Maak vergaderinge leersamer

1 “Een ding wat my beïndruk het, was dat jonk en oud by die Koninkryksaal aan die vergaderinge deelgeneem het deur kommentaar te lewer en die tekste na te slaan.” Het jy ooit enigiemand dit hoor sê oor die eerste vergaderinge van Jehovah se Getuies wat hy bygewoon het? (1 Kor. 14:25b). Baie van ons het sulke kommentare gehoor. En hoe bly was ons om daardie vergaderinge by te woon en ook kommentaar te lewer!

2 As ons voorberei, word ons kommentare betekenisvoller en is die vergaderinge leersamer en voordeliger vir almal wat dit by woon (Hebr. 10:24,  25). Dit moet die belangrikheid van werke wat met geloof strook in ons verstande en harte inprent. Dit sal ons help om ons Christelike leefwyse en aktiwiteit te verbeter.​—Jak. 1:25.

WANNEER ONS OP DIE VERHOOG IS

3 ’n Verskeidenheid onderwerpe word in die Teokratiese Bedieningskool gedek. Susters ontvang toewysings in die Paradys op aarde- en Redenering-boek, waarvan albei gereeld in ons veldbediening gebruik word. Diegene wat hierdie toewysings het, kan die skool leersamer maak deur praktiese agtergronde te gebruik om die sleutelgedagtes in die materiaal aan te bied. Dit sal die gehoor help om die informasie te waardeer en te besef hoe hulle dit in die veldbediening kan gebruik. Broers met toesprake wat op die Redenering-boek gebaseer is, kan eweneens gedagtes beklemtoon wat veral nuttig sal wees wanneer ons in plaaslike gebied getuig. Broers wat Bybelleestoewysings behartig, kan hulle inleidings, kommentaar oor die leesgedeelte en slot betekenisvol maak deur gedagtes van praktiese waarde te beklemtoon. Miskien kan jy die skool op een van hierdie maniere selfs leersamer maak vir almal wat dit bywoon.

4 Ons word moontlik gevra om aan ’n demonstrasie op die Diensvergadering deel te neem. Indien wel, is voorbereiding noodsaaklik. Wat ons sê, moet hoorbaar wees, en ons moet dus die mikrofone behoorlik gebruik. (Vergelyk 1 Korinthiërs 14:9.) Wanneer jy aan demonstrasies deelneem, moet jy nie met jou rug na die gehoor staan nie. Kyk altyd na die gehoor. Wanneer jy die inhoud van ’n publikasie vir ’n huisbewoner wys, sal die gehoor dus die buiteblad van die publikasie sien. Wanneer ons na die gehoor kyk, kan hulle ons duideliker hoor en die uitdrukking op ons gesig sien.

AS ’N GEHOOR

5 Die van ons wat in die gehoor sit, kan die vergaderinge leersamer vir onsself maak deur noukeurig aandag te skenk (1 Tim. 4:16; Hebr. 2:1). Ons almal moet die kuns om te luister aankweek, en nie ons gedagtes laat dwaal nie. Dit is steurend wanneer ons vir ander wat naby ons sit, fluister. As ons onnodig opstaan om na die kleedkamer te gaan, sal dit ook verhoed dat ons ten volle by die vergaderinge baat vind en sal dit boonop ander se aandag aftrek.

6 As ons klein kinders het en hulle rusteloos is, moet ons miskien naby ’n gangetjie agter in die Koninkryksaal sit sodat hulle so min mense moontlik sal steur. As hulle stout is of ’n geraas maak, is dit gepas dat die ouers hulle uit die gehoorsaal van die Koninkryksaal neem. Anders sal hulle aanhou om die konsentrasie van ander te breek wat probeer om by die vergaderinge aandag te skenk.​—Spr. 22:6,  15.

7 As ons moeite doen om die vergaderinge leersamer vir onsself sowel as vir ander te maak, sal ons almal gehelp word om geestelik te groei. Dan sal daar van ons gesê word soos dit van die Christene in Thessalonika gesê is. dat ons “geloof grootliks toeneem en die wederkerige liefde van elkeen van [ons] . . . groter word”.​—2 Thess. 1:3.