Gebruik die Redenering-boek in alle aspekte van jou bediening
1 Het jy al die Redenering-boek in jou bediening gebruik? Jy het ongetwyfeld alreeds verskillende gedeeltes daarvan gelees en dit baie nuttig gevind. Dit sal natuurlik voordelig wees om dit deur te lees en vertroud te raak met al die uitstekende informasie daarin. ’n Pionierbroer berig dat hy en sy vrou elke dag ’n gedeelte daarvan bestudeer.
2 Dit is egter nie nodig om die hele boek deur te lees voordat jy dit kan gebruik in die huis-tot-huiswerk of wanneer jy herbesoeke doen en Bybelstudies hou nie.
KOM BESWARE TE BOWE
3 Jy kom waarskynlik sekere besware gereeld teë wanneer jy van huis tot huis gaan. Dit kan dit vir jou moeilik maak om die huisbewoner se belangstelling te wek. Hulle sê dalk: “Ek stel nie belang nie”, “Ek is besig” of “Ek het my kerk”. Wanneer sulke gesprekdempers ’n struikelblok word, kan jy gerus ’n oomblik afstaan tussen huise om een of meer van die wenke op bladsye 15-24 van die Redenering-boek te memoriseer.
4 Jou kennis van die mense in die gebied sal jou in staat stel om ’n antwoord te kies wat jou sal help om jou gesprek voort te sit. Probeer om die bewoording te gebruik soos dit in die Redenering-boek verskyn. Dit is goed deurdink, en ervare broers gebruik dit met welslae. Mettertyd sal jy uitstekende antwoorde op ’n verskeidenheid gesprekdempers kan gee.
HERBESOEKE EN BYBELSTUDIES
5 Jy sal moontlik met die eerste besoek kan vasstel in watter onderwerp die huisbewoner veral belangstel. Slaan hierdie onderwerp in die saakregister van die Redenering-boek na wanneer jy vir die herbesoek voorberei. As dit bespreek word, sal jy of ’n wenk wat ’n direkte maar gebalanseerde benadering verstrek of bykomende Skriftuurlike inligting kry waarby die persoon baat sal vind.
6 Indien ’n vraag tydens ’n Bybelstudie opduik en jy meen dit raadsaam sal wees om dit te beantwoord voordat jy vertrek, moet jy of die saakregister agter in die Redenering-boek of die lys hoofonderwerpe voorin raadpleeg. Iemand het moontlik vir die belangstellende persoon gesê dat Jehovah se Getuies ’n sekte of ’n kultus is. Die informasie wat jy nodig het, verskyn op bladsy 222. Dit word maklik verkry deur “Jehovah se Getuies” onder “Hoofonderwerpe” na te slaan. Die spesifieke informasie word selfs makliker verkry deur onder “Kultus” of “Sektes” in die saakregister te kyk. Lees gerus die antwoord net so uit die boek en bespreek dit verder met die Bybelstudent. Moenie sleg voel as die student sien dat jy op hierdie manier bykomende informasie soek nie.
7 Een suster het haar waardering vir die Redenering-boek soos volg uitgedruk: “Julle taktvolle maar reguit benadering van verskillende onderwerpe wat dikwels moeilik is om te antwoord, is vir ons ’n ware seën.” Namate ons beter vertroud raak met hierdie uitstekende instrument en dit in die veld gebruik, sal ons groter sukses behaal in ons pogings om die harte van mense in ons gebied te bereik.