Delf dieper in God se Woord
‘As jy daarna soek soos na verborge skatte, dan sal jy die kennis van God vind.’—SPREUKE 2:4, 5.
1. Wat is ’n ware bron van geluk, en waarom?
“GELUKKIG die mens wat wysheid gevind het, en die mens wat verstand verkry; want die verkryging daarvan is beter as die van silwer, en die verwerwing daarvan beter as van goud; dit is kosteliker as korale, en al jou kleinode kan daar nie mee vergelyk word nie. In sy regterhand is lengte van dae . . . Dit is ’n lewensboom vir die wat dit aangryp, en elkeen wat dit vashou, is gelukkig.”—Spreuke 3:13-18.
2. Waarom is Jehovah se Getuies bly, maar watter raad ontvang hulle sedert hulle doop?
2 Ware Christene is inderdaad bly dat hulle wysheid kon vind. Dit is die vermoë om hulle kennis van God se Woord in hulle aktiewe aanbidding te gebruik, om hulle daaglikse probleme op te los en om besluite rakende hulle doelwitte in die lewe te neem. Voordat hulle deur Jehovah se Getuies vir doop aanvaar word, word elke kandidaat se basiese Bybelkennis deur ’n omvattende reeks pertinente vrae getoets. Een van die slotvrae lui: “Waarom sal dit, na jou waterdoop, vir jou lewensbelangrik wees om ’n goeie rooster vir persoonlike studie te behou en om gereeld aan die bediening deel te neem?” Dit maak daardie doopkandidaat daarvan bewus dat hy moet aanhou studeer nadat hy die grondbeginsels geleer het en dat hy moet ‘voortgaan tot rypheid’ (Hebreërs 6:1, NW). Maar slaan almal ag op hierdie raad?
3, 4. (a) Wat het Paulus van sommige Christene in Korinthe en in Judea gesê? (b) Wat is skynbaar die geval met party Christene vandag?
3 In sy eerste brief aan die Christene in Korinthe het die apostel Paulus gekla dat hy nie met hulle kon spreek “soos met geestelike mense” nie, maar dat hy met hulle moes spreek “soos met klein kinders in Christus” (1 Korinthiërs 3:1). Hy het eweneens aan die Christene, wat waarskynlik in Judea gewoon het, geskryf: “Waaroor ons veel te sê het wat swaar is om te verklaar, omdat julle traag geword het om te hoor. Want hoewel julle vanweë die tyd leraars behoort te wees, het julle weer nodig dat ’n mens julle die eerste beginsels van die woorde van God moet leer, en julle het weer behoefte aan melk en nie aan vaste spys nie. Want elkeen wat melk gebruik, is onervare in die woord van geregtigheid, omdat hy ’n kind is.”—Hebreërs 5:11-13.
4 Dit wil voorkom of daar vandag ook sommige is wat, nadat hulle genoeg kennis verkry het om hulle aan Jehovah toe te wy met die hoop om vir ewig in die Paradys op aarde te lewe, nie ernstige, langdurige studiegewoontes aankweek nie. Hulle meen moontlik dat hulle genoeg weet om, geestelik gesproke, “oor die weg te kom”. Hulle vorder nie verder as die “melk”-stadium nie. Paulus sê ronduit dat sulke persone “onervare in die woord van geregtigheid” bly, dit wil sê, hulle is ongewoond daaraan om “die woord van geregtigheid” te gebruik om dinge te beproef. Paulus voeg by: “Maar vaste spys is vir volwassenes, vir die wat geestesvermoëns besit deur die gewoonte geoefen, om goed van kwaad te onderskei.”—Hebreërs 5:14.
“Vaste spys” nodig vir groei
5, 6. (a) Wat is die geval met sommige wat al jare lank in die waarheid is, en waarom is dit abnormaal? (b) Wat het Paulus vir sulke persone gesê, en wat moet hulle dus doen?
5 Hoe lank is jy al ’n toegewyde kneg van Jehovah? Dink na oor jou geestelike groei gedurende daardie jare. Kan jy slegs die grondwaarhede van die Bybel, “die eerste beginsels van die woorde van God”, verduidelik? Party wat al 10 of 20 jaar lank in die Christenweg wandel, is nog by die “melk”-stadium. Wat sou mense van ’n tienjarige kind, of ’n jong man of vrou van 20, dink wat nog melk uit ’n bottel drink? Sou dit nie ’n anomalie wees nie? Sou so ’n melkdieet nie die persoon se groei belemmer nie? Die individu bly dalk aan die lewe, maar hy of sy sal nie ’n sterk en gesonde volwassene word nie. Dieselfde geld vir geestelikheid.
6 Waarom is party wat jare lank Christene is nie geestelik sterk genoeg om die wat tereg “klein kinders” is, diegene wat onlangs hulle standpunt vir Jehovah ingeneem het, daadwerklik te help nie? Diegene wat nie vordering gemaak het nie, het jare lank die tyd en aandag van Christen- ouere manne en ander rypes ontvang, hoewel hulle, soos Paulus sê, self “vanweë die tyd leraars behoort te wees”. Om leraars, ofte wel onderrigters, te word, moet hulle verder as die “melk”-dieet vorder en daaraan gewoond raak om “vaste spys” te eet. Hoe kan hulle dit doen?—Hebreërs 5:12.
7. Vir wie is “vaste spyse” volgens Hebreërs 5:14 gepas, en hoe word ’n Christen so ’n persoon?
7 Paulus sê “vaste spys is vir volwassenes”, en hy definieer sodaniges as “die wat geestesvermoëns besit deur die gewoonte geoefen, om goed van kwaad te onderskei”. Met ander woorde, diegene wat dit ’n gewoonte maak om watter kennis hulle ook al van God se Woord het te gebruik om tussen goed en kwaad te onderskei, sal geleidelik hulle geestesvermoëns oefen en Christenrypheid verkry. Hulle sal daaraan gewoond raak om “die woord van geregtigheid” te gebruik om dinge op die proef te stel en derhalwe te onderskei tussen wat sedelik, geestelik en selfs fisies heilsaam is en wat skadelik is. Deur toe te pas wat hulle leer, sal hulle nie meer “onervare in die woord van geregtigheid” wees nie. Hulle sal “volwassenes” word, vir wie “vaste spys is”.—Hebreërs 5:13, 14.
Kweek goeie “eetgewoontes” aan
8. Hoe kan ’n Christen hom op ’n “melk”-dieet hou, maar hoe kan hy sy geestelike “eetgewoontes” verander?
8 Siekes wat vir ’n lang tyd op ’n melkdieet was, moet hulle liggaam weer aan vaste kos gewoond laat raak. Diegene wat die gewoonte aangekweek het om te “peusel” aan die geestelike voedsel wat “die getroue en verstandige dienskneg” voorsit, en wat daardie versnaperinge wat ’n bietjie meer “kou” (bepeinsing en navorsing) verg as ’t ware eenkant op hulle bord los, sal eweneens ’n poging moet aanwend om goeie geestelike “eetgewoontes” aan te kweek. Hulle sal ‘hulle vermoë om helder te dink moet opwek’ en ‘hulle kragtig moet inspan’.—Mattheüs 24:45; 2 Petrus 3:1, 2, NW; Lukas 13:24, NW.
9. Wat kan iemand help as hy sy aptyt verloor het?
9 Daar is drie dinge wat ’n persoon wat siek was, kan help om sy aptyt vir vaste, voedsame kos te herwin: (1) die regte dryfveer, dit wil sê, die begeerte om weer gesond en sterk te word, (2) smaaklike kos wat gereeld voorgesit word en (3) genoeg vars lug en oefening. Hoe kan hierdie punte iemand help wat sy aptyt vir die dieper dinge van God se Woord verloor het?
10. Watter regte dryfveer moet ons beweeg om ons kennis van God se Woord te vermeeder?
10 Enige persoon wat sy lewe aan Jehovah toegewy het, behoort ’n sterk dryfveer te hê om sy kennis van God se Woord te vermeerder. Ons liefde vir Jehovah beweeg ons om sy wonderlike eienskappe, sy wil en sy voornemens beter te leer ken. Dit vereis diep studie en bepeinsing (Psalm 1:I, 2; 119:97). Daarbenewens hang ons hoop om vir ewig in God se paradysaarde te lewe daarvan af dat ons voortdurend ‘kennis inneem van die enigste ware God en van sy Seun, Jesus Christus’ (Johannes 17:3). Maar ons begeerte na ewige lewe moet nie ons vernaamste beweegrede wees waarom ons die Skrif bestudeer nie. Dit was die fout wat sommige ongelowige Jode begaan het. Ons moet ‘die Skrifte ondersoek’ hoofsaaklik uit liefde vir God en met die begeerte om sy wil te doen.—Johannes 5:39-42; Psalm 143:10, NAV.
11. Hoe ontvang ons gereeld smaaklike voedsel?
11 Die oorvloed smaaklike geestelike voedsel wat gereeld en “op tyd” deur “die getroue en verstandige dienskneg” voorsien word, moet ons almal beweeg om ons waardering te toon deur die goeie dinge wat voorsien word ten volle te benut (Mattheüs 24:45). Ons moet goeie geestelike “eetgewoontes” aankweek deur genoeg tyd af te sonder om al die uitstekende materiaal wat in die Wagtoringgenootskap se boeke en tydskrifte gepubliseer word te lees en te bestudeer. Geestelike voedsel word gereeld voorsien by die vyf weeklikse vergaderinge wat in die gemeentes van Jehovah se Getuies dwarsoor die aarde georganiseer word. Woon jy al hierdie vergaderinge by en is jy goed voorbereid om die voedsel in te neem?
12. (a) Op watter ander manier kan ’n Christen sy geestelike aptyt opbou? (b) Watter vrae kan ons onsself dus afvra?
12 Liefde vir God asook liefde vir ons naaste moet ons beweeg om Sy Woord te bestudeer (Lukas 10:27). ’n Persoon wat sy fisiese aptyt verloor het, kan baat vind by vars lug en oefening. Dit sal die Christen wat ’n aptyt vir “vaste spys” wil opbou eweneens help as hy uitgaan in die predikingswerk en sy kennis gebruik om “hierdie evangelie van die koninkryk” te versprei en ‘dissipels van al die nasies te maak’ (Mattheüs 24:14; 28:19, 20). Onthou dat Paulus vir diegene met ’n “behoefte aan melk”, of wat geestelike kindertjies geword het, gesê het dat hulle “vanweë die tyd leraars behoort te wees” (Hebreërs 5:12). Waar staan jy met die oog op die tyd wat jy al ’n ware Christen is? Het jy, as jy ’n broer is, so vooruitgang gemaak dat jy as ’n “leraar” in die veld, en miskien ook as ’n ouere man in die gemeente gebruik kan word? As jy ’n Christensuster is, kan jy opbouende Bybelstudies hou in die huise van mense wat belangstelling in God se waarheid toon of miskien jou Christensusters in die getuieniswerk help?
Maak studie ’n genot
13. Wat is die verskil tussen lees en studeer?
13 Daar is al gesê dat lees ’n genot is, maar dat studie werk is. Daar steek waarheid daarin. Baie opbouende leeswerk kan vir aangename ontspanning gedoen word. Wat is lekkerder as om jou gemaklik te maak en vir ’n uur of twee ’n verslag uit die Yearbook of Jehovah’s Witnesses of ’n nommer van Ontwaak! te lees? Studie beteken egter werk. ’n Woordeboek sê: “Studie dui op volgehoue, doelgerigte konsentrasie met sodanige noukeurige aandag aan besonderhede wat nodig is om die moontlikhede, toepassings, variasies of verhoudinge van die onderwerp wat bestudeer word te openbaar.” Ja, studie verg inspanning. Maar soos enige welgedane werk bevredigend en lonend kan wees, kan studie aangenaam en geestelik lonend wees. Dit is in ons belang om dit so te maak. Hoe?
14. Wat moet jy dalk doen om jou persoonlike studie aangenamer en voordeliger te maak?
14 Dit is nodig om genoeg tyd aan studie af te staan om dit aangenaam en waarlik voordelig te maak. Aangesien “studie dui op volgehoue, doelgerigte konsentrasie” en “noukeurige aandag aan besonderhede”, hoe dikwels kan jy eerlik waar sê dat jy jou Wagtoring of die publikasie wat vir jou Gemeentelike Boekstudie gebruik word, bestudeer het? Sou dit nie juister wees om te sê dat jy dikwels vlugtig deur die studiemateriaal lees en gou die antwoorde op die vrae onderstreep sonder om waarlik die besonderhede en die redes vir die gegewe verduidelikings in te neem nie? As dit met jou die geval is, is die eerste stap wat jy moet doen om jou geestelike “eetgewoontes” te verbeter waarskynlik om ‘die tyd uit te koop’ vir studie (Efesiërs 5:15-17). Dit beteken dalk ’n drastiese inkorting van tyd wat aan ander minder belangrike bedrywighede bestee word. Maar jy sal moontlik verbaas wees oor hoe aangenaam studie kan word wanneer jy die tyd het om reg aan die materiaal te laat geskied eerder as om dit net vlugtig deur te gaan.
15. Wat anders is onontbeerlik indien studie aangenaam sowel as geestelik voordelig moet wees?
15 Die tydfaktor hou verband met die kwessie van gebed. Jehovah se seën is noodsaaklik om studie geestelik voordelig te laat wees. Ons moet in die naam van Jesus tot hom bid en hom vra om ons verstande en harte oop te maak en hulle waarlik ontvanklik te maak vir die waarhede wat bestudeer gaan word. Hoe dikwels moes jy nie gou gaan sit om ’n vergadering voor te berei nie, net om later te besef dat jy vergeet het om Jehovah te vra om sy seën en om wysheid om die dinge wat jy leer in jou daaglikse lewe toe te pas? Waarom jou Jehovah se hulp ontsê as jy net daarom hoef te vra?—Jakobus 1:5-7.
Delf dieper
16. Wat moet ons in ooreenstemming met die temateks vir hierdie studie doen as ons kennis, insig en verstand wil verkry?
16 Spreuke 2:4, 5 sê: ‘As jy daarna soek soos na verborge skatte, dan sal jy die kennis van God vind.’ Die verband van daardie gedeelte handel oor die nodigheid om Jehovah se “woorde”, “gebooie”, “wysheid”, “insig” en “verstand” te soek. ’n Soektog na skatte verg inspanning en volharding. Dit vereis baie delwery. Dit is net dieselfde wanneer daar gesoek word na “die kennis van God”, na “insig” en “verstand”. Dit verg ook dat daar baie gedelf, of onder die oppervlak gesoek, moet word. Moenie dink dat dit genoeg is om God se Woord oppervlakkig te bestudeer nie.
17. Wat sê die Skrif oor Jehovah se gedagtes, en waarvoor moet ons derhalwe dankbaar wees?
17 ’n Psalmis het uitgeroep: “Hoe groot is u werke, o HERE; baie diep is u gedagtes!” (Psalm 92:6). Die apostel Paulus het bewonderend geskryf: “o, Diepte van die rykdom en wysheid en kennis van God!” (Romeine 11:33). In ’n ander brief het hy gepraat van “die diep dinge van God” (1 Korinthiërs 2:10, NW). Ja, soos Paulus verduidelik, openbaar God sulke diep dinge “deur sy gees”. Daardie werkende krag werk kragtig in op die gesalfde Christene wat deur Christus Jesus aangestel is om geestelike voedsel te voorsien. Ons moet waarlik dankbaar wees vir die geestelike delwery wat die “dienskneg”-klas doen ten einde “die verborge dieptes van God se voornemens” vir ons al hoe duideliker te maak.—1 Korinthiërs 2:10, Today’s English Version.
18. Hoe kan elke Christen dieper in God se Woord delf, en watter spesiale delfgerei is voorsien?
18 Maar dit bevry elke individuele Christen nie van die verantwoordelikheid om dieper in God se Woord te delf met die doel om die verklaarde gedagtes ten volle te verstaan nie. Dit beteken dat die gesiteerde tekste nageslaan moet word. Dit beteken dat die voetnote in Wagtoring-artikels, waarvan party die leser verwys na ’n vroeër publikasie wat ’n vollediger verduideliking van ’n sekere gedeelte of profesie bevat, gelees moet word. Dit vereis van ons dat ons dieper delf, die poging aanwend om daardie ouer publikasie op te spoor en dan die bladsye bestudeer waarna daar verwys word. Dit behels dat ons ten volle gebruik maak van gespesialiseerde Bybelstudiehulpe wat die “dienskneg”-klas oor die jare heen beskikbaar gestel het, soos registers, konkordansies, Aid to Bible Understanding en “All Scripture Is Inspired of God and Beneficial”. Ja, Christene is voorsien van uitstekende delfgerei, waarvan die nuutste die Engelse Naslaanbybel is, wat mettertyd in ’n aantal ander tale beskikbaar sal wees. Laat ons hierdie delfgerei met goeie nut gebruik.
Studeer met ’n doel
19. Watter waarskuwing oor kennis is lewensbelangrik?
19 Die doel waarom ons dieper in God se Woord delf, is nie sodat ons kan voel dat ons beter as ons broers is of om met ons kennis te spog nie. Dit is dikwels die geval met wêreldse mense. In beginsel geld Paulus se woorde hier: “Kennis maak verwaand, maar liefde bou op” (1 Korinthiërs 8:1, NAV). Liefde sal ons beweeg om ons kennis nederig in die predikings- en dissipelmaakwerk te gebruik en op beskeie wyse tot die geestelike waarde van Christenvergaderinge by te dra.
20. Watter vermanings gee Paulus in hierdie opsig?
20 Laat ons “nie meer kinders” wees nie, maar “in alles . . . opgroei in Hom wat die Hoof is, naamlik Christus” (Efesiërs 4: 13-15). “Laat ons voortgaan tot rypheid” (Hebreërs 6:1, NW). Laat ons ryp mense wees met die vermoë om “vaste spys” in te neem wat ons geestelik sterk en bruikbaar in die Christengemeente sal maak. Maar dit behels meer as om kennis deur studie in te neem. Dit vereis dat ons ons met waardering voed met die dinge wat Jehovah sê of met sy gedrukte uitdrukkinge, wat ons in die volgende artikel sal bespreek.—Psalm 110:1; Jesaja 56:8; 66:2.
Ter hersiening
◻ Waarom bly sommige geestelik “klein kinders”?
◻ Wat kan ’n persoon help om tot rypheid te groei?
◻ Hoe kan ons goeie geestelike “eetgewoontes” aankweek?
◻ Wat kan ons persoonlike studie aangenamer maak?
◻ Waarom is dit nodig om diep in God se Woord te delf?
[Venster op bladsy 11]
Faktore wat ’n persoon kan help om geestelike gesondheid te geniet
1. Die regte dryfveer: Kweek ’n sterk begeerte aan om Jehovah beter te leer ken
2. ’n Gereelde dieet: Benut die geestelike voedsel wat gereeld deur “die getroue en verstandige dienskneg” voorsien word
3. Oefening: Gebruik kennis om ander te help deur byvoorbeeld uit te gaan in die predikingswerk