Hoe sal jy voor die regterstoel staan?

“Wanneer die Seun van die mens in sy heerlikheid kom, en al die engele saam met hom, dan sal hy op sy heerlike troon gaan sit.”—MATTEUS 25:31.

1-3. Watter rede tot optimisme het ons met betrekking tot geregtigheid?

‘SKULDIG OF ONSKULDIG?’ Baie wonder wanneer hulle verslae van sekere hofsake hoor. Regters en jurielede probeer dalk om eerlik te wees, maar geskied reg wel in die meeste gevalle? Het jy nie al van onregverdigheid en onbillikheid in die regsproses gehoor nie? Sulke onregverdigheid is niks nuuts nie, soos ons in Jesus se illustrasie sien wat in Lukas 18:1-8 opgeteken staan.

² Wat jou ondervinding ook al is van die manier waarop die mens reg laat geskied, let op hoe Jesus afsluit: ‘Sal God nie reg laat geskied aan sy uitverkorenes wat dag en nag tot hom roep nie? Ek sê vir julle: Hy sal gou reg aan hulle laat geskied. Maar wanneer die Seun van die mens kom, sal hy werklik die geloof op die aarde vind?’

³ Ja, Jehovah sal sorg dat reg uiteindelik aan sy knegte sal geskied. Jesus is ook hierby betrokke, veral nou omdat ons in “die laaste dae” van die huidige goddelose stelsel lewe. Jehovah sal binnekort sy magtige Seun gebruik om goddeloosheid heeltemal van die aarde af weg te neem (2 Timoteus 3:1; 2 Tessalonisense 1:7, 8; Openbaring 19:11-16). Ons kan insig in Jesus se rol kry uit een van die laaste illustrasies wat hy gegee het en wat dikwels die gelykenis van die skape en die bokke genoem word.

4. Hoe het ons die tydsbepaling van die gelykenis van die skape en die bokke verstaan, maar waarom gaan ons nou aan die gelykenis aandag skenk? (Spreuke 4:18).

⁴ Ons was lank van mening dat die gelykenis Jesus afbeeld wat in 1914 as Koning gaan sit het en sedertdien oordeel vel—ewige lewe vir mense wat soos skape is, ewige dood vir die bokke. Maar ’n heroorweging van die gelykenis dui op ’n aanpassing in die begrip van die tydsbepaling daarvan, asook van wat dit illustreer. Hierdie verfyning verleen meer krag aan die belangrikheid van ons predikingswerk en die betekenis van mense se reaksie daarop. Om die grondslag vir hierdie dieper begrip van die gelykenis te verstaan, kom ons kyk na wat die Bybel toon oor Jehovah en Jesus, as Konings sowel as Regters.

Jehovah as die Opperregter

5, 6. Waarom is dit gepas om Jehovah as Koning sowel as Regter te beskou?

⁵ Jehovah heers oor die heelal met mag oor alles. Aangesien hy geen begin en geen einde het nie, is hy die “Koning van die ewigheid” (1 Timoteus 1:17; Psalm 90:2, 4; Openbaring 15:3). Hy het die gesag om wette te maak en dit streng toe te pas. Maar sy gesag sluit in dat hy ’n Regter is. Jesaja 33:22 sê: “Jehovah is ons Regter, Jehovah is ons Wetgewer, Jehovah is ons Koning; hy self sal ons red.”—NW.

⁶ God se knegte erken Jehovah lank reeds as die Regter van sake en geskille. Byvoorbeeld, nadat “die Regter van die ganse aarde” die getuienis omtrent die goddeloosheid van Sodom en Gomorra in oorweging geneem het, het hy geoordeel dat die inwoners vernietiging verdien en het hy ook daardie regverdige vonnis voltrek (Genesis 18:20-33; Job 34:10-12). Hoe behoort dit ons tog gerus te stel om te weet dat Jehovah ’n regverdige Regter is wat altyd sy oordele ten uitvoer kan bring!

7. Hoe het Jehovah as Regter opgetree in sy handeling met Israel?

⁷ In eertydse Israel het Jehovah soms regstreeks uitspraak gelewer. Sou jy nie destyds bemoedig gevoel het om te weet dat ’n volmaakte Regter uitspraak lewer nie? (Levitikus 24:10-16; Numeri 15:32-36; 27:1-11). God het ook “verordeninge” voorsien wat geheel en al goed was as standaarde waarvolgens oordeel gevel kon word (Levitikus 25:18, 19; Nehemia 9:13; Psalm 19:10, 11; 119:7, 75, vgl. NW, 164; 147:19, 20). Hy is die “Regter van die ganse aarde”, en daarom word ons almal geraak.—Hebreërs 12:23.

8. Watter toepaslike gesig het Daniël gehad?

⁸ In hierdie saak het ons die verklaring van ’n “ooggetuie”. Die profeet Daniël is ’n gesig gegee van wilde diere wat regerings of heerskappye voorgestel het (Daniël 7:1-8, 17). Hy het bygevoeg: ‘Trone is reggesit en ’n Oue van dae het gaan sit; sy kleed was wit soos sneeu’ (Daniël 7:9). Let op dat Daniël trone gesien het, ‘en ’n Oue van dae, oftewel Jehovah, het gaan sit’. Vra jou af: ‘Het Daniël hier gesien hoe God Koning word?’

9. Wat is een betekenis daarvan om op ’n troon te “gaan sit”? Gee voorbeelde.

⁹ Wel, wanneer ons lees dat iemand op ’n troon “gaan sit” het, dink ons moontlik dat hy ’n koning geword het, want die Bybel maak soms van hierdie styl gebruik. Byvoorbeeld: “Toe [Simri] begin regeer het, het hy, onmiddellik nadat hy op sy troon gaan sit het, . . . ” (1 Konings 16:11, NW; 2 Konings 10:30; 15:12; Jeremia 33:17). ’n Messiaanse profesie het gesê: “Hy moet gaan sit en heers op sy troon.” Om ‘op ’n troon te sit’ kan gevolglik beteken om koning te word (Sagaria 6:12, 13, NW). Jehovah word beskryf as ’n Koning wat op ’n troon sit (1 Konings 22:19; Jesaja 6:1; Openbaring 4:1-3). Hy is die “Koning van die ewigheid”. Maar toe hy ’n nuwe aspek van sy soewereiniteit laat geld het, kon daar gesê word dat hy Koning geword het, asof hy opnuut op sy troon gaan sit het.—1 Kronieke 16:1, 31, NW; Jesaja 52:7, NW; Openbaring 11:15-17; 15:3; 19:1, 2, 6.

10. Wat was ’n belangrike funksie van Israelitiese konings? Lig toe.

¹⁰ Maar hier volg ’n sleutelgedagte: ’n Belangrike funksie van eertydse konings was om sake te verhoor en uitspraak te lewer (Spreuke 29:14). Dink aan Salomo se verstandige oordeel toe twee vroue op dieselfde baba aanspraak gemaak het (1 Konings 3:16-28; 2 Kronieke 9:8). Een van sy regeringsgeboue was “die troonsaal . . . waar hy reggespreek het” en is ook “die regsaal” genoem (1 Konings 7:7). Jerusalem is beskryf as die plek waar ‘die stoele vir die gereg staan’ (Psalm 122:5). Om ‘op ’n troon te gaan sit’, kan klaarblyklik dan ook beteken om regterlike gesag uit te oefen.—Exodus 18:13; Spreuke 20:8, vgl. NW.

11, 12. (a) Wat is die betekenis daarvan dat Jehovah gaan sit het, soos in Daniël hoofstuk 7 gemeld word? (b) Hoe staaf ander tekste die feit dat Jehovah gaan sit om te oordeel?

¹¹ Kom ons keer nou terug na die toneel waar Daniël gesien het hoe “’n Oue van dae gaan sit”. Daniël 7:10 voeg by: “Die gereg het gaan sit, en die boeke is geopen.” Ja, die Oue van dae het gesit om uitspraak te lewer oor wêreldheerskappy en om die Seun van die mens te oordeel as waardig om te regeer (Daniël 7:13, 14). Daarna lees ons dat ‘die Oue van dae gekom en reg verskaf het aan die heiliges’, diegene wat geoordeel word as geskik om saam met die Seun van die mens te regeer (Daniël 7:22). Uiteindelik ‘sal die gereg sit’ en teen die laaste wêreldmoondheid uitspraak lewer.—Daniël 7:26.a

¹² Die feit dat Daniël gesien het dat God ‘op ’n troon sit’, het derhalwe beteken dat Hy gekom het om uitspraak te lewer. Vroeër het Dawid gesing: “U [Jehovah] het my reg en my regsaak behandel; U het gaan sit op die troon, o regverdige regter!” (Psalm 9:5, 8). En Joël het geskryf: “Die nasies moet hulle klaarmaak en optrek na die dal van Josafat; want daar sal Ek [Jehovah] sit om gerig te hou oor al die nasies rondom.” (Joël 3:12; vergelyk Jesaja 16:5.) Beide Jesus en Paulus was in geregtelike situasies waarin ’n mens gesit het om ’n saak te verhoor en uitspraak te lewer.b—Johannes 19:12-16; Handelinge 23:3; 25:6.

Jesus se posisie

13, 14. (a) Watter versekering het God se volk gehad dat Jesus Koning sou word? (b) Wanneer het Jesus op sy troon gaan sit, en in watter opsig het hy sedert 33 G.J. geheers?

¹³ Jehovah is Koning sowel as Regter. Wat van Jesus? Die engel wat sy geboorte aangekondig het, het gesê: “Jehovah God sal hom die troon van sy vader Dawid gee, . . . en daar sal geen einde aan sy koninkryk wees nie” (Lukas 1:32, 33). Jesus sou die permanente erfgenaam van die Dawidiese koningskap wees (2 Samuel 7:12-16). Hy sou vanuit die hemel regeer, want Dawid het gesê: “[Jehovah, NW] het tot my Here [Jesus] gespreek: Sit aan my regterhand, totdat Ek u vyande maak ’n voetbank vir u voete. U magtige septer sal [Jehovah, NW] uitstrek uit Sion en sê: Heers te midde van u vyande.”—Psalm 110:1-4.

¹⁴ Wanneer sou dit plaasvind? Jesus het nie as Koning geheers terwyl hy ’n mens was nie (Johannes 18:33-37). In 33 G.J. het hy gesterf, is hy opgewek en het hy na die hemel opgevaar. Hebreërs 10:12 sê: “Hierdie man het vir altyd een offerande vir sondes gebring en het aan die regterhand van God gaan sit.” Watter gesag het Jesus gehad? ‘God het hom aan sy regterhand in die hemelse plekke laat sit, ver bo elke regering en gesag en mag en heerskappy en hom hoof oor alles gemaak met betrekking tot die gemeente’ (Efesiërs 1:20-22). Omdat Jesus tóé koninklike gesag oor Christene gehad het, kon Paulus skryf dat Jehovah “ons verlos [het] van die gesag van die duisternis en ons oorgebring [het] in die koninkryk van die Seun van sy liefde”.—Kolossense 1:13; 3:1.

15, 16. (a) Waarom sê ons dat Jesus nie in 33 G.J. die Koning van God se Koninkryk geword het nie? (b) Wanneer het Jesus in God se Koninkryk begin heers?

¹⁵ In daardie tyd het Jesus egter nie as Koning en Regter oor die nasies opgetree nie. Hy het langs God gesit en gewag op die tyd om as die Koning van God se Koninkryk op te tree. Paulus het van hom geskryf: “Met betrekking tot watter een van die engele het hy ooit gesê: ‘Sit aan my regterhand totdat ek jou vyande as ’n voetbank vir jou voete stel’?”—Hebreërs 1:13.

¹⁶ Jehovah se Getuies het al baie getuienis gepubliseer dat Jesus se wagtyd in 1914 verstryk het toe hy die heerser van God se Koninkryk in die onsigbare hemele geword het. Openbaring 11:15, 18 sê: “Die koninkryk van die wêreld het die koninkryk van ons Here en van sy Christus geword, en hy sal vir ewig en altyd as koning heers.” “Maar die nasies se gramskap het ontvlam, en u eie gramskap het gekom.” Ja, die nasies het gedurende die Eerste Wêreldoorlog gramskap teenoor mekaar geopenbaar (Lukas 21:24). Die oorloë, aardbewings, peste, voedseltekorte, ensovoorts wat ons sedert 1914 gesien het, bevestig dat Jesus nou in God se Koninkryk heers, en dat die wêreld se finale einde op hande is.—Matteus 24:3-14.

17. Watter sleutelgedagtes het ons tot dusver bespreek?

¹⁷ By wyse van ’n kort hersiening: Daar kan gesê word dat God as Koning op ’n troon sit, maar in ’n ander sin kan hy op sy troon gaan sit om te oordeel. In 33 G.J. het Jesus aan God se regterhand gesit, en hy is nou die Koning van die Koninkryk. Maar dien Jesus, wat nou as Koning heers, ook as Regter? En waarom behoort dit, veral in dié tyd, vir ons van belang te wees?

18. Watter bewyse is daar dat Jesus ook ’n Regter sal wees?

¹⁸ Jehovah, wat die reg het om regters aan te stel, het Jesus gekies as ’n Regter wat aan Sy standaarde voldoen. Jesus het dit getoon toe hy gepraat het van mense wat geestelik lewend word: “Die Vader oordeel hoegenaamd niemand nie, maar hy het die hele oordeel aan die Seun toevertrou” (Johannes 5:22). Maar Jesus se regterlike rol strek verder as daardie soort oordeel, want hy is die regter van die lewendes en die dooies (Handelinge 10:42; 2 Timoteus 4:1). Paulus het eenkeer gesê: “[God] het ’n dag vasgestel waarop hy voornemens is om die bewoonde aarde in regverdigheid te oordeel deur ’n man [Jesus] wat hy aangestel het, en hy het aan alle mense ’n waarborg verskaf deurdat hy hom uit die dode opgewek het.”—Handelinge 17:31; Psalm 72:2-7.

19. Waarom is dit reg om van Jesus te praat as iemand wat as ’n Regter gaan sit?

¹⁹ Is dit dus reg as ons die gevolgtrekking maak dat Jesus in die bepaalde rol van Regter op ’n heerlike troon gaan sit? Ja. Jesus het vir die apostels gesê: “In die herskepping, wanneer die Seun van die mens op sy heerlike troon gaan sit, sal julle wat my gevolg het ook self op twaalf trone sit en die twaalf stamme van Israel oordeel” (Matteus 19:28). Hoewel Jesus nou die Koning van die Koninkryk is, sluit sy verdere werksaamhede wat in Matteus 19:28 gemeld word in dat hy op ’n troon sit om gedurende die Millennium te oordeel. Dan sal hy die hele mensdom, die regverdiges en die onregverdiges, oordeel (Handelinge 24:15). Dit is nuttig om dít in gedagte te hou terwyl ons ons aandag vestig op een van Jesus se gelykenisse wat op ons tyd en ons lewens betrekking het.

Wat sê die gelykenis?

20, 21. Wat het Jesus se apostels gevra wat op ons tyd betrekking het, en tot watter vraag gee dit aanleiding?

²⁰ Kort voor Jesus gesterf het, het sy apostels hom gevra: “Wanneer sal hierdie dinge wees, en wat sal die teken van u teenwoordigheid en van die voleinding van die stelsel van dinge wees?” (Matteus 24:3). Jesus het voorspel dat betekenisvolle gebeure op aarde sal plaasvind voor ‘die einde kom’. Kort voor daardie einde sal die nasies “die Seun van die mens met krag en groot heerlikheid op die wolke van die hemel sien kom”.—Matteus 24:14, 29, 30.

²¹ Hoe sal mense in daardie nasies egter vaar wanneer die Seun van die mens in sy heerlikheid kom? Kom ons vind dit uit in die gelykenis van die skape en die bokke, wat met dié woorde begin: “Wanneer die Seun van die mens in sy heerlikheid kom, en al die engele saam met hom, dan sal hy op sy heerlike troon gaan sit. En al die nasies sal voor hom versamel word.”—Matteus 25:31, 32.

22, 23. Watter punte dui daarop dat die gelykenis van die skape en die bokke nie in 1914 in vervulling begin gaan het nie?

²² Is hierdie gelykenis van toepassing op die tyd toe Jesus in 1914 in koningsmag gaan sit het, soos ons dit lank verstaan het? Wel, Matteus 25:34 praat inderdaad van hom as Koning; daarom is dit logies dat die gelykenis van toepassing is sedert Jesus in 1914 Koning geword het. Maar watter oordeelswerk het hy kort daarna gedoen? Dit was nie ’n oordeel van “al die nasies” nie. Hy het eerder sy aandag gevestig op diegene wat beweer dat hulle “die huis van God” uitmaak (1 Petrus 4:17). In ooreenstemming met Maleagi 3:1-3 het Jesus, as Jehovah se boodskapper, regterlike inspeksie gehou van die gesalfde Christene wat op die aarde oor was. Dit was ook tyd om die Christendom, wat valslik beweer dat dit “die huis van God” is, regterlik te vonnis (Openbaring 17:1, 2; 18:4-8).c Tog is daar geen aanduiding dat Jesus op daardie tydstip, of wat dit betref daarná, gesit het om mense van al die nasies finaal as skape of bokke te oordeel nie.

²³ As ons Jesus se werksaamhede in die gelykenis ontleed, sien ons hoe hy al die nasies finaal oordeel. Die gelykenis toon nie dat hierdie oordeel oor ’n lang tydperk van baie jare sou voortduur nie, asof elke persoon wat gedurende hierdie afgelope dekades gesterf het, geoordeel is om die ewige dood of die ewige lewe te verdien. Die meerderheid wat in onlangse dekades gesterf het, het blykbaar na die mensdom se gemeenskaplike graf gegaan (Openbaring 6:8; 20:13). Die gelykenis beskryf egter die tyd wanneer Jesus die mense van “al die nasies” oordeel wat dan lewe en wat voor die voltrekking van sy regterlike vonnis staan.

24. Wanneer sal die gelykenis van die skape en die bokke vervul word?

²⁴ Met ander woorde, die gelykenis wys na die toekoms wanneer die Seun van die mens in sy heerlikheid sal kom. Hy sal gaan sit om mense wat dan lewe te oordeel. Sy oordeel sal gegrond wees op wat hulle self getoon het hulle is. Op daardie tydstip sal “die onderskeid . . . tussen die regverdige en die goddelose” duidelik vasgestel wees (Maleagi 3:18). Die werklike uitspraak en voltrekking van oordeel sal in ’n beperkte tyd uitgevoer word. Jesus sal regverdige beslissings gee wat gegrond is op wat aan die lig gekom het omtrent individue.—Sien ook 2 Korintiërs 5:10.

25. Wat beskryf Matteus 25:31 wanneer dit praat van die Seun van die mens wat op ’n heerlike troon gaan sit?

²⁵ Dit beteken dus dat die profesie van Jesus wat “op sy heerlike troon gaan sit” om te oordeel, soos in Matteus 25:31 gemeld word, op die toekomstige tyd slaan wanneer hierdie magtige Koning sal gaan sit om oordeel oor die nasies uit te spreek en dit te voltrek. Ja, die oordeelstoneel waarby Jesus in Matteus 25:31-33, 46 betrokke is, kan vergelyk word met die toneel in Daniël hoofstuk 7 waar die heersende Koning, die Oue van dae, gaan sit het om sy rol as Regter te volbring.

26. Watter nuwe verduideliking van die gelykenis word duidelik?

²⁶ As die gelykenis van die skape en die bokke só verstaan word, dui dit daarop dat die skape en die bokke in die toekoms geoordeel gaan word. Dit sal plaasvind nadat “die verdrukking” wat in Matteus 24:29, 30 gemeld word, uitgebreek en die Seun van die mens ‘in sy heerlikheid gekom’ het. (Vergelyk Markus 13:24-26.) Daarna, aan die einde van die goddelose stelsel in sy geheel, sal Jesus ’n hofsitting hou en uitspraak lewer sowel as die vonnis voltrek.—Johannes 5:30; 2 Tessalonisense 1:7-10.

27. Wat behoort ons graag te wil weet omtrent Jesus se laaste gelykenis?

²⁷ Dit gee ons ’n duideliker begrip van die tydsbepaling van Jesus se gelykenis, wat toon wanneer die skape en die bokke geoordeel sal word. Maar hoe raak dit ons wat die goeie nuus van die Koninkryk ywerig verkondig? (Matteus 24:14). Maak dit ons werk minder belangrik, of bring dit groter verantwoordelikheid mee? Kom ons kyk in die volgende artikel hoe dit ons raak.

Watter toekoms vir die skape en die bokke?

“Hy sal die mense van mekaar afskei, net soos ’n herder die skape van die bokke afskei.”—MATTEUS 25:32.

1, 2. Waarom behoort ons in die gelykenis van die skape en die bokke belang te stel?

JESUS CHRISTUS was beslis die grootste Leermeester op aarde (Johannes 7:46). Een van sy onderrigmetodes was die gebruik van gelykenisse, of illustrasies (Matteus 13:34, 35). Hulle was eenvoudig dog kragtig om diep geestelike en profetiese waarhede oor te dra.

² In die gelykenis van die skape en die bokke het Jesus verwys na ’n tyd wanneer hy in ’n spesiale hoedanigheid gaan optree: “Wanneer die Seun van die mens in sy heerlikheid kom, en . . . ” (Matteus 25:31). Ons behoort daarin belang te stel omdat dit die illustrasie is waarmee Jesus sy antwoord afsluit op die vraag: “Wat sal die teken van u teenwoordigheid en van die voleinding van die stelsel van dinge wees?” (Matteus 24:3). Maar wat beteken dit vir ons?

3. Wat het Jesus vroeër in sy bespreking gesê sou onmiddellik ná die begin van die groot verdrukking gebeur?

³ Jesus het voorspel dat merkwaardige gebeure sou plaasvind “onmiddellik ná” die groot verdrukking uitgebreek het; gebeure waarna ons uitsien. Hy het gesê dat “die teken van die Seun van die mens” dan sal verskyn. Dit sal ’n groot uitwerking hê op “al die stamme van die aarde” wat “die Seun van die mens met krag en groot heerlikheid op die wolke van die hemel [sal] sien kom”. Die Seun van die mens sal van “sy engele” vergesel wees (Matteus 24:21, 29-31).a Wat van die gelykenis van die skape en die bokke? Moderne Bybels plaas dit in hoofstuk 25, maar dit maak deel uit van Jesus se antwoord en verstrek verdere besonderhede oor sy koms in heerlikheid en vestig die aandag op sy oordeel oor “al die nasies”.—Matteus 25:32.

Sinnebeelde in die gelykenis

4. Wat word aan die begin van die gelykenis van die skape en die bokke omtrent Jesus gesê, en wie anders speel ’n rol?

⁴ Jesus begin die gelykenis deur te sê: “Wanneer die Seun van die mens . . . kom.” Jy weet waarskynlik wie “die Seun van die mens” is. Die Evangelieskrywers het daardie uitdrukking dikwels op Jesus toegepas. Jesus self het dit ook gedoen; ongetwyfeld met Daniël se visioen in gedagte van ‘Een soos die Seun van ’n mens’ wat na die Oue van dae gekom het om “heerskappy en eer en koningskap” te ontvang (Daniël 7:13, 14; Matteus 26:63, 64; Markus 14:61, 62). Hoewel Jesus die vernaamste persoon in hierdie gelykenis is, is hy nie alleen nie. Vroeër in hierdie bespreking, soos ons in Matteus 24:30, 31 kan lees, het hy gesê dat sy engele ’n belangrike rol sal speel wanneer die Seun van die mens ‘met krag en groot heerlikheid kom’. Die gelykenis van die skape en die bokke toon eweneens dat engele saam met Jesus is wanneer hy “op sy heerlike troon gaan sit” om te oordeel. (Vergelyk Matteus 16:27.) Maar die Regter en sy engele is in die hemel; word mense dus in die gelykenis bespreek?

5. Hoe kan ons Jesus se “broers” identifiseer?

⁵ ’n Kykie na die gelykenis toon dat daar drie groepe is wat ons moet identifiseer. Benewens die skape en die bokke voeg die Seun van die mens die derde groep by wie se identiteit baie belangrik is om die skape en die bokke te kan identifiseer. Jesus noem hierdie derde groep sy geestelike broers (Matteus 25:40, 45). Hulle moet ware aanbidders wees, want Jesus het gesê: “Elkeen wat die wil doen van my Vader . . . , dié is my broer en suster en moeder” (Matteus 12:50; Johannes 20:17). Paulus was meer spesifiek toe hy geskryf het van Christene wat ’n deel is van “Abraham se saad” en wat seuns van God is. Hy het hulle Jesus se “broers” en “deelgenote van die hemelse roeping” genoem.—Hebreërs 2:9–3:1; Galasiërs 3:26, 29.

6. Wie is “die geringste” van Jesus se broers?

⁶ Waarom het Jesus van “die geringste” van sy broers gepraat? Daardie woorde is ’n herhaling van wat die apostels hom vroeër hoor sê het. Toe Jesus Johannes die Doper, wat voor Jesus gesterf en derhalwe ’n aardse hoop gehad het, gekontrasteer het met diegene wat hemelse lewe verkry, het hy gesê: “Daar [is] niemand groter as Johannes die Doper verwek nie; maar iemand wat ’n mindere in die koninkryk van die hemele is, is groter as hy” (Matteus 11:11). Party wat hemel toe gaan, was moontlik prominente lede van die gemeente, soos die apostels, en ander was dalk nie so prominent nie, maar hulle is almal Jesus se geestelike broers (Lukas 16:10; 1 Korintiërs 15:9; Efesiërs 3:8; Hebreërs 8:11). Al het party dus op aarde onbelangrik voorgekom, was hulle nog sy broers en moes hulle dienooreenkomstig behandel word.

Wie is die skape en die bokke?

7, 8. Wat het Jesus omtrent die skape gesê, en wat kan ons dus omtrent hulle aflei?

⁷ Ons lees omtrent die oordeel van die skape: “[Jesus sal] vir dié aan sy regterhand sê: ‘Kom, julle wat deur my Vader geseën is, beërf die koninkryk wat van die grondlegging van die wêreld af vir julle berei is. Want ek het honger geword, en julle het my iets gegee om te eet; ek het dors geword, en julle het my iets gegee om te drink. Ek was ’n vreemdeling, en julle het my gasvry ontvang; naak, en julle het my geklee. Ek het siek geword, en julle het na my omgesien. Ek was in die gevangenis, en julle het na my toe gekom.’ Dan sal die regverdiges hom antwoord met die woorde: ‘Here, wanneer het ons u honger gesien en u gevoed, of dors en u iets gegee om te drink? Wanneer het ons u ’n vreemdeling gesien en u gasvry ontvang, of naak en u geklee? Wanneer het ons u siek of in die gevangenis gesien en na u toe gegaan?’ En die koning sal antwoord en vir hulle sê: ‘Voorwaar, ek sê vir julle: In soverre julle dit aan een van die geringste van hierdie broers van my gedoen het, het julle dit aan my gedoen.’”—Matteus 25:34-40.

⁸ Die skape wat geoordeel word as waardig om aan Jesus se regterhand van eer en guns te wees, verteenwoordig klaarblyklik ’n groep mense (Efesiërs 1:20; Hebreërs 1:3). Wat het hulle gedoen en wanneer? Jesus sê dat hulle goedhartig, eerbiedig en vrygewig teenoor hom was deur hom van voedsel, drank en klere te voorsien en hom te help toe hy siek of in die gevangenis was. Wanneer die skape sê dat hulle dit nie aan Jesus persoonlik gedoen het nie, wys hy daarop dat hulle sy geestelike broers, die oorblyfsel van gesalfde Christene, ondersteun het en dit dus in daardie sin aan hom gedoen het.

9. Waarom is die gelykenis nie gedurende die Millennium van toepassing nie?

⁹ Die gelykenis is nie gedurende die Millennium van toepassing nie, want die gesalfdes sal dan nie mense wees wat honger, dors, siek of in die gevangenis is nie. Baie van hulle het egter hierdie dinge gedurende die voleinding van hierdie stelsel van dinge ondervind. Sedert Satan na die aarde neergewerp is, het hy die oorblyfsel ’n spesiale voorwerp van sy woede gemaak, en bespotting, marteling asook die dood oor hulle gebring.—Openbaring 12:17.

10, 11. (a) Waarom is dit onredelik om te dink dat die skape almal insluit wat ’n daad van goedhartigheid aan Jesus se broers doen? (b) Wie word gepas deur die skape voorgestel?

¹⁰ Sê Jesus dat elkeen wat ’n geringe daad van goedhartigheid aan een van sy broers doen, soos om hulle ’n stukkie brood of ’n glas water aan te bied, as een van hierdie skape gereken kan word? Sulke dade van goedhartigheid weerspieël weliswaar ’n mate van mensliewendheid, maar dit lyk asof daar in werklikheid baie meer by die skape van hierdie gelykenis betrokke is. Jesus het byvoorbeeld beslis nie na ateïste of geestelikes verwys wat toevallig ’n goedhartige daad aan een van sy broers doen nie. Inteendeel, Jesus het die skape twee keer “regverdiges” genoem (Matteus 25:37, 46). Die skape moet dus persone wees wat Christus se broers oor ’n tydperk gehelp—daadwerklik ondersteun—het en dermate geloof beoefen het dat hulle ’n regverdige posisie voor God verkry.

¹¹ Deur die eeue heen het baie, soos Abraham, ’n regverdige posisie geniet (Jakobus 2:21-23). Noag, Abraham en ander getroues tel onder die “ander skape” wat die lewe in die Paradys onder God se Koninkryk sal beërf. In onlangse tye het nog miljoene ware aanbidding as ander skape aangeneem en “een kudde” met die gesalfdes geword (Johannes 10:16; Openbaring 7:9). Hierdie persone met ’n aardse hoop erken Jesus se broers as ambassadeurs van die Koninkryk en help hulle dus—letterlik en geestelik. Jesus beskou dít wat die ander skape vir sy broers op aarde doen asof dit aan hom gedoen word. Sulke mense wat lewe wanneer hy kom om die nasies te oordeel, sal as skape gereken word.

12. Waarom sal die skape dalk vra hoe hulle dade van goedhartigheid aan Jesus gedoen het?

¹² As die ander skape nou die goeie nuus saam met die gesalfdes verkondig en hulle help, waarom sal hulle vra: “Here, wanneer het ons u honger gesien en u gevoed, of dors en u iets gegee om te drink?” (Matteus 25:37). Daar kan verskeie redes wees. Dit is ’n gelykenis. Deur middel hiervan toon Jesus sy diepe besorgdheid oor sy geestelike broers; hy het meegevoel met hulle en ly saam met hulle. Jesus het vroeër gesê: “Hy wat julle ontvang, ontvang my ook, en hy wat my ontvang, ontvang ook hom wat my uitgestuur het” (Matteus 10:40). In hierdie illustrasie brei Jesus die beginsel uit en toon dat wat aan sy broers gedoen word (goed of sleg) selfs tot in die hemel reik; dit is asof dit in die hemel aan hom gedoen word. Jesus beklemtoon hier ook Jehovah se standaard vir oordeel en toon duidelik dat God se oordeel, hetsy gunstig of veroordelend, geldig en regverdig is. Die bokke kan nie die verskoning maak nie: ‘Wel, as ons u tog net persoonlik gesien het.’

13. Waarom sal bokagtige mense Jesus dalk as “Here” aanspreek?

¹³ As ons eers verstaan wanneer die oordeel gevel word waarvan hierdie gelykenis praat, kry ons ’n duideliker begrip van wie die bokke is. Dit gaan in vervulling wanneer “die teken van die Seun van die mens in die hemel verskyn, en dan sal al die stamme van die aarde hulleself in weeklag slaan, en hulle sal die Seun van die mens met krag en groot heerlikheid . . . sien kom” (Matteus 24:29, 30). Diegene wat die verdrukking oor Babilon die Grote oorleef en wat die Koning se broers vyandiggesind was, sal die Regter dalk nou uit desperaatheid as “Here” aanspreek in die hoop dat hulle lewe gered sal word.—Matteus 7:22, 23; vergelyk Openbaring 6:15-17.

14. Op grond waarvan sal Jesus die skape en die bokke oordeel?

¹⁴ Maar Jesus se oordeel sal nie gegrond wees op desperate bewerings van voormalige kerkgangers, ateïste of ander nie (2 Tessalonisense 1:8). Die regter sal eerder kyk na die hartstoestand en vorige dade van mense ten opsigte van selfs “een van die geringste [van sy broers]”. Die aantal gesalfde Christene wat op aarde oor is, word weliswaar minder. Maar so lank as wat die gesalfdes, wat “die getroue en verstandige slaaf” uitmaak, voortgaan om geestelike voedsel en leiding te voorsien, het voornemende skape ’n geleentheid om goed te doen aan die slaafklas, net soos die ‘groot skare uit alle nasies en stamme en volke’ nog al die tyd doen.—Openbaring 7:9, 14.

15. (a) Hoe het baie getoon dat hulle soos bokke is? (b) Waarom moet ons iemand nie as ’n skaap of ’n bok bestempel nie?

¹⁵ Hoe is Christus se broers en die miljoene ander skape, wat saam een kudde uitmaak, behandel? Baie mense het self dalk nie Christus se verteenwoordigers aangeval nie, maar hulle het ook nie sy volk liefdevol behandel nie. Bokagtige mense verkies die goddelose wêreld en verwerp die Koninkryksboodskap, hetsy hulle dit direk of indirek hoor (1 Johannes 2:15-17). Jesus is natuurlik per slot van rekening die een wat aangestel is om te oordeel. Dit berus nie by ons om te besluit wie skape en wie bokke is nie.—Markus 2:8; Lukas 5:22; Johannes 2:24, 25; Romeine 14:10-12; 1 Korintiërs 4:5.

Watter toekoms vir elke groep?

16, 17. Watter toekoms sal die skape hê?

¹⁶ Jesus het sy oordeel van die skape gegee: “Kom, julle wat deur my Vader geseën is, beërf die koninkryk wat van die grondlegging van die wêreld af vir julle berei is.” Wat ’n hartlike uitnodiging—“Kom”! Waarheen? Na die ewige lewe, soos hy ter opsomming gesê het: “Die regverdiges [sal] die ewige lewe [ingaan].”—Matteus 25:34, 46.

¹⁷ In die gelykenis van die talente het Jesus getoon wat vereis word van diegene wat saam met hom in die hemel sal regeer, maar in hierdie gelykenis toon hy wat van die Koninkryk se onderdane verwag word (Matteus 25:14-23). Kortom, weens die skape se onverdeelde ondersteuning van Jesus se broers beërf hulle ’n plek in die aardse ryk van sy Koninkryk. Hulle sal die lewe op ’n paradysaarde geniet—’n vooruitsig wat God vir hulle berei het “van die grondlegging van die wêreld” van loskoopbare mense.—Lukas 11:50, 51.

18, 19. (a) Watter oordeel sal Jesus oor die bokke uitspreek? (b) Waarom kan ons daarvan seker wees dat die bokke nie ewige lyding sal verduur nie?

¹⁸ Hoe verskil die oordeel oor die bokke tog hiervan! “Dan sal hy vir dié aan sy linkerhand sê: ‘Gaan weg van my af, julle wat vervloek is, die ewige vuur in wat vir die Duiwel en sy engele berei is. Want ek het honger geword, maar julle het my niks gegee om te eet nie, en ek het dors geword, maar julle het my niks gegee om te drink nie. Ek was ’n vreemdeling, maar julle het my nie gasvry ontvang nie; naak, maar julle het my nie geklee nie; siek en in die gevangenis, maar julle het nie na my omgesien nie.’ Dan sal hulle ook antwoord met die woorde: ‘Here, wanneer het ons u honger of dors of ’n vreemdeling of naak of siek of in die gevangenis gesien en u nie bedien nie?’ Dan sal hy hulle antwoord met die woorde: ‘Voorwaar, ek sê vir julle: In soverre julle dit nie aan een van hierdie geringstes gedoen het nie, het julle dit nie aan my gedoen nie.’”—Matteus 25:41-45.

¹⁹ Bybelstudente weet dat dit nie kan beteken dat onsterflike siele van bokagtiges in ’n ewige vuur sal ly nie. Nee, want mense is siele; hulle het nie onsterflike siele nie (Genesis 2:7; Prediker 9:5, 10; Esegiël 18:4). Deur die bokke tot die “ewige vuur” te veroordeel, bedoel die Regter vernietiging sonder ’n toekomshoop, wat ook die permanente einde vir die Duiwel en sy demone sal wees (Openbaring 20:10, 14). Jehovah se Regter sit dus teenoorgestelde oordele uiteen. Hy sê vir die skape: “Kom”; vir die bokke: “Gaan weg van my af.” Die skape sal “die ewige lewe” beërf. Die bokke sal “die ewige afsnyding” kry.—Matteus 25:46.b

Wat beteken dit vir ons?

20, 21. (a) Watter belangrike werk moet Christene doen? (b) Watter skeiding vind nou plaas? (c) Wat sal die situasie van mense wees wanneer die gelykenis van die skape en die bokke in vervulling begin gaan?

²⁰ Die vier apostels wat Jesus se antwoord oor die teken van sy teenwoordigheid en die voleinding van die stelsel gehoor het, het baie gehad om oor te dink. Hulle moes wakker bly en aanhou waak (Matteus 24:42). Hulle moes ook die getuieniswerk doen waarvan Markus 13:10 praat. Jehovah se Getuies is vandag ywerig besig met daardie werk.

²¹ Maar wat beteken hierdie vars begrip van die gelykenis van die skape en die bokke vir ons? Wel, mense kies reeds kant. Party is op ‘die breë pad wat na die vernietiging lei’, terwyl ander op ‘die smal pad wat na die lewe lei’ probeer bly (Matteus 7:13, 14). Maar die tyd wanneer Jesus finale oordeel sal uitspreek oor die skape en die bokke wat in die gelykenis voorgestel word, lê nog voor. Wanneer die Seun van die mens in die rol van Regter kom, sal hy oordeel dat baie ware Christene—in werklikheid “’n groot skare” toegewyde skape—sal kwalifiseer om deur die finale deel van “die groot verdrukking” tot in die nuwe wêreld te gaan. Daardie vooruitsig behoort nou ’n rede tot vreugde te wees (Openbaring 7:9, 14). Daarbenewens sal groot getalle uit “al die nasies” bewys het dat hulle soos hardnekkige bokke is. Hulle “sal weggaan, die ewige afsnyding in”. Wat ’n verligting vir die aarde!

22, 23. Waarom is ons predikingswerk vandag lewensbelangrik, aangesien die gelykenis eers in die toekoms vervul sal word?

²² Hoewel die oordeel wat in die gelykenis beskryf word in die nabye toekoms sal plaasvind, vind daar nou al iets lewensbelangriks plaas. Ons as Christene is besig met ’n lewensreddende werk om ’n boodskap te verkondig wat ’n skeiding van mense veroorsaak (Matteus 10:32-39). Paulus het geskryf: “Want ‘elkeen wat die naam van Jehovah aanroep, sal gered word’. Maar hoe sal hulle hom aanroep in wie hulle nie geloof gestel het nie? En hoe sal hulle geloof stel in hom van wie hulle nie gehoor het nie? En hoe sal hulle hoor sonder dat iemand preek?” (Romeine 10:13, 14). Ons openbare bediening bereik mense in meer as 230 lande met die naam van God en sy boodskap van redding. Die gesalfde broers van Christus neem steeds die voortou met hierdie werk. Sowat vyfmiljoen ander skape het nou by hulle aangesluit. En mense oor die hele aarde gee gehoor aan die boodskap wat deur Jesus se broers verkondig word.

²³ Baie hoor ons boodskap terwyl ons van huis tot huis of informeel getuig. Ander hoor moontlik van Jehovah se Getuies en wat ons verteenwoordig op maniere wat vir ons onbekend is. In watter mate sal Jesus, wanneer die oordeelstyd aanbreek, gemeenskapsaanspreeklikheid en gesinsverdienste in ag neem? Ons weet nie, en dit het geen sin om te spekuleer nie. (Vergelyk 1 Korintiërs 7:14.) Daar is nou baie mense wat God se volk ignoreer, bespot of openlik teëstaan. Dit is gevolglik ’n kritieke tyd; sulke mense word dalk persone wat Jesus as bokke sal oordeel.—Matteus 10:22; Johannes 15:20; 16:2, 3; Romeine 2:5, 6.

24. (a) Waarom is dit vir individue belangrik om gunstig op ons predikingswerk te reageer? (b) Watter gesindheid teenoor jou bediening het hierdie studie jou persoonlik gehelp om te hê?

²⁴ Maar gelukkig reageer talle gunstig, hulle bestudeer God se Woord en word Getuies van Jehovah. Party wat tans bokagtig lyk, verander moontlik en word soos skape. Wat belangrik is, is dat diegene wat reageer en die oorblyfsel van Christus se broers daadwerklik ondersteun nóú daardeur bewys lewer waarvolgens hulle aan Jesus se regterhand geplaas word wanneer hy, in die nabye toekoms, op sy troon gaan sit om te oordeel. Hulle word nou geseën en sal altyd geseën word. Hierdie gelykenis behoort ons dus tot yweriger deelname aan die Christelike bediening aan te spoor. Voor dit te laat is, wil ons alles moontlik doen om die goeie nuus van die Koninkryk te verkondig en só aan ander die geleentheid bied om daarop te reageer. Daarna berus dit by Jesus om te oordeel, hetsy veroordelend of gunstig.—Matteus 25:46.