Waarom moet ons onophoudelik bid?
“Bid onophoudelik. Betuig dank in verband met alles.”—1 TESSALONISENSE 5:17, 18.
1, 2. Hoe het Daniël getoon dat hy die voorreg van gebed waardeer het, en watter uitwerking het dit op sy verhouding met God gehad?
DIE profeet Daniël het die gewoonte gehad om drie keer per dag tot God te bid. Hy het by die venster van sy dakvertrek gekniel, wat oop was in die rigting van die stad Jerusalem, en gebid (1 Konings 8:46-49; Daniël 6:10). Selfs toe ’n koninklike bevel gebede tot enigeen behalwe Darius, die Mediese koning, verbied het, het Daniël nie vir ’n oomblik uit vrees teruggedeins nie. Of dit nou sy lewe in gevaar gestel het of nie, hierdie man van gebed het onophoudelik tot Jehovah gebid.
2 Hoe het Jehovah Daniël beskou? Toe die engel Gabriël na Daniël gekom het om een van sy gebede te beantwoord, het hy die profeet as “’n besonder geliefde man” beskryf (Daniël 9:20-23). In Esegiël se profesie het Jehovah na Daniël as ’n regverdige man verwys (Esegiël 14:14, 20). Deur die jare heen het Daniël se gebede blykbaar tot ’n baie hegte verhouding met sy God gelei, ’n feit wat selfs Darius erken het.—Daniël 6:16.
3. Hoe kan gebed ons help om ons onkreukbaarheid te handhaaf, soos die ondervinding van een sendeling toon?
3 Gereelde gebed kan ons ook help om hewige beproewinge die hoof te bied. Dink byvoorbeeld aan die geval van Harold King, ’n sendeling in China wat vyf jaar in alleenopsluiting deurgebring het. Broer King het aangaande sy ondervinding gesê: “Ek is dalk afgesonder van my medemens, maar niemand kan my van God afsonder nie. . . . Ek het dus drie keer per dag in my sel gekniel, waar enigiemand wat verbygestap het my kon sien, en soos Daniël van die Bybel hardop gebid. . . . Op sulke tye het dit gevoel of God se gees my gedagtes op die belangrikste sake rig en my kalm laat voel. Hoe geestelik versterkend en vertroostend was gebed tog vir my!”
4. Watter vrae aangaande gebed sal ons in hierdie artikel bespreek?
4 Die Bybel sê: “Bid onophoudelik. Betuig dank in verband met alles” (1 Tessalonisense 5:17, 18). Met hierdie raad in gedagte kan ons die volgende vrae bespreek: Waarom moet ons let op ons gebede? Om watter redes wil ons voortdurend tot Jehovah bid? En wat moet ons doen as ons weens ons swakhede onwaardig voel om tot God te bid?
Bou vriendskap op deur gebed
5. Watter unieke vriendskap help gebed ons om te geniet?
5 Wil jy graag hê dat Jehovah jou as sy vriend moet beskou? Hy het die aartsvader Abraham sy vriend genoem (Jesaja 41:8; Jakobus 2:23). Jehovah wil hê dat ons daardie soort verhouding met hom moet opbou. Hy nooi ons in werklikheid om nader aan hom te kom (Jakobus 4:8). Moet daardie uitnodiging ons nie laat peins oor die unieke voorsiening van gebed nie? Dink net hoe moeilik dit is om ’n afspraak met ’n hooggeplaaste regeringsamptenaar te reël, wat nog te sê sy vriend te word! En tog spoor die Skepper van die heelal ons aan om hom vryelik in gebed te nader, wanneer ons ook al wil of moet (Psalm 37:5). Ons onophoudelike gebede help ons om ’n hegte vriendskap met Jehovah te hê.
6. Wat leer ons uit Jesus se voorbeeld oor die belangrikheid daarvan om ‘aan te hou bid’?
6 Hoe maklik kan ons egter nalaat om te bid! Die druk van die daaglikse lewe kan soveel van ons aandag in beslag neem dat ons nie tyd maak om met God te praat nie. Jesus het sy dissipels aangemoedig om ‘aan te hou bid’, en hy het dit self gedoen (Matteus 26:41). Hoewel hy gewoonlik van die oggend tot die aand besig was, het hy tyd ingeruim om met sy hemelse Vader te praat. Soms het Jesus “vroeg die oggend, terwyl dit nog donker was”, opgestaan om te bid (Markus 1:35). By ander geleenthede het hy teen die einde van die dag na ’n eensame plek gegaan om met Jehovah te praat (Matteus 14:23). Jesus het altyd tyd ingeruim om te bid, en ons moet ook.—1 Petrus 2:21.
7. Watter omstandighede moet ons beweeg om elke dag tot ons hemelse Vader te bid?
7 Elke dag is daar talle gepaste geleenthede vir private gebed, soos wanneer ons probleme ondervind, voor versoekings te staan kom en besluite moet maak (Efesiërs 6:18). As ons God se leiding in alle aspekte van die lewe probeer verkry, sal ons vriendskap met hom beslis hegter word. Versterk dit nie die vriendskapsband tussen twee persone as hulle probleme saam aanpak nie? (Spreuke 17:17). Dieselfde is waar wanneer ons op Jehovah steun en sien hoe hy ons help.—2 Kronieke 14:11.
8. Wat leer ons uit die voorbeelde van Nehemia, Jesus en Hanna oor die lengte van ons persoonlike gebede?
8 Hoe dankbaar kan ons tog wees dat God nie beperk hoe lank of hoe dikwels ons met hom in gebed kan praat nie! Nehemia het ’n kort gebed in sy hart gedoen voordat hy ’n versoek tot die koning van Persië gerig het (Nehemia 2:4, 5). Jesus het ook ’n kort gebed gedoen toe hy Jehovah gevra het om hom die krag te gee om Lasarus op te wek (Johannes 11:41, 42). Hanna daarenteen het “lank voor Jehovah gebid” toe sy haar hart voor hom uitgestort het (1 Samuel 1:12, 15, 16). Ons persoonlike gebede kan kort of lank wees, na gelang van die behoefte en die omstandighede.
9. Waarom moet ons gebede lof en dank insluit vir alles wat Jehovah vir ons doen?
9 Baie van die gebede in die Bybel druk hartgrondige waardering uit vir Jehovah se verhewe posisie en sy wonderlike werke (Eksodus 15:1-19; 1 Kronieke 16:7-36; Psalm 145). In ’n visioen sien die apostel Johannes hoe die 24 ouderlinge—die volledige getal gesalfde Christene in hulle hemelse posisie—Jehovah loof en sê: “U is waardig, Jehovah, ja, ons God, om die heerlikheid en die eer en die krag te ontvang, want u het alles geskep, en weens u wil het hulle bestaan en is hulle geskep” (Openbaring 4:10, 11). Ons het ook rede om die Skepper gereeld te loof. Hoe gelukkig maak dit ouers tog wanneer hulle kind hulle uit die hart bedank vir iets wat hulle vir hom gedoen het! As ons met waardering oor Jehovah se goedhartigheid peins en ons opregte dankbaarheid daarvoor uitspreek, sal dit ons beslis help om die gehalte van ons gebede te verbeter.
“Bid onophoudelik”—Waarom?
10. Hoe versterk gebed ons geloof?
10 Gereelde gebed is onontbeerlik vir ons geloof. Nadat Jesus geïllustreer het hoe noodsaaklik dit is “om altyd te bid en nie moed op te gee nie”, het hy gevra: “Sal die Seun van die mens werklik die geloof op die aarde vind wanneer hy kom?” (Lukas 18:1-8). Betekenisvolle, hartgrondige gebed bou ons geloof op. Toe die aartsvader Abraham oud begin word het en nog nie ’n nageslag voortgebring het nie, het hy met God oor die saak gepraat. In antwoord hierop het Jehovah hom eers gevra om op te kyk na die hemel en die sterre te tel, as hy enigsins kon. Toe het God Abraham weer eens verseker: “So sal jou saad word.” Wat was die gevolg? Abraham “het geloof in Jehovah gestel; en hy het hom dit as regverdigheid toegereken” (Genesis 15:5, 6). As ons ons hart in gebed voor Jehovah uitstort, sy versekeringe in die Bybel aanvaar en hom gehoorsaam, sal hy ons geloof versterk.
11. Hoe kan gebed ons help om probleme die hoof te bied?
11 Gebed kan ons ook help om probleme te hanteer. Is ons lot in die lewe soos ’n swaar las en het ons met moeilike omstandighede te kampe? Die Bybel sê vir ons: “Werp jou las op Jehovah, en hy sal jou onderskraag. Nooit sal hy die regverdige laat wankel nie” (Psalm 55:22). Wanneer ons voor moeilike besluite te staan kom, kan ons Jesus se voorbeeld navolg. Hy het ’n hele nag in private gebed deurgebring voordat hy sy 12 apostels gekies het (Lukas 6:12-16). En die nag voor sy dood het Jesus so intens gebid dat ‘sy sweet soos bloeddruppels geword het wat op die grond val’ (Lukas 22:44). Die gevolg? “Hy is weens sy godvrugtige vrees verhoor” (Hebreërs 5:7). Ons ernstige en onophoudelike gebede sal ons help om stresvolle situasies en moeilike beproewinge die hoof te bied.
12. Hoe lig die voorreg van gebed Jehovah se persoonlike belangstelling in ons toe?
12 Nog ’n rede waarom ons nader aan Jehovah wil kom deur gebed, is omdat hy op sy beurt nader aan ons sal kom (Jakobus 4:8). Kan ons nie aanvoel dat Jehovah in ons behoeftes belangstel en liefdevol vir ons omgee wanneer ons ons hart in gebed voor hom uitstort nie? Ons ondervind God se liefde op ’n baie persoonlike manier. Jehovah het aan niemand anders die verantwoordelikheid oorgedra om na elke gebed te luister wat sy knegte tot hom as hulle hemelse Vader rig nie (Psalm 66:19, 20; Lukas 11:2). En hy nooi ons om ‘al ons sorge op hom te werp, want hy sorg vir ons’.—1 Petrus 5:6, 7.
13, 14. Watter redes het ons om onophoudelik te bid?
13 Gebed kan ons met groter ywer vir die openbare bediening besiel en ons versterk wanneer onverskilligheid of teenstand ons dalk laat voel dat ons wil tou opgooi (Handelinge 4:23-31). Gebed kan ons ook beskerm teen “die sette van die Duiwel” (Efesiërs 6:11, 17, 18). Wanneer ons sukkel om daaglikse beproewinge die hoof te bied, kan ons God deurentyd vra om ons te versterk. Jesus se modelgebed sluit die versoek in dat Jehovah ‘ons verlos van die bose’, Satan die Duiwel.—Matteus 6:13.
14 As ons aanhou bid vir hulp om ons sondige neigings te beheer, sal ons sien hoe Jehovah ons help. Ons het hierdie versekering: “God is getrou, en hy sal nie toelaat dat julle versoek word bo wat julle kan verdra nie, maar saam met die versoeking sal hy ook die uitweg gee, sodat julle dit sal kan verduur” (1 Korintiërs 10:13). Die apostel Paulus het self Jehovah se versterkende sorg in ’n groot verskeidenheid situasies ervaar. “Vir alles is ek sterk genoeg deur hom wat my krag gee”, het hy gesê.—Filippense 4:13; 2 Korintiërs 11:23-29.
Hou vol met gebed ondanks swakhede
15. Wat kan gebeur as ons gedrag nie in ooreenstemming met God se standaarde is nie?
15 As ons wil hê dat ons gebede verhoor moet word, moet ons nie die raad van God se Woord verwerp nie. “Wat ons ook al vra, ontvang ons van hom”, het die apostel Johannes geskryf, “omdat ons sy gebooie bewaar en die dinge doen wat in sy oë welbehaaglik is” (1 Johannes 3:22). Wat kan egter gebeur as ons gedrag nie in ooreenstemming met God se standaarde is nie? Adam en Eva het hulle verberg nadat hulle in die tuin van Eden gesondig het. Ons voel dalk ook dat ons ons wil verberg “vir die aangesig van Jehovah” en hou dan op om te bid (Genesis 3:8). “Ek het opgemerk dat die eerste fout wat byna die meeste begaan wat van Jehovah en sy organisasie wegdryf, is dat hulle ophou bid”, sê Klaus, ’n ervare reisende opsiener (Hebreërs 2:1). Dit was die geval met José Ángel. Hy sê: “Ek het byna agt jaar lank selde tot Jehovah gebid. Ek het onwaardig gevoel om met hom te praat, hoewel ek hom steeds as my hemelse Vader beskou het.”
16, 17. Gee voorbeelde van hoe gereelde gebed ons kan help om geestelike swakheid te bowe te kom.
16 Sommige van ons voel dalk onwaardig om te bid omdat ons geestelik swak is of omdat ons in sonde verval het. Maar dit is juis dan dat ons die voorsiening van gebed ten volle moet benut. Jona het van sy toewysing af weggehardloop. Maar ‘uit sy benoudheid het hy tot Jehovah geroep, en Hy het hom geantwoord. Uit die buik van Sjeool het Jona om hulp geroep, en Jehovah het sy stem gehoor’ (Jona 2:2). Jona het gebid, Jehovah het sy gebed verhoor en Jona het sy geestelike ewewig herwin.
17 José Ángel het ook ernstig om hulp gebid. Hy vertel: “Ek het my hart uitgestort en God om vergifnis gesmeek. En hy het my gehelp. Ek dink nie ek sou na die waarheid teruggekeer het sonder die hulp van gebed nie. Ek bid nou gereeld elke dag, en ek sien uit na hierdie tye.” Ons moet altyd die vrymoedigheid hê om openhartig met God te praat oor ons foute en hom nederig om vergifnis vra. Toe koning Dawid sy oortredinge bely het, het Jehovah sy sondes vergewe (Psalm 32:3-5). Jehovah wil ons help, hy wil ons nie veroordeel nie (1 Johannes 3:19, 20). En die gebede van gemeentelike ouer manne kan ons geestelik help, want sulke smekinge het “groot krag”.—Jakobus 5:13-16.
18. Watter vertroue kan God se knegte hê ongeag hoe ver hulle dalk afgedwaal het?
18 Watter vader sal sy seun verwerp wat nederig na hom toe kom vir hulp en raad nadat hy ’n fout begaan het? Die gelykenis van die verlore seun toon dat ons hemelse Vader verheug is wanneer ons na hom toe terugkeer, ongeag hoe ver ons dalk afgedwaal het (Lukas 15:21, 22, 32). Jehovah spoor almal aan wat teen hom gesondig het, om hom aan te roep, ‘want hy vergewe ryklik’ (Jesaja 55:6, 7). Hoewel Dawid ’n paar ernstige sondes gepleeg het, het hy Jehovah aangeroep en gesê: “Luister tog, o God, na my gebed; en moet u nie vir my versoek om guns verberg nie.” Hy het ook gesê: “Saans en soggens en smiddags kan ek nie anders as om besorgdheid te toon nie, en ek kerm, en [Jehovah] hoor my stem” (Psalm 55:1, 17). Hoe bemoedigend tog!
19. Waarom moet ons nie tot die slotsom kom dat gebede wat skynbaar onbeantwoord bly, ’n bewys is dat God dit nie goedkeur nie?
19 Sê nou ons kry nie onmiddellik ’n antwoord op ons gebed nie? Dan moet ons seker maak dat ons versoek in ooreenstemming met Jehovah se wil is en dat ons dit in Jesus se naam vra (Johannes 16:23; 1 Johannes 5:14). Die dissipel Jakobus het na party Christene verwys wie se gebede nie verhoor is nie omdat hulle “met ’n verkeerde doel” gevra het (Jakobus 4:3). Aan die ander kant moet ons nie vinnig tot die slotsom kom dat gebede wat skynbaar onbeantwoord bly, altyd ’n bewys is dat God dit nie goedkeur nie. Jehovah kan soms toelaat dat getroue aanbidders ’n tyd lank aanhou bid oor ’n saak voordat sy antwoord duidelik word. “Hou aan vra, en vir julle sal gegee word”, het Jesus gesê (Matteus 7:7). Daarom moet ons ‘volhou met gebed’.—Romeine 12:12.
Bid gereeld
20, 21. (a) Waarom moet ons onophoudelik bid in hierdie “laaste dae”? (b) Wat sal ons ontvang as ons Jehovah se troon van onverdiende goedhartigheid daagliks nader?
20 Druk en probleme neem toe in hierdie “laaste dae”, wat gekenmerk word deur ‘kritieke tye wat moeilik is om deur te kom’ (2 Timoteus 3:1). En beproewinge kan maklik al ons aandag in beslag neem. Maar as ons onophoudelik bid, sal dit ons help om ons lewe gerig te hou op geestelike dinge, ondanks volgehoue probleme, versoekings en ontmoediging. Ons daaglikse gebede tot Jehovah kan die lewensbelangrike ondersteuning voorsien wat ons nodig het.
21 Jehovah, die “Hoorder van die gebed”, is nooit te besig om na ons te luister nie (Psalm 65:2). Laat ons nooit te besig wees om met hom te praat nie. Ons vriendskap met God is die kosbaarste besitting wat ons het. Mag ons dit nooit as vanselfsprekend aanvaar nie. “Laat ons dan met vrymoedigheid van spraak tot die troon van onverdiende goedhartigheid nader, sodat ons barmhartigheid kan verkry en onverdiende goedhartigheid kan vind vir hulp op die regte tyd.”—Hebreërs 4:16.
Hoe sal jy antwoord?
• Wat leer ons uit die voorbeeld van die profeet Daniël oor die waarde van gebed?
• Hoe kan ons ’n hegter vriendskap met Jehovah opbou?
• Waarom moet ons onophoudelik bid?
• Waarom moet ’n gevoel dat ons onwaardig is, ons nie verhinder om tot Jehovah te bid nie?
[Prent op bladsy 16]
Nehemia het ’n kort gebed in sy hart gedoen voordat hy met die koning gepraat het
[Prent op bladsy 17]
Hanna het “lank voor Jehovah gebid”
[Prente op bladsy 18]
Jesus het die hele nag gebid voordat hy sy 12 apostels gekies het
[Prente op bladsy 20]
Ons kan regdeur die dag geleenthede vind om te bid