Christopher, Hannah en Gina is nie die enigstes wat so voel nie. Baie mense regoor die wêreld is oortuig dat God hulle as sy vriende beskou. Wat van jou? Voel jy dat jy na aan God is? Of sal jy graag nader aan hom wil kom? Jy wonder dalk: ‘Is dit werklik vir ’n blote mens moontlik om ’n hegte verhouding met God die Almagtige te hê? En indien wel, hoe?’

DIT IS MOONTLIK OM NA AAN GOD TE WEES

Volgens die Bybel is dit moontlik om ’n hegte, persoonlike verhouding met God te hê. Die Bybel sê dat God die Hebreeuse aartsvader Abraham “my vriend” genoem het (Jesaja 41:8). Let ook op die hartlike uitnodiging in Jakobus 4:8: “Kom nader aan God, en hy sal nader aan julle kom.” Dit is dus duidelik dat ’n hegte verhouding—’n vriendskap—met God moontlik is. Maar hoe kan jy ‘nader aan God kom’ en ’n goeie verhouding met hom geniet, aangesien hy onsigbaar is?

Om hierdie vraag te beantwoord, kan ons dink aan hoe ’n vriendskap tussen mense ontwikkel. Dit begin gewoonlik wanneer twee mense mekaar se naam leer ken. Dan, namate hulle gereeld met mekaar kommunikeer en mekaar vertel wat hulle dink en hoe hulle voel, word hulle vriendskap hegter. En wanneer hulle dinge vir mekaar probeer doen, versterk dit hulle vriendskap nog verder. Iets soortgelyks gebeur wanneer ’n hegte verhouding met God opgebou word. Kom ons kyk waarom dit die geval is.

Kan jy aan ’n goeie vriend van jou dink wie se naam jy nie ken nie? Waarskynlik nie. ’n Bulgaarse vrou met die naam Irina het tereg gesê: “Dit is nie moontlik om na aan God te kom as jy nie sy naam ken nie.” Gelukkig wil God hê dat jy na aan hom moet kom, soos in die vorige artikel gemeld is. Daarom het hy homself as ’t ware deur middel van die Bybel aan jou voorgestel deur te sê: “Ek is Jehovah. Dit is my naam.”—Jesaja 42:8.

Is dit werklik vir Jehovah belangrik of jy sy naam ken en gebruik? Dink hieraan: God se naam, wat geskryf is met vier Hebreeuse konsonante wat as die Tetragrammaton bekend staan, kom byna 7 000 keer in die oorspronklike teks van die Hebreeuse Geskrifte voor—baie meer as enige ander naam wat in die Bybel gemeld word. Dit is ongetwyfeld ’n bewys dat Jehovah wil hê dat ons sy naam moet ken en gebruik.a

Maar party voel dat dit nie respekvol is om God se naam te gebruik nie, aangesien hy heilig en almagtig is. Dit sal natuurlik verkeerd wees om God se naam op ’n ongepaste manier te gebruik, net soos jy nie die naam van jou boesemvriend sal misbruik nie. Dit is egter Jehovah se wil dat diegene wat hom liefhet, sy naam verheerlik en bekend maak (Psalm 69:30, 31; 96:2, 8). Onthou dat Jesus sy volgelinge leer bid het: “Ons Vader in die hemele, laat u naam geheilig word.” Ons kan help om God se naam te heilig deur dit bekend te maak. Sodoende kom ons nader aan hom.—Matteus 6:9.

Die Bybel toon dat God spesiale aandag skenk aan “dié wat aan sy naam dink”, of moontlik, dit “kosbaar ag” (Maleagi 3:16; voetnoot in NW). Aangaande so iemand belowe Jehovah: “Ek sal hom beskerm omdat hy my naam leer ken het. Hy sal my aanroep, en ek sal hom antwoord. Ek sal met hom wees in benoudheid” (Psalm 91:14, 15). Om Jehovah se naam te ken en te gebruik, is dus belangrik as ons ’n hegte verhouding met hom wil geniet.

Goeie vriende kommunikeer met mekaar so dikwels as wat hulle omstandighede toelaat, hetsy van aangesig tot aangesig of per telefoon, e-pos, video of brief. Om na aan God te wees, moet ons dus gereeld met hom kommunikeer. Maar hoe doen ’n mens dit?

Ons kan met Jehovah praat deur middel van gebed. Maar gebed tot God is nie dieselfde as ’n alledaagse gesprek met een van ons vriende nie. Ons moet besef dat ons ons Skepper, die Allerhoogste van die heelal, aanspreek wanneer ons bid. Dit moet ons beweeg om met diep respek en ontsag te bid. As ons wil hê dat ons gebede deur God verhoor moet word, moet ons ook aan sekere vereistes voldoen. Kom ons kyk na drie van hierdie vereistes.

Eerstens, gebede moet uitsluitlik tot Jehovah God gerig word—nie tot Jesus, ’n “heilige” of ’n beeld nie (Eksodus 20:4, 5). Die Bybel sê duidelik: “Laat julle versoeke in alles deur gebed en smeking tesame met danksegging by God bekend word” (Filippense 4:6). Tweedens, gebede moet in die naam van God se Seun, Jesus Christus, gedoen word. Jesus het self gesê: “Niemand kom na die Vader behalwe deur my nie” (Johannes 14:6). Derdens, ons gebede moet in ooreenstemming met God se wil wees. Die Bybel sê: “Hy . . . hoor [ons], ongeag wat ons volgens sy wil vra.”a—1 Johannes 5:14.

’n Hegte verhouding sal natuurlik nie behoue bly as een persoon al die praatwerk doen nie. Net soos twee vriende met mekaar kommunikeer, moet ons God toelaat om met ons te praat, en ons moet luister wanneer hy dit doen. Weet jy hoe God met ons praat?

Jehovah God “praat” vandag met ons deur middel van sy geskrewe Woord, die Bybel (2 Timoteus 3:16, 17). Waarom sê ons so? Ter toeligting: Stel jou voor dat jy ’n brief van ’n goeie vriend ontvang. Nadat jy dit gelees het, vertel jy ander dalk opgewonde: “Ek het nou net van my vriend gehoor!” Tog was die kommunikasie nie mondelings nie, maar skriftelik. Net so laat jy Jehovah toe om met jou te praat deur die Bybel te lees. Gina, wat in die eerste artikel aangehaal is, sê dus: “Ek dink dat as ek wil hê dat God my as ’n vriend moet beskou, ek sy ‘brief’ aan ons—die Bybel—moet ondersoek.” Sy voeg by: “Daaglikse Bybellees het my nader aan God laat kom.” Laat jy Jehovah toe om elke dag met jou te praat deur daagliks sy Woord, die Bybel, te lees? As jy dit doen, sal dit jou help om nader aan God te voel.

“Jy moet net sê wat jy wil hê ek moet doen, en ek sal dit met graagte doen.” Jy sal waarskynlik nie so iets vir ’n algehele vreemdeling of ’n blote kennis sê nie. Maar jy sal moontlik nie huiwer om dit vir ’n dierbare vriend te sê nie. Goeie vriende is van nature geneig om vir mekaar te doen wat hulle gevra word.

Die Bybel toon dat Jehovah gereeld dinge doen wat hy weet sy aanbidders vreugde sal verskaf. Koning Dawid, wat ’n hegte verhouding met God gehad het, het byvoorbeeld gesê: “Baie dinge het u gedoen, O Jehovah my God, ja, u wonderlike werke en u gedagtes teenoor ons . . . Dit [het] te talryk geword om te vertel” (Psalm 40:5). Wat meer is, Jehovah doen selfs dinge wat diegene wat hom nog nie ken nie, vreugde verskaf—hy vul hulle “harte geheel en al met voedsel en vrolikheid”.—Handelinge 14:17.

Aangesien Jehovah behae daarin skep om te doen wat ander vreugde verskaf, is dit net redelik om te verwag dat diegene wat vriende van God wil wees, die dinge sal doen wat sy ‘hart bly maak’ (Spreuke 27:11). Maar presies wat kan jy doen om God te behaag? Die Bybel antwoord: “[Moenie] vergeet om goed te doen en mededeelsaam te wees nie, want sulke offerandes is vir God welbehaaglik” (Hebreërs 13:16). Beteken dit dat ons net goed moet doen en mededeelsaam moet wees om Jehovah te behaag?

“Sonder geloof is dit onmoontlik om vir [God] welbehaaglik te wees”, sê die Bybel (Hebreërs 11:6). Dit is betekenisvol dat Abraham “Jehovah se vriend” genoem is eers nadat hy “geloof in Jehovah gestel” het (Jakobus 2:23). Jesus Christus het ook beklemtoon dat ons ‘geloof in God moet beoefen’ as ons God se seën wil geniet (Johannes 14:1). Hoe kan jy dan die geloof verkry waarna God soek in diegene wat hy na aan hom laat kom? Jy kan begin deur God se Woord, die Bybel, gereeld te bestudeer. Deur dit te doen, sal jy “juiste kennis van sy wil” verkry en sodoende leer hoe om “hom ten volle te behaag”. Dan, namate jy voortgaan om juiste kennis van Jehovah in te neem en om toe te pas wat jy omtrent sy regverdige vereistes leer, sal jou vertroue in hom toeneem en sal hy steeds nader aan jou kom.—Kolossense 1:9, 10.

Wat kan jy doen om na aan God te wees? Ons het ’n aantal stappe bespreek wat jy kan doen om ’n hegte verhouding met hom op te bou:

1. Ken en gebruik God se naam, Jehovah.

2. Kommunikeer gereeld met hom deur te bid en sy Woord, die Bybel, te bestudeer.

3. Hou aan om te doen wat Jehovah behaag.

Sal jy in die lig hiervan sê dat jy doen wat nodig is om na aan God te wees? Is daar gebiede waarop jy dink jy kan verbeter? Dit verg natuurlik inspanning, maar dink aan die resultate.

“Om ’n hegte verhouding met God op te bou, is enige inspanning werd”, sê Jennifer, in die Verenigde State. “Hierdie verhouding bring baie seëninge mee: groter vertroue in God, ’n beter begrip van sy persoonlikheid, maar bowenal, meer liefde. Daar is geen beter lewenswyse nie!”

As jy ’n hegter verhouding met God wil geniet, sal Jehovah se Getuies jou met graagte help. Hulle kan reël om die Bybel gratis met jou te studeer. Jy is ook welkom om hulle Bybelvergaderinge by te woon by die plaaslike Koninkryksaal, waar jy kan assosieer met mense wat hulle verhouding met God koester.a As jy dit doen, sal jy ook voel soos die psalmis wat gesê het: “Wat my betref, dit is vir my goed om nader aan God te kom.”—Psalm 73:28.