Neem die profete as ’n voorbeeld—Nahum
1. Wat leer ons uit die boek Nahum?
1 Die ruïnes van die eertydse stad Nineve toon duidelik dat Jehovah wraak neem op sy vyande, en dat selfs die wreedste teenstanders nie teen hom kan standhou nie, soos Nahum voorspel het (Nah. 1:2, 6). As ons Nahum se profesie van naderby ondersoek, vind ons lesse wat ons in ons bediening kan toepas.
2. Hoe kan ons ons boodskap positief hou?
2 Bied vertroosting en hoop: Met die eerste oogopslag lyk dit of die boek Nahum net ’n veroordeling van Nineve is, die trotse hoofstad van eertydse Assirië (Nah. 1:1; 3:7). Maar hierdie veroordeling was goeie nuus vir Jehovah se volk. Nahum, wie se naam “Vertrooster” beteken, het sy mede-Jode verseker dat hulle vyand binnekort nie meer daar sal wees nie! Nahum het ook bevestig dat Jehovah “’n vesting in die dag van benoudheid” is (Nah. 1:7). Wanneer ons preek, verkondig ons ook goeie nuus en spoor ons mense aan om hulle toevlug tot Jehovah te neem.—Nah. 1:15.
3. Hoe kan ons Nahum navolg deur voorbeelde en illustrasies te gebruik?
3 Gebruik voorbeelde en illustrasies: Jehovah het Nahum geïnspireer om Nineve se ondergang te vergelyk met dié van die Egiptiese stad Tebe (No-Amon), wat teen daardie tyd reeds deur Assirië vernietig was (Nah. 3:8-10). Wanneer ons met mense praat oor die einde van hierdie goddelose stelsel van dinge, kan ons die aandag vestig op Bybelprofesieë wat toon dat Jehovah sy woord tot in die fynste besonderhede vervul. Byvoorbeeld, toe die Babiloniërs en die Mede in 632 VHJ teen die stad Nineve opgetrek het, het swaar reën die Tigrisrivier laat oorstroom, wat veroorsaak het dat ’n gedeelte van die stad se ondeurdringbare muur ineenstort. Gevolglik is Nineve maklik verower, net soos Jehovah voorspel het.—Nah. 1:8; 2:6.
4. Hoe kan ons in die bediening seker maak dat ons boodskap duidelik en verstaanbaar is?
4 Jou boodskap moet duidelik en verstaanbaar wees: Nahum se skryfstyl was beskrywend en dramaties. Sy boodskap was duidelik (Nah. 1:14; 3:1). Net so wil ons taal gebruik wat maklik verstaanbaar is (1 Kor. 14:9). Verduidelik tydens die eerste besoek waarom jy daar is. Terwyl jy die Bybel met mense studeer, moet jy hulle help om geloof in Jehovah en sy Woord op te bou en om te besef hoe die inligting op hulle van toepassing is.—Rom. 10:14.
5. Watter versekering vind ons in Nahum se profesie?
5 Nahum se vertroue in die feit dat Jehovah se woord vervul sal word, kan duidelik gesien word in die Bybelboek wat sy naam dra. Namate die einde van Satan se stelsel naderkom, put ons vertroosting uit die goddelike versekering: “Benoudheid sal nie ’n tweede keer opkom nie.”—Nah. 1:9.