Dit is hoe ’n 13-jarige meisie gevoel het toe sy ’n hondjie as ’n troeteldier gekry het. ’n Suksesvolle sakevrou het gesê dat ’n rekenaar wat haar pa haar gegee het toe sy op hoërskool was, ’n geskenk is wat haar lewe verander het. En ’n pasgetroude man het gedink dat die kaartjie wat sy vrou vir hulle eerste huweliksherdenking gemaak het, die beste geskenk is wat hy nog ooit ontvang het.

Elke jaar spandeer baie mense tyd en energie om na die “beste” geskenk vir ’n vriend of ’n familielid te soek wanneer daar ’n spesiale geleentheid is. En die meeste mense sal graag wil hoor dat die persoon sê dat dit die beste geskenk nog ooit is. Wat van jou? Wil jy graag geskenke gee en ontvang wat regtig waardeer word?

Om geskenke te gee of te ontvang, is baie lekker. Dit maak nie net die persoon wat dit ontvang, gelukkig nie, maar dit laat die persoon wat die geskenk gee, ook goed voel. Die Bybel sê: “Dit verskaf groter geluk om te gee as om te ontvang” (Handelinge 20:35). Dit kan ’n mens nog gelukkiger maak as die persoon wat die geskenk ontvang, dit baie waardeer.

Hoe kan jy dan seker maak dat die geskenke wat jy gee, jou en die persoon vir wie jy dit gee, regtig gelukkig sal maak? En as dit nie moontlik is om die “beste” geskenk te gee nie, wat kan jy doen sodat jou geskenk regtig waardeer word?

Dit kan moeilik wees om die ideale geskenk vir iemand te kry. Die persoon wat dit gaan ontvang, sal in elk geval besluit of dit vir hom waardevol is of nie. En waarvan een persoon hou, is dalk glad nie waarvan iemand anders hou nie.

’n Tiener sal dalk dink dat die nuutste elektroniese toestel die perfekte geskenk is. Maar ’n grootmens sal dalk iets wat sentimentele waarde het, soos ’n familie-erfstuk, verkies. In party kulture wil mense, jonk en oud, eerder hê dat jy vir hulle geld as ’n geskenk moet gee. Die een wat dit ontvang, kan dan self besluit wat om daarmee te koop.

Baie mense wat regtig omgee, hou aan om na die beste geskenk vir ’n spesiale persoon te soek, al is dit soms moeilik. Hoewel dit nie altyd moontlik is om so ’n geskenk te kry nie, sal jy dit dalk kan doen as jy die volgende dinge in gedagte hou. Kom ons kyk na vier faktore wat daartoe sal bydra dat die persoon wat dit ontvang, daarmee tevrede sal wees.

Wat die persoon wil hê. ’n Man in Belfast, Noord-Ierland, het gesê dat ’n resiesfiets wat hy gekry het toe hy 10 of 11 jaar oud was, die beste geskenk is wat hy nog ooit gekry het. Hoekom? “Want ek wou dit bitter graag hê”, het hy gesê. Hierdie woorde wys dat wat ’n persoon graag wil hê, baie te doen het met hoe belangrik ’n geskenk vir hom sal wees. So dink aan die persoon vir wie jy ’n geskenk wil gee. Probeer uitvind wat vir hom belangrik is, want dit het dikwels ’n invloed op wat hy wil hê. Byvoorbeeld, dit is dalk vir ’n ouma en oupa belangrik om tyd saam met hulle familie te spandeer. Hulle wil dalk graag hulle kinders en kleinkinders soveel as moontlik sien. Hulle sal eerder saam wil gaan op ’n familie-vakansie as om enige ander geskenk te ontvang.

Om uit te vind wat ’n persoon regtig wil hê, moet jy baie goed luister. Die Bybel sê dat ons “gou [moet] wees om te hoor, stadig om te praat” (Jakobus 1:19). Wanneer jy met jou vriende en familie gesels, moet jy mooi luister sodat jy kan agterkom waarvan hulle hou en waarvan hulle nie hou nie. Dan sal dit vir jou makliker wees om vir hulle iets te gee wat hulle baie sal waardeer.

Wat die persoon nodig het. ’n Persoon sal dalk selfs ’n eenvoudige of ’n goedkoop geskenk waardeer as dit iets is wat hy regtig nodig het. Maar hoe sal jy weet?

Die maklikste manier om uit te vind wat ’n persoon nodig het of dalk graag wil hê, is om hom eenvoudig net te vra. Maar baie persone geniet dit meer om iemand met net die regte geskenk te verras. En hoewel party mense maklik vir jou sal sê waarvan hulle hou of nie hou nie, sal hulle nie noodwendig vir jou sê wat hulle regtig nodig het nie.

Daarom moet jy oplettend wees en uitvind wat die persoon se omstandighede is. Is hy of sy jonk of oud, getroud of ongetroud, dalk geskei, het hulle huweliksmaat gesterf, is hulle werkloos of het hulle afgetree? Dink mooi na oor wat ’n persoon regtig nodig het.

Om te verstaan wat die persoon werklik nodig het, praat met ander mense wat al in soortgelyke omstandighede was. Hulle sal dalk vir jou kan vertel van iets wat ’n persoon in daardie omstandighede nodig het waaraan jy nooit sou gedink het nie. Met hierdie insig sal jy vir die persoon ’n unieke geskenk kan gee wat hy beslis kan gebruik.

Die regte tyd. Die Bybel sê: “Hoe goed is ’n woord op die regte tyd tog!” (Spreuke 15:23). Hierdie teks wys dat dit ’n groot verskil kan maak as ons die regte tyd kies om iets te sê of te doen. Net soos ’n mens daarvan hou om na woorde te luister wat op die regte tyd gesê word, kan ’n geskenk op die regte tyd of by die regte geleentheid ’n persoon baie bly maak.

’n Vriend trou binnekort. ’n Jongmens maak een van die dae klaar met skool. ’n Getroude paartjie verwag ’n baba. Dit is net ’n paar geleenthede wanneer daar gewoonlik geskenke gegee word. Party vind dit prakties om ’n lysie te maak van spesiale geleenthede wat in die komende jaar gaan gebeur. Dit help hulle om te beplan sodat hulle die beste geskenk vir elke geleentheid kan koop.a

Dit is natuurlik nie nodig om net vir iemand ’n geskenk te gee wanneer daar ’n spesiale geleentheid is nie. Jy kan dit enige tyd doen, en dit sal jou ook gelukkig maak. Maar jy moet versigtig wees. Byvoorbeeld, as ’n man sonder ’n goeie rede vir ’n vrou ’n geskenk gee, kan sy dalk dink dat hy in haar belangstel. As hy nie in haar belangstel nie, kan so ’n geskenk tot ’n misverstand of probleme lei. Dit beklemtoon hoe belangrik dit is om die rede waarom jy die geskenk gee, in gedagte te hou.

Die rede vir die geskenk. Soos die voorbeeld in die vorige paragraaf wys, is dit goed om in gedagte te hou of die persoon wat die geskenk ontvang, dalk die verkeerde idee kan kry. Maar dit sal ook goed wees as die persoon wat die geskenk gee seker maak waarom hy of sy die geskenk gee. Hoewel die meeste mense graag sal wil dink dat hulle ’n goeie rede het om geskenke te gee, is daar baie wat gedurende sekere tye van die jaar net geskenke gee omdat hulle verplig voel om dit te doen. Ander gee weer geskenke omdat hulle op ’n spesiale manier behandel wil word of omdat hulle iets terugverwag.

Hoe kan jy seker maak dat jy geskenke vir die regte rede gee? Die Bybel sê: “Laat al julle aangeleenthede in liefde geskied” (1 Korintiërs 16:14). As jy geskenke gee uit opregte liefde en omdat jy vir mense omgee, sal hulle bly wees om ’n geskenk by jou te kry. En dit sal jou ook baie gelukkig maak omdat jy regtig vrygewig is. Wanneer jy iets uit jou hart gee, maak jy ook ons hemelse Vader bly. Die apostel Paulus het die Christene in eertydse Korinte geprys omdat hulle vrygewig en gewillig was om hulle mede-Christene in Judea te help. Paulus het vir hulle gesê: “God het ’n blymoedige gewer lief.”—2 Korintiërs 9:7.

Wanneer jy die faktore wat ons bespreek het, in gedagte hou, kan dit jou help om geskenke te gee wat ander mense bly maak. Hierdie faktore en ook ander dinge het ’n rol gespeel in God se reëling om aan die mens die grootste geskenk nog ooit te gee. Vind uit wat hierdie wonderlike geskenk is deur die volgende artikel te lees.

“Elke goeie gawe en elke volmaakte geskenk kom van bo, want dit daal neer van die Vader van die hemelse ligte” (Jakobus 1:17). Hierdie teks wys hoe vrygewig ons hemelse Vader, Jehovah God, is. Maar van al die geskenke wat God aan die mens gegee het, is daar een wat die heel beste is. Wat is dit? Jesus het die volgende bekende woorde in Johannes 3:16 gesê: “God het die wêreld so liefgehad dat hy sy enigverwekte Seun gegee het, sodat elkeen wat geloof in hom beoefen, nie vernietig sal word nie maar die ewige lewe kan hê.”

Die geskenk van God se enigverwekte Seun is beslis die grootste geskenk wat enigeen van ons nog ooit gekry het. Deur middel van hierdie geskenk kan ons bevry word uit slawerny aan sonde, ouderdom en die dood (Psalm 51:5; Johannes 8:34). Al probeer ons hoe hard, is daar niks wat ons op ons eie kan doen om uit hierdie slawerny vrygelaat te word nie. Maar omdat God ons baie liefhet, het hy voorsien wat nodig is sodat ons vrygemaak kan word. Deur sy enigverwekte Seun, Jesus Christus, as die losprys te gee, het Jehovah God dit vir gehoorsame mense moontlik gemaak om die vooruitsig op die ewige lewe te hê. Maar wat presies is die losprys? Hoekom is dit nodig? En hoe kan dit ons bevoordeel?

’n Losprys word betaal om iets wat aan jou behoort het, terug te koop of om iemand uit slawerny te bevry. Die Bybel verduidelik dat ons eerste ouers, Adam en Eva, sonder sonde geskep was. Hulle het die vooruitsig gehad om vir ewig op ’n paradysaarde te woon saam met die kinders wat hulle later sou hê (Genesis 1:26-28). Ongelukkig het hulle dit alles verloor omdat hulle gekies het om ongehoorsaam aan God te wees. Deur dit te doen, het hulle sondaars geword. Wat was die gevolg? Die Bybel sê: “Daarom, net soos deur een mens die sonde in die wêreld ingekom het en die dood deur die sonde en die dood só tot alle mense deurgedring het omdat hulle almal gesondig het” (Romeine 5:12). Adam kon toe nie meer volmaakte lewe aan sy nageslag oordra nie, net sonde en die dood.

Die waarde van ’n losprys moet gelyk wees aan die waarde van dit wat verloor is. Toe Adam opsetlik ongehoorsaam aan God was, het hy gesondig en as gevolg hiervan is ’n volmaakte menselewe verloor—Adam se lewe. Volgens die Bybel is dit hoe Adam se nageslag slawe van sonde en die dood geword het. Daarom moes ’n ander volmaakte menselewe opgeoffer word—Jesus se lewe. Hierdie offerande het bevryding van slawerny moontlik gemaak (Romeine 5:19; Efesiërs 1:7). Dit is net omdat God hierdie losprys uit liefde betaal het dat die mens die vooruitsig het om iets te geniet wat Adam en Eva verloor het—ewige lewe op ’n paradysaarde.—Openbaring 21:3-5.

As ons besef dat God se geskenk van die losprys die ewige lewe moontlik maak, is dit duidelik dat dit die heel beste geskenk is. Kom ons kyk weer na die faktore wat in die vorige artikel bespreek is om uit te vind hoekom die losprys ’n “volmaakte geskenk” is.

Dit gee ons alles wat ons wil hê. Mense wil baie graag aanhou lewe (Prediker 3:11). Al is dit ons begeerte, is daar niks wat ons op ons eie kan doen om langer te lewe nie. Maar die losprys maak dit vir ons moontlik om vir ewig te lewe. Die Bybel sê: “Want die loon wat die sonde betaal, is die dood, maar die gawe wat God gee, is die ewige lewe deur Christus Jesus, ons Here.”—Romeine 6:23.

Dit is presies wat ons nodig het. Geen mens kon die losprys voorsien nie. Die Bybel verduidelik: “Die loskoopprys vir hulle siel is so kosbaar dat dit tot onbepaalde tyd ontbreek” (Psalm 49:8). Daarom het ons God se hulp dringend nodig gehad om ons van slawerny aan sonde en die dood te bevry. Maar God het presies voorsien wat ons nodig het, “bevryding deur die losprys wat deur Christus Jesus betaal is.”—Romeine 3:23, 24.

Dit kom op die regte tyd. Die Bybel sê: ‘Christus het vir ons gesterf terwyl ons nog sondaars was’ (Romeine 5:8). Omdat die losprys voorsien is “terwyl ons nog sondaars was”, verseker dit ons dat God ons baie liefhet al is ons sondig. En dit gee ons baie om na uit te sien, al moet ons die gevolge van sonde dra.

Die rede daarvoor is goed en onselfsugtig. Die Bybel wys waarom God sy Seun as ’n losprys gegee het: “Hierdeur is die liefde van God in ons geval openbaar gemaak, want God het sy enigverwekte Seun in die wêreld uitgestuur sodat ons deur hom die lewe kan verkry. Hierin lê die liefde: nie dat ons God liefgehad het nie, maar dat hy ons liefgehad . . . het.”—1 Johannes 4:9, 10.

Hoe kan jy wys dat jy die heel beste geskenk waardeer? Jesus het in Johannes 3:16 gesê dat net die mense wat “geloof in hom beoefen”, gered sal word. Volgens die Bybel is geloof “die gewaarborgde verwagting van dinge waarop gehoop word” (Hebreërs 11:1). Om hierdie waarborg te hê, moet jy akkurate kennis inneem. Daarom spoor ons jou aan om die tyd te neem om van Jehovah God te leer, wat die Gewer van hierdie “volmaakte geskenk” is. Jy moet ook uitvind wat jy moet doen om die ewige lewe te kan geniet wat moontlik gemaak word deur die losprysofferande van Jesus.

Jy kan meer hieroor leer deur inligting wat op die Bybel gebaseer is, te ondersoek. Dit is aanlyn beskikbaar by www.pr2711.com/af. Jehovah se Getuies sal jou graag wil help. Ons is daarvan oortuig dat jy, wanneer jy van die grootste geskenk leer en daardeur bevoordeel word, ook sal sê: “Aan God die dank deur middel van Jesus Christus, ons Here!”—Romeine 7:25.