Laat jy Jehovah jou deel wees?

“Hou . . . aan om eers die koninkryk en sy regverdigheid te soek, en al hierdie ander dinge sal vir julle bygevoeg word.”—MATT. 6:33.

1, 2. (a) Wie word voorgestel deur “die Israel van God” wat in Galasiërs 6:16 genoem word? (b) Wie word in Matteus 19:28 deur “die twaalf stamme van Israel” voorgestel?

WAARAAN dink jy wanneer jy die naam Israel in die Bybel lees? Dink jy aan Isak se seun Jakob, wie se naam na Israel verander is? Of dink jy aan sy nakomelinge, die eertydse nasie Israel? Wat van geestelike Israel? Wanneer daar in figuurlike sin na Israel verwys word, is dit gewoonlik van toepassing op “die Israel van God”, die 144 000, wat met heilige gees gesalf is om konings en priesters in die hemel te word (Gal. 6:16; Op. 7:4; 21:12). Maar beskou die spesiale verwysing na Israel se 12 stamme in Matteus 19:28.

² Jesus het gesê: “In die herskepping, wanneer die Seun van die mens op sy glorieryke troon gaan sit, sal ook julle wat my gevolg het, op twaalf trone sit en die twaalf stamme van Israel oordeel.” In hierdie vers is “die twaalf stamme van Israel” dié wat deur Jesus se gesalfde dissipels geoordeel sal word en wat die hoop het om die ewige lewe in die Paradys op aarde te ontvang. Hulle sal by die priesterlike dienste van die 144 000 baat vind.

3, 4. Watter goeie voorbeeld stel getroue gesalfdes?

³ Soos die priesters en Leviete van ouds, beskou die gesalfdes van vandag hulle diens as ’n voorreg (Num. 18:20). Die gesalfdes verwag nie om grond of ’n gebied op die aarde as besitting te ontvang nie. Hulle sien eerder daarna uit om saam met Jesus Christus konings en priesters in die hemel te wees. Hulle sal voortgaan om Jehovah in daardie toewysing te dien, soos getoon word deur wat ons in Openbaring 4:10, 11 lees in verband met die gesalfdes in hulle hemelse posisie.—Eseg. 44:28.

⁴ Terwyl gesalfdes op die aarde is, lewe hulle op ’n manier wat toon dat Jehovah hulle deel is. Hulle voorreg om God te dien, is vir hulle van die allergrootste belang. Hulle beoefen geloof in Christus se losprysofferande en volg hom voortdurend, waardeur hulle ‘hulle roeping en verkiesing verseker’ (2 Pet. 1:10). Hulle persoonlike omstandighede en vermoëns verskil. Maar hulle gebruik nie enige beperking as ’n verskoning om min in God se diens te doen nie. In teenstelling hiermee beskou hulle God se diens as iets baie belangriks en doen hulle soveel as wat hulle kan. En hulle stel ’n goeie voorbeeld vir diegene wat hoop om op ’n paradysaarde te woon.

5. Hoe kan alle Christene Jehovah as hulle deel hê, en waarom is dit moontlik ’n uitdaging?

⁵ Hetsy ons die hemelse of ’n aardse hoop het, ons moet ‘onsself verloën en ons folterpaal opneem en Christus voortdurend volg’ (Matt. 16:24). Miljoene wat na lewe in die Paradys op aarde uitsien, aanbid God en volg Christus op hierdie manier. Hulle is nie daarmee tevrede om net ’n bietjie te doen wanneer hulle voel dat hulle meer kan doen nie. Baie is beweeg om hulle lewe te vereenvoudig en het pioniers geword. Ander kry dit reg om elke jaar ’n paar maande lank te pionier. Nog ander kan dalk nie pionier nie, maar span hulle in die bediening in. Sulke mense is soos die toegewyde Maria, wat welriekende olie oor Jesus uitgegiet het. Hy het gesê: “Sy het ’n goeie daad aan my gedoen. . . . Sy het gedoen wat sy kon” (Mark. 14:6-8). Dit is dalk nie maklik om soveel te doen as wat ons kan nie, want ons lewe in ’n wêreld wat deur Satan oorheers word. Maar ons span ons kragtig in en stel ons vertroue in Jehovah. Kom ons kyk hoe ons dit op vier spesifieke gebiede kan doen.

Soek eers God se Koninkryk

6. (a) Hoe toon die meeste mense dat hulle deel slegs in hierdie lewe is? (b) Waarom is dit beter om Dawid se beskouing te hê?

⁶ Jesus het sy volgelinge geleer om eers die Koninkryk en God se regverdigheid te soek. As “mense van hierdie stelsel van dinge, wie se deel in hierdie lewe is”, is wêreldse mense geneig om persoonlike belange eerste te soek. (Lees Psalm 17:1, 13-15.) Aangesien baie geen agting vir hulle Skepper het nie, wy hulle hulle daaraan om ’n gemaklike bestaan te voer, ’n gesin groot te maak en ’n erfenis na te laat. Hulle deel is slegs in hierdie lewe. Aan die ander kant het Dawid daarin belanggestel om “’n goeie naam” by Jehovah te maak, soos sy seun almal later aangemoedig het om te doen (Pred. 7:1, vtn. in NW). Net soos Asaf, het Dawid gesien dat dit baie beter is om Jehovah as sy Vriend te hê as om sy eie belange die eerste plek in sy lewe te gee. Dit was vir hom ’n vreugde om met God te wandel. In ons tyd het baie Christene geestelike bedrywighede bo hulle sekulêre werk gestel.

7. Hoe is een broer geseën omdat hy die Koninkryk eerste gestel het?

⁷ Beskou die geval van Jean-Claude, in die Sentraal-Afrikaanse Republiek. Hy is ’n getroude ouer man met drie kinders. In daardie land is dit moeilik om werk te vind, en die meeste mense sal byna enigiets doen om hulle werk te behou. Eendag het die produksiebestuurder vir Jean-Claude gesê om saans te begin werk—vanaf 18:30, sewe dae ’n week. Jean-Claude het verduidelik dat hy nie net materieel vir sy gesin moet sorg nie, maar dat hy ook na hulle geestelike welsyn moet omsien. Hy het ook gesê dat hy die verantwoordelikheid het om die gemeente te help. Wat was die bestuurder se reaksie? “As jy gelukkig genoeg is om ’n werk te hê, moet jy van alle ander dinge vergeet, en dit sluit jou vrou, jou kinders en jou probleme in. Jy moet jou lewe aan jou werk wy—aan niks anders as jou werk nie. Kies nou: jou godsdiens of jou werk.” Wat sou jy gedoen het? Wel, Jean-Claude het besef dat God vir hom sal sorg as hy sy werk verloor. Hy sou nog steeds baie hê om in God se diens te doen, en Jehovah sou na sy gesin se materiële behoeftes omsien. Hy het dus die volgende vergadering daardie week bygewoon. Daarna het hy hom gereedgemaak om werk toe te gaan, al het hy nie eers geweet of hy ’n werk sou hê nie. Net toe het hy ’n telefoonoproep gekry. Die bestuurder is afgedank, maar ons broer het nog sy werk gehad.

8, 9. In watter opsig kan ons die priesters en Leviete navolg deur Jehovah as ons deel te hê?

⁸ Party wat al in ’n situasie was waar dit gelyk het asof hulle hulle werk sou verloor, het dalk gewonder: ‘Hoe sal ek my verantwoordelikheid om vir my gesin te sorg, nakom?’ (1 Tim. 5:8). Hetsy jy al voor ’n soortgelyke uitdaging te staan gekom het of nie, jy sal heel moontlik uit eie ondervinding oortuig wees dat jy nooit teleurgesteld sal wees as God jou deel is en jy die voorreg om hom te dien, hoog op prys stel nie. Toe Jesus vir sy dissipels gesê het om eers die koninkryk te soek, het hy hulle verseker: “Al hierdie ander dinge”—soos wat om te eet, te drink of aan te trek—“sal vir julle bygevoeg word”.—Matt. 6:33.

⁹ Dink aan die Leviete, wat nie grond as erfdeel ontvang het nie. Aangesien ware aanbidding vir hulle van die allergrootste belang was, moes hulle vir hulle lewensonderhoud op Jehovah vertrou, wat vir hulle gesê het: “Ek is jou deel” (Num. 18:20). Al dien ons nie soos die priesters en Leviete by ’n letterlike tempel nie, kan ons hulle gees navolg en vertrou dat Jehovah vir ons sal sorg. Ons vertroue in God se krag om vir ons te sorg, word al hoe belangriker namate ons dieper in die laaste dae ingaan.—Op. 13:17.

Soek eers God se regverdigheid

10, 11. Hoe het party op Jehovah vertrou met betrekking tot hulle werk? Gee ’n voorbeeld.

¹⁰ Jesus het sy dissipels ook aangespoor om ‘aan te hou om eers God se regverdigheid te soek’ (Matt. 6:33). Dit beteken dat ’n mens Jehovah se standaard van wat reg en wat verkeerd is, bo die mens se standaarde stel. (Lees Jesaja 55:8, 9.) Jy onthou dalk dat ’n aantal persone in die verlede daarby betrokke was om tabak te kweek of tabakprodukte te verkoop, ander in oorlogvoering op te lei of om oorlogswapens te vervaardig en te verkoop. Nadat hulle die waarheid geleer het, het die meeste van hulle besluit om van werk te verander en aan die vereistes te voldoen om gedoop te word.—Jes. 2:4; 2 Kor. 7:1; Gal. 5:14.

¹¹ Andrew is ’n voorbeeld hiervan. Toe hy en sy vrou van Jehovah geleer het, het hulle besluit om hom te dien. Andrew was baie trots op sy werk, maar het dit verlaat. Waarom? Omdat hy vir ’n nieneutrale organisasie gewerk het en vasbeslote was om God se regverdigheid eerste te stel. Toe Andrew sy werk verlaat het, het hy twee kinders gehad, geen inkomste nie en net genoeg geld vir ’n paar maande. Uit ’n menslike oogpunt het dit moontlik gelyk asof hy geen ‘erfdeel’ het nie. Met vertroue op God het hy werk gesoek. Wanneer hulle terugkyk, kan hy en sy gesin bevestig dat Jehovah se hand nie te kort is nie (Jes. 59:1). Omdat hulle hulle lewe eenvoudig gehou het, kon Andrew en sy vrou selfs die voorreg geniet om in die voltydse diens te wees. “Daar was tye wanneer finansies, behuising, gesondheid en die blote feit dat ons ouer word, ons angstig laat voel het”, sê hy. “Maar Jehovah het ons nog altyd bygestaan. . . . Ons kan sonder enige twyfel sê dat diens aan Jehovah die edelste en lonendste van die mens se strewes is.”a—Pred. 12:13.

12. Watter eienskap is nodig om God se standaarde eerste te stel? Gee plaaslike voorbeelde.

¹² Jesus het vir sy dissipels gesê: “As julle geloof het so groot soos ’n mosterdsaadjie, sal julle vir hierdie berg sê: ‘Gaan weg hiervandaan daarnatoe’, en hy sal weggaan, en niks sal vir julle onmoontlik wees nie” (Matt. 17:20). Sal jy God se standaarde eerste kan stel as dit tot probleme sou lei? As jy nie seker is of jy dit sal kan doen nie, praat met ander lede van die gemeente. Jy sal dit ongetwyfeld geestelik verkwikkend vind om hulle ondervindinge te hoor.

Waardeer Jehovah se geestelike voorsienings

13. Wat kan ons met betrekking tot geestelike voorsienings verwag as ons ons in Jehovah se diens inspan?

¹³ As jy jou voorreg om Jehovah te dien as iets kosbaars beskou, kan jy seker wees dat hy in jou fisiese en geestelike behoeftes sal voorsien, net soos hy aan die Leviete lewensmiddele voorsien het. Dink aan Dawid. Al was hy in ’n grot, kon hy op God staatmaak om vir hom te sorg. Ons kan ook op Jehovah vertrou, al kan ons geen uitweg sien nie. Onthou dat Asaf, toe hy “in die grootse heiligdom van God” ingegaan het, insig gekry het in wat hom gekwel het (Ps. 73:17). So moet ons ons ook tot die goddelike Bron van ons geestelike voedsel wend. Op hierdie manier toon ons waardering vir ons voorreg om God te dien, ongeag ons omstandighede. Sodoende laat ons Jehovah ons deel wees.

14, 15. Hoe moet ons reageer wanneer daar meer lig op sekere tekste gewerp word, en waarom?

¹⁴ Hoe reageer jy wanneer Jehovah, die Bron van geestelike verligting, lig werp op “die diep dinge van God” wat in die Bybel gevind word? (1 Kor. 2:10-13). Ons het ’n uitstekende voorbeeld in die apostel Petrus se reaksie toe Jesus vir Sy toehoorders gesê het: “Tensy julle die vlees van die Seun van die mens eet en sy bloed drink, het julle geen lewe in julleself nie.” Baie dissipels het hierdie woorde letterlik opgeneem en gesê: “Hierdie woord is skokkend; wie kan daarna luister?” Hulle het “teruggegaan na die dinge wat hulle agtergelaat het”. Maar Petrus het gesê: “Here, na wie toe sal ons weggaan? U het woorde van die ewige lewe.”—Joh. 6:53, 60, 66, 68.

¹⁵ Petrus het nie ten volle verstaan wat Jesus bedoel het toe hy gesê het dat hulle Sy vlees moet eet en Sy bloed moet drink nie. Maar die apostel het op God vertrou vir geestelike verligting. Probeer jy, wanneer geestelike lig op ’n saak helderder word, die onderliggende skriftuurlike redes vir die aanpassing verstaan? (Spr. 4:18). Die eerste-eeuse Bereane het die woord “met die grootste gretigheid van verstand ontvang en die Skrif elke dag sorgvuldig ondersoek” (Hand. 17:11). As jy hulle navolg, sal jy groter waardering hê vir jou voorreg om Jehovah te dien, om hom as jou deel te hê.

Trou net in die Here

16. Hoe kan God ons deel wees met betrekking tot die opdrag in 1 Korintiërs 7:39?

¹⁶ ’n Ander gebied waarop Christene God se voornemens in gedagte moet hou, is die toepassing van die Bybel se raad om “net in die Here” te trou (1 Kor. 7:39). Baie het gekies om ongetroud te bly eerder as om hierdie goddelike raad te verontagsaam. God neem sulke persone liefdevol in. Wat het Dawid gedoen toe hy eensaam gevoel het en blykbaar geen hulp gehad het nie? “Voor [God] het ek my besorgdheid bly uitstort”, het hy gesê. “Voor hom het ek van my benoudheid bly vertel, toe my gees in my versmag het” (Ps. 142:1-3). Die profeet Jeremia, wat God dekades lank getrou gedien het as ’n ongetroude persoon, het dalk soortgelyke gevoelens ondervind. Jy kan sy voorbeeld bestudeer, wat bespreek word in hoofstuk 8 van die boek God se woord vir ons deur Jeremia.

17. Hoe bied een ongetroude suster tye van eensaamheid die hoof?

¹⁷ “Ek het nooit doelbewus besluit om ongetroud te bly nie”, sê ’n suster in die Verenigde State. “Ek sal graag trou as ek die regte persoon ontmoet. My ongelowige ma het my probeer oorreed om met sommer enigiemand te trou. Ek het haar gevra of sy daarvoor verantwoordelik gehou wil word as my huwelik misluk. Sy het mettertyd gesien dat ek ’n vaste werk het, vir myself sorg en gelukkig is. Sy het opgehou om druk op my uit te oefen.” Hierdie suster voel soms ’n bietjie eensaam. “Dan”, sê sy, “probeer ek groter vertroue in Jehovah stel. Hy laat my nooit in die steek nie.” Wat het haar gehelp om op Jehovah te vertrou? “Gebed help my om te besef dat God werklik is en dat ek nooit alleen is nie. Die Allerhoogste van die heelal luister; hoe kan ek dan anders as om waardig en vreugdevol te voel?” Sy is vol vertroue dat ‘dit groter geluk verskaf om te gee as om te ontvang’ en sê: “Ek probeer om van myself te gee om ander te help, sonder om enigiets terug te verwag. Wanneer ek dink: ‘Wat kan ek doen om hierdie persoon te help?’ ervaar ek innerlike vreugde” (Hand. 20:35). Ja, Jehovah is haar deel, en sy geniet haar voorreg om hom te dien.

18. In watter opsig kan Jehovah jou sy deel laat wees?

¹⁸ Ongeag in watter situasie jy jou bevind, jy kan God jou deel laat wees. As jy dit doen, sal jy ’n deel van sy gelukkige volk wees (2 Kor. 6:16, 17). Dit kan daartoe lei dat jy Jehovah se deel is, soos in die verlede met ander die geval was. (Lees Deuteronomium 32:9, 10.) Net soos Israel God se deel onder die nasies geword het, kan hy jou as sy eiendom identifiseer en sal hy liefdevol vir jou sorg.—Ps. 17:8.

[Voetnoot]

Hoe sal jy antwoord?

Hoe kan jy Jehovah jou deel laat wees

• deur eers God se Koninkryk en sy regverdigheid te soek?

• deur waardering vir geestelike voedsel te toon?

• deur gehoorsaam te wees aan God se opdrag om net in die Here te trou?

[Lokteks op bladsy 13]

Jehovah word ons deel wanneer ons sy diens as van die allergrootste belang beskou

[Prent op bladsy 15]

Jeremia se voorbeeld is aanmoedigend