Kan jy aan die wonderwerke glo wat in die Bybel opgeteken is?

AS IEMAND vir jou ’n merkwaardige verhaal vertel, sal die geloofwaardigheid van daardie persoon tog sekerlik bepaal of jy dit sal glo of nie, nie waar nie? Sy geloofwaardigheid sal nie net afhang van hoe hy die verhaal vertel nie, maar ook of hy daarvoor bekend is dat hy die waarheid praat. As hy immers oor die jare nog altyd die waarheid gepraat het en nooit opsetlik vir jou gejok het nie, sal jy goeie rede hê om te glo wat hy jou nou vertel.

Dit is ook waar van die wonderwerke wat in die Bybel opgeteken is. Nie een van ons het gelewe toe daardie gebeure plaasgevind het nie. Maar ons kan vasstel of die Bybel se verhaal geloofwaardig is—of dit die waarheid is. Hoe? Hier is ’n paar faktore wat tot die geloofwaardigheid van Bybelverslae oor wonderwerke bydra.

Baie wonderwerke is in openbare plekke verrig. Soms het duisende, selfs miljoene, dit gesien (Eksodus 14:21-31; 19:16-19). Dit is nie in die geheim verrig waar mense dit nie kon sien nie.

Die wonderwerke is gekenmerk deur eenvoud. Daar was nie spesiale rekwisiete, groot vertoon of ligeffekte nie. In die meeste gevalle het die wonderwerke wat in die Bybel opgeteken is na aanleiding van toevallige ontmoetings en versoeke van mense plaasgevind (Markus 5:25-29; Lukas 7:11-16). In sulke gevalle kon die gebeure nie vooraf beplan gewees het deur die een wat die wonderwerk verrig het nie.

Die beweegrede van diegene wat die wonderwerke verrig het, was nie om roem, glorie en rykdom te verkry nie. Dit was eerder om God te verheerlik (Johannes 11:1-4, 15, 40). Enige poging om sulke wonderdadige vermoëns te gebruik om ryk te word, is veroordeel.—2 Konings 5:15, 16, 20, 25-27; Handelinge 8:18-23.

Die verskeidenheid wonderwerke wat in die Bybel opgeteken is, toon dat dit nie bloot die werk van mense kon gewees het nie. Byvoorbeeld, die see en wind is tot bedaring gebring, water is in wyn verander, reënval is beheer, siekes is genees en die sig van blindes is herstel. Al hierdie wonderwerke en talle ander toon dat ’n bomenslike mag wat beheer oor alle vorme van materie kan uitoefen, vir hierdie wonderwerke verantwoordelik was.—1 Konings 17:1-7; 18:41-45; Matteus 8:24-27; Lukas 17:11-19; Johannes 2:1-11; 9:1-7.

Teenstanders wat die wonderwerke gesien het, het nie die feit dat dit plaasgevind het, bevraagteken nie. Toe Jesus sy vriend Lasarus opgewek het, het Jesus se godsdiensvyande nie die feit dat Lasarus dood was, bevraagteken nie. Hoe kon hulle? Lasarus was vier dae lank in die graf (Johannes 11:45-48; 12:9-11). Selfs eeue ná Jesus se dood het die skrywers van die Joodse Talmoed nog steeds erken dat Jesus wonderdadige vermoëns gehad het. Hulle het slegs die bron van daardie vermoëns bevraagteken. So ook is Jesus se dissipels, toe hulle voor ’n Joodse hof gebring is, nie gevra “Het julle ’n wonderwerk verrig?” nie. Hulle is eerder gevra: “Deur watter krag of in wie se naam het julle dit gedoen?”—Handelinge 4:1-13.

Kan jy dus glo wat die Bybel vir ons oor wonderwerke sê? Uit wat ons so pas bespreek het, is dit duidelik dat Bybelverslae oor wonderwerke die kenmerke van geloofwaardigheid het. Daar is ook ander redes waarom ons hierdie Bybelverslae kan vertrou. Byvoorbeeld, wanneer die Bybel van ’n gebeurtenis vertel, voorsien dit dikwels die tyd, plek en name van die mense wat betrokke was. Selfs Bybelkritici is verbaas oor die akkuraatheid van die geskiedkundige besonderhede in die Bybel. Honderde Bybelprofesieë is al tot in die fynste besonderheid vervul. Daarbenewens bevat die Bybel baie raad oor hoe om gelukkige menseverhoudings te hê—raad wat mense van alle ouderdomme en agtergronde al gehelp het. Wat menseverhoudings betref, is die raad wat in die Bybel gevind word sonder gelyke.

As jy die Bybel nog nie ten volle vertrou nie, neem gerus die tyd om dit deegliker te ondersoek. Hoe meer jy daarvan leer, hoe meer sal jy dit vertrou (Johannes 17:17). Jy sal besef dat jy kan vertrou wat dit sê oor die wonderwerke wat in die verlede plaasgevind het. Wanneer jy eers daardie verslae glo, sal jy ’n goeie grondslag hê om vertroue te stel in wat die Bybel sê in die nabye toekoms sal gebeur.

[Prent op bladsy 7]

Jesus se teenstanders het nie die feit dat Lasarus dood was, bevraagteken nie

Wonderwerke wat binnekort gaan plaasvind

HOE sou jy voel as jy uitvind dat ’n chirurg wat ’n ingewikkelde operasie op jou moet uitvoer, nog nooit hierdie tipe prosedure gedoen het nie? Jy sou ongetwyfeld besorg wees. Maar sê nou jy vind uit dat hierdie dokter die beste chirurg in sy veld is en dat hy al honderde soortgelyke operasies suksesvol uitgevoer het? Sou jy nie baie meer vertroue hê dat hy jou kan help nie?

Die siek wêreld waarin ons vandag lewe, het ingrypende “chirurgie” nodig. Deur sy Woord, die Bybel, het Jehovah God belowe dat hy die Paradys op hierdie aarde sal herstel (2 Petrus 3:13). Maar voordat dit kan plaasvind, moet goddeloosheid eers verwyder, heeltemal weggesny, word (Psalm 37:9-11; Spreuke 2:21, 22). Al die droewige toestande wat ons om ons sien, moet heeltemal verwyder word voordat ’n paradys weer tot stand gebring kan word. Dit sal sonder twyfel ’n wonderwerk verg om dit te laat gebeur!—Openbaring 21:4, 5.

Jehovah se Getuies glo dat hierdie drastiese veranderinge binnekort sal plaasvind. Waarom? Want die wonderwerke wat Jehovah God reeds verrig het, bewys dat hy die mag het om sy beloftes te vervul. Vergelyk slegs ses van die wonderwerke wat in die Bybel opgeteken is met die beloftes wat dit in verband met die toekoms maak.

Mag jy aanhou om oor die Bybel se beloftes in verband met ons toekoms te leer. Namate jou geloof toeneem, sal jou hoop ook sterker word—’n hoop om in ’n tyd te lewe wanneer jy persoonlik sal baat vind by die wonderwerke wat Jehovah verrig.

[Venster/Prente op bladsye 9, 10]

WONDERWERK:

JESUS HET DUISENDE MENSE MET ’N PAAR BRODE EN VISSE GEVOED.—MATTEUS 14:13-21; MARKUS 8:1-9; JOHANNES 6:1-14.

BELOFTE:

“Die aarde sal beslis sy opbrengs lewer; God, ons God, sal ons seën.”—PSALM 67:6.

WAT DIT VIR ONS BETEKEN:

NIEMAND SAL OOIT WEER HONGER LY NIE.

WONDERWERK:

JESUS HET DIE BLINDES LAAT SIEN.—MATTEUS 9:27-31; MARKUS 8:22-26.

BELOFTE:

“Die oë van die blindes [sal] geopen word.”—JESAJA 35:5.

WAT DIT VIR ONS BETEKEN:

ALLE BLINDES SAL WEER KAN SIEN.

WONDERWERK:

JESUS HET DIE GESTREMDES GENEES.—MATTEUS 11:5, 6; JOHANNES 5:3-9.

BELOFTE:

“Die kreupele [sal] net soos ’n takbok klim.”—JESAJA 35:6.

WAT DIT VIR ONS BETEKEN:

ALLE LIGGAAMSGEBREKE SAL GENEES WORD.

WONDERWERK:

JESUS HET VERSKEIE SIEKTES GENEES.—MARKUS 1:32-34; LUKAS 4:40.

BELOFTE:

“Geen inwoner sal sê: ‘Ek is siek’ nie.”—JESAJA 33:24.

WAT DIT VIR ONS BETEKEN:

ALLE AFTAKELENDE SIEKTES SAL GENEES WORD. ONS SAL VOLMAAKTE GESONDHEID GENIET.

WONDERWERK:

JESUS HET DIE ELEMENTE BEHEER.—MATTEUS 8:23-27; LUKAS 8:22-25.

BELOFTE:

“Hulle sal beslis huise bou en dit bewoon; en hulle sal beslis wingerde plant en die vrug daarvan eet. Hulle sal nie verniet swoeg nie.”—JESAJA 65:21, 23.

“Jy sal ver wees van onderdrukking—want jy sal niemand vrees nie—en van enigiets skrikwekkends, want dit sal nie naby jou kom nie.”—JESAJA 54:14.

WAT DIT VIR ONS BETEKEN:

NATUURRAMPE SAL IETS VAN DIE VERLEDE WEES.

WONDERWERK:

JESUS HET DIE DOOIES OPGEWEK.—MATTEUS 9:18-26; LUKAS 7:11-17.

BELOFTE:

“Almal wat in die gedenkgrafte is, . . . sal uitkom.”—JOHANNES 5:28, 29.

“Die see het die dooies daarin gegee, en die dood en Hades het die dooies in hulle gegee.”—OPENBARING 20:13.

WAT DIT VIR ONS BETEKEN:

ONS GELIEFDES WAT GESTERF HET, SAL OPGEWEK WORD.