Was dit redelik van Dawid om te verwag dat God besorg moet wees oor hom? Is God besorg oor jou? Vir baie mense is dit moeilik om te glo dat ’n almagtige God in hulle belangstel. Waarom?

Een rede is dat God ’n baie hoër lewensvorm as blote mense is. Vanuit sy verhewe posisie is hele nasies “soos ’n druppel uit ’n emmer; en soos die stoflagie op die weegskaal is hulle gereken” (Jesaja 40:15). ’n Skeptiese hedendaagse skrywer het selfs tot die slotsom gekom dat dit “uiters verwaand is om te glo dat daar ’n goddelike wese is wat persoonlike en onmiddellike belangstelling in jou toon”.

Aan die ander kant dink party mense dat hulle weens hulle dade nie God se besorgdheid waardig is nie. ’n Middeljarige man met die naam Jim vertel byvoorbeeld: “Ek het aanhoudend vir vrede en selfbeheersing gebid, maar vroeër of later het ek weer kwaad geword. Uiteindelik het ek tot die slotsom gekom dat ek deur en deur goddeloos is en dat God my nie kan help nie.”

Is God so ver van mense af dat hy ons nie raaksien nie? Hoe voel hy werklik oor sy onvolmaakte skepsele? Geen mens kan tereg namens God praat en hierdie vrae sonder goddelike openbaring beantwoord nie. Maar God se geïnspireerde boodskap aan die mensdom—die Bybel—verseker ons dat hy nie ’n afsydige wese is nie en dat hy besorg is oor elkeen van ons. Die Bybel sê dat “hy eintlik nie ver van elkeen van ons af is nie” (Handelinge 17:27). In die volgende vier artikels sal ons bespreek wat God sê omtrent sy persoonlike belangstelling in mense en hoe hy hierdie belangstelling toon in werklike mense soos jy.

WAAROM PARTY TWYFEL: Volgens ’n onlangse studie is daar moontlik in ons sterrestelsel alleen ten minste 100 miljard planete. Aangesien die heelal so ontsaglik groot is, vra baie mense: ‘Waarom sou die almagtige Skepper let op wat nietige mense op ’n klein planeetjie doen?’

WAT GOD SE WOORD LEER: God het nie bloot vir ons die Bybel gegee en toe belangstelling in ons verloor nie. Jehovah gee ons eerder die versekering: “Ek sal raad gee met my oog op jou.”—Psalm 32:8.

Dink aan Hagar, ’n Egiptiese vrou van die 20ste eeu VHJ. Omdat Hagar oneerbiedig was teenoor haar werkgeefster, Sarai, het Sarai haar verneder, en Hagar het na die wildernis gevlug. Het God belangstelling in Hagar verloor noudat sy ’n fout begaan het? Volgens die Bybel het “Jehovah se engel haar . . . gevind”. Daardie engel het Hagar gerusgestel en gesê: “Jehovah het van jou ellende gehoor.” Hagar het toe vir Jehovah gesê: “U is ’n God wat sien.”—Genesis 16:4-13.

Die “God wat sien”, waak ook oor jou. Ter toeligting: ’n Liefdevolle ma hou veral oor haar klein kindertjies ’n wakende oog, want hoe jonger ’n kind is, hoe nodiger het hy sy ouer se aandag. Net so waak God veral oor ons wanneer ons nederig en kwesbaar is. “In die hoogte en in die heilige plek woon ek,” sê Jehovah, “asook by die verbryselde en nederige van gees, om die gees van die nederiges te laat herlewe en om die hart van die verbryseldes te laat herlewe.”—Jesaja 57:15.

Maar jy wonder dalk: ‘Hoe waak God oor my? Oordeel hy my volgens my voorkoms of kyk hy dieper as die oppervlak en verstaan hy werklik wie ek is?’

WAAROM PARTY TWYFEL: Baie dink dat God mense net as sondaars beskou—as onrein skepsele wat nie sy aandag waardig is nie. Kendra, wat aan depressie gely het, het baie skuldig gevoel omdat sy nie heeltemal aan God se vereistes kon voldoen nie. Sy het dus opgehou bid.

WAT GOD SE WOORD LEER: Jehovah kyk verder as jou onvolmaakthede en verstaan wie jy werklik is. “Hy weet goed hoe ons gevorm is”, sê die Bybel, “gedagtig dat ons stof is.” Wat meer is, hy handel nie met ons “volgens ons sondes nie”, maar hy is barmhartig en vergewe ons wanneer ons berouvol is.—Psalm 103:10, 14.

Dink aan Dawid, die Israelitiese koning wat in die eerste artikel van hierdie reeks genoem is. Dawid het in gebed vir God gesê: “U oë het selfs my embrio gesien, en in u boek was al die dele daarvan opgeskrywe . . . Deurvors my, o God, en ken my hart” (Psalm 139:16, 23). Ja, al het Dawid gesondig—soms baie ernstig—was hy oortuig dat Jehovah kon sien dat hy ’n berouvolle hart het.

Jehovah verstaan jou beter as wat enige mens jou verstaan. “Die mens sien wat vir die oë sigbaar is”, sê die Bybel, “maar Jehovah sien wat die hart is” (1 Samuel 16:7). God weet waarom jy op ’n sekere manier optree—hoe oorerflikheid, die manier waarop jy grootgeword het, jou omgewing en jou persoonlikheid jou die soort mens maak wat jy is. Hy sien watter soort mens jy probeer wees, en hy waardeer jou pogings, al begaan jy foute.

Maar hoe gebruik God sy deeglike kennis van wie jy werklik is, om jou te vertroos?

WAAROM PARTY TWYFEL: Selfs wanneer hulle vertroosting dringend nodig het, dink party mense dat dit selfsugtig is om God te vra om in te gryp en hulle te help om hulle probleme die hoof te bied. “Wanneer ek dink aan die ontsaglike aantal mense in die wêreld—en die ernstige probleme waarmee hulle te kampe het”, sê ’n vrou met die naam Raquel, “lyk my probleme so onbenullig dat ek huiwer om God se hulp te vra.”

WAT GOD SE WOORD LEER: God het reeds op ’n merkwaardige manier ingegryp om die mens te help en te vertroos. Almal wat vandag op die aarde is, het oorgeërfde sonde—wat beteken dat hulle nie in staat is om heeltemal aan God se vereistes te voldoen nie. Maar God het “ons liefgehad en sy Seun [Jesus Christus] uitgestuur . . . as ’n soenoffer vir ons sondes” (1 Johannes 4:10). Deur Jesus se offerdood maak God dit vir ons moontlik om vergifnis van sondes te kry, ’n rein gewete te hê en die hoop te hê om vir ewig in ’n vreedsame nuwe wêreld te lewe.a Maar is hierdie offerande bloot vir die mensdom as ’n geheel, of toon dit dat God in jou persoonlik belangstel?

Beskou die apostel Paulus. Die offerande van Jesus het hom so diep geraak dat hy geskryf het: “Ek [lewe] deur die geloof in die Seun van God, wat my liefgehad het en homself vir my oorgegee het” (Galasiërs 2:20). Jesus het weliswaar gesterf voordat Paulus ’n Christen geword het. Maar Paulus het hierdie offerande beskou as God se persoonlike gawe aan hom.

Die offerdood van Jesus is ook God se persoonlike gawe aan jou. Hierdie gawe toon hoe kosbaar jy vir God is. Dit kan jou “ewige troos en goeie hoop” gee en jou sodoende “standvastig maak in elke goeie daad en woord”.—2 Tessalonisense 2:16, 17.

Maar Jesus het byna 2 000 jaar gelede sy lewe as ’n offerande gegee. Watter bewys is daar dat God vandag in jou belangstel?

WAAROM PARTY TWYFEL: Baie mense wat aan God glo, voel ver verwyderd van hom. “Ek het hom net beskou as die God wat alles geskep het”, erken Christina, ’n vrou van Ierland wat elke week kerk toe gegaan het. “Maar ek het hom nie geken nie. Ek het nooit na aan hom gevoel nie.”

WAT GOD SE WOORD LEER: Wanneer ons verlore voel, hou Jehovah aan om ons te probeer help. Jesus het God se besorgdheid oor ons soos volg toegelig: “As ’n sekere man honderd skape het en een van hulle dwaal af, sal hy nie die nege-en-negentig op die berge laat staan en die een wat afdwaal, gaan soek nie?” Wat is die les? “Net so is dit vir my Vader wat in die hemel is, nie wenslik dat een van hierdie kleintjies vergaan nie.”—Matteus 18:12-14.

Elkeen “van hierdie kleintjies” is kosbaar vir God. Hoe ‘gaan soek God die een wat afdwaal’? Volgens die teks wat aan die begin aangehaal is, trek Jehovah mense na hom.

Kyk hoe God die inisiatief geneem het om opregte mense te trek. In die eerste eeu HJ het God die Christendissipel Filippus na ’n Etiopiese amptenaar se wa gestuur om ’n Bybelprofesie wat die amptenaar gelees het, te verduidelik (Handelinge 8:26-39). Later het God die apostel Petrus gestuur na die huis van ’n Romeinse leëroffisier met die naam Kornelius, wat smeekbedes gedoen het en God graag wou aanbid (Handelinge 10:1-48). God het ook die apostel Paulus en sy metgeselle na ’n rivier buite die stad Filippi gestuur. Daar het hulle “’n aanbidder van God” met die naam Lidia ontmoet, en “Jehovah het haar hart wyd oopgemaak om aandag te skenk”.—Handelinge 16:9-15.

In al hierdie gevalle het Jehovah seker gemaak dat diegene wat hom gesoek het, die geleentheid gekry het om hom te leer ken. Wie besoek mense vandag by hulle huise en in openbare plekke om die Bybel se boodskap oor God aan hulle bekend te maak? Baie sal sê: “Jehovah se Getuies.” Vra jou af: ‘Gebruik God hulle dalk om my te probeer help?’ Ons spoor jou aan om tot God te bid vir hulp om gunstig te reageer op sy pogings om jou na hom te trek.a