Hoofstuk 37

Moet ek my laat doop?

Dui aan of die volgende stellings waar of onwaar is:

Doop is ’n vereiste vir Christene.

□ Waar

□ Onwaar

Die hoofdoel van doop is om jou teen sonde te beskerm.

□ Waar

□ Onwaar

Doop laat jou in aanmerking kom vir redding.

□ Waar

□ Onwaar

As jy nie gedoop is nie, is jy nie teenoor God aanspreeklik vir jou dade nie.

□ Waar

□ Onwaar

As jou vriende gedoop word, beteken dit dat jy ook gereed is om gedoop te word.

□ Waar

□ Onwaar

AS JY volgens God se standaarde lewe, ’n vriendskap met God opbou en met ander oor jou geloof praat, is dit net natuurlik dat jy daaraan sal dink om gedoop te word. Maar hoe weet jy of jy gereed is vir daardie stap? Om jou te help om hierdie vraag te beantwoord, kom ons kyk na die waar-of-onwaar-stellings hierbo.

● Doop is ’n vereiste vir Christene.

Waar. Jesus het gesê dat sy dissipels gedoop moet word (Matteus 28:19, 20). Om die waarheid te sê, Jesus self het hom laat doop. As jy Christus wil volg, moet jy gedoop word wanneer jy volwasse genoeg is om daardie besluit te neem en ’n opregte begeerte het om dit te doen.

● Die hoofdoel van doop is om jou teen sonde te beskerm.

Onwaar. Doop is ’n openbare simbool van jou toewyding aan Jehovah. Jou toewyding is nie ’n onpersoonlike kontrak wat jou keer om dinge te doen wat jy in die geheim eintlik wíl doen nie. Inteendeel, jy wy jou lewe aan Jehovah toe omdat jy volgens sy standaarde wil lewe.

● Doop laat jou in aanmerking kom vir redding.

Waar. Die Bybel sê dat doop ’n belangrike stap is om redding te verkry (1 Petrus 3:21). Maar dit beteken nie dat doop soos ’n versekeringspolis is wat jy koop om jou te beskerm ingeval jy iets oorkom nie. Jy word gedoop omdat jy Jehovah liefhet en hom vir ewig met jou hele hart wil dien.—Markus 12:29, 30.

● As jy nie gedoop is nie, is jy nie teenoor God aanspreeklik vir jou dade nie.

Onwaar. Jakobus 4:17 sê: “As iemand dan weet hoe om te doen wat reg is en dit tog nie doen nie, is dit vir hom ’n sonde”—of hy nou gedoop is of nie. As jy weet wat reg is en volwasse genoeg is om ernstig te dink oor jou lewe, is dit dalk nou die tyd om die saak met ’n ouer of ’n ander ryp Christen te bespreek. Sodoende kan jy uitvind hoe jy tot doop kan vorder.

● As jou vriende gedoop word, beteken dit dat jy ook gereed is om gedoop te word.

Onwaar. Die besluit om gedoop te word, moet uit jou eie gewillige hart kom (Psalm 110:3). Jy moet alleenlik gedoop word wanneer jy ten volle bewus is van wat dit beteken om een van Jehovah se Getuies te wees en jy seker is dat jy gereed is om hierdie verantwoordelikheid te aanvaar.—Prediker 5:4, 5.

’n Stap wat jou lewe sal verander

Doop is ’n stap wat jou lewe sal verander en wat tot baie seëninge lei. Terselfdertyd behels dit ’n ernstige verantwoordelikheid—om die persoonlike toewyding wat jy aan Jehovah gemaak het, na te leef.

Is jy amper daar? Indien wel, het jy rede om goed te voel. Wat vir jou voorlê, is die allergrootste voorreg—om Jehovah heelhartig te dien en op ’n manier te lewe wat toon dat jy jou waarlik aan hom toegewy het.—Matteus 22:36, 37.

SLEUTELTEKSTE

‘Bied julle liggaam aan as ’n offerande wat lewend, heilig en vir God aanneemlik is, ’n heilige diens met julle denkvermoë.’—Romeine 12:1.

WENK

Vind met jou ouers se hulp iemand in die gemeente wat jou kan help om geestelik te vorder.—Handelinge 16:1-3.

HET JY GEWEET . . . ?

Doop is ’n noodsaaklike deel van “die merk” wat jou identifiseer vir redding.—Esegiël 9:4-6.

AKSIEPLAN!

Om tot doop te vorder, gaan ek die volgende Bybelleringe beter probeer verstaan: ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom is doop so ’n ernstige stap?

● Waarom laat ’n jongmens hom dalk te vroeg doop?

● Om watter rede sal ’n jongmens dalk onwyslik huiwer om hom toe te wy en te laat doop?

[Lokteks op bladsy 306]

Ek het altyd in gedagte gehou dat ek gedoop is; en dit het my gehelp om wyse besluite te neem en nie dinge te doen wat slegte gevolge kon hê nie.’’—Holly

[Venster/Prent op bladsy 307]

Vrae wat dikwels oor doop gevra word

Waarvan is doop ’n simbool? Wanneer jy onder die water gedompel en dan daaruit opgelig word, beteken dit dat jy gesterf het ten opsigte van ’n selfsugtige lewenswyse en opgewek word om Jehovah se wil te doen.

Wat beteken dit om jou lewe aan Jehovah toe te wy? Dit beteken dat jy afstand doen van eienaarskap van jouself en dat jy belowe om die uitvoering van God se wil bo alle ander dinge te stel (Matteus 16:24). Dis gepas dat jy jou die een of ander tyd voordat jy gedoop word, in gebed aan Jehovah toewy.

Hoe moet jy jou lewe lei voordat jy gedoop word? Jy moet in ooreenstemming met God se Woord lewe en met ander oor jou geloof praat. Jy moet ’n vriendskap met God opbou deur middel van gebed en ’n studie van sy Woord. Jy moet Jehovah dien omdat jy dit wil doen—nie omdat ander druk op jou plaas nie.

Moet ’n mens teen ’n sekere ouderdom gedoop wees? Ouderdom is nie die belangrikste nie. Maar jy moet oud genoeg—en volwasse genoeg—wees om die betekenis van toewyding te verstaan.

Sê nou jy wil jou laat doop, maar jou ouers sê jy moet wag? Dalk wil hulle hê dat jy meer ondervinding in die Christelike lewenswyse moet opdoen. Waardeer hulle raad, en gebruik hierdie tyd om ’n intiemer vriendskap met Jehovah op te bou.—1 Samuel 2:26.

[Venster op bladsy 308, 309]

Werkblad

Dink jy daaraan om jou te laat doop?

Gebruik die vrae en stellings hieronder om jou vordering te meet. Slaan die tekste na wat aangegee word voordat jy jou antwoorde neerskryf.

Hoe toon jy nou dat jy op Jehovah vertrou?—Psalm 71:5. ․․․․․

Hoe toon jy dat jou waarnemingsvermoëns geoefen is om te onderskei tussen wat reg en wat verkeerd is?—Hebreërs 5:14. ․․․․․

Hoe dikwels bid jy? ․․․․․

Hoe spesifiek is jou gebede, en wat openbaar dit oor jou liefde vir Jehovah?—Psalm 17:6. ․․․․․

Skryf hieronder neer watter doelwitte jy in verband met jou gebede wil stel. ․․․․․

Hoe gereeld doen jy persoonlike Bybelstudie?—Josua 1:8. ․․․․․

Wat sluit jy by jou persoonlike studie in? ․․․․․

Skryf hieronder neer watter doelwitte jy in verband met jou persoonlike studie wil stel. ․․․․․

Is jou bediening sinvol? (Voorbeelde: Kan jy basiese Bybelleerstellings aan ander verduidelik? Gaan jy terug na belangstellendes? Probeer jy ’n tuisbybelstudie kry?)

□ Ja □ Nee

Neem jy aan die bediening deel selfs as jou ouers dit nie doen nie?—Handelinge 5:42.

□ Ja □ Nee

Skryf hieronder neer watter doelwitte jy in verband met jou bediening wil stel.—2 Timoteus 2:15. ․․․․․

Sou jy sê jou bywoning van Christelike vergaderinge is gereeld of sporadies?—Hebreërs 10:25. ․․․․․

Op watter maniere neem jy aan vergaderinge deel? ․․․․․

Woon jy vergaderinge by wanneer jou ouers dit nie kan doen nie (as jy hulle toestemming het)?

□ Ja □ Nee

Kan jy sê dat jy dit regtig geniet om God se wil te doen?—Psalm 40:8.

□ Ja □ Nee

Kan jy spesifieke gevalle noem waar jy portuurdruk weerstaan het?—Romeine 12:2. ․․․․․

Hoe beplan jy om jou liefde vir Jehovah sterk te hou?—Judas 20, 21.

Sal jy Jehovah dien, al hou jou ouers en jou vriende op om dit te doen?—Matteus 10:36, 37.

□ Ja □ Nee

[Prent op bladsy 310]

Soos die huwelik, is doop ’n stap wat jou lewe sal verander—jy moet goed daaroor nadink