Stem jy saam met die jong Rogelio? Watter een van die volgende menings klink vir jou redelik?

• Satan is nie ’n werklike persoon nie; hy is net ’n simbool van boosheid.

• Satan bestaan werklik, maar hy stel nie eintlik belang in mense nie.

• Satan is ’n magtige geesskepsel wat ’n groot invloed op die mensdom uitoefen.

Elkeen van hierdie beskouings het sy ondersteuners, miskien selfs miljoene. Maar maak dit werklik saak watter beskouing reg is? Wel, as Satan nie bestaan nie, is dié wat glo dat hy ’n werklike persoon is, mislei. As Satan bestaan maar nie eintlik in mense belangstel nie, is baie sonder rede op hulle hoede of selfs bang. Maar as Satan ’n bedrieglike manipuleerder is, is hy gevaarliker as wat die meeste mense dink.

Kom ons kyk hoe die Heilige Skrif die volgende vrae beantwoord: Wat of wie is Satan—’n simbool van boosheid of ’n geespersoon? As Satan ’n persoon is, hou hy ’n bedreiging vir jou in? Indien wel, hoe kan jy jou beskerm?

Dit is redelik maklik om te sê dat die Satan van wie ons in die Bybel lees, bloot ’n simbool van alle boosheid is. Maar is dit werklik wat die Bybel leer? Indien wel, waarom sê die Bybel dan dat Satan met Jesus Christus en selfs met God die Almagtige gepraat het? Kyk na twee van hierdie gesprekke.

TOE SATAN MET JESUS GEPRAAT HET

Aan die begin van Jesus se bediening het die Duiwel hom op drie maniere probeer versoek. Satan het Jesus eers probeer oorreed om sy godgegewe krag op ’n selfsugtige manier te gebruik om sy honger te stil. Toe het die Duiwel Jesus uitgedaag om sy lewe dwaaslik in gevaar te stel en die aandag op homself te vestig. Laastens het Satan vir Jesus heerskappy oor al die koninkryke van die wêreld aangebied in ruil vir een klein daad van aanbidding. Jesus het al drie slinkse aanvalle afgeweer deur elke keer die Skrif aan te haal.—Matteus 4:1-11; Lukas 4:1-13.

Met wie het Jesus gepraat? Met ’n bose deel van homself? Volgens die Bybel is Jesus “in alle opsigte soos ons op die proef gestel . . . , maar sonder sonde” (Hebreërs 4:15). Die Bybel sê ook: “Hy het geen sonde begaan nie, en ook is bedrog nie in sy mond gevind nie” (1 Petrus 2:22). Jesus het volmaak gebly en sy onkreukbaarheid gehandhaaf. Hy het nooit toegelaat dat enige boosheid in hom ontwikkel nie. Dit is duidelik dat Jesus nie met ’n bose deel van homself gepraat het nie; hy het met ’n werklike persoon gepraat.

Dieselfde gesprek lewer verdere bewys dat Satan ’n werklike persoon is.

• Onthou dat die Duiwel Jesus wêreldwye heerskappy aangebied het in ruil vir ’n daad van aanbidding (Matteus 4:8, 9). Hierdie aanbod sou sinloos gewees het as Satan nie ’n werklike persoon was nie. Wat meer is, Jesus het nie betwis dat Satan sulke indrukwekkende gesag het nie.

• Nadat Jesus die versoekings verwerp het, het die Duiwel “tot ’n ander geskikte tyd van hom gewyk” (Lukas 4:13). Lyk dit asof Satan in hierdie geval net iets boos is of dat hy eerder ’n onversetlike, vasbeslote teenstander is?

• Let op dat ‘engele gekom en Jesus begin bedien het’ (Matteus 4:11). Was hierdie engele werklike geespersone wat aanmoediging en praktiese hulp aan Jesus voorsien het? Beslis. Waarom sou ons dan aanneem dat Satan iets anders as ’n werklike geespersoon is?

TOE SATAN MET GOD GEPRAAT HET

Ons lees van hoe Satan met God gepraat het in die verslag oor die godvresende man Job. Hierdie verslag bevat twee gesprekke tussen die Duiwel en God. In albei gevalle het God Job geprys weens sy onkreukbaarheid. Satan het beweer dat Job God net om selfsugtige redes dien en het te kenne gegee dat God Job se lojaliteit koop. Die Duiwel het in werklikheid beweer dat hy Job beter ken as wat God hom ken. Jehovah het Satan toegelaat om Job van sy besittings, sy kinders en selfs sy gesondheid te beroof.a Later het dit duidelik geword dat Jehovah reg was oor Job, en Satan is ’n leuenaar bewys. God het Job vir sy onkreukbaarheid geseën.—Job 1:6-12; 2:1-7.

Het Jehovah in hierdie gesprekke tussen hom en Satan met ’n bose deel van homself gepraat? Die Bybel sê: “Wat die ware God betref, volmaak is sy weg” (2 Samuel 22:31). God se Woord sê ook: “Heilig, heilig, heilig is Jehovah God, die Almagtige” (Openbaring 4:8). Heilig beteken rein, afgeskeie van sonde. Jehovah is volmaak en vlekkeloos. Hy kan onmoontlik iets boos in hom hê.

Maar party beweer dat selfs Job nie ’n werklike persoon was nie en dat die hele gesprek dus sinnebeeldig was. Maar is hierdie redenasie logies? Ander Bybeltekste toon dat Job ’n werklike persoon was. Byvoorbeeld, in Jakobus 5:7-11 word Job gebruik as ’n voorbeeld om Christene aan te spoor om in moeilike tye te volhard en as ’n vertroostende herinnering dat Jehovah sulke volharding beloon. Watter krag sou hierdie voorbeeld gehad het as Job nie ’n werklike persoon was nie en die aanvalle van Satan net denkbeeldig was? Verder word Job in Esegiël 14:14, 20 saam met Noag en Daniël as ’n regverdige man beskryf. Soos Noag en Daniël, was Job ’n werklike persoon, ’n man van groot geloof. Aangesien Job ’n werklike persoon was, moes sy aanvaller, die bron van sy vervolging, tog sekerlik ook ’n werklike persoon gewees het.

Dit is duidelik dat die Bybel Satan as ’n werklike geespersoon uitbeeld. Maar jy wonder dalk: ‘Hou hy vandag ’n bedreiging vir my en my gesin in?’

WAT VAN ONS TYD?

Stel jou voor dat ’n klomp misdadigers skielik in julle stad intrek. Persoonlike veiligheid en sedes oor die algemeen sal natuurlik agteruitgaan. Kyk nou na ’n soortgelyke scenario: Satan en sy demone—werklike geespersone wat, soos Satan, teen God in opstand gekom het—word skielik tot die aarde beperk. Wat sou die gevolg wees? Wel, dink aan wat jy in die plaaslike en internasionale nuus sien.

• Sien jy ’n toename in sinlose geweld, ten spyte van pogings regoor die wêreld om dit stop te sit?

• Sien jy ’n toename in vermaak wat spiritisme bevat, ondanks die besorgdheid van baie ouers?

• Sien jy dat die omgewing meedoënloos vernietig word, ten spyte van welmenende pogings om dit te red?

• Lyk dit asof iets ernstigs fout is met die samelewing—dat die een of ander mag die mensdom na rampspoed dryf?

Let asseblief op wie volgens die Bybel verantwoordelik is vir vandag se probleme: “Toe is die groot draak neergeslinger, die oorspronklike slang, die een wat Duiwel en Satan genoem word, wat die hele bewoonde aarde mislei; hy is na die aarde neergeslinger, en sy engele is saam met hom neergeslinger. . . . Wee die aarde en die see, want die Duiwel het na julle toe neergedaal en het groot toorn, omdat hy weet dat hy ’n kort tydjie het” (Openbaring 12:9, 12). Nadat hulle die bewyse ondersoek het, het baie mense tot die slotsom gekom dat Satan ’n gevaarlike geespersoon is wat die wêreld om ons daadwerklik beïnvloed.

Jy wonder dalk hoe jy beskerming kan vind. Dit is tereg iets om oor besorg te wees. Die volgende artikel sal praktiese raad voorsien.

Soos koolstofmonoksied, is Satan onsigbaar, baie moeilik vir mense om te bespeur en uiters gevaarlik. Maar God het ons nie sonder hulp gelaat nie. Jy hoef Satan nie te vrees as jy van die volgende voorsienings van God gebruik maak nie.

Die vermoë om te kies. Jakobus 4:7 sê vir ons: “Staan die Duiwel teë, en hy sal van julle af wegvlug.” Hoewel Satan magtig is, kan hy jou nie dwing om dinge te doen wat jy nie wil doen nie. Jy het ’n keuse. Eerste Petrus 5:9 sê: “Weerstaan hom [die Duiwel], vas in die geloof.” Onthou dat Satan Jesus verlaat het nadat Jesus die drie versoekings ferm weerstaan het (Matteus 4:11). Jy kan ook kies om Satan se aanvalle te weerstaan.

Vriendskap met God. Jakobus 4:8 spoor ons aan: “Kom nader aan God.” Jehovah self nooi jou om ’n hegte vriendskap met hom aan te knoop. Hoe kan jy dit doen? Die beste manier om daarmee te begin, is deur meer omtrent hom uit die Bybel te leer (Johannes 17:3). Wat jy omtrent Jehovah leer, sal jou beweeg om hom lief te hê, en hierdie liefde sal jou motiveer om sy wil te doen (1 Johannes 5:3). Hoe sal jou hemelse Vader reageer wanneer jy nader aan hom kom? Jakobus sê verder: “[God] sal nader aan julle kom.”

Die belofte van beskerming. Spreuke 18:10 sê: “Die naam van Jehovah is ’n sterk toring. Die regverdige hardloop daarin en word beskerm.” Dit beteken natuurlik nie dat God se persoonlike naam ’n gelukbringer is nie. Dit beteken eerder dat diegene wat God se naam werklik respekteer, hom enige tyd om beskerming kan vra.

’n Praktiese voorbeeld. Handelinge 19:19 vertel ons iets insiggewends omtrent pas bekeerde Christene in Efese: “Heelparty van dié wat toorkunste beoefen het, het hulle boeke bymekaargebring en voor almal verbrand. En hulle het die waarde daarvan bereken en gevind dat dit vyftigduisend silwerstukke werd was.”a Daardie Christene het alle voorwerpe vernietig wat met spiritisme verband gehou het, ongeag hoeveel dit werd was. Hierdie voorbeeld kan ons vandag baie help. Hierdie wêreld is deurtrek van die okkulte en spiritisme. Selfs spiritistiese voorwerpe en gebruike wat onskuldig lyk, kan demone lok. Dit is noodsaaklik om sulke dinge heeltemal te vermy, ongeag wat dit verg.—Deuteronomium 18:10-12.

Rogelio, wat in die eerste artikel van hierdie reeks gemeld is, het die eerste 50 jaar van sy lewe nie aan die Duiwel geglo nie. Maar toe het hy sy beskouing verander. Waarom? “Vir die eerste keer in my lewe het ek ’n Bybel gekry”, vertel Rogelio. “Bybelkennis het my oortuig dat die Duiwel werklik bestaan. Dieselfde kennis help my nou om sy invloed te weerstaan.”

Wil jy graag die dag beleef wanneer Satan nie meer bestaan nie? Jy kan. Die Bybel voorspel ’n tyd in die toekoms wanneer die Duiwel, wat soveel mense mislei, “in die poel van vuur en swael geslinger” sal word (Openbaring 20:10). Fisiese vuur en swael kan ’n onsigbare geesskepsel natuurlik geen skade aandoen nie. Daarom moet die poel van vuur ewige vernietiging voorstel. Satan sal vir ewig uit die weg geruim wees. Wat ’n vreugdevolle tyd sal dit tog vir liefhebbers van God wees!

Intussen moet jy aanhou om soveel moontlik omtrent Jehovah en sy weë te leer.b Stel jou voor hoe dit sal wees om te lewe wanneer daar uiteindelik werklik gesê kan word: “Satan bestaan nie!”