Gebed

Definisie: Die eerbiedige aanroep, hetsy hardop of stil in ’n mens se gedagtes, van die ware God of van valse gode.

Meen jy, soos baie, dat jou gebede nie verhoor word nie?

Wie se gebede is God bereid om te hoor?

Ps. 65:3; Hand. 10:34, 35: “o Hoorder van die gebed, tot U moet alle vlees kom!” “Ek sien waarlik dat God geen aannemer van die persoon is nie, maar dat in elke nasie die een wat Hom vrees en geregtigheid doen, Hom welgevallig is.” (’n Mens se nasionaliteit, jou velkleur, of jou finansiële omstandighede het niks met die saak te doen nie. Maar die beweegredes van ’n mens se hart en ’n mens se lewenswyse het wel.)

Luk. 11:2: “Wanneer julle bid, sê: Onse Vader wat in die hemele is, laat u Naam geheilig word.” (Bid jy tot die Vader, die een wie se naam volgens die Bybel Jehovah is? Of rig jy jou gebede eerder tot “heiliges”?)

Joh. 14:6, 14: “Jesus antwoord hom: Ek is die weg en die waarheid en die lewe; niemand kom na die Vader behalwe deur My nie. . . . As julle iets in my Naam vra, sal Ek dit doen.” (Bid jy in die naam van Jesus Christus en besef jy dat jy, as ’n sondige mens, sy voorspraak ten behoewe van jou nodig het?)

1 Joh. 5:14: “Dit is die vrymoedigheid wat ons teenoor Hom het, dat Hy ons verhoor as ons iets vra volgens sy wil.” (Om sulke vertroue te hê, moet jy egter eers God se wil ken. Sorg dan dat jou versoeke in ooreenstemming daarmee is.)

1 Pet. 3:12: “Die oë van die Here is op die regverdiges en sy ore tot hulle gebed, maar die aangesig van die Here is teen die kwaaddoeners.” (Het jy die tyd afgestaan om te leer wat Jehovah in sy Woord sê oor wat regverdig en wat kwaad is?)

1 Joh. 3:22: “Wat ons ook al bid, ontvang ons van Hom, omdat ons sy gebooie bewaar en doen wat welgevallig is voor Hom.” (Is dit waarlik jou begeerte om God te behaag, en probeer jy opreg om al sy gebooie wat jy reeds ken te gehoorsaam?)

Jes. 55:6, 7: “Soek die HERE terwyl Hy nog te vinde is; roep Hom aan terwyl Hy naby is. Laat die goddelose sy weg verlaat en die kwaaddoener sy gedagtes; en laat hy hom tot die HERE bekeer, dan sal Hy hom barmhartig wees; en tot onse God, want Hy vergeef menigvuldiglik.” (In barmhartigheid nooi Jehovah selfs persone wat slegte dinge gedoen het om hom in gebed aan te roep. Maar om God se goedkeuring te geniet, moet hulle opreg berou hê oor hulle verkeerde weë en gedagtes en hulle weg verander.)

Wat kan ’n persoon se gebede vir God onaanneemlik maak?

Matt. 6:5: “Wanneer jy bid, moet jy nie wees soos die geveinsdes nie; want hulle hou daarvan om in die sinagoges en op die hoeke van die strate te staan en bid, om deur die mense gesien te word. Voorwaar Ek sê vir julle dat hulle hul loon weg het.” (Ook Lukas 18:9-14)

Matt. 6:7: “As julle bid, gebruik nie ’n ydele herhaling van woorde soos die heidene nie, want hulle dink dat hulle deur hul baie woorde verhoor sal word.”

Spr. 28:9: “Wie sy oor wegdraai om nie na die wet [van God] te luister nie, selfs sy gebed is ’n gruwel.”

Miga 3:4: “Dan sal hulle die HERE aanroep, en Hy sal hulle nie antwoord nie; maar Hy sal sy aangesig in dié tyd vir hulle verberg, omdat hulle verkeerde dinge gedoen het.”

Jak. 4:3: “Julle bid en julle ontvang nie, omdat julle verkeerd bid, om dit in julle welluste deur te bring.”

Jes. 42:8; Matt. 4:10: “Ek is die HERE [“Jahweh”, JB; “Jehovah”, NW], dit is my Naam; en my eer sal Ek aan geen ander gee, of ook my lof aan die gesnede beelde nie.” “Die Here jou God [“Jehovah jou God”, NW] moet jy aanbid en Hom alleen dien” (Ook Psalm 115:4-8). (Gebed is ’n vorm van aanbidding. Sal dit God behaag as jy voor gesnede beelde bid?)

Jes. 8:19: “As hulle vir julle sê: Raadpleeg die geeste van afgestorwenes en die geeste wat waarsê, wat piep en mompel—moet ’n volk nie sy God raadpleeg nie; moet vir die lewendes die dooies gevra word?”

Jak. 1:6, 7: “Hy moet in die geloof bid, sonder om te twyfel; want hy wat twyfel, is soos ’n golf van die see wat deur die wind gedrywe en voortgesweep word. Want dié mens moenie dink dat hy iets van die Here sal ontvang nie.”

Wat is gepaste onderwerpe vir gebed?

Matt. 6:9-13: “Só moet julle dan bid: [1] Onse Vader wat in die hemele is, laat u Naam geheilig word; [2] laat u koninkryk kom; [3] laat u wil geskied, soos in die hemel net so ook op die aarde; [4] gee ons vandag ons daaglikse brood; en [5] vergeef ons ons skulde, soos ons ook ons skuldenaars vergewe; en [6] lei ons nie in versoeking nie, maar verlos ons van die Bose.” (Let op dat God se naam en voorneme die voorkeur moet geniet.)

Ps. 25:4, 5: “HERE, maak my u weë bekend; leer my u paaie. Lei my in u waarheid en leer my, want U is die God van my heil.”

Luk. 11:13: “As julle dan wat sleg is, weet om goeie gawes aan julle kinders te gee, hoeveel te meer sal die hemelse Vader die Heilige Gees gee aan die wat Hom bid?”

1 Thess. 5:17, 18: “Bid sonder ophou. Wees in alles dankbaar.”

Matt. 14:19, 20: “Hy [Jesus] neem die vyf brode en die twee visse, kyk op na die hemel en dank; en nadat Hy die brode gebreek het, gee Hy dit aan die dissipels en die dissipels aan die skare. En almal het geëet en versadig geword.”

Jak. 5:16: “Bid vir mekaar.”

Matt. 26:41: “Waak en bid, dat julle nie in versoeking kom nie.”

Filip. 4:6: “Wees oor niks besorg nie, maar laat julle begeertes in alles deur gebed en smeking met danksegging bekend word by God.”

As iemand sê—

‘Bid eers saam met my, dan kan ons gesels’

Jy kan antwoord: ‘Ek is bly om te sien dat u ’n persoon is wat besef hoe belangrik gebed is. Jehovah se Getuies bid ook gereeld. Maar daar is iets wat Jesus gesê het oor wanneer en hoe ’n mens moet bid wat dalk vir u nuut sal wees. Het u geweet dat hy vir sy dissipels gesê het om nie openbare gebede te doen om ander te laat sien dat hulle toegewyde gebedsmense is nie? . . . (Matt. 6:5).’ Dan kan jy byvoeg: ‘Let op wat hy voorts gesê het vir ons van die grootste belang moet wees en waaraan ons in ons gebede die voorkeur moet gee. Dit is wat ek met u kom bespreek het (Matt. 6:9, 10).’

Of jy kan sê: ‘Ek weet dat die verteenwoordigers van sommige gelowe dit doen. Maar Jehovah se Getuies doen dit nie, omdat Jesus sy dissipels beveel het om hulle predikingswerk op ’n ander manier te doen. Hy het nie gesê: “As julle die huis ingaan, bid eers” nie. Kyk wat hy wel gesê het, soos opgeteken hier in Mattheüs 10:12, 13. . . . En kyk hier in vers 7 waaroor hulle moes gesels. . . . Hoe kan daardie Koninkryk mense soos ek en u help? (Openb. 21:4).’