Hoofstuk 16
Hoe jy na aan God kan kom
1. Watter ooreenkomste kan in baie godsdienste gesien word?
’N TOERIS wat ’n Oosterse land besoek het, was verbaas oor die godsdiensrituele wat sy in ’n Boeddhistetempel gesien het. Hoewel die beelde nie dié van Maria of Christus was nie, het baie van die rituele met dié van haar kerk by die huis ooreengekom. Sy het byvoorbeeld die gebruik van bidsnoere en die gedreun-sing van gebede gesien. Ander het ook al sulke vergelykings gemaak. Of dit nou die Ooste of die Weste is, daar is ’n opvallende ooreenkoms tussen die maniere waarop aanbidders na aan God of die voorwerpe van hulle aanbidding probeer kom.
2. Hoe is gebed al beskryf, en waarom bid baie mense?
2 Baie probeer veral deur gebed om na aan God te kom. Gebed is al beskryf as “’n daad van kommunikasie deur die mens met dit wat heilig is—God, die gode, die transendentale ryk of bonatuurlike magte” (The New Encyclopædia Britannica). Maar wanneer party God in gebed nader, dink hulle net aan hoe hulle daaruit voordeel kan trek. ’n Man het byvoorbeeld eenkeer vir een van Jehovah se Getuies gevra: “Sal die probleme wat ek in my gesin, by die werk en met my gesondheid ondervind, opgelos word as jy vir my bid?” Die man het blykbaar so gedink, maar baie bid en vind dat hulle probleme voortduur. Ons kan dus vra: ‘Waarom moet ons dan nou eintlik na aan God kom?’
WAAROM ONS NA AAN GOD MOET KOM
3. Tot wie moet ons gebede gerig word, en waarom?
3 Gebed is nie ’n leë ritueel of bloot ’n manier om iets te verkry nie. ’n Vername rede om God te nader, is om ’n hegte verhouding met hom te hê. Ons gebede moet derhalwe tot Jehovah God gerig word. “Die HERE is naby almal wat Hom aanroep”, het die psalmis Dawid gesê (Psalm 145:18). Jehovah nooi ons om in ’n vreedsame verhouding met hom te kom (Jesaja 1:18). Dié wat hierdie uitnodiging aanvaar, is dit eens met die psalmis wat gesê het: “Wat my aangaan, dit is vir my goed om naby God te wees.” Waarom? Omdat dié wat na aan Jehovah God kom ware geluk en gemoedsrus sal geniet.—Psalm 73:28.
4, 5. (a) Waarom is dit belangrik om tot God te bid? (b) Watter soort verhouding kan ons deur gebed met God opbou?
4 Waarom moet ons tot God om hulp bid as hy ‘weet wat ons nodig het voordat ons hom vra’? (Matteus 6:8; Psalm 139:4). Gebed toon dat ons geloof in God het en hom as die Bron van “elke goeie gawe en elke volmaakte geskenk” beskou (Jakobus 1:17; Hebreërs 11:6). Jehovah skep behae in ons gebede (Spreuke 15:8). Hy is bly om ons sinvolle woorde van waardering en lof te hoor, net soos ’n vader hom verheug wanneer hy sy jong kind opregte woorde van waardering hoor uitspreek (Psalm 119:108). Wanneer daar ’n goeie vader-kind-verhouding is, is daar hartlike kommunikasie. ’n Geliefde kind wil met sy vader praat. Dieselfde geld vir ons verhouding met God. As ons werklik waardeer wat ons van Jehovah leer en van die liefde wat hy vir ons getoon het, sal ons ’n sterk begeerte hê om in gebed vir hom te sê hoe ons voel.—1 Johannes 4:16-18.
5 Wanneer ons die Allerhoogste God nader, moet ons eerbiedig wees, hoewel dit nie nodig is om oorbesorg te wees oor die presiese woorde wat ons gebruik nie (Hebreërs 4:16). Ons het altyd toegang tot Jehovah. En wat ’n voorreg is dit tog dat ons in gebed ‘ons hart kan uitstort’ voor God! (Psalm 62:9). Waardering vir Jehovah lei tot ’n hartlike verhouding met hom, soos die getroue man Abraham as God se vriend geniet het (Jakobus 2:23). Maar wanneer ons tot die Soewereine Heer van die heelal bid, moet ons sy vereistes nakom ten opsigte van gebed tot hom.
VEREISTES OM NA AAN GOD TE KOM
6, 7. Hoewel God nie geld vra om ons gebede te verhoor nie, vereis hy wel wat van ons wanneer ons bid?
6 Is geld nodig om God te nader? Baie mense betaal die geestelikes om vir hulle te bid. Party glo selfs dat hulle gebede verhoor sal word na gelang van die grootte van hulle bydrae. Maar God se Woord sê nie dat ’n geldoffer nodig is sodat ons Jehovah in gebed kan nader nie. Sy geestelike voorsienings en die seëninge van ’n verhouding met hom in gebed is beskikbaar sonder prys.—Jesaja 55:1, 2.
7 Wat is dan nodig? ’n Regte hartstoestand is een vereiste (2 Kronieke 6:29, 30; Spreuke 15:11). In ons hart moet ons geloof in Jehovah God beoefen as die “Hoorder van die gebed” en ‘die beloner van dié wat hom ernstig soek’ (Psalm 65:3; Hebreërs 11:6). Ons moet ook ’n nederige hart hê (2 Konings 22:19; Psalm 51:19). In een van sy illustrasies het Jesus Christus getoon dat ’n beskeie belastinggaarder met ’n nederige hartstoestand regverdiger as ’n verwaande Fariseër was toe hulle God genader het (Lukas 18:10-14). Wanneer ons God in gebed nader, moet ons onthou dat ‘elke hoogmoedige van hart vir Jehovah ’n gruwel is’.—Spreuke 16:5.
8. Waarvan moet ons ons reinig as ons wil hê dat God ons gebede moet verhoor?
8 As ons wil hê dat God ons gebede moet verhoor, moet ons ons van sondige gedrag reinig. Toe die dissipel Jakobus ander aangemoedig het om nader aan God te kom, het hy bygevoeg: “Reinig julle hande, julle sondaars, en suiwer julle harte, julle besluiteloses” (Jakobus 4:8). Selfs oortreders kan in ’n vreedsame verhouding met Jehovah kom as hulle berou toon en hulle vorige lewenswyse laat staan (Spreuke 28:13). Ons kan nie voor Jehovah verskyn as ons bloot voorgee dat ons ons weg gereinig het nie. “Die oë van Jehovah is op die regverdiges, en sy ore is tot hulle smeking; maar die aangesig van Jehovah is teen dié wat slegte dinge doen”, sê God se Woord.—1 Petrus 3:12.
9. Deur wie moet ons Jehovah nader, en waarom?
9 Die Bybel sê: “Daar is geen regverdige mens op die aarde wat goed doen sonder om te sondig nie” (Prediker 7:20). Jy kan dus vra: ‘Hoe kan ons Jehovah God dan nader?’ Die Bybel antwoord: “As iemand wel ’n sonde pleeg, het ons ’n helper by die Vader, Jesus Christus, ’n regverdige” (1 Johannes 2:1). Hoewel ons sondaars is, kan ons God deur Jesus Christus, wat as ’n losprys vir ons gesterf het, met vrymoedigheid van spraak nader (Matteus 20:28). Hy is die enigste kanaal deur wie ons Jehovah God kan nader (Johannes 14:6). Ons moet nie die waarde van Jesus se losprysofferande as vanselfsprekend aanneem en opsetlik sonde beoefen nie (Hebreërs 10:26). Maar as ons ons bes doen om nie te doen wat sleg is nie en tog soms sondig, kan ons berou toon en God om vergifnis vra. Wanneer ons hom met ’n nederige hart nader, sal hy ons verhoor.—Lukas 11:4.
GELEENTHEDE OM MET GOD TE PRAAT
10. Hoe kan ons Jesus ten opsigte van gebed navolg, en wat is party geleenthede vir private gebed?
10 Jesus Christus het sy verhouding met Jehovah baie kosbaar geag. Daarom het Jesus tyd ingeruim om in persoonlike gebed met God te praat (Markus 1:35; Lukas 22:40-46). Dit sal goed wees as ons Jesus se voorbeeld na–volg en gereeld tot God bid (Romeine 12:12). Dit is gepas om die dag met woorde van gebed te begin, en voor ons bed toe gaan, kan ons Jehovah tereg dank vir die dag se bedrywighede. Ons moet ons dit ten doel stel om God gedurende die dag “by elke geleentheid” te nader (Efesiërs 6:18). Ons kan selfs stil in ons hart bid, in die wete dat Jehovah ons kan hoor. As ons privaat met God praat, help dit ons om ons verhouding met hom te versterk, en as ons daagliks tot Jehovah bid, help dit ons om al hoe nader aan hom te kom.
11. (a) Waarom moet gesinne saam bid? (b) Wat beteken dit wanneer jy aan die einde van ’n gebed “Amen” sê?
11 Jehovah luister ook na gebede wat ten behoewe van groepe mense gedoen word (1 Konings 8:22-53). Ons kan as ’n gesin na aan God kom, met die gesinshoof wat die leiding neem. Dit versterk die gesinsband, en Jehovah word ’n werklike persoon vir die jonges wanneer hulle hulle ouers nederig tot God hoor bid. En sê nou iemand verteenwoordig ’n groep in gebed, miskien by ’n vergadering van Jehovah se Getuies? As ons in die gehoor is, moet ons aandagtig luister sodat ons aan die einde van die gebed heelhartig “Amen” kan sê, wat beteken: “Laat dit so wees.”—1 Korintiërs 14:16.
GEBEDE WAT JEHOVAH VERHOOR
12. (a) Waarom verhoor God party gebede nie? (b) Waarom moet ons nie net oor persoonlike behoeftes bid nie?
12 Party meen dalk dat God nie hulle gebede verhoor nie, selfs al bid hulle deur Christus tot hom. Die apostel Johannes het egter gesê dat “[God] ons hoor, ongeag wat ons volgens sy wil vra” (1 Johannes 5:14). Ons moet dus volgens God se wil vra. Aangesien hy in ons geestelike welvaart belangstel, is enigiets wat ons geestelikheid raak ’n gepaste onderwerp vir gebed. Ons moet die versoeking weerstaan om net oor fisiese behoeftes te bid. Terwyl dit byvoorbeeld gepas is om in gebed insig en krag met be–trekking tot ’n siekte te vra, moet kwellinge oor gesondheid nie geestelike belange verdring nie (Psalm 41:2-4). Toe een Christenvrou besef het dat sy te besorg oor haar gesondheid is, het sy Jehovah gevra om haar te help om die regte beskouing van haar siekte te hê. Gevolglik het haar gesondheidsprobleme ’n baie minder belangrike kwessie geword, en sy het gevoel dat sy “krag wat bo die normale is”, ontvang het (2 Korintiërs 4:7). Haar begeerte om ander geestelik te help, het toegeneem, en sy het ’n voltydse Koninkryksverkondiger geword.
13. Wat toon Matteus 6:9-13 is party gepaste onderwerpe wat ons in ons gebede kan insluit?
13 Wat kan ons in ons gebede insluit sodat Jehovah graag daarna sal luister? Jesus Christus het sy dissipels geleer hoe om te bid. In die modelgebed wat in Matteus 6:9-13 opgeteken is, het hy ’n voorbeeld gegee van onderwerpe waaroor ons tereg kan bid. Wat moet van die grootste belang in ons gebede wees? Jehovah God se naam en Koninkryk moet die voorrang geniet. Dit is gepas om versoeke ten opsigte van ons materiële behoeftes te rig. Dit is ook belangrik om vergifnis vir ons sondes te vra, asook verlossing van versoekings en van die bose, Satan die Duiwel. Jesus wou nie hê dat ons hierdie gebed moes sing-praat of dit oor en oor moes herhaal en moes opsê sonder om te dink aan wat dit beteken nie (Matteus 6:7). Watter soort verhouding sou dit wees as ’n kind elke keer dieselfde woorde gebruik wanneer hy met sy vader praat?
14. Behalwe versoeke, watter soort gebede moet ons doen?
14 Behalwe versoeke en hartgrondige smekinge moet ons lof- en dankgebede doen (Psalm 34:2; 92:2; 1 Tessalonisense 5:18). Ons kan ook vir ander bid. Gebede oor ons geestelike broers en susters wat swaarkry of vervolg word, toon ons belangstelling in hulle, en dit behaag Jehovah om ons sulke besorgdheid te hoor uitspreek (Lukas 22:32; Johannes 17:20; 1 Tessalonisense 5:25). Trouens, die apostel Paulus het geskryf: “Moet oor niks besorg wees nie, maar laat julle versoeke in alles deur gebed en smeking tesame met danksegging by God bekend word; en die vrede van God wat alle denke te bowe gaan, sal julle harte en julle verstandelike vermoëns deur middel van Christus Jesus bewaak.”—Filippense 4:6, 7.
HOU VOL MET GEBED
15. Wat moet ons onthou as dit lyk of ons gebede nie verhoor word nie?
15 Hoewel jy kennis oor God opdoen, voel jy dalk dat jou gebede soms nie verhoor word nie. Dit is miskien so omdat dit nie God se tyd is om ’n spesifieke gebed te verhoor nie (Prediker 3:1-9). Jehovah laat ’n situasie dalk ’n ruk lank voortduur, maar hy verhoor wel gebede en weet wanneer dit die beste tyd is om dit te doen.—2 Korintiërs 12:7-9.
16. Waarom moet ons volhard in gebed, en hoe kan dít ons verhouding met God raak?
16 Ons volharding in gebed toon ons opregte belangstelling in wat ons vir God sê (Lukas 18:1-8). Byvoorbeeld, ons vra Jehovah dalk om ons te help om ’n sekere swakheid te bowe te kom. Deur met gebed vol te hou en in ooreenstemming met ons versoeke op te tree, toon ons ons opregtheid. Ons moet spesifiek en eerlik wees in ons versoeke. Dit is veral belangrik om intens te bid wanneer ons voor ’n versoeking te staan kom (Matteus 6:13). Wanneer ons aanhou bid terwyl ons ons sondige neigings probeer bedwing, sal ons sien hoe Jehovah ons help. Dit sal ons geloof opbou en ons verhouding met hom versterk.—1 Korintiërs 10:13; Filippense 4:13.
17. Hoe sal ons by ’n biddende gesindheid in ons diens aan God baat vind?
17 As ons ’n biddende gesindheid in ons heilige diens aan Jehovah God aankweek, sal dit ons laat besef dat ons hom nie in ons eie krag dien nie. Dit is Jehovah wat dinge gedoen kry (1 Korintiërs 4:7). As ons dit erken, sal dit ons help om nederig te wees en ons verhouding met hom verryk (1 Petrus 5:5, 6). Ja, ons het goeie redes om met gebed vol te hou. Ons ernstige gebede en kosbare kennis van hoe om na aan ons liefdevolle hemelse Vader te kom, sal ons lewe waarlik gelukkig maak.
KOMMUNIKASIE MET JEHOVAH IS NIE EENSYDIG NIE
18. Hoe kan ons na God luister?
18 As ons wil hê dat God ons gebede moet verhoor, moet ons luister na wat hy sê (Sagaria 7:13). Hy stuur nie meer sy boodskappe deur middel van Goddelik geïnspireerde profete nie en gebruik gewis nie spiritistiese middele nie (Deuteronomium 18:10-12). Maar ons kan na God luister deur sy Woord, die Bybel, te bestudeer (Romeine 15:4; 2 Timoteus 3:16, 17). Net soos ons miskien ’n smaak moet ontwikkel vir fisiese voedsel wat vir ons goed is, word ons aangespoor om ‘’n verlange te ontwikkel na die onvervalste melk wat tot die woord behoort’. Ontwikkel ’n smaak vir geestelike voedsel deur God se Woord daagliks te lees.—1 Petrus 2:2, 3; Handelinge 17:11.
19. Van watter nut is dit om te peins oor wat jy in die Bybel lees?
19 Peins oor wat jy in die Bybel lees (Psalm 1:1-3; 77:12, 13). Dit beteken om oor die materiaal na te dink. Jy kan dit met die vertering van voedsel vergelyk. Jy kan geestelike voedsel verteer deur wat jy lees te verbind met dinge wat jy reeds weet. Dink aan hoe die materiaal jou lewe raak, of peins oor wat dit omtrent Jehovah se eienskappe en handelinge openbaar. So kan jy deur persoonlike studie die geestelike voedsel inneem wat Jehovah voorsien. Dit sal jou nader aan God laat kom en sal jou help om daaglikse probleme die hoof te bied.
20. Hoe help die bywoning van Christelike vergaderinge ons om na aan God te kom?
20 Jy kan ook na aan God kom deur na sy Woord te luister wanneer dit by Christelike vergaderinge bespreek word, net soos die Israeliete aandagtig geluister het wanneer hulle vergader het om na die openbare voorlesing van God se Wet te luister. Die onderrigters van destyds het hulle voorlesing van die Wet sinvol gemaak en sodoende hulle luisteraars gehelp om te verstaan wat hulle gehoor het en beweeg te word om dit toe te pas. Dit het tot groot vreugde gelei (Nehemia 8:9, 13). Maak dit dus jou gewoonte om die vergaderinge van Jehovah se Getuies by te woon (Hebreërs 10:24, 25). Dit sal jou help om die kennis van God te verstaan en dan in jou lewe toe te pas en sal vir jou geluk meebring. As jy ’n deel van die wêreldwye Christenbroederskap is, sal dit jou help om na aan Jehovah te bly. En soos ons sal sien, kan jy ware veiligheid onder God se volk vind.
TOETS JOU KENNIS
Waarom moet jy na aan Jehovah kom?
Wat is party van die vereistes om na aan God te kom?
Wat kan jy in jou gebede insluit?
Waarom moet jy met gebed volhou?
Hoe kan jy vandag na Jehovah luister?
[Volbladillustrasie op bladsy 157]