Die „ander skape” en die Here se Aandmaal
„[Jesus] is ’n versoening vir ons sondes, en nie alleen vir ons s’n nie, maar ook vir dié van die hele wêreld.”—1 JOHANNES 2:2.
1. Watter gunstige resultate het die ,verkondiging van die evangelie van die koninkryk’ gelewer?
JESUS het gesê: „Hierdie evangelie van die koninkryk sal verkondig word in die hele wêreld tot ’n getuienis vir al die nasies; en dan sal die einde kom” (Mattheüs 24:14). Party van 1914 se geslag lewe nog om te kan getuig dat Jehovah se Getuies hierdie bevel getrou uitgevoer het. Gevolglik het honderdduisende opregte persone, wat deur hierdie wêreld se mislukkings ontnugter is, gunstig op die goeie nuus gereageer. Hulle het hulle toegewy aan Jehovah God en trou gesweer aan sy Koninkryk, en het hierdie toewyding deur waterdoop bekend gemaak. Gedurende 1984 het 179 421 daardie verstandige weg ingeslaan. Hulle het in werklikheid vir God se naamvolk gesê: „Ons wil met julle saamgaan, want ons het gehoor dat God met julle is.”—Sagaria 8:23.
2. Watter faktor het die tyd vir Jesus se insameling van sy „ander skape” bepaal?
2 Hierdie immertoenemende „groot menigte” aanbidders is deel van diegene wat Jesus as sy „ander skape” beskryf het (Openbaring 7:9, 15; Johannes 10:16). Hulle het die wonderlike hoop om vir ewig in ’n aardse paradys te lewe (Psalm 37:29). Jesus het voorspel dat hy hierdie getroue volgelinge van hom bymekaar sou bring nadat hy eers sy onverdeelde aandag geskenk het aan die insameling van ’n „klein kuddetjie” sagmoediges vir wie hy as middelaar van die nuwe verbond optree (Lukas 12:32; Hebreërs 9:15). Met die oog op hierdie insameling van twee klasse sagmoediges in „een kudde” kan ons verstaan waarom die apostel Johannes gesê het dat Jesus Christus „’n versoening vir ons sondes, en nie alleen vir ons s’n nie, maar ook vir die van die hele wêreld” is.—1 Johannes 2:1, 2.
Veranderinge in sienswyse
3, 4. (a) Watter verandering van sienswyse het talle oor die viering van die Here se Aandmaal gehad? (b) Wat het Paulus bedoel toe hy gesê het: „Want so dikwels as julle . . . eet en . . . drink”?
3 Baie van die „ander skape” wat onlangs ingesamel is, het dikwels die Mis of die Nagmaal gevier—die frekwensie en manier van viering het afgehang van die opvattinge van die betrokke godsdiensorganisasie waartoe hulle behoort het. Maar nou besef hulle dat die Here se Aandmaal slegs een keer elke jaar gevier moet word. Hoe so? Wel, die Joodse Pasga is slegs een keer elke jaar gevier, en Jesus het die Aandmaal op daardie selfde Pasganag, 14 Nisan, ingestel. Hy het toe vir sy dissipels gesê: „Doen dit tot my gedagtenis.” Paulus voeg by: „Want so dikwels as julle hierdie brood eet en hierdie beker drink, verkondig julle die dood van die Here totdat Hy kom” (1 Korinthiërs 11:24-26). Jesus het duidelik bedoel dat sy dissipels die viering van sy dood op die Pasgadag moes hou, wat een keer per jaar aanbreek. Dit is derhalwe „dikwels” gedurende die bestaan van die Christengemeente gevier. Trouens, die Aandmaal is reeds 1 952 keer gevier.
4 Daar is nog ’n belangrike verskil in sienswyse wat die „ander skape” nou begryp. In plaas daarvan om van die brood en die wyn te gebruik, soos talle van hulle voorheen in die een of ander kerk gedoen het, vind hulle dat hulle posisie nou „aangepas” is tot die van toeskouers. Waarom is dit die geval, en het ons Skriftuurlike ondersteuning vir ’n prosedure wat toeskouers so wel as gebruikers insluit?—2 Korinthiërs 13:11, NW; 2 Timotheüs 3:16, 17.
5. (a) Beskryf die fundamentele stappe wat ’n persoon moet doen om by Jesus se offer baat te vind. (b) Waarom het God op ’n besondere manier ten behoewe van 144 000 van Christus Jesus se volgelinge opgetree?
5 As iemand baat wil vind by die „versoening” van Christus Jesus, is daar sekere stappe wat hy moet doen, ongeag of hy die hoop op lewe in die hemel of die hoop op lewe in die aardse paradys het. Hierdie fundamentele stappe is: (1) die inneem van juiste kennis van God se Woord (Romeine 10:13-15); (2) die beoefening van geloof (Hebreërs 11:6); (3) berou (Mattheüs 4:17, NW); (4) bekering (Handelinge 3:19); (5) toewyding (Lukas 9:23); en (6) doop (Mattheüs 28:19). Dit is nadat hierdie stappe gedoen is dat God op ’n besondere manier teenoor ’n persoon optree wat hy kies om een van die 144 000, of „klein kuddetjie”, te wees. Met watter doel? Sodat die persoon God se geestelike seun kan word met die vooruitsig om saam met Christus Jesus ’n priester en ’n koning te wees (Openbaring 20:4, 6). Daar is nou slegs ’n oorblyfsel van sulke geestelike seuns, en dit is hulle wat tereg die embleme gebruik. Dit verklaar dan waarom die meeste van Jehovah se Getuies toeskouers en nie gebruikers is nie.
Die Pasga en die Gedenkmaal
6. Waarom het party beweer dat die „ander skape” die embleme behoort te gebruik, en watter vraag ontstaan as gevolg hiervan?
6 Party het beweer dat die toenemende groot getal „ander skape” die embleme behoort te gebruik. Hulle redeneer: Aangesien „die wet . . . ’n skaduwee het van die toekomstige weldade”, en aangesien een van die vereistes van die Wet was dat Israeliete sowel as besnede vreemdelinge die Pasga moes hou, dit daarop dui dat albei klasse sagmoediges in die „een kudde” onder die „een herder” van die Gedenkmaalembleme behoort te gebruik (Hebreërs 10:1; Johannes 10:16; Numeri 9:14). Dit laat ’n belangrike vraag ontstaan: Het die Pasga die Gedenkmaal afgeskadu?
7. In watter opsigte was die Pasga ,’n skaduwee van die toekomstige weldade’?
7 Sekere kenmerke van die Pasgaviering in Egipte is ongetwyfeld in Jesus vervul. Paulus het Jesus met die paaslam vergelyk en gesê: „Ons paaslam is vir ons geslag, naamlik Christus” (1 Korinthiërs 5:7). Die besprinkeling van die Paaslam se bloed aan die deurposte en bo-drumpels het verlossing vir die eersgeborene in elke Israelitiese huis beteken. Dit is eweneens deur die besprinkeling van Christus se bloed dat „die gemeente van eersgeborenes wat in die hemele opgeskrywe is” hulle „verlossing” ontvang (Hebreërs 12:23, 24; Efesiërs 1:3, 7). Nie een van die paaslam se bene moes boonop gebreek word nie, en dit is ook in Christus Jesus vervul (Exodus 12:46; Psalm 34:21; Johannes 19:36). Dit is derhalwe waar dat die Pasga, in sekere opsigte, een van die talle kenmerke van die Wet was wat ,’n skaduwee van die toekomstige weldade’ voorsien het. Al hierdie kenmerke het vooruit gewys op Christus Jesus, „die Lam van God”.—Johannes 1:29.
8-10. (a) In watter belangrike aspek ten opsigte van die bloed het die Pasga van die Gedenkmaal verskil? (b) Hoe bring die verbonde waarmee die Gedenkmaal verband hou nog ’n verskil na vore? (c) Tot watter slotsom bring dit ons?
8 Die Pasga was nietemin nie in engere sin ’n afskaduwing van die Here se Aandmaal nie. Waarom nie? Toe die Pasga in Egipte ingestel is, is die vleis van die gebraaide lam geëet, maar niks van die bloed van die paaslam is geëet nie. Maar in teenstelling hiermee het Jesus, toe hy die Herdenking van sy dood ingestel het, diegene daar teenwoordig uitdruklik beveel om sy vlees te eet en sy bloed te drink, wat deur die brood en wyn afgebeeld is (Exodus 12:7, 8; Mattheüs 26:27, 28). Die Pasga was nie in hierdie uiters belangrike aspek—die bloed—’n afskaduwing van die Here se Aandmaal nie.
9 Daar is iets anders wat nie oor die hoof gesien moet word nie. Jesus het twee verwante verbonde met sy dissipels bespreek, „die nuwe verbond” en ,’n verbond vir ’n koninkryk’ (Lukas 22:20, 28-30, vgl. NW). Albei verbonde het te doen gehad met die gebruikers se vooruitsig om saam met Christus Jesus as priesters en konings te dien. Maar geen besnede vreemdeling kon ooit in Israel ’n priester of ’n koning word nie. Ons vind ook in hierdie opsig ’n verskil tussen die Paasfees in Israel en die Here se Aandmaal.
10 Tot watter slotsom laat dit ons dus kom? Die feit dat die besnede vreemdeling van die ongesuurde brood, bitter kruie en lam van die Pasga geëet het, bewys nie dat die Here se hedendaagse „ander skape” wat die Gedenkmaal bywoon van die brood en die wyn moet gebruik nie.
Die belangrikheid daarvan om die Gedenkmaal by te woon
11. Om watter belangrike redes moet die „ander skape” die Gedenkmaal bywoon?
11 Toon dit egter dat dit vir die „ander skape” nie belangrik is om by die viering van die Gedenkmaal teenwoordig te wees nie? Beslis nie! Dit is ’n geleentheid vir al Jesus se opregte volgelinge om Jesus in ’n baie besondere sin te onthou. Die „ander skape” onthou by daardie geleentheid dat hulle reeds weens hulle geloof in Christus se vergote bloed baat gevind het sodat hulle nou deur Jehovah beskou word as persone wat „hul klere gewas en hul klere wit gemaak [het] in die bloed van die Lam”. Dit is waarom hulle ,God dag en nag in sy tempel kan dien’ (Openbaring 7:14, 15). Hulle kan ook onthou dat hulle moet aanhou om ,Jehovah, geregtigheid en ootmoedigheid te soek’ in die hoop dat hulle op „die dag van die toorn van die HERE” verborge mag bly, en daarna die vreugde kan smaak om menslike volmaaktheid te bereik. Hulle kan uiteindelik deur Jehovah regverdig verklaar word, en dit sal geskied na Jesus die Koninkryk aan sy Vader oorgegee het.—Sefanja 2:2, 3; 1 Korinthiërs 15:24; Openbaring 20:5.
12. Watter voordele hou dit in wanneer ’n persoon na die Gedenkmaaltoespraak luister?
12 Nog ’n belangrike rede om teenwoordig te wees, is die feit dat die waarhede wat gedurende die Gedenkmaaltoespraak bespreek word van „die diep dinge van God”, ,vaste voedsel vir ryp mense’ is, en nie net die melk van die „grondleer” nie (1 Korinthiërs 2:10, NW; Hebreërs 5:13-6:1, NW). Die Skriftuurlike toespraak sal ons waardering vergroot vir die liefde wat Jehovah getoon het deur so ’n wonderlike Koninkryksreëling tot seën van die mensdom in te stel. Dit is ook ’n geleentheid om ,die oog noukeuriger gevestig te hou op Jesus, die Leidsman en Voleinder van die geloof. Ons moet nooit die liefde wat Jesus ten behoewe van ons geopenbaar het of die lyding wat hy ondergaan het vanselfsprekend aanneem nie (Hebreërs 12:2, 3). Ons almal kan ook saamstem dat talle van die kosbare gedagtes wat Jesus met sy apostels bespreek het toe hy die Gedenkmaal ingestel het—gedagtes oor eenheid, liefde en die verheerliking van Jehovah se naam—deur die „ander skape” sowel as die „klein kuddetjie” gedeel kan word.
Toon liefdevolle besorgdheid teenoor almal
13. Waarom is dit belangrik dat die embleme onder alle aanwesiges rondgestuur word?
13 Dit is belangrik dat almal wat by die Here se Aandmaal teenwoordig is, herinner word aan die prosedure wat Jesus ingestel het. Die rondstuur van die brood en die wyn help om waardering vir die heilige dinge wat pas tevore daardie aand bespreek is te verdiep. Dit help elkeen ook om te toon wat sy hoop is—hemelse of aardse lewe.a As die regte prosedure gevolg word, bring dit die gemeente in ooreenstemming met wat aardwyd daardie aand gedoen word.—1 Korinthiërs 14:40.
14. Hoe kan die ouere manne liefdevolle besorgdheid toon teenoor een van die gesalfdes wat op die aand van die Gedenkmaal siek is?
14 Gestel een van die gesalfdes in ’n gemeente is siek en kan nie die Gedenkmaal bywoon nie. Wat dan? Alles moontlik moet gedoen word dat een van die ouere manne die embleme na daardie siek Christen neem en, indien dit geleë is, kan die ouere man ’n paar gepaste kommentare maak voordat hy die embleme aanbied en met ’n paslike gebed afsluit. Hoe bemoedigend sal dit tog vir die sieke wees! Sulke dade van liefdevolle besorgdheid bevorder ’n gees van liefde in die gemeente. (Kyk ook bladsy 31.)—Psalm 133:1.
15. Beskryf party ander maniere waarop respek vir die Here se Aandmaal getoon kan word.
15 Ander interessante vrae is geopper oor die prosedure en die soort embleme wat by die Gedenkmaal gebruik moet word. Die antwoorde op hierdie vrae verskyn op bladsy 19 onder „Toon respek vir die Here se Aandmaal”. Dit sal goed wees as die verantwoordelike ouere manne die inligting wat daar uiteengesit word noukeurig volg.
Die nodigheid vir selfondersoek
16, 17. (a) Watter vraag het party gestel oor die gebruik van die Gedenkmaalembleme, en wie alleen kan dit beantwoord? (b) Hoe voorsien God oortuigende bewys vir diegene wat deur sy gees verwek word?
16 Sommige word gekwel omdat hulle nie seker is of hulle die embleme mag gebruik nie. Hierdie vraag ontstaan soms gedurende die weke voor nog ’n viering van die Here se Aandmaal. Sulke navrae word dikwels gestel deur persone wat onlangs met Jehovah se Getuies begin assosieer het. Is jy al deur hierdie onsekerheid gekwel? Hoe kan jy vasstel wat die regte ding is om te doen?
17 Paulus beveel omtrent die Here se Aandmaal aan: „Laat elkeen homself eers goedkeur na hy homself noukeurig ondersoek het, en laat hy dan van die brood eet en van die beker drink” (1 Korinthiërs 11:28, 29, NW). Het jy opgelet dat Paulus sê dat jy die een is wat jou ,na noukeurige ondersoek moet goedkeur’? Dit is natuurlik nie verkeerd om so ’n ernstige saak met ’n ryp Christen te bespreek nie, maar jy alleen moet vasstel wat jou persoonlike verhouding met Jehovah en sy Seun is. God laat nie een van die 144 000 in onsekerheid nie. Ons word verseker: „Die Gees self getuig saam met ons gees dat ons kinders van God is.” Dit is God se gees wat in die hart van ’n lid van Christus se liggaam die oortuiging wek dat hy een van God se geestelike seuns is. Die verkose een weet dit en hoef nie ’n ander in die gemeente om bevestiging te vra nie.—Romeine 8:15, 16.
18. Watter geskiedkundige feite oor die „ander skape” is vir ons van belang?
18 Die hedendaagse geskiedenis van Jehovah se Getuies toon dat daar deur middel van die Koninkryksboodskap sedert 1931 meer aandag aan die „ander skape” geskenk is. En in die toespraak „Die groot menigte”,b wat op 31 Mei 1935 gehou is, is die „groot menigte” wat die apostel Johannes in ’n gesig gesien het duidelik met die „ander skape” geïdentifiseer. Waarop het hierdie nuwe nadruk gedui? Ongetwyfeld op die feit dat die insameling van die „klein kuddetjie” ten einde loop en dat die tyd aangebreek het vir Jesus om sy aandag, deur middel van die administrasie van „die getroue en verstandige dienskneg”, tot die insameling van die „ander skape” te wend.—Mattheüs 24:45-47.
19. Watter selfondersoek sal raadsaam wees vir daardie nuweres wat beweer dat hulle gesalfdes is?
19 In die lig van die voormelde gedagtes wil ons vir almal sê wat onlangs met Jehovah se volk begin assosieer het en miskien beweer het dat hulle een van die gesalfdes is: Ondersoek jou verhouding met Jehovah noukeurig. Vra jouself af: Is die hemelse hoop waarop ek aanspraak maak miskien ’n oorblyfsel van die kerkleerstelling dat alle kerklidmate hemel toe gaan waaraan ek voorheen geglo het? Hou my hoop enigsins verband met ’n selfsugtige begeerte of emosionele gevoelens? Paulus het gesê: „Dit [is] onmoontlik . . . dat God sou lieg” (Hebreërs 6:18). Die heilige gees van aanneming kan ook nie lieg nie. Enigiemand wat waarlik deur God se gees verwek is, sal derhalwe nie voortdurend deur onsekerheid gekwel word nie, maar kan met ’n goeie gewete getuig dat hy een van God se seuns is.
Die Gedenkmaal in 1985
20. Hoe belangrik is die Gedenkmaal vir Jehovah se Getuies?
20 Die Here se Aandmaal is ongetwyfeld vir alle ware Christene die jaar se grootste viering. Daar is geen ander soortgelyke geleentheid wat belangrikheid, doel of prosedure betref nie. Namate die aarde om sy as draai sodat die son aardwyd stadig agter die horison wegsak, sal elke gemeente van Jehovah se Getuies, groot sowel as klein, en elke afgesonderde groepie dus in gehoorsaamheid aan die Heer se bevel bymekaarkom.
21. Watter gesindheid en verwagtinge behoort die Gedenkmaal in 1985 by God se volk te wek
21 Alle sagmoedige dissipels is dus verheug oor die vooruitsig om nog ’n Gedenkmaalviering saam te hou. Mag hierdie jaar se geleentheid al Jehovah se knegte opbou en bemoedig. Mag dit hulle met dieselfde vertroue besiel as dié van hulle Voorbeeld, Jesus Christus, wat gesê het: „Hou goeie moed, Ek het die wêreld oorwin.”—Johannes 16:33.
[Voetnote]
a In een groot gemeente was dit die gebruik dat diegene wat die embleme bedien aan die punt van elke ry sitplekke staan en na die persone in die ry wys. As iemand van die embleme wou gebruik, moes hy dit vir die bediener aandui. Maar soos hierbo getoon, sou dit nie gepas wees nie.
b Hierdie toespraak is in Washington, D.C., deur J. F. Rutherford, die destydse President van die Wagtoring- Bybel- en Traktaatgenootskap, gehou.
Kan jy onthou—
◻ Waarom was die Pasga nie ’n afskaduwing van die Gedenkmaal nie?
◻ Watter ses stappe moet gedoen word voordat ’n mens by Jesus se offer kan baat vind?
◻ Waarom is dit so noodsaaklik dat jy die Gedenkmaal bywoon?
◻ Waarom is selfondersoek voor die Gedenkmaal nuttig?
[Venster op bladsy 19]
Toon respek vir die Here se Aandmaal
Die embleme
Ongesuurde brood: Brood, soos ongekruide Joodse matse, wat slegs met meelblom en water gemaak is, kan gebruik word. Moenie matse gebruik waarby ander bestanddele, soos sout, suiker, mout, eiers of uie, gevoeg is nie. Julle kan julle eie ongesuurde brood volgens hierdie resep maak: Meng een en ’n halwe koppie meelblom (indien nie beskikbaar nie, gebruik rysmeel, mieliemeelblom of ’n ander graanmeel) met een koppie water en maak ’n klam deeg. Rol dan die deeg dun uit. Plaas dit op ’n bakplaat en druk ’n klomp gaatjies met ’n vurk daarin. Bak dit in ’n warm oond totdat dit droog en bros is.
Wyn: Gebruik ’n suiwer, rooi druiwewyn, soos Chianti, Burgundy of ’n klaret. Moenie dessertwyne wat gefortifiseer is of waarby brandewyn gevoeg is, soos sjerrie, port of muskadelwyn, gebruik nie. Moenie wyne met speserye of kruie in, soos Dubonnet en ander aperatiefwyne, gebruik nie. ’n Tuisgemaakte rooiwyn kan ook gebruik word mits dit nie versoet, gekrui of gefortifiseer is nie.
Voorbereiding van die Koninkryksaal
Tafel vir embleme: Bedek die tafel met ’n skoon tafeldoek en plaas genoeg borde en wynglase vir doeltreffende bediening daarop. Die brood kan voor die vergadering gebreek en die wyn ingeskink word. Jesus het geen ritualistiese presedent hiervoor ingestel nie. Indien nodig, moet die embleme met ’n skoon kleedjie bedek word om insekte uit te hou.
Bedieners: Lig hulle vooraf in oor die prosedure wat gevolg gaan word sodat daar geen oponthoud of verwarring is wanneer die embleme aan al die aanwesiges, die spreker en bedieners inkluis, bedien word nie.
Saalwagters: Genoeg saalwagters moet vroeg genoeg daar wees om almal te verwelkom en vir hulle ’n sitplek aan te wys.
Blommerangskikkings: Dit kan voorsien word, maar moet eenvoudig en smaakvol wees.
Vergaderingprosedure
Tyd van viering: Hoewel die toespraak vroeër kan begin, moet die embleme nie voor sononder rondgestuur word nie. Daar moet plaaslik vasgestel word hoe laat sonsondergang op 4 April in julle omgewing is.
Gedenkmaaltoespraak: Die spreker moet goed voorberei sodat hy sy materiaal in die vasgestelde tyd kan dek. Dit moet duidelik aangebied word en vir al die aanwesiges bemoedigend wees.
[Prent op bladsy 17]
Die Gedenkmaal versterk ons liefde vir Jehovah en sy Seun