Hoe sal ons Jehovah vergoed?

HOE reageer ons wanneer iemand opregte, innige belangstelling in ons toon, moontlik deur iets te doen wat ons tot voordeel strek? Goedhartigheid en vrygewigheid ontlok gewoonlik ’n reaksie, nie waar nie? Hoe voel ons dus teenoor ons God, Jehovah, weens die liefderyke goedheid wat hy voortdurend aan ons betoon?

Die gejaagdheid weens die daaglikse druk van die lewe kan ons so maklik Jehovah se weldade as vanselfsprekend laat aanvaar en ons soms selfs laat optree asof ons nie werklik dankbaar is nie. Daarom is dit gepas dat ons nadink oor die psalmis se vraag: “Hoe sal ek die Here vergoed vir al sy weldade aan my?” (Psalm 116:12, NAV). Op watter maniere kan ons reageer?

Weldade van Jehovah

Hoe verlore sou ons tog gewees het as Jehovah ons nie sy Woord, die Bybel, as gawe gegee het nie! In vorige eeue het moedige manne en vroue hul lewe in gevaar gestel om hierdie boek te besit en te lees, en ons verstaan nou waarom. Manne van God was nog altyd dankbaar vir die geïnspireerde Skrif, omdat hulle besef het hoe nuttig dit is “tot lering, tot weerlegging, tot teregwysing, tot onderwysing in die geregtigheid”.—2 Timotheüs 3:16.

Ons weet egter dat ons meer as blote kopkennis van die Bybel nodig het om “vir elke goeie werk volkome toegerus” te wees (2 Timotheüs 3:17). Ons lewens word deur die krag van God se heilige gees bevoordeel, en hierdie feit word onder ons aandag gebring deur Jehovah se smekende woorde by monde van sy profeet Jesaja: “En nou het die Here HERE my met sy Gees gestuur. So sê die HERE, jou Verlosser, die Heilige van Israel: Ek is die HERE jou God, wat jou leer wat heilsaam is [“om jouself te bevoordeel”, NW], wat jou lei op die weg wat jy moet gaan. Ag, as jy maar na my gebooie geluister het, dan sou jou vrede gewees het soos ’n rivier en jou geregtigheid soos die golwe van die see” (Jesaja 48:16-18). Deur middel van sy heilige gees, tesame met sy Woord, lei Jehovah ons om onsself te bevoordeel, en die gevolg is vrede en geregtigheid.

Daarbenewens strek Jehovah se werkende krag ons tot voordeel omdat ’n raamwerk opgerig is, ’n aardse organisasie, waardeur die heilige gees werk. In 1 Korinthiërs hoofstuk 12 vergelyk Paulus die Christengemeente met ’n liggaam, en in vers 7 sê hy: “Maar aan elkeen word die openbaring van die Gees gegee met die oog op wat nuttig is.” Hy toon voorts hoe dit ons tot voordeel strek as ons deel van God se aardse organisasie is.

Ongeveer vyf jaar nadat hy daardie woorde geskryf het, het hy sy brief aan die gemeente in Efese geskryf, waarin hy uitgewei het oor die voordele wat dit inhou om aan daardie aardse reëling verbonde te wees. Hoewel sy woorde aanvanklik op gesalfde Christene van toepassing was, kan daar ook vandag van die “groot menigte” gesê word dat hulle ‘toegerus is vir dienswerk’, geestelik ‘volwasse manne’ word, in die geloof gestabiliseer word, “nie meer kinders” is nie en ‘deur liefde opgroei in Hom wat die Hoof is, naamlik Christus’ (Openbaring 7:9; Efesiërs 4:12-16). Ons almal het goeie rede om dankbaar te wees.

Die getroue en verstandige dienskneg word met die Christengemeente geïdentifiseer, en hierdie dienskneg se werk, om ons geestelik te voed, is nog ’n bewys van Jehovah se weldade aan ons (Mattheüs 24:45, 46). Ons bevind ons nou in die voorspelde tyd van die heer se teenwoordigheid. Doen die “dienskneg” sy werk? Is ons, ondanks die neerdrukkende “laaste dae”, gevul met hoop? Het ons ’n doel wat die moeite werd is? (2 Timotheüs 3:1-5; Romeine 5:5; 1 Timotheüs 4:10, NAV). Ja! En ons hoop is nie net ’n blote waarskynlikheid nie, maar ’n vaste oortuiging op grond van geloof, geloof wat vaste bewyse as grondslag het.—Hebreërs 11:1.

Dit is dus onmiskenbaar dat Jehovah, ons Groot Weldoener, ons soveel gegee het waarvoor ons dankbaar moet wees. Die vraag is dus logies:

Hoe sal ek Jehovah vergoed?

Ons moet eerstens erken dat Jehovah niks van ons nodig het nie. Hy is die een wat sê: “Aan My behoort die silwer en aan My die goud”, asook “die wild op duisende berge” (Haggai 2:8; Psalm 50:10, NAV; Job 41:2). Dit beteken dat dit onmoontlik is om Jehovah se guns te “koop”; tog word ons aangespoor om vrywillig offers aan hom te bring. (Vergelyk 1 Kronieke 29:14.) Daar is egter sekere voorwaardes verbonde aan die voorreg om gawes aan Jehovah te bring.

“Waarmee sal ek die HERE tegemoetgaan en my buig voor die hoë God? Sal ek Hom tegemoetgaan met brandoffers, met jaaroud kalwers? Sal die HERE ’n welbehae hê in duisende ramme en tienduisende strome van olie? Sal ek my eersgeborene gee vir my oortreding, die vrug van my liggaam vir die sonde van my siel? Hy het jou bekend gemaak, o mens, wat goed is; en wat vra die HERE van jou anders as om reg te doen en liefde te betrag en ootmoedig te wandel met jou God?”—Miga 6:6-8.

Ons sien hieruit dat Jehovah se vereistes altyd redelik is, altyd binne ons bereik. Daarbenewens het Jesus getoon dat tensy ons verhouding met beide Jehovah en ons medemens reg is ons offers nie aanvaarbaar sal wees nie (Mattheüs 5:23, 24). Noudat ons die regte fondament gelê het, kan ons sien dat ons almal iets het wat ons aan Jehovah kan gee as blyk van waardering vir sy goedheid teenoor ons.

Hoe kan ons gebruik wat ons het?

Dit kos tyd, inspanning en in sekere mate geld, maar watter voorreg is dit tog om Jehovah in die predikingswerk te verteenwoordig! Hierdie lofoffer is iets wat ons almal aan Jehovah kan gee. Een ouere man wat as pionier dien en drie kindertjies het, voel śo hieroor:

“Die voorreg om in die voltydse diens te wees, is enige persoonlike opoffering werd—en meer—want dit is die doeltreffendste manier om ons hemelse Vader te loof. Dit stel my ook in staat om hom in sekere mate te bedank vir sy onverdiende goedheid wat hy teenoor my as individu toon.”

Sy vrou voeg by: “Dit is ’n ware voorreg om my man te help om as pionier te dien. Dit stel die hele gesin in staat om ’n groter aandeel in die bediening te hê, en as ons sien hoe Jehovah se liefdevolle hand geestelik en materieel vir ons voorsien, wil ons hom selfs meer loof.”

Weens vrywillige bydraes versprei die Wagtoringgenootskap reeds meer as honderd jaar lank Bybels en Bybellektuur, wat sedert 1920 op die Genootskap se eie perse gedruk word. Die tyd en energie van vrywilligers wat by Bethel werk om al die boeke te druk wat ons vandag het, asook dié van gemeentelike verkondigers en pioniers om hulle te versprei, is in werklikheid ’n bykomende bydrae vir die noodsaaklike predikingswerk.—Mattheüs 24:14.

Christene in die ekonomies stabieler lande is ook bly om te weet dat hulle goedhartige geldskenkings, wat aan die Wagtoringgenootskap se takkantoor in hulle land gestuur is, talle van hulle broers in ander wêrelddele in staat stel om al hulle tyd aan die predikings- en dissipelmaakwerk te bestee. Hierdie vrywillige bydraes help sendelinge van die Wagtoring-Bybelskool Gilead, kring- en streekopsieners sowel as spesiale pioniers om hulle voltydse diens voort te sit.

Dalk is dit vir jou onmoontlik om by Bethel te dien of met die ‘Internasionale Vrywillige Konstruksiewerkers’-program te help. Maar moontlik beskik jy oor fondse wat diegene kan help wat in hierdie hoedanigheid dien maar nie ’n “oorvloed” fondse het om hulle diens voort te sit nie. Daar kan dus ’n nuttige gelykmaking wees, soos 2 Korinthiërs 8:14 beskryf. Een van die briewe wat saam met sulke donasies gestuur is, was dié van ’n bejaarde suster wat geskryf het:

“Ek is baie dankbaar vir al die seëninge wat ek van Jehovah ontvang, en ek bid voortdurend vir die bouprojekte en die organisasie.”

Nog ’n suster het gesê: “Ek wil liewer hê dat hierdie klein bedraggie vir teokratiese doeleindes gebruik moet word as wat dit in ’n bank lê wat een van die dae tot niet sal gaan!”

’n Broer het hom so uitgedruk: “Die feit dat Jehovah ons maan om ons besittings te gebruik om hom te verheerlik, is waarlik ’n beskerming teen hebsugtige kommersialisme, die ‘derde komponent’ van Satan se goddelose stelsel van dinge. Ek wil hierdie geleentheid gebruik om te sê hoe bly ek is dat ek iets kan hydra om die groei wat Jehovah ons gee te versnel, en ek bedank hom dat hy dit vir my moontlik gemaak het om gebruik te kan word.”

Gawes van oud en jonk

Dit is bemoedigend om te lees van die getroue vasbeslotenheid van bejaardes wat, hoewel hulle hoop om die einde van hierdie stelsel te oorleef, ’n gepaste testament opstel om seker te maak dat die Koninkrykswerk bevorder sal word indien hulle sterf. Party eksekuteurs het die volgende oor die pragtige gesindheid van sulke erflaters gesê:

“Iemand wat baie goedhartig teenoor almal was, haar hele lewe lank . . . het sy Jehovah en sy skepping liefgehad.”

“Die belange van die Koninkryk was altyd vir haar die belangrikste.”

“Na 70 jaar van getroue diens het hy sy hemelse beloning ontvang . . . hy wou altyd die waarheid met sy besittings bevorder.”

Ons is ook bly as ons van jongmense hoor wat hulle materiële besittings vir Jehovah se werk wil gebruik. Een brief wat aan die Genootskap se kantoor in Brittanje gestuur is, het van ’n skoolgaande verkondiger gekom. Sy het vertel dat sy eerste in ’n opstelkompetisie gekom het. Sy het al die prysgeld saam met haar brief gestuur. Die Genootskap se publikasies was die enigste bronmateriaal wat sy vir haar opstel oor “Christelike verpligting” gebruik het, en daarom het sy geredeneer dat die geld eintlik aan Jehovah behoort.

Nadat hy gevra het hoe hy Jehovah sal vergoed, sê die skrywer van Psalm 116 voorts in verse 13 en 14: “Ek sal die beker van verlossing opneem en die Naam van die HERE aanroep. My geloftes sal ek aan die HERE betaal in die teenwoordigheid van sy ganse volk.” Waardering vir die kosbare gawe van verlossing wat Jehovah ons deur sy Seun gee, beweeg ons, net soos die psalmis, om Hom aan te roep en ons beloftes aan Hom na te kom.

Jehovah het ons soveel weldade bewys, en wat ons ook al op ons beurt kan doen, lyk so min vergeleke daarmee. Hoe gepas is dit dan tog dat ons as blyk van waardering in elke opsig doen wat ons kan! “Ek sal U ’n offer van danksegging bring en die Naam van die HERE aanroep.”—Psalm 116:17.

[Venster op bladsy 26]

HOE PARTY TOT DIE KONINKRYKSWERK BYDRA

◻ SKENKINGS: Vrywillige geldelike bydraes kan regstreeks aan die Watch Tower Bible and Tract Society of Pennsylvania, 25 Columbia Heights, Brooklyn, New York 11201, of aan die Genootskap se plaaslike takkantoor gestuur word. Eiendom, soos vaste eiendom, asook juwele of ander kosbaarhede kan ook geskenk word. ’n Kort briefie wat meld dat dit ’n regstreekse bydrae is, moet hierdie bydraes vergesel.

◻ REËLING VIR VOORWAARDELIKE SKENKINGS: Geld kan aan die Wagtoringgenootskap gegee word om in trust beheer te word, op voorwaarde dat dit, in geval van persoonlike behoefte, aan die skenker terugbetaal sal word.

◻ VERSEKERING: Die Wagtoringgenootskap kan benoem word as die begunstigde van ’n lewensversekeringspolis of in ’n aftree-/pensioenstelsel. Die Genootskap moet van sulke reëlings in kennis gestel word.

◻ TRUSTS: Bankspaarrekeninge kan vir die Genootskap in trust geplaas word. Wanneer dit gedoen word, moet die Genootskap asseblief daarvan verwittig word. Effekte, verbande en eiendom kan ook geskenk word ooreenkomstig ’n reëling waarvolgens die skenker gedurende sy of haar lewe bevoordeel word. Hierdie metode skakel die koste en onsekerhede van regterlike verifikasie van ’n testament uit en verseker dat die Genootskap die eiendom ontvang wanneer die skenker sterf.

◻ TESTAMENTE: Eiendom of geld kan deur ’n wettige testament aan die Wagtoringgenootskap bemaak word. ’n Kopie moet aan die Genootskap gestuur word. (In Suid-Afrika moet testamente Jehovah se Getuies van Suid-Afrika as begunstigde benoem.)

Skryf aan die Tesourierskantoor, Watch Tower Bible and Tract Society of Pennsylvania, 25 Columbia Heights, Brooklyn, New York, 11 201, of aan die Genootskap se plaaslike takkantoor vir nadere inligting of raad oor sodanige sake.

Ons het ons tot die Bron van ware regverdigheid gewend

Soos vertel deur Erwin Grosse

’N PAAR jaar gelede sou jy my vroeg soggens by die hekke van ’n groot skeepswerf in Kiel, Duitsland, aangetref het terwyl ek pamflette versprei en Rote Fahne, die tydskrif van die KPD/ML, verkoop het.a Ek het terselfdertyd probeer om werkers en vakleerlinge by besprekings te betrek. Dit was ’n ondankbare taak om hulle van my kommunistiese sienings te probeer oortuig.

Maar ek het nie toegelaat dat dit my van stryk bring nie. Ek het ’n lewensdoel ontdek: om regverdige toestande deur middel van wêreldrevolusie te help bewerkstellig. Wat het aanleiding gegee tot daardie sienswyse? Sou so ’n lewensdoel my begeerte na regverdigheid verwesenlik?

Die soeke na regverdigheid

My ouers se leefwyse het om die najaging van materiële rykdom gedraai, en dit het my glad nie aangestaan nie. Ons jongmense het iets beters gesoek. Nuwe lewenstyle is op die proef gestel, en nuwe doelwitte in die lewe is gepropageer. Destyds was die oorlog in Viëtnam en studente-onluste voortdurend in die nuus. Dit het vir ons gelyk asof onskuldige mense met hul lewens vir die hoogmoedswaansin van die politici en die kapitaliste betaal het. Ek het dikwels oor hierdie situasie nagedink en het die kapitalistiese stelsel begin haat.

Ek het ook gevestigde godsdiens die rug toegekeer. ’n Ondervinding wat ek tydens my diens in die Wes-Duitse leër gehad het, het bygedra tot hierdie besluit. Die krygsoefeninge waaraan ons deelgeneem het, is onderbreek vir ’n kampdiens, en die soldate is in Katolieke en Protestantse groepe verdeel. Na afloop van die diens het die geestelikes van albei denominasies die grofgeskut geseën! Ek was geskok. Was hierdie