ANTWOORDE OP BYBELVRAE

Waarom moet ons bid?

Jehovah God wil hê dat ons die vrymoedigheid moet hê om gereeld met hom te praat oor ons bekommernisse (Lukas 18:1-7). Hy luister omdat hy in ons belangstel. Aangesien ons hemelse Vader ons vriendelik nooi om te bid, kan ons sy uitnodiging gerus aanvaar.—Lees Filippense 4:6.

Gebed is nie bloot ’n manier om hulp te vra nie. Gebed help ons eerder om nader aan God te kom (Psalm 8:3, 4). As ons gereeld ons hart voor God uitstort, raak ons vriendskap met hom hegter.—Lees Jakobus 4:8.

Hoe moet ons bid?

Wanneer ons bid, wil God nie hê dat ons hoogdrawende woorde moet gebruik of gebede moet opsê wat ons uit ons kop geleer het nie. Ons hoef ook nie ’n sekere liggaamshouding in te neem nie. Jehovah nooi ons om uit die hart te bid (Matteus 6:7). In eertydse Israel het Hanna byvoorbeeld oor ’n ontstellende gesinsprobleem gebid. Toe haar benoudheid later in vreugde verander het, het sy God in hartgrondige gebed gedank.—Lees 1 Samuel 1:10, 12, 13, 26, 27; 2:1.

Wat ’n wonderlike voorreg het ons tog! Ons kan die Skepper vertel van ons bekommernisse. Ons kan hom ook loof en dank vir wat hy doen. Ons moet hierdie kosbare voorreg beslis nie verwaarloos nie.—Lees Psalm 145:14-16.