Verlossing by die openbaring van Jesus Christus
“[Wees] bly . . . sodat julle ook by die openbaring van sy heerlikheid met blydskap kan jubel.”—1 PETRUS 4:13.
1. Hoe het Jehovah sy knegte verryk?
JEHOVAH het sy Getuies met baie gawes verryk. As ons Groot Onderrigter het hy ons verlig met ’n volheid van kennis aangaande sy wil en voorneme. Deur sy heilige gees het hy in ons die vermoë ontwikkel om die lig met vrymoedigheid te laat skyn. Die geïnspireerde apostel Paulus deel ons in 1 Korinthiërs 1:6, 7 mee: “Die getuienis aangaande Christus [is] bevestig . . . onder julle, sodat julle in geen enkele genadegawe agterstaan nie, terwyl julle wag op die openbaring van onse Here Jesus Christus.”
2. Watter vreugdevolle vooruitsig bied die “openbaring van onse Here Jesus Christus” aan ons?
2 “Die openbaring van onse Here Jesus Christus”—wat beteken dit? Dit verwys na die tyd wanneer Jesus geopenbaar word as ’n glorieryke Koning wat handelend optree om sy getroue volgelinge te beloon en om wraak uit te oefen op die goddeloses. Soos 1 Petrus 4:13 toon, sal dit vir die geesgesalfde Christene wat hulle onkreukbaarheid handhaaf en hulle lojale metgeselle van die “groot menigte” ’n tyd wees om ‘met blydskap te jubel’ omdat dit die einde van Satan se stelsel van dinge sal beteken.
3. Hoe moet ons, soos ons broers in Thessalonika, standvastig bly?
3 Namate hierdie tyd nader kom, oefen Satan in sy woede al hoe meer druk op ons uit. Soos ’n brullende leeu probeer hy ons verslind. Ons moet vasstaan! (1 Petrus 5:8-10). Ons broers in eertydse Thessalonika het, toe hulle nog nuut in die waarheid was, verdrukkinge gely soortgelyk aan dié wat talle Getuies van Jehovah vandag verduur. Daarom is die apostel Paulus se woorde aan hulle vir ons baie betekenisvol. Hy het geskryf: “Dit [is] reg . . . by God om aan die wat julle verdruk, verdrukking te vergelde, en aan julle wat verdruk word, verligting te gee saam met ons in die openbaring van die Here Jesus uit die hemel met sy magtige engele in vuur en vlam, wanneer Hy wraak uitoefen op die wat God nie ken nie en op die wat aan die evangelie van onse Here Jesus nie gehoorsaam is nie” (2 Thessalonicense 1:6-8). Ja, verligting sal kom!
4. Waarom verdien die geestelikes die oordeel wat by Jesus se openbaring oor hulle gaan kom?
4 In Paulus se dag was dit hoofsaaklik die Joodse godsdiensleiers wat vir die verdrukking verantwoordelik was. Die teenstand waarmee die vredeliewende Getuies van Jehovah vandag te kampe het, word insgelyks dikwels aangestig deur diegene wat beweer dat hulle God verteenwoordig, in die besonder die geestelikes van die Christendom. Hulle gee voor dat hulle God ken, maar hulle verwerp die “een Jehovah” van die Bybel en stel ’n mistiese Drie-eenheid in sy plek (Markus 12:29, NW). Hulle gehoorsaam nie die goeie nuus van onse Here Jesus nie, en hulle verlaat hulle op menseheerskappy vir verligting en verwerp die goeie nuus van Christus se inkomende Koninkryk van geregtigheid. Al hierdie godsdienstige teenstanders moet omkom tydens “die openbaring van die Here Jesus uit die hemel”!
Die “koms” van Jesus Christus
5. Hoe word Jesus se openbaring op aanskoulike wyse in Mattheüs 24:29, 30 geskets?
5 Hierdie openbaring word op aanskoulike wyse deur Jesus in Mattheüs 24:29, 30 geskets. In sy beskrywing van verskillende kenmerke van die teken van sy teenwoordigheid en van die voleinding van die stelsel van dinge sê hy: “Die son [sal] verduister word, en die maan sal sy glans nie gee nie, en die sterre sal van die hemel val, en die kragte van die hemele sal geskud word.” Dan “sal die teken van die Seun van die mens in die hemel verskyn”. Die nasies van die aarde “sal . . . rou bedryf en die Seun van die mens [God se Messiaanse Koning] sien kom op die wolke van die hemel met groot krag en heerlikheid”. Hierdie ‘koms’, er·khoʹme·non in die Grieks, verwys na Jesus se verskyning as Jehovah se Hoofregverdiger.
6, 7. In watter opsig sal ‘elke oog hom sien’, en wie word hierby ingesluit?
6 Hierdie ‘koms’ word ook deur die apostel Johannes beskryf in Openbaring 1:7, waar hy sê: “Kyk, Hy kom met die wolke.” Nee, hierdie vyande sal Jesus nie met hulle letterlike oë sien nie, want “die wolke” dui aan dat hy onsigbaar kom om die oordeel te voltrek. As nietige mense sy hemelse heerlikheid met die blote oog moet aanskou, sal hulle blind word, net soos Saulus op die pad na Damaskus met blindheid geslaan is toe die verheerlikte Jesus in ’n groot flitsende lig aan hom verskyn het.—Handelinge 9:3-8; 22:6-11.
7 Die verslag in Openbaring sê: “Elke oog sal Hom sien, ook hulle wat Hom deursteek het; en al die geslagte van die aarde sal oor Hom rou bedryf.” Dit beteken dat die teenstanders op aarde uit die vernietiging wat Jesus op hulle laat neerreën, sal onderskei dat hy met groot krag en heerlikheid as Jehovah se Skerpregter gekom het. Waarom word hulle beskryf as “hulle wat Hom deursteek het”? Dit is omdat hulle vandag dieselfde venynige houding teenoor Jehovah se knegte openbaar as wat Jesus se vervolgers aan die dag gelê het. Hulle sal inderdaad “oor Hom rou bedryf”.
8. Watter waarskuwing rig Jesus sowel as Paulus aangaande skielike vernietiging?
8 Hoe sal daardie dag van Jehovah se wraak kom? In die profesie in Lukas hoofstuk 21 beskryf Jesus die katastrofiese gebeure wat as die teken van sy teenwoordigheid sedert 1914 gedien het. Dan waarsku Jesus in verse 34 en 35: “Pas op vir julleself, dat julle harte nie miskien beswaar word deur swelgery en dronkenskap en sorge van die lewe nie, en dié dag julle nie skielik oorval nie. Want soos ’n strik sal hy kom oor almal wat op die hele aarde woon.” Ja, daardie dag van Jehovah se wraak kom onverwags, skielik! Die apostel Paulus bevestig dit in 1 Thessalonicense 5:2, 3, waar hy sê: “Die dag van die Here [“Jehovah”, NW] kom net soos ’n dief in die nag. Want wanneer hulle sê: Vrede en veiligheid—dan oorval ’n skielike verderf hulle.” Die nasies praat nou reeds van vrede en veiligheid en kom met voorstelle om die Verenigde Nasies te versterk om deur middel van militêre mag die orde in probleemgebiede te handhaaf.
9. Vir wie ‘gaan die lig op’, en waarom?
9 Die apostel sê vervolgens aan ons in verse 4 en 5: “Maar julle, broeders, is nie in duisternis, dat die dag julle soos ’n dief sou oorval nie. Julle is almal kinders van die lig en kinders van die dag; ons is nie van die nag of die duisternis nie.” Ons verbly ons dat ons kinders van die lig is—ligdraers aan ander wat na ware vrede en veiligheid in God se nuwe wêreld smag. In Psalm 97:10, 11 lees ons: “O julle liefhebbers van Jehovah, haat die kwaad. Hy behoed die siel van sy lojales; hy bevry hulle uit die hand van die goddeloses. Die lig het opgegaan vir die regverdige, en verheuging selfs vir die opregtes van hart.”—NW.
Die volgorde van gebeure
10. Op watter vroeë waarskuwing aangaande God se dag van vergelding moet ons ag slaan? (Openbaring 16:15).
10 In watter volgorde sal dinge gebeur wanneer die groot verdrukking losbars? Kom ons blaai na Openbaring hoofstuk 16. Let op dat dit in verse 13 tot 16 beskryf hoe onreine demoongeeste die nasies van die ganse aarde versamel na Armageddon—die oorlog van daardie groot dag van die almagtige God. Weer eens word die feit beklemtoon dat die dag van vergelding soos ’n dief sal kom, en ons word gewaarsku om te waak—om ons geestelike klere aan te hou wat ons vir redding identifiseer. Die tyd het aangebreek om die mense van die aarde, die nasies, te oordeel—asook iemand anders. En wie is dit?
11. Hoe het die vrou van Openbaring 17:5 haarself geïdentifiseer?
11 Dit is ’n sinnebeeldige vrou wat hard probeer het om aansien te verwerf. Sy word in Openbaring 17:5 beskryf as ’n “verborgenheid, die groot Babilon [“Babilon die Grote”, NW], die moeder van die hoere en van die gruwels van die aarde”. Maar sy is nie meer ’n verborgenheid vir Jehovah se Getuies nie. Sy het haarself duidelik geïdentifiseer as die wêreldryk van valse godsdiens, waarvan die sektes van die Christendom die vernaamste deel vorm. Die feit dat sy haar met politieke aangeleenthede bemoei, is ’n gruwel in Jehovah se oë, en so ook die feit dat sy “dronk [is] van die bloed van die heiliges” deurdat sy ware Christene vervolg en sy verantwoordelik is vir die bloed “van almal wat op die aarde gedood is”, waaronder meer as honderdmiljoen wat net in die oorloë van hierdie 20ste eeu omgekom het.—Openbaring 17:2, 6; 18:24.
12. Waarom word die Christendom se sektes veroordeel?
12 Maar die ergste van alles is die feit dat die sektes van die Christendom smaad gebring het op die naam van die God wat hulle huigelagtig beweer hulle verteenwoordig. Hulle het Babiloniese en Griekse filosofieë verkondig pleks van die suiwer Woord van God, en hulle het tot die sedelike verval van hele nasies bygedra deurdat hulle permissiewe leefwyses goedkeur wat van Bybelbeginsels ’n bespotting maak. Hebsugtige bedrieërs onder hulle word veroordeel deur die woorde wat in Jakobus 5:1, 5 opgeteken is: “Kom nou, julle rykes, ween en huil oor die ellendes wat oor julle kom. Julle het op die aarde ’n weelderige en losbandige lewe gelei; julle het jul harte vet gevoer soos op ’n slagdag.”
Weg met Babilon die Grote!
13. Hoe vind die eerste fase van die groot verdrukking plaas, en watter dringende waarskuwing word in Openbaring 18:4, 5 beklemtoon?
13 Die eerste fase van die groot verdrukking is die voltrekking van Jehovah se oordeel aan Babilon die Grote. Openbaring 17:15-18 beskryf in beeldende taal God se “bedoeling”—om die “tien horings”, sterk magte binne die veelvolkige VN-“wilde dier”, te maneuvreer om haar te vernietig. “En die tien horings wat jy op die [“wilde”, NW] dier gesien het, hulle sal die hoer haat en haar verlate maak en naak, en haar vlees eet en haar met vuur verbrand. Want God het dit in hulle harte gegee om sy bedoeling uit te voer.” Dit is dus geen wonder nie dat ’n stem uit die hemel ’n dringende waarskuwing laat hoor soos ons in Openbaring 18:4, 5, lees: “Gaan uit haar uit, my volk, sodat julle nie gemeenskap met haar sondes mag hê en van haar plae ontvang nie. Want haar sondes reik tot aan die hemel, en God het haar ongeregtighede onthou.” Hierdie waarskuwing word nog gehoor: Verbreek alle bande met valse godsdiens, voordat dit te laat is!
14. Wie sal oor die vernietiging van Babilon die Grote weeklaag, en waarom?
14 Hoe sal die wêreld die vernietiging van Babilon die Grote beskou? Die korrupte politici—“die konings van die aarde”—sal op ’n afstand oor haar weeklaag omdat hulle eeue lank wedersydse genot in hulle geestelike hoerery gevind het. Ook die hebsugtige manne van die sakewêreld, “die handelaars . . . wat van haar ryk geword het”, sal oor haar ween en oor haar rou bedrywe. Hulle sal hulle ook van haar distansieer en sê: “Wee, wee die groot stad wat bekleed was met fyn linne en purper en skarlaken en versierd met goud en edelgesteente en pêrels, omdat in een uur soveel rykdom verwoes is!” Al die swier van kerklike gewade en die luisterrykheid van die wêreld se groot katedrale sal vir ewig verdwyn! (Openbaring 18:9-17). Maar sal almal oor Babilon die Grote weeklaag?
15, 16. Watter rede vir blydskap sal God se volk hê?
15 Openbaring 18:20, 21 gee vir ons die antwoord: “Verbly jou oor haar, o hemel, en o heilige apostels en profete, omdat God julle oordeel aan haar voltrek het!” Soos ’n groot meulsteen wat in die see gegooi word, “so met ’n vaart, [is] Babilon, die groot stad, neergegooi . . . en [sal] nooit meer gevind word nie”.
16 Wat ’n rede tog vir blydskap! Openbaring 19:1-8 bevestig dit. Vier keer weerklink die uitroep “Halleluja” vanuit die hemel. Die eerste drie van hierdie Halleluja’s loof Jehovah omdat hy sy regverdige oordeel aan die berugte hoer, Babilon die Grote, voltrek het. Die wêreldryk van valse godsdiens bestaan nie meer nie! ’n Stem wat uit die troon van God uitgaan, sê: “Prys onse God, al sy diensknegte, en julle wat Hom vrees, klein en groot!” Hoe bevoorreg sal ons tog wees as ons ook daardie lied kan sing!
Die bruilof van die Lam
17. Hoe toon ’n vergelyking tussen Openbaring 11:17 en 19:6 ons in watter twee opsigte Jehovah as Koning begin regeer?
17 Die vierde Halleluja lei ’n ander tema in: “Halleluja! want die Here God [“Jehovah onse God”, NW], die Almagtige, het die koningskap aanvaar.” Maar is daar nie ’n soortgelyke refrein in Openbaring 11:17 aangehef nie? Daar lees ons: “Ons dank U, Jehovah God, die Almagtige, . . . dat U u groot mag aangeneem en as koning begin heers het” (NW). Ja. Maar volgens die teksverband van Openbaring 11:17 verwys dit na Jehovah se oprigting van die Messiaanse Koninkryk in 1914 “wat al die nasies met ’n ystersepter sou regeer” (Openbaring 12:5). Openbaring 19:6 se teksverband is die vernietiging van Babilon die Grote. Met die uitwissing van hoeragtige godsdiens is Jehovah se Godskap geregverdig. Sy aanbidding as die Opperste Soewerein en Koning sal nou tot in alle ewigheid seëvier!
18. Watter jubelende aankondiging kan gemaak word ná die vernietiging van Babilon die Grote?
18 Gevolglik kan die jubelende aankondiging gemaak word: ‘Laat ons bly wees en ons verheug en aan Jehovah die heerlikheid gee, want die bruilof van die Lam het gekom en sy vrou het haar gereed gemaak. En aan haar is gegee om bekleed te wees met rein en blink fyn linne, want die fyn linne is die regverdige dade van die heiliges’ (Openbaring 19:7, 8). Daar word nie gesê presies wanneer die gesalfdes wat nog op die aarde is hulle hemelse opstanding sal ontvang nie. Maar ons word deur die teksverband hier verseker dat hulle deelneming aan die bruilof van die Lam, Christus Jesus, ’n vreugdevolle geleentheid sal wees, en dit des te meer omdat hulle die vernedering van die berugte hoer, Babilon die Grote, persoonlik aanskou het.
Satan se wêreld word vernietig
19. Watter ander verwikkeling word in Openbaring 19:11-21 beskryf?
19 Die wit perd wat die eerste keer in Openbaring 6:2 vermeld word, kom weer te voorskyn. Ons lees in Openbaring 19:11: “En Hy wat daarop sit [op die wit perd], word genoem Getrou en Waaragtig, en Hy oordeel en voer oorlog in geregtigheid.” Die “Koning van die konings en die Here van die here” trek dus uit om die nasies stukkend te slaan en om die parskuip “van die grimmigheid en van die toorn van God, die Almagtige” te trap. Tevergeefs versamel “die konings van die aarde en hulle leërs” om die oorlog van Armageddon te voer. Die Ruiter op die wit perd voltooi sy oorwinning. Daar bly geen spoor van Satan se aardse organisasie oor nie.—Openbaring 19:12-21.
20. Wat gebeur met die Duiwel self?
20 Maar wat gebeur met die Duiwel self? In Openbaring 20:1-6 word daar beskryf hoe Christus Jesus as “’n engel uit die hemel . . . neerdaal, met die sleutel van die afgrond en ’n groot ketting in sy hand”. Hy gryp die draak, die ou slang wat die duiwel en die Satan is, en bind hom, werp hom dan in die afgrond en sluit dit toe en verseël dit bo hom. Met die verwydering van Satan wat nou nie meer die nasies kan mislei nie, breek die glorieryke Duisendjarige Ryk van die Lam en sy bruid aan. Nou is daar geen trane van smart meer nie! Geen Adamiese dood nie! Geen droefheid, geen geween, geen pyn meer nie! “Want die eerste dinge het verbygegaan.”—Openbaring 21:4.
21. Wat moet ons vasbeslote wees om te doen terwyl ons reikhalsend uitsien na die openbaring van Jesus Christus?
21 Laat ons met ywer voortgaan om vir ander van God se liefdevolle Koninkryksbeloftes te vertel terwyl ons reikhalsend wag op die openbaring van onse Here Jesus Christus. Verlossing is op hande! Mag ons, as verligte kinders van die Soewereine Heer Jehovah, voorwaarts beweeg, ja, altyd voorwaarts!
Ter hersiening
◻ Wat toon dat die openbaring van Jesus Christus op hande is?
◻ Hoe sal die dag van Jehovah se wraak kom?
◻ Hoe moet “liefhebbers van Jehovah” die huidige wêreldsituasie beskou?
◻ In watter volgorde sal dinge gebeur wanneer die groot verdrukking losbars?
[Prent op bladsy 23]
Jesus ‘kom met die wolke’ om onsigbaar oordeel te voltrek
[Prent op bladsy 25]
Valse godsdiens, Satan se goddelose stelsel en Satan self gaan binnekort verwyder word