasgestelde posisies het in ’n reeks sfere van toenemende grootte wat om die aarde draai. Hulle het ook gedink dat die son op sy jaarlikse reis deur die hemel ’n spesifieke baan tussen die sterre en sterrebeelde volg. Hulle het die oënskynlike baan van die son die ekliptika genoem en dit in 12 sones, of dele, verdeel. Elke deel is vernoem na die sterrebeeld daarin waardeur die son beweeg het. So het die 12 tekens van die diereriem ontstaan. Hierdie sones, of “huise van die hemel”, is as die woonplekke van spesifieke gode beskou. Natuurlik het wetenskaplikes ná verloop van tyd uitgevind dat die son nie om die aarde reis nie, maar dat die aarde om die son reis. Hierdie ontdekking het sterrewiggelary as ’n wetenskap die nekslag toegedien.
Van sy oorsprong in Mesopotamië het sterrewiggelary na byna alle dele van die wêreld versprei en in verskeie vorme ’n inherente deel geword van feitlik al die groot beskawings van die mensdom. Ná die Persiese verowering van Babilon het sterrewiggelary na Egipte, Griekeland en Indië versprei. Van Indië af het Boeddhistiese sendelinge dit na Sentraal-Asië, China, Tibet, Japan en Suidoos-Asië geneem. Hoewel daar nie bekend is presies hoe dit aan die Majas oorgedra is nie, het daardie beskawing astrologiese waarnemings op groot skaal en op soortgelyke wyse as die Babiloniërs gebruik. Die “moderne” vorm van sterrewiggelary het vermoedelik in die gehelleniseerde Egipte ontwikkel en het ’n groot invloed gehad op die denke van elemente van Judaïsme, Islam en die Christendom.
Selfs voor die nasie Israel in die sewende eeu VHJ in ballingskap na Babilon weggevoer is, het sterrewiggelary ’n invloed op hulle uitgeoefen. Die Bybel vertel ons van die getroue koning Josia se pogings om die volk te reinig van die gebruik om offerandes te bring “vir die son en vir die maan en vir die sterrebeelde van die diereriem en vir die hele leër van die hemel”.—2 Konings 23:5.
Die bron van sterrewiggelary
Sterrewiggelary is gegrond op ernstige wanopvattings aangaande die struktuur en werking van die heelal. Daarom kan dit beslis nie van God af kom nie. Aangesien die basiese veronderstellings daarvan op onwaarhede gegrond is, kan sterrewiggelary nie ’n akkurate bron van inligting oor die toekoms wees nie. Die tekortkominge daarvan word goed toegelig deur twee interessante geskiedkundige gebeure.
Gedurende die bewind van die Babiloniese koning Nebukadnesar was die priesters en sterrewiggelaars nie in staat om die koning se droom vir hom uit te lê nie. Daniël, ’n profeet van die ware God, Jehovah, het gewys op die rede vir die probleem: “Die geheim wat die koning vra, kan die wyse manne, die besweerders, die towerpriesters en die sterrewiggelaars nie aan die koning openbaar nie. Maar daar bestaan ’n God in die hemel wat ’n Openbaarder van geheime is, en hy het aan koning Nebukadnesar bekend gemaak wat aan die einde van die dae gaan plaasvind” (Daniël 2:27, 28). Ja, Daniël het op Jehovah God, die “Openbaarder van geheime”, vertrou—nie op die son, maan of sterre nie—en hy het vir die koning die korrekte uitlegging gegee.—Daniël 2:36-45.
Die uiters presiese astrologiese berekeninge van die Majas het nie gekeer dat hulle beskawing in die negende eeu HJ ineenstort nie. Hierdie mislukkings toon nie net dat sterrewiggelary ’n bedrogspul is, wat niks met akkuraatheid kan voorspel nie, maar dit onthul ook die werklike doel daarvan: om te keer dat mense hulle tot God wend vir juiste inligting aangaande die toekoms.
Die feit dat sterrewiggelary op onwaarhede gegrond is, help ons ook om die bron daarvan te identifiseer. Jesus het van die Duiwel gesê: “Hy het nie in die waarheid vasgestaan nie, omdat daar geen waarheid in hom is nie. Wanneer hy die leuen spreek, spreek hy ooreenkomstig sy eie geaardheid, want hy is ’n leuenaar en die vader van die leuen” (Johannes 8:44). Satan gee voor dat hy “’n engel van lig” is, en die demone doen hulle voor as “bedienaars van regverdigheid”. In werklikheid is hulle bedrieërs wat daarop uit is om mense in ’n web van bedrog te vang (2 Korintiërs 11:14, 15). God se Woord lê die “kragtige werke en leuenagtige tekens en voortekens” bloot as “die werking van Satan”.—2 Tessalonisense 2:9.
Waarom jy dit moet vermy
Sterrewiggelary is gegrond op leuens en is dus verfoeilik vir Jehovah, die God van waarheid (Psalm 31:5). Daarom veroordeel die Bybel dit uitdruklik en vermaan dit mense om niks daarmee te doen te hê nie. In Deuteronomium 18:10-12 sê God duidelik: “Daar mag niemand onder jou gevind word wat . . . voortekens soek of wat ’n towenaar is nie, of wat . . . ’n geestemedium of ’n beroepsvoorspeller van gebeure om inligting vra of die dooies raadpleeg nie. Want elkeen wat hierdie dinge doen, is vir Jehovah verfoeilik.”
Aangesien Satan en die demone die mag agter sterrewiggelary is, stel dit iemand wat daarby betrokke raak, aan hulle invloed bloot. Net soos iemand wat met dwelms eksperimenteer, onder die beheer van dwelmhandelaars kan kom, kan iemand wat met sterrewiggelary eksperimenteer, onder die beheer van die meesterbedrieër Satan kom. Daarom moet dié wat God en waarheid liefhet, sterrewiggelary heeltemal verwerp en eerder ag slaan op die Bybel se raad: “Haat wat sleg is, en wees lief vir wat goed is.”—Amos 5:15.
Sterrewiggelary floreer op mense se begeerte om te weet wat die toekoms inhou. Is dit moontlik om te weet wat die toekoms inhou? En indien wel, hoe? Die Bybel sê vir ons dat ons nie kan weet wat môre, volgende maand of volgende jaar in ons lewe sal gebeur nie (Jakobus 4:14). Tog openbaar die Bybel aan ons die algemene beeld van wat in die nabye toekoms met die mensdom sal gebeur. Dit sê vir ons dat die Koninkryk waarvoor ons in die Onse Vader bid, binnekort sal kom (Daniël 2:44; Matteus 6:9, 10). Dit sê ook vir ons dat menselyding binnekort tot ’n einde sal kom en ons nooit weer sal teister nie (Jesaja 65:17; Openbaring 21:4). God beskik nie mense se lewe vooraf nie, maar nooi alle mense eerder om te leer omtrent hom en wat hy ten behoewe van hulle sal doen. Hoe weet ons dit? Die Bybel toon duidelik dat dit God se wil is dat “alle soorte mense gered moet word en tot juiste kennis van die waarheid moet kom”.—1 Timoteus 2:4.
Die luisterryke hemel en alles daarin is nie daargestel om ons lewe te beheer nie. Hulle getuig eerder van Jehovah se krag en Godheid (Romeine 1:20). Hulle kan ons beweeg om onwaarhede te verwerp en op God en sy Woord, die Bybel, te vertrou vir betroubare raad en leiding om ’n suksesvolle lewe te lei. “Vertrou op Jehovah met jou hele hart en moenie op jou eie begrip steun nie. Slaan ag op hom in al jou weë, en hy sal jou paaie reguit maak.”—Spreuke 3:5, 6.
[Lokteks op bladsy 19]
Die Majas het op groot skaal van astrologiese waarnemings gebruik gemaak
[Lokteks op bladsy 20]
“Daar bestaan ’n God in die hemel wat ’n Openbaarder van geheime is, en hy het . . . bekend gemaak wat aan die einde van die dae gaan plaasvind”
[Lokteks op bladsy 20]
Die presiese astrologiese berekeninge van die Majas het nie gekeer dat hulle beskawing ineenstort nie
[Prent op bladsy 19]
EL CARACOL-STERREWAG, CHICHÉN ITZÁ, YUCATÁN, MEXIKO, 750-900 HJ
[Foto-erkennings op bladsy 19]
Bladsye 18 en 19, van links na regs: Sterre: NASA, ESA, and A. Nota (STScI); Maja-kalender: © Lynx/Iconotec com/age fotostock; Maja-sterrewiggelaar: © Albert J. Copley/age fotostock; Maja-sterrewag: El Caracol (The Great Conch) (photo), Mayan/Chichen Itza, Yucatan, Mexico/Giraudon/The Bridgeman Art Library