1. Wat is God se voorneme met die aarde?

GOD se voorneme met die aarde is werklik wonderlik. Jehovah wil hê dat die aarde vol gelukkige, gesonde mense moet wees. Die Bybel sê dat “God ’n tuin in Eden geplant” het en dat hy “allerhande bome, begeerlik om te sien en goed vir voedsel, . . . laat groei” het. Nadat God die eerste man en vrou, Adam en Eva, geskep het, het Hy hulle in daardie lieflike tuiste gesit en vir hulle gesê: “Wees vrugbaar en word baie en vul die aarde en onderwerp dit” (Genesis 1:28; 2:8, 9, 15). Dit was dus God se voorneme dat mense kinders moes hê, die grense van daardie tuintuiste oor die hele aarde moes uitbrei en vir die diere moes sorg.

2. (a) Hoe weet ons dat God se voorneme met die aarde vervul sal word? (b) Wat sê die Bybel oor ewige lewe vir die mens?

² Dink jy dat Jehovah God se voorneme dat mense in ’n aardse paradys moet lewe, ooit verwesenlik sal word? “Ek het dit gespreek”, sê God, “ek sal dit ook doen” (Jesaja 46:9-11; 55:11). Ja, wat God hom voorgeneem het, sal hy beslis doen! Hy sê dat hy die aarde “nie verniet geskep het nie”, maar dat hy “dit gevorm het om bewoon te word” (Jesaja 45:18). Watter soort mense wou God hê moes op die aarde lewe? En hoe lank wou hy hê moes hulle hier lewe? Die Bybel antwoord: “Die regverdiges sal die aarde besit, en hulle sal vir ewig daarop woon.”—Psalm 37:29; Openbaring 21:3, 4.

3. Watter droewige toestande heers vandag op die aarde, en watter vrae laat dit ontstaan?

³ Dit het natuurlik nog nie gebeur nie. Mense word vandag siek en gaan dood; hulle baklei selfs en maak mekaar dood. Iets het verkeerd geloop. Maar God se voorneme was tog sekerlik nie dat die aarde moet wees soos dit vandag is nie! Wat het dan gebeur? Waarom is God se voorneme nie vervul nie? Geen geskiedenisboek wat deur die mens geskryf is, kan ons die antwoord gee nie, want die moeilikheid het in die hemel begin.

DIE OORSPRONG VAN ’N VYAND

4, 5. (a) Wie het in werklikheid deur middel van ’n slang met Eva gepraat? (b) Hoe kan iemand wat voorheen ordentlik en eerlik was, ’n dief word?

⁴ Die eerste boek van die Bybel vertel van ’n teenstander van God wat sy opwagting in die tuin van Eden gemaak het. Hy word as “die slang” beskryf, maar hy was nie ’n blote dier nie. Die laaste boek van die Bybel identifiseer hom as “die een wat Duiwel en Satan genoem word, wat die hele bewoonde aarde mislei”. Hy word ook “die oorspronklike slang” genoem (Genesis 3:1; Openbaring 12:9). Hierdie magtige engel, of onsigbare geesskepsel, het ’n slang gebruik om met Eva te praat, net soos ’n geoefende persoon dit kan laat klink asof sy stem uit ’n pop kom. Daardie geespersoon was ongetwyfeld teenwoordig toe God die aarde vir die mens voorberei het.—Job 38:4, 7.

⁵ Maar wie het hierdie “Duiwel”, hierdie “Satan”, gemaak, aangesien alles wat Jehovah geskep het, volmaak is? Eenvoudig gestel, een van die magtige geesseuns van God het homself in die Duiwel verander. Hoe was dit moontlik? Wel, vandag kan iemand wat voorheen ordentlik en eerlik was, ’n dief word. Hoe gebeur dit? Hy laat moontlik toe dat ’n verkeerde begeerte in sy hart ontwikkel. As hy aanhou om daaroor te dink, kan daardie slegte begeerte baie sterk word. Wanneer hy die geleentheid kry, sal hy dalk die slegte dinge doen waaroor hy gedink het.—Jakobus 1:13-15.

6. Hoe het ’n magtige geesseun van God Satan die Duiwel geword?

⁶ Dit het in die geval van Satan die Duiwel gebeur. Hy het blykbaar gehoor hoe God vir Adam en Eva sê om kinders te hê en om die aarde met hulle nageslag te vul (Genesis 1:27, 28). ‘Al hierdie mense kan mos eerder vir mý aanbid as vir God!’ het Satan blykbaar gedink. Só het ’n verkeerde begeerte in sy hart ontwikkel. Uiteindelik het hy opgetree en vir Eva bedrieg deur vir haar leuens oor God te vertel (Genesis 3:1-5). Sodoende het hy ’n “Duiwel” geword, wat “Lasteraar” beteken. Terselfdertyd het hy “Satan” geword, wat “Teenstander” beteken.

7. (a) Waarom het Adam en Eva gesterf? (b) Waarom word al Adam se nakomelinge oud en sterf hulle?

⁷ Deur middel van leuens en bedrog het Satan die Duiwel Adam en Eva sover gekry om aan God ongehoorsaam te wees (Genesis 2:17; 3:6). As gevolg daarvan het hulle uiteindelik gesterf, net soos God gesê het sou gebeur as hulle ongehoorsaam was (Genesis 3:17-19). Aangesien Adam onvolmaak geword het toe hy gesondig het, het al sy nakomelinge sonde van hom geërf (Romeine 5:12). Die situasie kan toegelig word met ’n pan waarin ’n mens brood bak. As daar ’n duik in die pan is, hoe lyk elke brood wat daarin gebak word? Elke brood het ook ’n duik, of onvolmaaktheid, daarin. So ook het elke mens ’n “duik” van onvolmaaktheid van Adam geërf. Dit is waarom alle mense oud word en sterf.—Romeine 3:23.

8, 9. (a) Watter uitdaging het Satan blykbaar geopper? (b) Waarom het God die opstandelinge nie onmiddellik vernietig nie?

⁸ Toe Satan vir Adam en Eva in ’n weg van sonde teen God gelei het, het hy eintlik ’n opstand gelei. Hy het die manier waarop Jehovah regeer, teëgestaan. Satan het in werklikheid gesê: ‘God is ’n slegte heerser. Hy vertel leuens en weerhou goeie dinge van sy onderdane. Mense het God nie nodig om oor hulle te regeer nie. Hulle kan self besluit wat goed en wat sleg is. En hulle sal beter af wees onder my heerskappy.’ Hoe sou God so ’n beledigende uitdaging hanteer? Party mense dink dat God die opstandelinge eenvoudig moes doodgemaak het. Maar sou dit ’n antwoord op Satan se uitdaging voorsien het? Sou dit bewys het dat God se manier van regeer reg is?

⁹ Jehovah se volmaakte sin vir geregtigheid het hom daarvan weerhou om die opstandelinge op die plek dood te maak. Hy het besluit dat tyd nodig was om ’n bevredigende antwoord op Satan se uitdaging te voorsien en om te bewys dat die Duiwel ’n leuenaar is. Daarom het God besluit dat hy mense sou toelaat om hulleself ’n tyd lank onder Satan se invloed te regeer. Waarom Jehovah dit gedoen het en waarom hy toegelaat het dat soveel tyd verbygaan voordat hy hierdie geskille oplos, sal in Hoofstuk 11 van hierdie boek bespreek word. Maar dit is nou goed om hieroor na te dink: Was dit reg van Adam en Eva om Satan te glo, wat nog nooit vir hulle iets goeds gedoen het nie? Was dit reg van hulle om te glo dat Jehovah, wat hulle alles gegee het wat hulle gehad het, ’n wrede leuenaar is? Wat sou jy gedoen het?

10. Hoe kan jy Jehovah se kant ondersteun en ’n antwoord op Satan se uitdaging voorsien?

¹⁰ Dit is goed om oor hierdie vrae na te dink, want elkeen van ons staan vandag voor soortgelyke geskille. Ja, jy het die geleentheid om Jehovah se kant te ondersteun en ’n antwoord op Satan se uitdaging te voorsien. Jy kan Jehovah as jou Heerser aanvaar en help om te toon dat Satan ’n leuenaar is (Psalm 73:28; Spreuke 27:11). Ongelukkig is daar maar min onder die miljarde mense in hierdie wêreld wat kies om dit te doen. Dit laat ’n belangrike vraag ontstaan: Leer die Bybel werklik dat Satan oor hierdie wêreld heers?

WIE HEERS OOR HIERDIE WÊRELD?

11, 12. (a) Hoe openbaar ’n versoeking van Jesus dat Satan die heerser van hierdie wêreld is? (b) Wat anders bewys dat Satan die heerser van hierdie wêreld is?

¹¹ Jesus het nooit daaraan getwyfel dat Satan die heerser van hierdie wêreld is nie. Op die een of ander wonderdadige manier het Satan eenkeer vir Jesus “al die koninkryke van die wêreld en hulle heerlikheid” gewys. Satan het Jesus toe belowe: “Al hierdie dinge sal ek jou gee as jy neerval en ’n daad van aanbidding teenoor my verrig” (Matteus 4:8, 9; Lukas 4:5, 6). Dink net daaraan. Sou daardie aanbod vir Jesus ’n versoeking gewees het as Satan nie die heerser van daardie koninkryke was nie? Jesus het nie gesê dat al daardie wêreldse regerings nie aan Satan behoort het nie. Jesus sou dit tog sekerlik gedoen het as Satan nie die mag daaragter was nie.

¹² Jehovah is natuurlik die almagtige God, die Skepper van die wonderlike heelal (Openbaring 4:11). Maar die Bybel sê nêrens dat Jehovah God of Jesus Christus die heerser van hierdie wêreld is nie. Trouens, Jesus het spesifiek na Satan verwys as “die heerser van hierdie wêreld” (Johannes 12:31; 14:30; 16:11). Die Bybel noem Satan die Duiwel selfs “die god van hierdie stelsel van dinge” (2 Korintiërs 4:3, 4). Van hierdie teenstander, of Satan, het die Christenapostel Johannes geskryf: “Die hele wêreld lê in die mag van die bose.”—1 Johannes 5:19.

HOE SATAN SE WÊRELD VERNIETIG SAL WORD

13. Waarom is ’n nuwe wêreld nodig?

¹³ Met elke jaar wat verbygaan, word die wêreld al hoe gevaarliker. Oral sien jy strydende leërs, oneerlike politici, skynheilige godsdiensleiers en geharde misdadigers. Die wêreld in sy geheel kan nie meer hervorm word nie. Die Bybel openbaar dat die tyd naby is wanneer God die goddelose wêreld tydens sy oorlog van Armageddon sal vernietig. Dit sal die weg baan vir ’n regverdige nuwe wêreld.—Openbaring 16:14-16.

14. Wie het God gekies om die Heerser van Sy Koninkryk te wees, en hoe is dit voorspel?

¹⁴ Jehovah God het Jesus Christus gekies om die Heerser van Sy hemelse Koninkryk, of regering, te wees. Die Bybel het lank gelede voorspel: “’n Kind is vir ons gebore, ’n seun is vir ons gegee; en die vorstelike heerskappy sal op sy skouer wees. En hy sal genoem word: . . . Vredevors. Aan die oorvloed van die vorstelike heerskappy en aan vrede sal daar geen einde wees nie” (Jesaja 9:6, 7). Aangaande hierdie regering het Jesus sy volgelinge geleer bid: “Laat u koninkryk kom. Laat u wil geskied, soos in die hemel, so ook op die aarde” (Matteus 6:10). Soos ons later in hierdie boek sal sien, sal al die regerings van hierdie wêreld binnekort deur God se Koninkryk vernietig word, en dit sal hulle almal vervang (Daniël 2:44). Dan sal God se Koninkryk ’n aardse paradys tot stand bring.

’N NUWE WÊRELD IS OP HANDE!

15. Wat is die “nuwe aarde”?

¹⁵ Die Bybel verseker ons: “Daar is nuwe hemele en ’n nuwe aarde wat ons volgens [God se] belofte verwag, en daarin sal regverdigheid woon” (2 Petrus 3:13; Jesaja 65:17). Wanneer die Bybel van “die aarde” praat, bedoel dit soms die mense wat op die aarde lewe (Genesis 11:1). Die regverdige “nuwe aarde” is dus ’n gemeenskap van mense wat God se goedkeuring wegdra.

16. Watter kosbare gawe sal God aan diegene gee wat sy goedkeuring wegdra, en wat moet ons doen om dit te ontvang?

¹⁶ Jesus het belowe dat diegene wat deur God goedgekeur word, in die komende nuwe wêreld die “ewige lewe” sal verkry (Markus 10:30). Slaan asseblief Johannes 3:16 en 17:3 in jou Bybel na, en lees wat Jesus gesê het ons moet doen as ons die ewige lewe wil verkry. Kyk nou in die Bybel watter seëninge diegene sal geniet wat aan die vereistes voldoen om hierdie wonderlike gawe van God in die komende aardse Paradys te ontvang.

17, 18. Hoe kan ons seker wees dat daar oral op die aarde vrede en veiligheid sal wees?

¹⁷ Goddeloosheid, oorlog, misdaad en geweld sal nie meer bestaan nie. “Die goddelose sal daar nie meer wees nie . . . Maar die sagmoediges sal die aarde besit” (Psalm 37:10, 11). Daar sal vrede wees, want ‘God sal oorloë laat ophou tot aan die eindes van die aarde’ (Psalm 46:9; Jesaja 2:4). Dan “sal die regverdige bloei, en die oorvloed van vrede totdat die maan nie meer is nie”—en dit beteken vir ewig!—Psalm 72:7.

¹⁸ Aanbidders van Jehovah sal in veiligheid lewe. Solank die Israeliete in Bybeltye aan God gehoorsaam was, het hulle in veiligheid gelewe (Levitikus 25:18, 19). Hoe wonderlik sal dit tog wees om dieselfde soort veiligheid in die Paradys te geniet!—Jesaja 32:18; Miga 4:4.

19. Waarom weet ons dat daar volop kos in God se nuwe wêreld sal wees?

¹⁹ Daar sal geen voedseltekorte wees nie. “Daar sal volop graan op die aarde wees”, het die psalmis gesing. “Op die top van die berge sal daar ’n oorvloed wees” (Psalm 72:16). Jehovah God sal sy regverdige knegte seën, en “die aarde sal beslis sy opbrengs lewer”.—Psalm 67:6.

20. Waarom kan ons seker wees dat die hele aarde ’n paradys sal word?

²⁰ Die hele aarde sal ’n paradys word. Lieflike nuwe huise en tuine sal op grond staan wat vroeër deur sondige mense verniel is (Jesaja 65:21-24; Openbaring 11:18). Mettertyd sal dele van die aarde wat reeds onderwerp is, uitbrei totdat die hele aarde so pragtig en vrugbaar is soos die tuin van Eden. En God sal nooit nalaat om ‘sy hand oop te maak en die begeerte van alles wat lewe, te bevredig’ nie.—Psalm 145:16.

21. Wat wys dat daar vrede tussen mense en diere sal wees?

²¹ Daar sal vrede tussen mense en diere wees. Wilde en mak diere sal saam wei. Selfs ’n klein kindjie sal glad nie bang hoef te wees vir diere wat nou gevaarlik is nie.—Jesaja 11:6-9; 65:25.

22. Wat sal van siekte word?

²² Siekte sal verdwyn. As die Heerser van God se hemelse Koninkryk, sal Jesus mense op ’n veel groter skaal genees as toe hy op die aarde was (Matteus 9:35; Markus 1:40-42; Johannes 5:5-9). Dan sal “geen inwoner . . . sê: ‘Ek is siek’ nie”.—Jesaja 33:24; 35:5, 6.

23. Waarom sal die opstanding ons harte bly maak?

²³ Geliefdes wat gesterf het, sal opgewek word met die vooruitsig om nooit dood te gaan nie. Almal wat nou in die dood slaap en in God se geheue is, sal weer lewend gemaak word. Trouens, “daar [sal] ’n opstanding van die regverdiges sowel as die onregverdiges . . . wees”.—Handelinge 24:15; Johannes 5:28, 29.

24. Hoe voel jy daaroor om in die Paradys op die aarde te lewe?

²⁴ Wat ’n wonderlike toekoms wag daar tog op diegene wat kies om van ons Grootse Skepper, Jehovah God, te leer en om hom te dien! Jesus het na die komende Paradys op die aarde verwys toe hy hierdie belofte gemaak het aan die kwaaddoener wat langs hom gesterf het: “Jy sal saam met my in die Paradys wees” (Lukas 23:43). Dit is noodsaaklik dat ons meer van Jesus Christus leer, die een deur wie al hierdie seëninge moontlik gemaak sal word.

1. Watter beroemde gebed gaan nou bespreek word?

MILJOENE mense regoor die wêreld ken die gebed wat baie die Onse Vader, of die Gebed van die Here, noem. Albei uitdrukkings verwys na ’n beroemde gebed wat Jesus Christus self as ’n model gegee het. Dit is ’n baie betekenisvolle gebed, en ’n bespreking van die eerste drie versoeke daarin sal jou help om meer uit te vind omtrent wat die Bybel werklik leer.

2. Wat is drie van die dinge waarvoor Jesus sy dissipels leer bid het?

² Aan die begin van hierdie modelgebed het Jesus vir sy toehoorders gesê: “Julle moet dan só bid: ‘Ons Vader in die hemele, laat u naam geheilig word. Laat u koninkryk kom. Laat u wil geskied, soos in die hemel, so ook op die aarde’” (Matteus 6:9-13). Wat beteken hierdie drie versoeke?

3. Wat moet ons van God se Koninkryk weet?

³ Ons het al baie oor God se naam, Jehovah, geleer. En ons het God se wil in sekere mate bespreek—wat hy vir die mensdom gedoen het en nog gaan doen. Maar waarna het Jesus verwys toe hy vir ons gesê het om te bid: “Laat u koninkryk kom”? Wat is God se Koninkryk? Hoe sal die koms daarvan God se naam heilig? En hoe hou die koms van die Koninkryk verband met die uitvoering van God se wil?

WAT GOD SE KONINKRYK IS

4. Wat is God se Koninkryk, en wie is die Koning daarvan?

⁴ God se Koninkryk is ’n regering wat deur Jehovah God opgerig is, met ’n Koning wat deur God gekies is. Wie is die Koning van God se Koninkryk? Jesus Christus. As Koning is Jesus groter as alle menseheersers, en hy word “die Koning van dié wat as konings heers en Here van dié wat as here heers”, genoem (1 Timoteus 6:15). Hy het die mag om in baie groter mate goed te doen as enige menseheerser, selfs die beste onder hulle.

5. Waarvandaan regeer God se Koninkryk, en waaroor?

⁵ Waarvandaan sal God se Koninkryk regeer? Wel, waar is Jesus? Jy sal onthou dat jy geleer het dat hy aan ’n folterpaal tereggestel en toe opgewek is. Kort daarna het hy na die hemel opgevaar (Handelinge 2:33). Dít is dus waar God se Koninkryk is—in die hemel. Daarom noem die Bybel dit ’n “hemelse koninkryk” (2 Timoteus 4:18). Al is God se Koninkryk in die hemel, sal dit oor die aarde regeer.—Openbaring 11:15.

6, 7. Wat maak Jesus ’n besondere Koning?

⁶ Wat maak Jesus ’n besondere Koning? Om maar een ding te noem, hy sal nooit sterf nie. Waar die Bybel Jesus met mensekonings vergelyk, noem dit hom die een “wat alleen onsterflikheid het, wat in ontoeganklike lig woon” (1 Timoteus 6:16). Dit beteken dat die goeie dinge wat Jesus tot stand bring, nooit tot niet sal gaan nie. En hy sal groot en goeie dinge doen.

⁷ Dink aan hierdie Bybelprofesie oor Jesus: “Op hom sal die gees van Jehovah rus, die gees van wysheid en van begrip, die gees van raad en van mag, die gees van kennis en van die vrees van Jehovah; en hy sal vreugde vind in die vrees van Jehovah. En hy sal nie oordeel net volgens wat sy oë sien nie, en ook nie teregwys net volgens wat sy ore hoor nie. En met regverdigheid sal hy die geringes oordeel, en met billikheid sal hy teregwysing gee ten behoewe van die sagmoediges van die aarde” (Jesaja 11:2-4). Hierdie woorde toon dat Jesus ’n regverdige en medelydende Koning oor mense op die aarde sal wees. Sou jy so ’n heerser wou hê?

8. Wie sal saam met Jesus regeer?

⁸ Hier is nog ’n waarheid oor God se Koninkryk: Jesus sal nie alleen regeer nie. Hy sal medeheersers hê. Die apostel Paulus het byvoorbeeld vir Timoteus gesê: “As ons volhard, sal ons ook saam as konings heers” (2 Timoteus 2:12). Ja, Paulus, Timoteus en ander getroues wat deur God gekies is, sal saam met Jesus in die hemelse Koninkryk regeer. Hoeveel sal daardie voorreg hê?

9. Hoeveel sal saam met Jesus regeer, en wanneer het God hulle begin kies?

⁹ Soos jy in Hoofstuk 7 van hierdie boek geleer het, is die apostel Johannes ’n visioen gegee waarin hy gesien het dat ‘die Lam [Jesus Christus] op die berg Sion [sy koninklike posisie in die hemel] staan, en saam met hom honderd-vier-en-veertigduisend met sy naam en die naam van sy Vader op hulle voorkoppe geskrywe’. Wie is hierdie 144 000? Johannes sê self vir ons: “Dit is hulle wat die Lam bly volg ongeag waar hy gaan. Hulle is uit die mensdom gekoop as eerstelinge vir God en vir die Lam” (Openbaring 14:1, 4). Ja, hulle is getroue volgelinge van Jesus Christus wat spesiaal gekies is om in die hemel saam met hom te regeer. Nadat hulle uit die dode tot hemelse lewe opgewek is, gaan hulle saam met Jesus “as konings oor die aarde heers” (Openbaring 5:10). Van die dae van die apostels af het God getroue Christene gekies om die getal 144 000 vol te maak.

10. Waarom is dit ’n liefdevolle reëling dat Jesus en die 144 000 oor die mensdom gaan regeer?

¹⁰ Dit is ’n baie liefdevolle reëling dat Jesus en die 144 000 oor die mensdom gaan regeer. Om maar een ding te noem, Jesus weet wat dit beteken om ’n mens te wees en te ly. Paulus het gesê dat Jesus “nie iemand [is] wat nie met ons swakhede kan simpatiseer nie, maar iemand wat in alle opsigte soos ons op die proef gestel is, maar sonder sonde” (Hebreërs 4:15; 5:8). Sy medeheersers het ook as mense gely en volhard. Wat meer is, hulle het teen onvolmaaktheid gestry en allerhande soorte siektes verduur. Hulle sal beslis die probleme verstaan waarmee mense te kampe het!

WAT SAL GOD SE KONINKRYK DOEN?

11. Waarom het Jesus gesê dat sy dissipels moet bid dat God se wil in die hemel gedoen moet word?

¹¹ Toe Jesus gesê het dat sy dissipels moet bid vir God se Koninkryk om te kom, het hy ook gesê dat hulle moet bid dat God se wil gedoen moet word, “soos in die hemel, so ook op die aarde”. God is in die hemel, en die getroue engele daar het nog altyd sy wil gedoen. Maar in Hoofstuk 3 van hierdie boek het ons geleer dat ’n goddelose engel opgehou het om God se wil te doen en Adam en Eva sover gekry het om te sondig. In Hoofstuk 10 sal ons meer leer van wat die Bybel omtrent hierdie goddelose engel leer, wat ons as Satan die Duiwel ken. Satan en die geesskepsele wat gekies het om hom te volg—wat demone genoem word—is toegelaat om ’n ruk lank in die hemel te bly. Gevolglik het nie almal wat op daardie stadium in die hemel was, God se wil gedoen nie. Dit sou verander wanneer God se Koninkryk begin regeer. Die pas gekroonde Koning, Jesus Christus, sou teen Satan oorlog voer.—Openbaring 12:7-9.

12. Watter twee belangrike gebeurtenisse word in Openbaring 12:10 beskryf?

¹² Die volgende profetiese woorde beskryf wat sou gebeur: “Ek het ’n harde stem in die hemel hoor sê: ‘Nou het die redding en die krag en die koninkryk van ons God en die gesag van sy Christus gekom, want die beskuldiger van ons broers [Satan], wat hulle dag en nag voor ons God beskuldig, is neergeslinger!’” (Openbaring 12:10). Het jy opgelet dat twee baie belangrike gebeurtenisse in hierdie Bybelvers beskryf word? Eerstens, God se Koninkryk onder Jesus Christus begin regeer. Tweedens, Satan word uit die hemel na die aarde neergewerp.

13. Wat was die resultaat van Satan se uitwerping uit die hemel?

¹³ Wat was die resultaat van hierdie twee gebeurtenisse? Ons lees aangaande wat in die hemel gebeur het: “Daarom, wees bly, o hemele en julle wat daarin woon!” (Openbaring 12:12). Ja, die getroue engele in die hemel is bly, want nadat Satan en sy demone uitgewerp is, is almal wat in die hemel is, getrou aan Jehovah God. Daar heers algehele, onversteurde vrede en harmonie daar. God se wil word in die hemel gedoen.

14. Wat het gebeur omdat Satan na die aarde neergewerp is?

¹⁴ Maar wat van die aarde? Die Bybel sê: “Wee die aarde en die see, want die Duiwel het na julle toe neergedaal en het groot toorn, omdat hy weet dat hy ’n kort tydjie het” (Openbaring 12:12). Satan is woedend omdat hy uit die hemel gewerp is en net ’n kort tydjie oorhet. As gevolg van sy woede veroorsaak hy benoudheid, of “wee”, op die aarde. Ons sal in die volgende hoofstuk meer van hierdie “wee” leer. Maar met die oog hierop kan ons vra: Hoe kan die Koninkryk God se wil op die aarde laat geskied?

15. Wat is God se wil vir die aarde?

¹⁵ Wel, onthou wat God se wil vir die aarde is. Jy het in Hoofstuk 3 daarvan geleer. In Eden het God getoon dat dit sy wil is dat hierdie aarde ’n paradys moet wees wat gevul is met regverdige mense wat nooit sal sterf nie. Satan het Adam en Eva sover gekry om te sondig, en dit het wel ’n uitwerking gehad op die vervulling van God se wil vir die aarde, maar dit het dit nie verander nie. Jehovah se voorneme is nog steeds dat ‘die regverdiges die aarde besit en vir ewig daarop woon’ (Psalm 37:29). En God se Koninkryk sal dit bewerkstellig. Hoe?

16, 17. Wat leer Daniël 2:44 ons van God se Koninkryk?

¹⁶ Kyk na die profesie wat in Daniël 2:44 opgeteken staan. Daar lees ons: “In die dae van dié konings sal die God van die hemel ’n koninkryk oprig wat nooit vernietig sal word nie. En die koninkryk sal aan geen ander volk oorgedra word nie. Dit sal al hierdie koninkryke verbrysel en daar ’n einde aan maak, en self sal dit tot onbepaalde tye bly staan.” Wat leer dit ons van God se Koninkryk?

¹⁷ Eerstens leer dit ons dat God se Koninkryk “in die dae van dié konings” opgerig sou word, of terwyl ander koninkryke nog bestaan. Tweedens leer dit ons dat die Koninkryk vir ewig sal bestaan. Dit sal nie verower word en deur ’n ander regering vervang word nie. Derdens sien ons dat daar ’n oorlog tussen God se Koninkryk en die koninkryke van hierdie wêreld sal wees. God se Koninkryk sal seëvier. Uiteindelik sal dit die enigste regering oor die mensdom wees. Dan sal mense die beste heerskappy geniet wat hulle nog ooit geken het.

18. Wat is die naam van die finale oorlog tussen God se Koninkryk en die regerings van hierdie wêreld?

¹⁸ Die Bybel sê baie oor daardie finale oorlog tussen God se Koninkryk en die regerings van hierdie wêreld. Dit leer byvoorbeeld dat bose geeste leuens sal versprei om “die konings van die hele bewoonde aarde” te bedrieg wanneer die einde naby is. Waarom? “Om hulle [die konings] te versamel vir die oorlog van die groot dag van God die Almagtige.” Die konings van die aarde sal versamel word na “die plek wat in Hebreeus Har–Magedon genoem word” (Openbaring 16:14, 16). Uit hierdie twee verse kan ons sien dat die finale konflik tussen menseregerings en God se Koninkryk die slag van Har–Magedon, of Armageddon, genoem word.

19, 20. Wat keer dat God se wil nou op die aarde gedoen word?

¹⁹ Wat sal God se Koninkryk deur middel van Armageddon bereik? Dink weer oor wat God se wil vir die aarde is. Jehovah God se voorneme is dat die aarde vol regverdige, volmaakte mense moet wees wat hom in die Paradys dien. Wat keer dat dit nou gebeur? Eerstens, ons is sondig, ons word siek en sterf. Maar ons het in Hoofstuk 5 geleer dat Jesus vir ons gesterf het sodat ons vir ewig kan lewe. Jy onthou heel moontlik die woorde wat in die Evangelie van Johannes opgeteken staan: “God het die wêreld so liefgehad dat hy sy enigverwekte Seun gegee het, sodat elkeen wat geloof in hom beoefen, nie vernietig sal word nie maar die ewige lewe kan hê.”—Johannes 3:16.

²⁰ Nog ’n probleem is dat baie mense goddelose dinge doen. Hulle lieg, bedrieg en lei onsedelike lewens. Hulle wil nie God se wil doen nie. Mense wat goddelose dinge doen, sal in God se oorlog van Armageddon vernietig word (Psalm 37:10). Nog ’n rede waarom God se wil nie op die aarde gedoen word nie, is omdat regerings mense nie aanmoedig om dit te doen nie. Baie regerings is swak, wreed of korrup. Die Bybel sê tereg: “Die mens [het] oor die mens geheers . . . tot sy nadeel.”—Prediker 8:9.

21. Hoe sal die Koninkryk God se wil op die aarde laat geskied?

²¹ Ná Armageddon sal daar net een regering oor die mensdom wees, God se Koninkryk. Daardie Koninkryk sal God se wil doen en wonderlike seëninge meebring. Dit sal byvoorbeeld Satan en sy demone verwyder (Openbaring 20:1-3). Die krag van Jesus se offerande sal aangewend word sodat getroue mense nie meer sal siek word en sterf nie. In plaas daarvan sal hulle onder die Koninkryksheerskappy vir ewig kan lewe (Openbaring 22:1-3). Die aarde sal in ’n paradys omskep word. So sal die Koninkryk God se wil op die aarde laat geskied en God se naam heilig. Wat beteken dit? Dit beteken dat almal wat onder God se Koninkryk lewe, uiteindelik Jehovah se naam sal eer.

WANNEER TREE GOD SE KONINKRYK OP?

22. Waarom weet ons dat God se Koninkryk nie gekom het toe Jesus op die aarde was of onmiddellik nadat hy opgewek is nie?

²² Dit was duidelik dat die Koninkryk nog nie gekom het toe Jesus gesê het dat sy volgelinge moet bid: “Laat u koninkryk kom” nie. Het dit gekom toe Jesus opgevaar het hemel toe? Nee, want Petrus sowel as Paulus het gesê dat die profesie in Psalm 110:1 eers in Jesus vervul is nadat hy opgewek is: “Jehovah het vir my Here gesê: ‘Sit aan my regterhand totdat ek jou vyande ’n voetbank vir jou voete maak’” (Handelinge 2:32-34; Hebreërs 10:12, 13). Daar was dus ’n wagtyd.

23. (a) Wanneer het God se Koninkryk begin regeer? (b) Wat sal in die volgende hoofstuk bespreek word?

²³ Hoe lank was dit? Gedurende die 19de eeu het opregte Bybelstudente bereken dat die wagtyd in 1914 sou eindig. (Vir meer inligting oor hierdie datum, sien die Aanhangsel, bladsye 215-18.) Wêreldgebeure wat in 1914 begin het, bevestig dat hierdie opregte Bybelstudente se berekeninge korrek was. Die vervulling van Bybelprofesieë toon dat Christus in 1914 Koning geword het en dat God se hemelse Koninkryk toe begin regeer het. Gevolglik lewe ons in die “kort tydjie” wat Satan oorhet (Openbaring 12:12; Psalm 110:2). Ons kan ook met sekerheid sê dat God se Koninkryk binnekort gaan optree sodat God se wil op die aarde gedoen sal word. Dink jy nie dit is wonderlike nuus nie? Glo jy dat dit waar is? Die volgende hoofstuk sal jou help om te sien dat die Bybel werklik hierdie dinge leer.