Hulp vir gesinne
1. Hoe het Israelitiese gesinne by die weeklikse Sabbat baat gevind?
1 Die Sabbat was ’n liefdevolle voorsiening van Jehovah waarby gesinne baat gevind het. Die Israeliete het van hulle gewone arbeid gerus en het tyd gehad om na te dink oor Jehovah se goedheid en hulle verhouding met hom. Ouers kon van hierdie geleentheid gebruik maak om die Wet in die hart van hulle kinders in te skerp (Deut. 6:6, 7). Die Sabbat het Jehovah se volk elke week tyd gegee om hulle aandag op hulle geestelikheid toe te spits.
2. Wat leer die Sabbat ons omtrent Jehovah?
2 Jehovah vereis natuurlik nie meer dat gesinne die Sabbat onderhou nie. Maar hierdie wet leer ons iets omtrent ons God. Hy het nog altyd intens belanggestel in die geestelike welsyn van sy volk (Jes. 48:17, 18). Een manier waarop Jehovah vandag hierdie liefdevolle belangstelling toon, is deur middel van die aand vir Gesinsaanbidding.
3. Wat is die doel van die aand vir Gesinsaanbidding?
3 Wat is die doel van die aand vir Gesinsaanbidding? Vanaf Januarie 2009 word die Gemeentelike Boekstudie dieselfde aand as die Teokratiese Bedieningskool en Diensvergadering gehou. Een rede vir hierdie aanpassing was om gesinne die geleentheid te bied om hulle geestelikheid te versterk deur ’n spesifieke aand elke week vir gesinsaanbidding opsy te sit. Elke gesin is aangespoor om die gesinstudie te skuif na die aand wat voorheen vir die boekstudie gebruik is, as dit prakties is, en om hierdie tyd te gebruik vir rustige Bybelbesprekings en ’n studie wat by die behoeftes van die gesin aangepas is.
4. Moet die gesin hulle bespreking tot een uur beperk? Verduidelik.
4 Om die Gemeentelike Boekstudie by te woon, het ons tyd nodig gehad om aan te trek, daar te kom, ensovoorts. Vir baie van ons het dit ’n groot deel van die aand in beslag geneem om hierdie een uur lange vergadering by te woon. Noudat ons vergaderingrooster aangepas is, het ons hierdie aand om Jehovah as ’n gesin te aanbid. Ons hoef dus nie ons aand vir Gesinsaanbidding tot slegs een uur te beperk nie. Ons moet eerder die behoeftes en beperkings van ons gesin in ag neem en daarvolgens besluit hoe lank dit sal duur.
5. Moet al die tyd vir groepbespreking gebruik word? Verduidelik.
5 Moet al die tyd vir groepbespreking gebruik word? Wanneer egpare en gesinne met kinders skriftuurlike onderwerpe saam bespreek, moedig hulle mekaar aan (Rom. 1:12). Die gesinsband word versterk. Skriftuurlike besprekings moet dus die middelpunt van die aand vir Gesinsaanbidding wees. Maar elke gesinslid kan ook tyd aan persoonlike studie bestee. Die gesin kan byvoorbeeld ná die groepbespreking bymekaar bly sit terwyl elkeen voortgaan om afsonderlik te studeer, dalk deur klaar voor te berei vir die vergaderinge of die tydskrifte te lees. Party gesinne verkies om die hele aand nie die televisie aan te skakel nie.
6. Hoe kan die bespreking gehou word?
6 Hoe kan die bespreking gehou word? Dit hoef nie altyd ’n vraag-en-antwoord-bespreking te wees nie. Om die aand vir Gesinsaanbidding lewendig en interessant te maak, volg baie gesinne ’n program wat soortgelyk is aan dié van ons vergadering wat in die week gehou word. Hulle verdeel hulle bespreking in verskeie dele en behartig dit op verskillende maniere. Hulle lees byvoorbeeld die Bybel saam, berei voor vir ’n deel van die vergaderinge en hou oefensessies vir die bediening. Op bladsy 6 word ’n paar wenke gegee.
7. Watter atmosfeer moet ouers probeer skep?
7 Watter atmosfeer moet ouers probeer skep? Julle gesin sal die maklikste leer in ’n liefdevolle, ontspanne atmosfeer. Julle kan soms buitekant studeer as die weer mooi is. Neem gerus ’n blaaskans wanneer dit nodig is. Party gesinne geniet verversings ná die program. Hoewel ouers nie die aand vir Gesinsaanbidding sal gebruik om met hulle kinders te raas of hulle te dissiplineer nie, sal hulle dalk ’n deel van die tyd daaraan moet bestee om ’n spesifieke neiging of probleem te bespreek wat hulle opgemerk het. Maar delikate sake van ’n persoonlike aard moet eerder op ’n ander tyd gedurende die week privaat met ’n kind bespreek word, sodat hy nie voor sy broers en susters in die verleentheid gestel word nie. Die aand vir Gesinsaanbidding moenie ’n vervelige, baie ernstige geleentheid wees nie, maar dit moet die gelukkige God wat ons aanbid, weerspieël.—1 Tim. 1:11.
8, 9. Watter voorbereiding moet gesinshoofde doen?
8 Hoe kan die gesinshoof voorberei? Die gesin sal die grootste voordeel daaruit trek as die gesinshoof voor die tyd vir die aand vir Gesinsaanbidding voorberei deur te besluit wat bespreek moet word en hoe dit op die beste manier gedoen kan word (Spr. 21:5). Dit sal goed wees as ’n man sy vrou hieroor raadpleeg (Spr. 15:22). Gesinshoofde, julle kan gerus ook soms julle kinders vir voorstelle vra. Dit sal julle nuttige insig in hulle belangstellings en bekommernisse gee.
9 Die meeste weke sal die gesinshoof nie baie tyd aan voorbereiding hoef te bestee nie. Die gesin sal waarskynlik elke week sekere gereelde aspekte geniet, en die gesinshoof sal nie elke keer met ’n splinternuwe program vorendag hoef te kom nie. Dit sal goed wees as hy ná elke studie voorberei terwyl sy gesin se geestelike behoeftes nog vars in sy geheue is. Party gesinshoofde stel ’n kort lys met besprekingspunte op en sit dit waar die gesin dit maklik kan sien, soos op die yskas. Dit skep afwagting en gee die gesin kans om voor te berei as dit nodig is.
10. Hoe kan diegene wat alleen woon, hulle aand vir Gesinsaanbidding gebruik?
10 Sê nou ek woon alleen? Diegene wat alleen woon, kan die aand vir Gesinsaanbidding vir persoonlike studie gebruik. ’n Goeie program vir persoonlike studie moet insluit dat ’n mens die Bybel lees, vir vergaderinge voorberei en Die Wagtoring en Ontwaak! lees. Party verkondigers pak ook ’n projek as deel van hulle persoonlike studie aan. Hulle nooi miskien nou en dan ’n ander verkondiger of gesin om ’n opbouende Bybelbespreking saam met hulle te geniet.
11, 12. Watter voordele hou dit in om ’n gereelde aand vir Gesinsaanbidding te hê?
11 Watter voordele hou dit in om ’n gereelde aand vir Gesinsaanbidding te hê? Diegene wat ware aanbidding heelhartig beoefen, kom nader aan Jehovah. Gesinne wat saam aanbid, versterk ook die gesinsband. ’n Egpaar het die volgende geskryf oor die seëninge wat hulle geniet: “As ’n pionieregpaar sonder kinders sien ons werklik uit na ons aand vir Gesinsaanbidding. Dit voel of ons nader aan mekaar en nader aan ons hemelse Vader kom. Wanneer ons nou wakker word op die dag dat ons saam gaan studeer, sê ons vir mekaar: ‘Raai wat is vanaand? Ons aand vir Gesinsaanbidding!’”
12 Die reëling om ’n aand vir gesinsaanbidding te hê, help ook besige gesinne. ’n Enkelmoeder wat twee seuns grootmaak en ’n gewone pionier is, het geskryf: “In die verlede het ons nie elke week ons gesinstudie gehou nie. Dit was ongereeld omdat ek dikwels moeg was. Ek het nie geweet hoe ek alles gedoen moet kry nie. Daarom skryf ek aan julle om baie dankie te sê vir die aand vir Gesinsaanbidding. Ons het nou gereeld ons gesinstudie en geniet die voordele daarvan.”
13. Wat bepaal hoeveel jou gesin by hierdie reëling sal baat vind?
13 Soos die Sabbat, is die aand vir Gesinsaanbidding ’n gawe van ons hemelse Vader wat gesinne kan help (Jak. 1:17). Die manier waarop Israelitiese gesinne die Sabbatdag gebruik het, het bepaal hoeveel hulle op geestelike gebied daarby baat gevind het. Net so sal die manier waarop ons die aand gebruik wat vir gesinsaanbidding aan ons gegee is, bepaal hoeveel ons gesin daarby sal baat vind (2 Kor. 9:6; Gal. 6:7, 8; Kol. 3:23, 24). As julle gesin goeie gebruik maak van hierdie reëling, kan julle soos die psalmis sê: “Maar wat my betref, dit is vir my goed om nader aan God te kom. In die Soewereine Heer Jehovah het ek my toevlug gestel.”—Ps. 73:28.
[Lokteks op bladsy 5]
Die aand vir Gesinsaanbidding moenie ’n vervelige, baie ernstige geleentheid wees nie, maar dit moet die gelukkige God wat ons aanbid, weerspieël
[Venster op bladsy 6]
BÊRE
Idees vir die aand vir Gesinsaanbidding
Bybel:
• Lees ’n deel van die weeklikse Bybelleesgedeelte saam. As die inligting geskik is daarvoor, kan iemand die vertelling lees, en die ander gesinslede kan die woorde van die verskillende karakters lees.
• Voer ’n deel van die Bybelleesgedeelte op.
• Vra elke gesinslid om die aangewese Bybelhoofstukke voor die tyd te lees en een of twee vrae wat hulle oor die inligting het, neer te skryf. Doen dan saam navorsing oor almal se vrae.
• Maak elke week ’n flitskaart met ’n Bybelvers daarop en probeer om dit uit die kop te leer en te verduidelik. Hou al die kaarte, en hersien dit weekliks om te kyk hoeveel tekste julle onthou.
• Luister na ’n opname van die Bybelleesgedeelte terwyl julle in die Bybel volg.
Vergaderinge:
• Berei saam voor vir ’n deel van die vergaderinge.
• Oefen die Koninkryksliedere wat die komende week gesing sal word.
• As iemand ’n toespraak op die Teokratiese Bedieningskool of ’n demonstrasie tydens die Diensvergadering het, kan idees vir die aanbieding bespreek word of kan dit voor die gesin geoefen word.
Behoeftes van die gesin:
• Bespreek inligting in die Jongmense vra- of Leer by die Groot Onderwyser-boeke.
• Hou ’n oefensessie oor hoe om ’n situasie wat waarskynlik by die skool sal ontstaan, die hoof te bied.
• Hou ’n oefensessie waar die ouers en kinders rolle omruil. Die kinders doen navorsing oor ’n onderwerp en redeneer dan met die ouers.
Bediening:
• Hou oefensessies om aanbiedings vir die naweek voor te berei.
• Bespreek realistiese doelwitte wat die gesin kan stel om gedurende die Gedenkmaalseisoen of vakansietyd meer in die bediening te doen.
• Laat elke gesinslid ’n paar minute lank navorsing doen oor hoe om verskillende vrae te beantwoord wat dalk in die bediening geopper sal word, en hou dan oefensessies.
Nog wenke:
• Lees ’n artikel in die jongste tydskrifte saam.
• Laat elke gesinslid voor die tyd ’n artikel waarin hy belangstel, in die jongste tydskrifte lees, en laat hom dan daarvan vertel.
• Nooi nou en dan ’n verkondiger of egpaar om vir julle aand vir Gesinsaanbidding by julle aan te sluit, en voer ’n onderhoud met hulle.
• Kyk na een van ons video’s en bespreek dit.
• Bespreek “Jongmense vra” of “Vir gesinsbespreking” in die Ontwaak!
• Bespreek “Leer jou kinders” of “Vir jongmense” in Die Wagtoring.
• Lees en bespreek ’n deel van die jongste Jaarboek of ’n publikasie wat by die laaste streekbyeenkoms vrygestel is.
• Hersien die glanspunte van ’n byeenkoms wat julle bygewoon het.
• Kyk na Jehovah se skeppingswerke, en bespreek wat dit ons omtrent Jehovah leer.
• Werk saam aan ’n projek, soos ’n model, ’n kaart of ’n tabel.