toon, het nog 40 dae verstryk voordat hy opgevaar het hemel toe. Wat is dus die betekenis van Jesus se woorde ten tye van sy dood? Hy het gesê dat hy geweet het dat sy toekomstige lewensvooruitsigte ná sy dood ten volle van God afgehang het. Kyk bladsy 377, onder “Siel”, vir verdere kommentaar oor die ‘gees wat na God terugkeer’.)

As iemand sê—

‘Het jy die heilige gees?’

Jy kan antwoord: ‘Ja, en dit is waarom ek vandag na u deur gekom het (Hand. 2:17, 18).’

Of jy kan sê: ‘Dit is wat dit vir my moontlik maak om aan die Christelike bediening deel te neem. Maar ek vind dat nie almal dieselfde idee het oor wat bewys dat ’n persoon werklik God se gees het nie. Wat beskou u as bewys?’ Dan kan jy byvoeg: (Bespreek van die materiaal op bladsye 145, 146.)

Gees van die wêreld

Definisie: Die dryfkrag wat die mensegemeenskap wat bestaan uit diegene wat nie knegte van God is nie beïnvloed en sulke mense dinge volgens ’n kenmerkende patroon laat sê en doen. Hoewel mense se dade deur individuele voorkeur bepaal word, het diegene wat die gees van die wêreld openbaar sekere basiese gesindhede, handelwyses en lewensdoelwitte wat eie aan die stelsel is waarvan Satan die heerser en god is.

Waarom is dit ’n ernstige saak wanneer ’n persoon met die gees van die wêreld besmet is?

1 Joh. 5:19: “Die hele wêreld [lê] in die mag van die Bose.” (Satan wakker ’n gees aan wat die denke en die aktiwiteite oorheers van dié lede van die mensdom wat nie Jehovah se goedgekeurde knegte is nie. Dit is ’n gees van selfsug en hoogmoed wat so algemeen is dat dit soos die lug is wat mense inasem. Ons moet baie versigtig wees dat ons ons nie aan Satan se mag onderwerp deur toe te laat dat daardie gees ons lewens beïnvloed nie.)

Openb. 12:9: “Die groot draak is neergewerp, die ou slang wat genoem word duiwel en Satan, wat die hele wêreld verlei, hy is neergewerp op die aarde, en sy engele is saam met hom neergewerp.” (Sedert daardie gebeurtenis, ná die geboorte van die Koninkryk in 1914, het Satan en sy demone se invloed onder die mensdom sterk toegeneem. Sy gees het mense tot dade van groter selfsug en geweld aangespoor. Daar word veral groot druk uitgeoefen op diegene wat daarna streef om Jehovah te dien ten einde hulle te oorreed om ’n deel van die wêreld te word, om te doen wat ander doen en om ware aanbidding te versaak.)

Wat is van die kenmerke van die gees van die wêreld waarteen ons op ons hoede moet wees?

1 Kor. 2:12: “Ons het ewenwel nie die gees van die wêreld ontvang nie, maar die Gees wat uit God is, sodat ons kan weet wat God ons uit genade geskenk het.” (As die gees van die wêreld in ’n persoon se denke en begeertes posvat, word die vrug daarvan gou waargeneem in dade wat daardie gees openbaar. Om van die gees van die wêreld los te breek, moet ’n mens dus nie alleen onchristelike bedrywighede en onmatigheid vermy nie, maar ook tot die kern van die saak deurdring deur gesindhede aan te kweek wat God se gees en opregte liefde vir sy weë weerspieël. Hou dit in gedagte terwyl jy die volgende blyke van die gees van die wêreld beskou.)

As ’n persoon doen net wat hy wil, sonder agting vir God se wil

Satan het Eva aangespoor om self te besluit wat goed en wat kwaad is. (Gen. 3:3-5; vergelyk dit met Spreuke 3:5, 6.) Baie wat Eva se voorbeeld volg, weet nie wat God se wil vir die mensdom is nie en stel ook nie daarin belang om uit te vind nie. Hulle “volg hulle eie kop”, soos hulle sê. Diegene wat God se vereistes ken en hulle daarna probeer skik, moet oppas dat die wêreld se gees hulle nie moedswillig die raad in God se Woord laat ignoreer in wat hulle as “klein dingetjies” beskou nie.—Luk. 16:10; kyk ook “Onafhanklikheid”.

As ’n persoon hoogmoedig op situasies reageer

Dit was Satan wat eerste toegelaat het dat ’n te hoë dunk van homself sy hart verderf. (Vergelyk Esegiël 28:17; Spreuke 16:5.) Hoogmoed is ’n verdelende krag in die wêreld waarvan hy die owerste is, en dit laat mense dink dat hulle beter as mense van ander rasse, nasies, taalgroepe en ekonomiese stande is. Selfs diegene wat God dien, moet moontlik nog ontslae raak van spore van sulke gevoelens. Hulle moet ook oppas dat hulle nie weens hoogmoed ’n berg van ’n molshoop maak of toelaat dat hoogmoed hulle verhinder om hulle eie foute te erken en raad te aanvaar en aldus baat te vind by al die liefdevolle hulp wat Jehovah deur sy organisasie verleen nie.—Rom. 12:3; 1 Pet. 5:5.

As ’n persoon ’n opstandige gesindheid teenoor gesag openbaar

Opstand het sy ontstaan by Satan, wie se naam “Teenstander” beteken. Deur Jehovah te trotseer, het Nimrod, wie se naam moontlik beteken “Laat ons rebelleer”, getoon dat hy ’n kind van Satan is. As mense daardie gees vermy, sal dit verhoed dat godvresende persone sekulêre heersers trotseer (Rom. 13:1); sal dit minderjariges help om hulle aan die Godgegewe gesag van hulle ouers te onderwerp (Kol. 3:20); sal dit hulle beskerm sodat hulle nie simpatiseer met afvalliges wat diegene minag aan wie Jehovah verantwoordelikheid in sy sigbare organisasie toevertrou het nie.—Jud. 11; Hebr. 13:17.

As ’n persoon die begeertes van die sondige vlees botvier

Die invloed hiervan kan oral gesien en gehoor word. Ons moet voortdurend op ons hoede wees daarvoor (1 Joh. 2:16; Ef. 4:17, 19; Gal. 5:19-21). Die denke en begeertes wat tot ernstiger blyke daarvan kan lei, kan geopenbaar word in ’n persoon se gesprekke, die grappe wat hy vertel, die woorde van die musiek waarna hy luister, die soort danse waaraan hy meedoen of as hy na programme kyk wat geslagsonsedelikheid bevat. Hierdie aspek van die wêreld se gees kom tot uiting in dwelmmisbruik, dronkenskap, owerspel, hoerery en homoseksualiteit. Dit word ook geopenbaar wanneer ’n persoon onskriftuurlik, maar moontlik wettig, van ’n huweliksmaat skei en met ’n ander trou.—Mal. 2:16.

As ’n persoon toelaat dat sy lewe oorheers word deur die begeerte om te besit wat sy oë sien

Dit was so ’n begeerte wat Satan in Eva gewek het toe hy haar verlok het om iets te doen wat haar verhouding met God geruïneer het (Gen. 3:6; 1 Joh. 2:16). Jesus het so ’n versoeking ferm verwerp (Matt. 4:8-10). Diegene wat Jehovah wil behaag, moet oppas dat hulle nie die handelswêreld toelaat om so ’n gees by hulle te laat posvat nie. Dit bring baie leed asook geestelike ondergang mee vir diegene wat daardeur verstrik word.—Matt. 13:22; 1 Tim. 6:7-10.

As ’n persoon pronk met sy besittings en vermeende prestasies

Ook hierdie gebruik “is uit die wêreld” en moet gestaak word deur diegene wat knegte van God word (1 Joh. 2:16). Dit is gewortel in hoogmoed, en in plaas dat dit ander geestelik opbou, stel dit hulle bloot aan materiële versoekings en kan dit die begeerte wek na wêreldlike prestasie.—Rom. 15:2.

As ’n persoon deur skeltaal en geweld lug gee aan sy gevoelens

Dit is “werke van die vlees” waarteen baie persone hard moet stry. Met opregte geloof en met behulp van God se gees kan hulle die wêreld oorwin in plaas van toe te laat dat die gees daarvan hulle oorheers.—Gal. 5:19, 20, 22; Ef. 4:31; 1 Kor. 13:4-8; 1 Joh. 5:4.

As ’n persoon sy verwagtinge en vrese baseer op wat mense kan doen

Vir ’n vleeslike mens is die dinge wat hy kan sien en aanraak die dinge wat waarlik tel. Sy verwagtinge en vrese draai om die beloftes en dreigemente van ander mense. Hy maak op die menseheersers staat vir hulp en is ontnugter wanneer hulle misluk (Ps. 146:3, 4; Jes. 8:12, 13). Vir hom is hierdie lewe al wat daar is. Dreigemente met die dood maak hom maklik diensbaar. (In teenstelling hiermee, kyk Mattheüs 10:28; Hebreërs 2:14, 15.) Maar ’n nuwe krag dryf die denke aan van mense wat Jehovah leer ken, wat hulle verstande en harte met sy beloftes vul en wat leer om in elke tyd van nood op hom staat te maak vir hulp.—Ef. 4:23, 24, vgl. NW; Ps. 46:2; 68:20.

As ’n persoon die aanbidding wat God toekom aan mense en dinge gee

“Die god van hierdie wêreld”, Satan die Duiwel, staan allerhande gebruike voor wat die mens se Godgegewe neiging om te aanbid in die verkeerde rigting stuur (2 Kor. 4:4). Sommige heersers word as gode bejeën (Hand. 12:21-23). Miljoene buig voor afgode neer. Nog miljoene verafgood verhoogkunstenaars en sporthelde. Vierings gee individuele mense dikwels te veel eer. Hierdie gees is so algemeen dat diegene wat Jehovah waarlik liefhet en uitsluitlike toewyding aan hom wil gee elke dag op hulle hoede moet wees teen die invloed daarvan.

Geloof

Definisie: “Die geloof dan is ’n vaste vertroue op die dinge wat ons hoop, ’n bewys van die dinge wat ons nie sien nie” (Hebr. 11:1). Ware geloof is nie liggelowigheid nie, dit wil sê, die neiging om iets sonder gegronde getuienis te glo of net omdat ’n persoon dit so verkies nie. Opregte geloof verg basiese of fundamentele kennis, vertroudheid met getuienis, asook hartgrondige besef van wat daardie getuienis aandui. Hoewel dit dus onmoontlik is om ware geloof sonder juiste kennis te hê, sê die Bybel dat ’n mens “met die hart” glo.—Rom. 10:10.

Waarom het baie mense nie geloof nie?

Geloof is ’n vrug van God se gees, en God gee met graagte sy gees aan diegene wat daarna soek (Gal. 5:22, NW; Luk. 11:13). Persone sonder geloof soek dus nie daardie gees nie, of hulle doen dit om ’n verkeerde rede of hulle weerstaan die werking daarvan in hulle lewens. Baie dinge speel ’n rol:

Hulle het ’n gebrek aan juiste Bybelkennis: Die Bybel is ’n produk van God se gees, daar dit deur God geïnspireer is (2 Tim. 3:16, 17; 2 Sam. 23:2). As ’n mens in gebreke bly om dit te bestudeer, verhinder dit die ontwikkeling van ware geloof. Al het kerklidmate Bybels, sal hulle nie ware geloof in God en sy voorneme hê as hulle die idees van mense in plaas van die Woord van God geleer is nie. Hulle sal geneig wees om op hulle eie idees en die van ander mense staat te maak om lewensprobleme op te los.—Vergelyk Mattheüs 15:3-9.

Hulle is ontnugter deur godsdiens: Baie is ontnugter deur die geveinsdheid van die kerke van die Christendom, wat