Rig met vrymoedigheid die uitnodiging om te “Kom!”
1 Die snelle verloop van gebeure in die wêreld dui aan dat hierdie tye “die laaste dae” is (2 Tim. 3:1-5). Die toename in misdadigheid, ekonomiese onbestendigheid en lewensgevaarlike siektes het verdere druk veroorsaak. Maar gelukkig word daar ondanks sulke ellende ’n uitnodiging aan mense gerig wat hulle lewe vir ewig kan beïnvloed. Die gees en die bruid hou aan sê: “Kom!” En “’n groot menigte” het nou by hulle aangesluit en rig ’n ope uitnodiging aan mense oral oor om te kom en die water van die lewe verniet te neem.—Openb. 7:9; 22:17.
2 Vandag reageer diegene wat na geregtigheid dors in groot getalle op hierdie uitnodiging. Verlede jaar het miljoene die streekbyeenkomste bygewoon wat wêreldwyd gehou is, en byna tienmiljoen het die Gedenkmaal bygewoon. Miljoene ander toon waardering vir Jehovah se voorsiening deur na die Koninkryksboodskap te luister. Hoe belangrik is dit dan dat ons ons tyd wyslik gebruik om hierdie uitnodiging in die openbaar en van huis tot huis te rig!—Hand. 5:42; Ef. 5:15, 16.
NEEM MET VRYMOEDIGHEID DEEL
3 Die vroeë Christene is weens hulle ywerige predikingswerk vervolg (Hand. 16:19-21; 17:2-8). Maar hulle het nie opgehou met hulle moedige pogings om die goeie nuus bekend te maak nie. Ons moet ook moedig en vasbeslote wees in ons pogings om die goeie nuus te verkondig.
4 Selfs in lande waar die werk verbied is, neem die broers heelhartig aan die predikingswerk deel ondanks kwaai vervolging, wat kan meebring dat hulle hul werk, huis en selfs hulle vryheid kan verloor. Hulle goeie voorbeeld spoor ons aan om ander te bly uitnooi om te “Kom!”—2 Thess. 3:9.
5 Een suster het ná sy die waarheid geleer het meer as 35 jaar lank die hartsbegeerte behou om as pionier te dien. Haar persoonlike omstandighede het verander toe sy 70 jaar oud was, en sy het ’n gewone pionier geword. Hoewel min mense op daardie ouderdom ’n nuwe loopbaan sal aanpak, het sy dit gedoen. Noudat sy die voltydse diens reeds ’n paar jaar geniet, sê sy: “Ek geniet dit elke dag meer.” Sy het geestelike verkwikking aan ander gebring omdat sy Jehovah se uitnodiging om vooruit te gaan en ’n groter aandeel aan die Koninkryksdiens te hê onverskrokke aanvaar het.
6 Net soos in die eerste eeu reageer mense vandag op hierdie uitnodiging deur hulle denkwyse te verander, hulle gedagtes te vernuwe en hulle godonterende gebruike te laat vaar. Hulle word deel van ’n toegewyde, internasionale broederskap van Getuies en sluit by die gees en die bruid aan en sê “Kom!” aan nog ander opregtes van hart.
7 Die groot vermeerdering in die Koninkrykswerk en die uitbreiding van takkantore in verskillende lande gee blyk van Jehovah se seën. Maar die tyd vir hierdie ou stelsel raak kort. Dit is nou die geleë tyd om ons moed en ywer te toon deur die uitnodiging om te “Kom!” aan ander te rig sodat hulle gou kan optree en op dit wat hulle hoor kan reageer.—Hand. 20:26, 27; Rom. 12:11.