Help jy jou kind om Jehovah te kies?

“DIT was vir my regtig vervelig en moeisaam om Bybelstudie te doen. Ek het stilletjies in my hart besluit dat ek nie een van Jehovah se Getuies gaan wees wanneer ek groot is nie”, het een jong man gesê. Hoewel die meeste kinders in Christenhuise hopelik uiteindelik sal kies om hulle aan Jehovah se kant te skaar, kan dit vir jongmense soos hy moeilik wees om Jehovah as hulle God te kies.

Ouers voel soms onseker oor hoe hulle hulle kinders doeltreffende leiding kan gee. Hulle doen baie selfondersoek, soos die besorgde vader wat eenkeer gesê het: “Ek moet eerlikwaar sê dat daar tye was dat ek na my kinders se slapende gesigte gekyk het, met trane van teleurstelling nog op hulle wange, en gewonder het of ek nie toegeefliker moes gewees het nie.” Sy twee seuns het grootgeword en gekies om Jehovah te dien.

Tog is daar jongmense wat Jehovah en die Christenkudde vir Satan se wêreld verlaat. Presies hoe kry ouers dit dan reg om hulle kinders te help om Jehovah te kies? Om daardie vraag te beantwoord, kan ons eers kyk waarom sommige jongmense Jehovah verlaat wanneer dit hulle ouers se hartsbegeerte is dat hulle by hom moet bly.

Waarom sommige jongmense Jehovah verlaat

Een van die algemener redes is dat sommige jongmense Jehovah en sy weë nooit werklik leer ken nie. Hoewel hulle van kleins af Christelike vergaderinge bywoon, is dit bloot vormdiens, en hulle soek Jehovah nie werklik nie (Jesaja 55:6; Handelinge 17:27). Die seun wat hierbo genoem is, was verveeld by die Christelike vergaderinge omdat hy nie verstaan het wat die sprekers van die verhoog af gesê het nie.

Die saadjies van waarheid word in sommige kinders geplant, maar hulle laat toe dat die oënskynlik sorgelose, materialistiese lewenstyl van Satan se wêreld hulle hart verlei. Sommige kan nie die uiters sterk begeerte weerstaan om met hulle portuurs te assosieer en soos hulle te wees nie.—1 Kronieke 28:9; Lukas 8:12-14; 1 Korinthiërs 15:33.

Maar baie kinders in Christenhuise dwarsdeur die wêreld het gekies om hulle aan Jehovah se kant te skaar. Kan ons iets leer uit die positiewe stappe wat hulle ouers gedoen het?

Begin vroeg

Ten einde jou kinders te help om Jehovah te kies, is dit noodsaaklik dat jy vroeg begin. In die meeste gevalle sal indrukke wat geskep en lesse wat geleer word wanneer die hart vormbaar en ontvanklik is ’n leeftyd duur (Spreuke 22:6). Begin dus vroeg om jou kind te vertel van Jehovah se goedheid, sy liefde en ontsagwekkendheid, en streef daarna om liefde vir Jehovah en waardering vir wat Jehovah vir hulle gedoen het in hulle hart te bou. Om dít reg te kry, het baie ouers die oorvloed artikels oor Jehovah se skeppingswerke gebruik wat in die Wagtoringgenootskap se publikasies aangetref word.

Gehoorsaamheid aan en respek vir Jehovah en sy aanbidding is ander eienskappe wat vroeg in ’n kind se lewe by hom ingeskerp moet word. Dit is hartverblydend om te sien hoe kleuters by Christelike vergaderinge worstel om eenvoudige aantekeninge te maak en om tekste in hulle eie Bybels na te slaan of saam met hulle ouers na die badkamer gaan om hulle gesig met koue water af te spoel wanneer hulle lomerig word. Hierdie dinge is eenvoudig, maar hoe belangrik is hulle tog nie om ’n jong verstand te laat besef dat ’n mens respek vir Jehovah moet hê en aan hom gehoorsaam moet wees nie!

Ernstige persoonlike By- belonderrigting moet ook vroeg reeds begin. Toe een egpaar se seuns twee jaar oud was, het hulle die boek Luister na die Groot Onderwysera saam met die seuns begin lees. Later, toe die seuns begin skoolgaan het, het hulle vroeg opgestaan en elke oggend saam met hulle ma gestudeer uit die boeke My boek met Bybelverhale en Jy kan vir ewig in die paradys op aarde lewe.b Dit is gevolg deur ’n bespreking van die dagteks wat hulle vader voor ontbyt gehou het. Die ouers se pogings is ryklik geseën toe hulle seuns onlangs gekies het om Jehovah te dien en hulle toewyding op die ouderdomme van 10 en 11 deur waterdoop gesimboliseer het.

’n Voorbeeldige jong man wat by die Wagtoringgenootskap se takkantoor in Japan dien, vertel dat sy ma hom gehelp het om ’n verhouding met Jehovah op te bou toe hy nog baie jonk was deur saans langs hom te sit en hom te help bid. Hy het nooit die les vergeet nie—ongeag waarheen hy gegaan het of wat hy gedoen het, Jehovah was altyd naby en gereed om te help.

Suksesvolle ouers leer om verkeerde neigings te herken wat die gevolg van hulle kinders se oorgeërfde onvolmaaktheid is, en die ouers begin hulle kinders vroeg help om dit reg te stel (Spreuke 22:15). Daar moet vroegtydig aandag geskenk word aan neigings om selfsugtig, hardkoppig, trots en oormatig krities teenoor ander te wees. Anders sal sulke saadjies later ontwikkel in opstand teen God en sy weë. Byvoorbeeld, ouers wat goeie bedoelings het, maar te toegeeflik is, laat hulle kinders dikwels egosentriese gesindhede ontwikkel. Hierdie kinders vind dit moeilik om hulle ouers of Jehovah te respekteer, en hulle word soos die ‘ondankbares’ waarvan die Bybel praat (Spreuke 29:21). Daarenteen is kinders wat huistakies gegee word en geleer word om van ander se behoeftes bewus te wees meer geneig om dankbaar teenoor hulle ouers sowel as teenoor Jehovah te wees.

Nog ’n vereiste is om vroeg te begin om teokratiese doelwitte te stel wat ’n kind redelikerwys kan bereik. As dit nie vroeg en konsekwent gedoen word nie, kan ander sy verstand en hart met ander doelwitte vul. Om die Bybel deur te lees, persoonlik een van die Wagtoringgenootskap se publikasies te bestudeer, by die Teokratiese Bedieningskool aan te sluit, ’n verkondiger van die goeie nuus te word en om gedoop te word, moet onder hierdie doelwitte tel.

Takafoemi vertel dat sy ma hom geleer het om gereeld Die Wagtoring en die Ontwaak! te lees deur eenvoudige vrae op te stel en dit op die kombuistafel te los sodat hy dit kon vind wanneer hy van die skool af kom. Joeri onthou dat sy ’n paar dae by pioniersc gewoon het wat gedien het waar daar meer Christenbedienaars nodig was en dat sy saam met hulle in die bediening uitgegaan het, gesien het hoe hulle smaaklike maaltye voorberei en hoe vreugdevol en ywerig hulle was, en dít het haar begeerte om Jehovah op dieselfde manier te dien grootliks beïnvloed. Baie jongmense vertel dat hulle ouers hulle gereeld na Bethel geneem het, soos die Wagtoringgenootskap se hoofkwartier en takkantore genoem word, waar hulle kon sien hoe ander jong manne en vroue Jehovah vreugdevol dien. Baie van dié wat as kinders daar besoek afgelê het, dien nou in Bethelhuise oor die hele wêreld.

Gee jou kinders jou tyd

Die hoeveelheid en die gehalte van die tyd wat jy saam met jou kinders deurbring, sal waarskynlik ’n direkte invloed hê op hulle besluit om Jehovah te dien of nie. Hulle kom gou agter hoeveel tyd en voorbereiding jy aan die Bybelstudie bestee wat jy met hulle hou. As jy nie kan onthou waar jy met die vorige studie opgehou het nie of as jy die studie sonder goeie rede kanselleer, dra jy die boodskap oor dat die studie nie baie belangrik is nie. Maar wanneer hulle sien dat ouers opofferinge vir die studie doen, goed daarvoor voorberei en die studie gereeld hou ongeag wat voorval, word ’n heeltemal ander boodskap oorgedra. Hoewel dit nie ’n vereiste is nie, trek sommige moeders netjies aan vir hulle kinders se studie, soos wanneer hulle vergaderinge bywoon of ’n Bybelstudie met iemand in die buurt hou. Dit skep die indruk dat Jehovah se aanbidding belangrik is.

Dit sal baie tyd en inspanning verg om jou kinders se Bybelonderrigting aangenaam te maak en sodoende hulle hart te bereik. Veral klein kindertjies is beïndruk wanneer hulle sien hoe die dinge wat hulle leer voor hulle opgevoer word. Een pa het byvoorbeeld sy kinders gehelp om die opstanding te visualiseer deur die Bybelverslag van die opstanding van Lasarus op te voer. Hy het in die kas geklim en toe as die verrese Lasarus uitgekom.—Johannes 11:17-44.

Namate die kinders volwassenheid nader, verg dit selfs meer tyd en bekwaamheid om hulle te help om die vloedgolf van emosies, twyfelgedagtes en bekommernisse te verwerk waarvoor hulle te staan kom. Die tyd wat liefdevolle en oordeelkundige ouers in hierdie stadium opsy sit, is uiters belangrik as hulle wil hê die kinders moet vertroue in Jehovah opbou. ’n Suksesvolle vader van vier het vertel dat hy, wanneer sy kinders voor verskillende probleme te staan gekom het, materiaal wat daarmee verband hou in Wagtoring-publikasies opgesoek het en dit elke dag met hulle bespreek het totdat die krisis heeltemal verby was.

’n Besige pionier en moeder van twee het opgemerk dat haar dogter teruggetrokke begin raak het en nie teokratiese bedrywighede geniet het nie. Die moeder het gevolglik gesorg dat sy elke middag tuis is wanneer die kind van die skool af kom, en dan het sy ’n gesprek met haar dogter oor ’n koppie tee aangeknoop. Deur die intieme gesprekke tussen moeder en dogter het die meisie die nodige hulp ontvang. Noudat sy haar skoolloopbaan voltooi het, het sy by haar ma in die pionierdiens aangesluit.—Spreuke 20:5.

Goeie omgang en voorbeeld

Ouers moet nie net hulle tyd gee nie, maar hulle moet hulle kinders ook van heilsame omgang voorsien. Spreuke 13:20 sê: “Gaan met die wyse om, dan word jy wys; maar hy wat met dwase verkeer, versleg.”

Talle suksesvolle ouers besef hoe waar daardie spreuk is. ’n Vader van vier sê: “Wanneer ek terugkyk, dink ek dat dit ons kinders se groot vriendekring in die waarheid was wat gehelp het dat hulle beweeg is om Jehovah te dien. Ek het hulle aangemoedig om vriende in ander gemeentes sowel as in ons eie te maak en om daardie vriendskappe te koester.” ’n Christen- ouere man wat al baie jare by Bethel dien, het vertel: “Toe ek jonk was, was ons huis klein, maar dit is altyd as verblyf vir die kringopsiener aangebied. Daarbenewens het spesiale pioniers in ons gemeente gereeld by ons kom eet. Hulle het by ons huis gebad en by ons gekuier. Ek het na hulle ondervindinge geluister en hulle vreugde gesien, en dit het my gehelp om waardering vir die voltydse diens aan te kweek.”

Goeie omgang help diegene met probleme. ’n Moeder wie se seun ’n moeilike tyd deurgemaak het, het die probleem met ’n reisende opsiener van Jehovah se Getuies bespreek. Hy het aanbeveel dat sy die seun saam met haar in die velddiens neem. “As jy dit doen, sal sy geestelikheid en al die ander dinge verbeter”, het die opsiener gesê. Sy vertel: “In ons gemeente was daar ’n reëling vir aandgetuieniswerk, en baie skoolgaande kinders, verskeie ouer gewone pioniers en ten minste een ouere man het daaraan deelgeneem. Aanvanklik was dit ’n stryd om my seun sover te kry om gereeld uit te gaan, maar dit het nie lank geduur nie, aangesien hy altyd vroliker by die huis aangekom het en deur die heilsame omgang aangemoedig is. Terwyl hy op hoërskool was, is hy gedoop en het hy elke maand as ’n hulppionier gedien, en toe hy sy skoolloopbaan voltooi het, het hy ’n gewone pionier geword.” Heilsame omgang tesame met die uitvoering van Jehovah se wil het goeie vrugte afgewerp.

Daar is dalk nie plaaslik jongmense wat ’n heilsame invloed op jou kind kan hê nie, maar ’n opmerking wat baie jongmense gemaak het wat gekies het om Jehovah te dien, hou verband met die voorbeeld wat hulle ouers gestel het. Baie jongmense het hulle ouers bewonder en wou hulle navolg. Joeri onthou haar ma se gasvryheid en hoe sy getoon het dat sy vir ander omgee deur hulle te bel en etes vir die siekes voor te berei. Tatsoeo, wat uit ’n gesin van vier seuns kom wat almal nou volwasse is en Jehovah dien, het gesê: “My ma kon nie gereeld met ons studeer nie omdat my pa ’n ongelowige was, en sy het baie teëstand van die familie gekry. Maar ek het gesien hoe sy haar standpunt vir die waarheid inneem en hoeveel vreugde dit haar verskaf het om Jehovah te dien, en dit het my grootliks beïnvloed. Sy was ook gewillig om tot die vroeë oggendure op te bly om ons met ons probleme te help.” Ouers se wyse woorde het krag wanneer dit deur getroue werke gerugsteun word. Joitsjiro het van sy ouers gesê: “Ek kan nie onthou dat hulle ooit iets negatiefs oor ander in die gemeente gesê het nie; en ons is ook nie toegelaat om oor ander se foute te skinder nie.”—Lukas 6:40-42.

Die vreugde wanneer kinders Jehovah kies

Daar is geen onfeilbare metode om jou kinders te help om Jehovah te kies nie. Daar sal talle angsvolle oomblikke wees. Maar die besorgde vader wat vroeër genoem is, het gesê: “As ouers het ons altyd die wenke van Jehovah se sigbare organisasie getrou probeer volg. Dit het grootliks gehelp om probleme te oorkom.” Hulle pogings was geslaagd.

Ja, as jy jou bes doen om Bybelriglyne te volg, jou kinders grondige redes gee om Jehovah lief te hê en dit deur jou getroue voorbeeld en opregte pogings rugsteun, sal jou pogings waarskynlik ook uiteindelik met sukses bekroon word. Onthou jy nog die seun wat eers gesê het dat hy nie een van Jehovah se Getuies gaan word nie? Wel, nadat sy moeder hom met welslae deur sy moeilike jare gehelp het, het hy gesê: “Ek is bly dat sy nooit moed opgegee het nie!” Dit kan net so wees met jou kinders.—Galasiërs 6:9.

[Voetnote]

[Prent op bladsy 30]

Kan jy met gelukkige herinneringe terugkyk op die grootmaak van jou kinders?