“Julle is my getuies”

1, 2. (a) Wat beteken dit om ’n getuie te wees, en in watter opvallende opsig het hierdie wêreld se nuusmedia gefaal? (b) Waarom maak Jehovah nie op hierdie wêreld se media staat nie?

WAT beteken dit om ’n getuie te wees? Een woordeboek gee hierdie definisie: “Iemand wat ’n gebeurtenis waarneem en vertel wat gebeur het.” Byvoorbeeld, in die stad Pietermaritzburg is daar ’n koerant wat nou The Witness genoem word en al meer as 160 jaar uitgegee word. Die naam is gepas, aangesien die doel van ’n koerant is om akkuraat verslag te lewer oor gebeure wat in die wêreld plaasvind. Die stigter-redakteur van The Witness het belowe dat die koerant “die waarheid, die volle waarheid en niks anders as die waarheid” sal vertel nie.

² Ongelukkig het die wêreld se nuusmedia die belangrikste feite in die mensegeskiedenis grootliks geïgnoreer of selfs verdraai. Dit is beslis die geval met die feit wat die almagtige God deur middel van sy eertydse profeet Esegiël bekend gemaak het: “Die nasies sal moet weet dat ek Jehovah is” (Eseg. 39:7). Maar die Soewereine Heerser van die heelal maak nie op hierdie wêreld se media staat nie. Hy het sowat agtmiljoen Getuies wat mense van alle nasies vertel omtrent hom en hoe hy in die verlede sowel as die hede met die mensdom gehandel het. Hierdie leër Getuies verkondig ook wat God in die toekoms gaan doen om die mensdom te seën. Deur hierdie getuieniswerk ’n prioriteit te maak, hou ons ons godgegewe naam hoog, wat in Jesaja 43:10 beskryf word: “‘Julle is my getuies’, sê Jehovah, ‘ja, my kneg wat ek uitverkies het.’”

3, 4. (a) Wanneer het die Bybelstudente ’n nuwe naam aangeneem, en hoe het hulle daaroor gevoel? (Sien prent aan begin van artikel.) (b) Watter vrae sal ons nou bespreek?

³ Wat ’n voorreg is dit tog om Jehovah se naam te dra, want hy is “die Koning van die ewigheid”, wat sê: “Dit is my naam tot onbepaalde tyd, en dit is my gedagtenis van geslag tot geslag”! (1 Tim. 1:17; Eks. 3:15; vergelyk Prediker 2:16.) In 1931 het die Bybelstudente die naam Jehovah se Getuies aangeneem. Daarna is baie briewe van waardering in hierdie tydskrif gepubliseer. “Ons is verheug oor die goeie nuus dat ons ‘Jehovah se Getuies’ is, en ons het ons opnuut voorgeneem om hierdie nuwe naam waardig te wees”, het ’n gemeente in Kanada geskryf.

⁴ Hoe kan jy jou waardering toon vir die voorreg om God se naam te dra? En kan jy die Skriftuurlike konteks verduidelik waaruit ons naam, Jehovah se Getuies, geneem is?

GOD SE GETUIES IN DIE OU TYD

5, 6. (a) Op watter manier moes Israelitiese ouers getuies van Jehovah wees? (b) Wat is Israelitiese ouers nog beveel om te doen, en waarom moet ouers van vandag dit ook doen?

⁵ As individue was die Israeliete in Jesaja se dag “getuies” van Jehovah en was die nasie in sy geheel God se “kneg” (Jes. 43:10). Een manier waarop Israelitiese ouers getuig het, was om hulle kinders omtrent God se handelinge met hulle voorvaders te leer. Byvoorbeeld, toe die volk die opdrag gekry het om elke jaar die Pasga te vier, is daar vir hulle gesê: “Wanneer julle kinders vir julle sê: ‘Wat beteken hierdie diens vir julle?’ dan moet julle sê: ‘Dit is die offerande van die pasga aan Jehovah, wat die huise van die kinders van Israel in Egipte oorgeslaan het toe hy die Egiptenaars met die plaag getref maar ons huise bevry het’” (Eks. 12:26, 27). Hierdie ouers het dalk ook vir hulle kinders vertel hoe die heerser van Egipte gereageer het toe Moses hom genader het om te vra of die Israeliete Jehovah in die wildernis kan aanbid. Farao het gesê: “Wie is Jehovah, dat ek sy stem moet gehoorsaam om Israel weg te stuur?” (Eks. 5:2). Ouers kon natuurlik ook vir hulle kinders vertel dat Farao se vraag duidelik beantwoord is nadat tien plae die land verwoes het en die Israeliete by die Rooisee uit die hand van Egipte se leër gered is. Jehovah was—en is—die Almagtige. Die nasie Israel het ook lewende getuies geword van die feit dat Jehovah die ware God en die Vervuller van sy beloftes is.

⁶ Israeliete wat waardering gehad het vir die voorreg om Jehovah se naam te dra, het ongetwyfeld hierdie wonderlike verwikkelinge nie net aan hulle kinders vertel nie, maar ook aan die uitlanders wat slawe in hulle huis geword het. Nog ’n belangrike opdrag wat die Israeliete ontvang het, was om hulle kinders op te lei om by God se standaarde van heiligheid te bly. Jehovah het gesê: “Julle moet heilig wees, want ek, Jehovah julle God, is heilig” (Lev. 19:2; Deut. 6:6, 7). Wat ’n uitstekende voorbeeld stel dit vir Christenouers van vandag, want hulle moet ook hulle kinders in die weë van heiligheid oplei en hulle sodoende help om God se glorieryke naam te vereer!—Lees Spreuke 1:8; Efesiërs 6:4.

7. (a) Wat was die uitwerking op die omliggende nasies toe Israel getrou aan Jehovah was? (b) Watter verantwoordelikheid rus op almal wat God se naam dra?

⁷ Wanneer die Israeliete getrou was, het hulle dus ’n goeie getuienis oor God se naam gelewer. Daar is vir hulle gesê: “Al die volke van die aarde sal moet sien dat Jehovah se naam oor jou uitgeroep is, en hulle sal inderdaad vir jou bang wees” (Deut. 28:10). Maar ongelukkig was Israel se geskiedenis meestal ’n verslag van ontrouheid. Keer op keer het hulle mensgemaakte afgode aanbid. Wat meer is, hulle het net so wreed geword soos die Kanaänitiese gode wat hulle aanbid het, en hulle het hulle kinders geoffer en die armes onderdruk. Wat ’n kragtige les is dit tog vir ons om daarna te streef om altyd heilig te wees in navolging van die Allerheiligste, wie se naam ons dra!

“KYK! EK DOEN IETS NUUTS”

8. Watter opdrag het Jesaja van Jehovah ontvang, en hoe het Jesaja gereageer?

⁸ Jehovah het voorspel dat die nasie Israel getuies sou wees van ’n wonderbaarlike verlossing uit gevangenskap (Jes. 43:19). Die eerste ses hoofstukke van die boek Jesaja bevat meestal waarskuwings oor die rampspoed wat oor Jerusalem en sy omliggende stede sou kom. Jehovah, die volmaakte leser van harte, het vir Jesaja gesê dat hy moet aanhou om hierdie waarskuwing te verkondig, al sou hy ’n negatiewe reaksie kry. Jesaja was geskok en wou weet hoe lank God se nasie onberouvol sou bly. God se antwoord? “Totdat die stede in puin stort, om sonder inwoner te wees, en die huise sonder ’n mens is en die land verwoes is tot ’n woesteny.”—Lees Jesaja 6:8-11.

9. (a) Wanneer is Jesaja se profesie oor Jerusalem bewaarheid? (b) Watter hedendaagse situasie vereis dat ons waaksaam moet wees?

⁹ Jesaja het hierdie opdrag in die laaste jaar van koning Ussia se heerskappy, omstreeks 778 VHJ, ontvang. Hy het ongeveer 46 jaar lank as ’n profeet gedien, tot ná 732 VHJ, toe koning Hiskia regeer het. Dit was 125 jaar voor Jerusalem se vernietiging in 607 VHJ. God se volk is dus lank voor die tyd en herhaaldelik in kennis gestel oor wat met hulle nasie sou gebeur. Vandag maak Jehovah ook seker dat sy knegte ander in kennis stel van wat voorlê. Lesers van Die Wagtoring word al 135 jaar lank, vanaf die tydskrif se eerste nommer, aangespoor om bewus te wees van die feit dat Satan se goddelose heerskappy binnekort tot ’n einde sal kom en deur die Duisendjarige Heerskappy van Jesus Christus vervang sal word.—Op. 20:1-3, 6.

10, 11. Van watter vervulling van Jesaja se profesie was die Israeliete in Babilon getuies?

¹⁰ Talle gehoorsame Jode wat hulle aan die Babiloniërs oorgegee het, het Jerusalem se vernietiging oorleef en is na Babilon weggevoer (Jer. 27:11, 12). Daar het God se volk 70 jaar later die vervulling van ’n wonderlike profesie ondervind: “Só het Jehovah gesê, julle Terugkoper, die Heilige van Israel: ‘Ter wille van julle sal ek na Babilon stuur en die grendels van die gevangenisse laat afkom.’”—Jes. 43:14.

¹¹ In ooreenstemming met hierdie profesie het ’n wêreldskokkende gebeurtenis een nag vroeg in Oktober 539 VHJ plaasgevind. Terwyl die koning van Babilon en sy edelmanne mensgemaakte gode geloof het en wyn gedrink het uit heilige voorwerpe wat uit Jerusalem se tempel geneem is, het die leërs van Medië en Persië Babilon verower. In 538 of 537 VHJ het Babilon se veroweraar, Kores, die Jode beveel om terug te gaan en God se tempel in Jerusalem te herbou. Dit is alles deur Jesaja voorspel, insluitende Jehovah se belofte dat hy vir sy berouvolle volk sou voorsien en hulle sou beskerm terwyl hulle na Jerusalem terugkeer. God het hulle beskryf as “die volk wat ek vir my geformeer het, sodat hulle my lof sal verkondig” (Jes. 43:21; 44:26-28). Toe hierdie voormalige ballinge teruggekeer het en Jehovah se tempel in Jerusalem herbou het, het hulle getuies geword van die feit dat Jehovah, die enigste ware God, altyd sy woord vervul.

12, 13. (a) Wie is saam met die Israeliete by die herstelling van Jehovah se aanbidding ingesluit? (b) Wat word van die “ander skape” verwag terwyl hulle “die Israel van God” ondersteun, en watter hoop het hulle?

¹² Duisende nie-Israeliete was deel van die wedergebore nasie, en later het baie ander nie-Jode Joodse proseliete geword (Esra 2:58, 64, 65; Est. 8:17). Vandag gee “’n groot menigte” van Jesus se “ander skape” hulle lojale ondersteuning aan die gesalfde Christene, wat “die Israel van God” uitmaak (Op. 7:9, 10; Joh. 10:16; Gal. 6:16). Die groot menigte dra ook hierdie godgegewe naam, Jehovah se Getuies.

¹³ Gedurende die Duisendjarige Heerskappy van Christus sal die groot menigte die onbeskryflike vreugde hê om vir dié wat opgewek word, te verduidelik hoe dit was om gedurende die laaste dae van hierdie stelsel van dinge een van Jehovah se Getuies te wees. Maar ons sal dit slegs kan doen as ons nou getrou bly aan ons naam en daarna streef om heilig te bly. En ongeag hoe hard ons probeer, ons moet ook elke dag vergifnis vra vir enige gebrek aan heiligheid en erken dat ons sondaars is en dat dit ’n baie groot eer is om God se heilige naam te dra.—Lees 1 Johannes 1:8, 9.

WAT GOD SE NAAM BETEKEN

14. Wat beteken die naam Jehovah?

¹⁴ Ons kan ons waardering vergroot vir die eer om God se naam te dra deur te peins oor die betekenis daarvan. Die goddelike naam, wat dikwels met “Jehovah” vertaal word, kom van ’n Hebreeuse werkwoord wat aksie kan beskryf en met “om te word” vertaal kan word. Daar word gemeen dat die naam Jehovah dus “Hy laat word” beteken. Dit is ’n gepaste beskrywing van Jehovah se rol as die Skepper van die fisiese heelal en intelligente wesens sowel as die Vervuller van sy voorneme. Wanneer Jehovah sê dat hy iets sal doen, kan niemand hom keer nie, nie eens Satan nie.

15. Hoe het Jehovah ’n aspek van sy persoonlikheid geopenbaar wat in die betekenis van sy naam weerspieël word? (Sien die venster “’n Naam ryk aan betekenis”.)

¹⁵ Jehovah het ’n aspek van sy persoonlikheid geopenbaar deur ’n verwante werkwoord te gebruik om sy naam te beskryf. Toe Jehovah Moses gestuur het om sy volk uit Egipte te bevry, het Hy vir hom gesê: “Ek sal word wat ek sal word.” Toe het Jehovah bygevoeg: “Só moet jy vir die kinders van Israel sê: ‘Ek sal word het my na julle toe gestuur’” (Eks. 3:14). Jehovah sal dus onder enige omstandighede word wat ook al nodig is om sy voorneme te vervul. Vir die Israeliete, wat voorheen slawe was, was hy ’n Verlosser, ’n Beskermer, ’n Gids en ’n Voorsiener wat al hulle materiële en geestelike behoeftes bevredig het.

HOE ONS ONS DANKBAARHEID KAN TOON

16, 17. (a) Hoe kan ons ons dankbaarheid toon vir die voorreg om God se naam te dra? (b) Wat sal ons in die volgende artikel bespreek?

¹⁶ Vandag is Jehovah nog steeds getrou aan die betekenis van sy naam omdat hy al ons geestelike en materiële behoeftes bevredig. En tog is die betekenis van God se naam nie beperk tot wat hy self kies om te word nie. Dit sluit in wat hy laat gebeur in verband met die werk wat sy Getuies doen om sy voorneme te help verwesenlik. As ons hieroor peins, sal dit ons beweeg om sy naam voortdurend hoog te hou. Die 84-jarige Kåre, wat oor die afgelope 70 jaar ’n ywerige Getuie in Noorweë is, som dit so op: “Vir my is dit ’n groot eer om Jehovah, die Koning van die ewigheid, te dien en om deel te wees van die volk wat sy heilige naam dra. Dit is altyd ’n groot voorreg om Bybelwaarheid te verduidelik en om te sien hoe mense se oë verhelder wanneer hulle dit begryp. Dit gee my byvoorbeeld groot tevredenheid wanneer ek aan hulle verduidelik hoe Christus se losprysoffer werk en hoe hulle deur middel daarvan die ewige lewe in ’n vreedsame en regverdige nuwe wêreld kan verkry.”

¹⁷ Dit word wel op party plekke al hoe moeiliker om mense te vind wat omtrent God wil leer. Maar ervaar jy nie ook, soos Kåre, groot vreugde wanneer jy iemand vind wat luister en wanneer jy hom oor Jehovah se naam kan leer nie? Hoe kan ons egter Jehovah se Getuies en terselfdertyd getuies van Jesus wees? Hierdie vraag sal die onderwerp van ons volgende artikel wees.