Verhuis jy?
As die antwoord op hierdie vraag ja is, is daar baie dinge waarin jy en ander die inisiatief moet neem. Deur die basiese stappe hieronder te volg, sal jy gou in jou nuwe gemeente gevestig raak.
(1) Sodra jy weet waarheen jy gaan verhuis, sal jou huidige gemeentelike sekretaris moontlik vir jou die adres van die Koninkryksaal van jou nuwe gemeente kan kry. Wanneer jy in daardie gebied aankom, moet jy onmiddellik uitvind waar die saal is en seker maak van die gemeentelike vergaderingtye. As meer as een gemeente die Koninkryksaal gebruik, moet jy by die ouer manne uitvind in watter gemeente se gebied jy woon. Moenie versuim om die vergaderinge by te woon en die plaaslike ouer manne te leer ken nie.
(2) Die sekretarisse van jou huidige en jou nuwe gemeente sal saamwerk om jou en jou gesin se gemeentelike verkondigerverslagkaarte oor te plaas. ’n Bekendstellingsbrief sal ook na die ouer manne van jou nuwe gemeente gestuur word. (Sien die Vraebus in Ons Koninkryksbediening vir Februarie 1991.) Die Gemeentelike Dienskomitee daar moet die betrokke boekstudiehouer in kennis stel dat jy in die gebied ingetrek het sodat hy met jou in aanraking kan kom en vir jou kan verduidelik hoe om by jou nuwe boekstudiegroep te kom.—Rom. 15:7.
(3) Alle verkondigers in jou nuwe gemeente het ’n vreugdevolle rol om te speel—naamlik om jou te leer ken en jou welkom te laat voel. (Vergelyk 3 Johannes 8.) Dit beteken natuurlik dat jy by die vergaderinge teenwoordig moet wees sodat jy aanmoedigende en opbouende assosiasie met die broers en susters kan hê.
(4) Jy moenie wag totdat al die werk wat met verhuising gepaardgaan, afgehandel is voordat jy saam met jou nuwe gemeente aan die veldbediening deelneem nie. Namate jy Koninkryksbelange eerste stel, sal daar na die ander dinge omgesien word, en jy sal baie tuis voel in jou nuwe omgewing (Matt. 6:33). Wanneer jy in jou nuwe huis gevestig is, sal jy waarskynlik broers in die gemeente wil nooi om te kom kuier en hulle beter te leer ken.—Rom. 12:13b.
Dit is ’n groot werk om te verhuis. Wanneer almal wat betrokke is hierdie wenke toepas, sal daar geen geestelike terugslae wees nie. Almal sal bevoordeel word danksy ons liefdevolle Christenbroederskap.