Hoofstuk 33

Waarom moet ek pornografie vermy?

Hoe dikwels kom jy per ongeluk op pornografie af?

□ Nooit

□ Selde

□ Gereeld

Waar gebeur dit die meeste?

□ Internet

□ Skool

□ TV

□ Ander

Hoe reageer jy?

□ Ek kyk onmiddellik weg.

□ Nuuskierigheid laat my vir ’n oomblik daarna kyk.

□ Ek staar daarna en soek selfs na meer.

TOE jou ouers so oud soos jy was, moes mense wat na pornografie wou kyk, daarna soek. Vandag lyk dit of pornografie na jou soek. Een 19-jarige meisie sê: “Partykeer snuffel ek op die Internet rond of doen ek aanlyninkopies of kyk ek net na aanlynbankstate en dan, uit die bloute, verskyn daar pornografiese foto’s!” Dis niks ongewoons nie. In een opname het 90 persent van jongmense tussen 8 en 16 gesê dat hulle toevallig op pornografie afgekom het toe hulle op die Internet was—in die meeste gevalle terwyl hulle huiswerk gedoen het!

Aangesien dit so algemeen voorkom, wonder jy dalk: ‘Is pornografie dan regtig so sleg?’ Die antwoord is ja! Pornografie verlaag dié wat daarin uitgebeeld word sowel as dié wat daarna kyk, en dit lei dikwels tot seksuele sondes. Maar dis nie al nie.

Om na pornografie te kyk, kan ’n gewoonte word wat langdurige, verwoestende gevolge het. Kyk byvoorbeeld na ’n man met die naam Jeff wat selfs nadat hy al 14 jaar lank vry is van pornografie, erken het: “Dis ’n daaglikse stryd. Die begeerte is nog steeds daar, al is dit baie minder intens. Die nuuskierigheid is nog steeds daar. Die beelde is nog steeds daar. Ek wens ek het my nooit op hierdie afskuwelike weg begewe nie. Dit het aan die begin so onskadelik gelyk. Maar nou weet ek beter. Pornografie is skadelik, dis pervers en dit verlaag almal wat iets daarmee te doen het. Al sê die voorstanders daarvan ook wat, daar is niks—hoegenaamd niks—positiefs omtrent pornografie nie.”

Ondersoek die situasie

Hoe kan jy dit vermy om selfs toevallig op pornografie af te kom? Ontleed eerstens die situasie. Is daar enige patroon? Dink aan die volgende voorbeelde:

Sal van jou skoolmaats dalk vir jou pornografie per e-pos of na jou selfoon stuur? Indien wel, sal dit goed wees om hulle boodskappe uit te wis sonder om dit oop te maak.

Verskyn daar opspringvenstertjies (“pop-ups”) wanneer jy sekere woorde in ’n Internet-soekenjin intik? As jy weet dat dit kan gebeur, sal dit jou dalk help om meer spesifiek en versigtiger te wees met die sleutelwoorde wat jy gebruik.

Maak hieronder ’n lys van enigiets wat daartoe gelei het dat jy op pornografie afkom.

․․․․․

Is daar enigiets wat jy kan doen om die aantal kere wat jy toevallig daarop afkom te verminder of uit te skakel? Indien wel, skryf hieronder neer wat jy beplan om te doen.

․․․․․

As jy alreeds vasgevang is

Dis een ding om toevallig op pornografie af te kom, maar iets heeltemal anders om doelbewus daarna te gaan kyk. Sê nou dit het al ’n gewoonte geword? Maak geen fout nie—dis glad nie maklik om met so ’n gewoonte te breek nie. Ter toeligting: Sê nou jou hande was met ’n enkele garedraad aan mekaar vasgebind. Jy sou moontlik die draad maklik kon breek. Maar sê nou dit was ’n hele paar keer om jou hande gedraai? Dan sou dit baie moeiliker wees om los te breek. Dieselfde geld vir mense wat ’n gewoonte daarvan maak om na pornografie te kyk. Hoe meer hulle daarna kyk, hoe meer vasgevang raak hulle. Hoe kan jy losbreek as dit met jou gebeur het?

Sien pornografie vir wat dit werklik is. Pornografie is niks minder nie as ’n sataniese poging om iets te verlaag wat Jehovah wil hê eerbaar moet wees. As jy pornografie in hierdie lig beskou, sal dit jou help om ‘die kwaad te haat’.—Psalm 97:10.

Dink aan die gevolge. Pornografie vernietig huwelike. Dit verlaag die mense wat daarin uitgebeeld word. Dit verlaag die persoon wat daarna kyk. Die Bybel sê met goeie rede: “Skerpsinnig is die een wat die rampspoed gesien en hom verberg het” (Spreuke 22:3). Skryf hieronder een voorbeeld neer van rampspoed wat jou kan tref as jy ’n gewoonte daarvan sou maak om na pornografie te kyk.

․․․․․

Maak ’n belofte. “Ek het plegtig belowe om nooit met wellus na ’n meisie te kyk nie”, het die getroue man Job gesê (Job 31:1, Today’s English Version). Hier volg ’n paar ‘plegtige beloftes’ wat jy kan maak:

Ek sal nie die Internet gebruik wanneer ek alleen in ’n vertrek is nie.

Ek sal enige opspringvenstertjie of webwerf met seksueel eksplisiete inhoud onmiddellik toemaak.

Ek sal met ’n geestelike ryp vriend gesels as ek terugval.

Kan jy aan een of twee ander voornemens dink wat jou in die stryd teen pornografie kan help? Indien wel, maak hieronder ’n lys daarvan.

․․․․․

Bid oor die saak. Die psalmis het Jehovah gesmeek: “Wend my oë af, sodat hulle niks sien wat waardeloos is nie” (Psalm 119:37). Jehovah God wil hê dat jy suksesvol moet wees, en hy kan jou die krag gee om te doen wat reg is!—Filippense 4:13.

Praat met iemand. ’n Belangrike stap om met die gewoonte te breek, is om iemand te kies wat jy in jou vertroue kan neem (Spreuke 17:17). Skryf hieronder die naam neer van ’n geestelike ryp persoon met wie jy gemaklik sal voel om oor die saak te praat.

․․․․․

Wees verseker dat jy kan oorwin in jou stryd om weg te bly van pornografie. Om die waarheid te sê, elke keer as jy dit vermy, het jy ’n groot oorwinning behaal. Vertel Jehovah van daardie oorwinning en dank hom vir die krag wat hy jou gegee het. Onthou altyd dat jy Jehovah se hart bly maak as jy die plaag van pornografie vermy!—Spreuke 27:11.

SLEUTELTEKSTE

“Maak dan dood julle liggaamsdele wat op die aarde is ten opsigte van hoerery, onreinheid, geslagsdrif, skadelike begeertes en hebsug, wat afgodediens is.”—Kolossense 3:5.

WENK

Sorg dat jou rekenaar so gestel is dat dit jou nie toegang tot pornografiese webwerwe sal gee nie. Moet ook nie op skakels in ongevraagde e-posboodskappe kliek nie.

HET JY GEWEET . . . ?

’n Obsessie met pornografie is soortgelyk aan die oordrewe beheptheid met seks van die goddelose geeste in Noag se dag.—Genesis 6:2.

AKSIEPLAN!

Om te keer dat ek aan pornografie blootgestel word, sal ek ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Hoe verlaag pornografie iets wat eerbaar is?

● Hoe sou jy jou broer of suster help as hy of sy ’n probleem met pornografie het?

[Lokteks op bladsy 278]

Voordat ek die Bybel bestudeer het, het ek baie geëksperimenteer met byna elke bekende dwelm. Maar van al my verslawings was dit verreweg die moeilikste om van pornografie los te breek. Dis net met Jehovah se hulp dat ek hierdie probleem te bowe kon kom.’’—Jeff

[Prent op bladsy 276]

Pornografie het ’n kumulatiewe uitwerking—hoe meer kere jy daarna kyk, hoe moeiliker is dit om daarvan los te breek