Jehovah se oog ‘het op die ouere manne gebly’
OUERE MANNE moet vandag dikwels besluite neem wat skynbaar buite die bestek van hulle kennis en ervaring is. Maar beskou ’n situasie waarvoor sommige Joodse ouere manne in die dae van Esra te staan gekom het.
Na die terugkeer van die Joodse oorblyfsel uit Babilon was daar ’n onbedrywige tydperk van 16 jaar. Die profete Haggai en Sagaria het daarin geslaag om die Jode uit hulle onverskilligheid te wek, en die bouwerk aan Jehovah se tempel is hervat. Maar Persiese amptenare het weldra teen hierdie werk beswaar gemaak. “Wie het julle bevel gegee om hierdie huis te bou?” het die teenstanders gevra.—Esra 5:1-3.
Die antwoord op hierdie vraag was van kritieke belang. As die ouere manne hulle laat intimideer het, sou die herstelwerk aan die tempel skielik beëindig word. As die ouere manne hierdie amptenare vyandig gemaak het, sou die werk onmiddellik verbied word. Die ouere manne (ongetwyfeld onder leiding van goewerneur Serubbabel en hoëpriester Josua) het derhalwe ’n taktvolle dog doeltreffende antwoord opgestel. Hulle het die amptenare herinner aan die langvergete bevel van Kores wat die Jode koninklike toestemming gegee het om hierdie werk voort te sit. Hierdie amptenare, wat geweet het van die Persiese beleid om nooit ’n verklaarde wet te herroep nie, het verstandig besluit om nie ’n koninklike bevel teen te gaan nie. Die werk kon dus voortgaan totdat koning Kores later sy amptelike verlof toegestaan het!—Esra 5:11-17; 6:6-12.
Was hierdie verstommende uitslag aan menslike wysheid te danke? Inteendeel, Esra se verslag sê dat “die oog van hulle God op die ouere manne van die Jode gebly het” (Esra 5:5, NW). Jehovah het onteenseglik hulle antwoord sowel as die gunstige reaksie van die Persiese koning gerig. Christen- ouere manne kan vandag eweneens op Jehovah vertrou vir leiding wanneer hulle voor moeilike besluite te staan kom of met teenstanders te doen het. Jehovah gee in Psalm 32:8 die versekering: “Ek wil jou onderrig en jou leer aangaande die weg wat jy moet gaan; Ek wil raad gee; my oog sal op jou wees.”