Verwysings vir die Lewe en Bediening-vergaderingwerkboek
© 2023 Watch Tower Bible and Tract Society of Pennsylvania
4-10 SEPTEMBER
SKATTE UIT GOD SE WOORD | ESTER 1-2
“Doen jou bes om soos Ester beskeie te wees”
Jy kan beskeie bly—Selfs wanneer dit moeilik is
11 As ons te veel geprys of gevlei word, kan dit ook moeilik wees om beskeie te bly. Dink aan hoe Ester gereageer het toe haar omstandighede onverwags verander het. Sy was ’n pragtige jong vrou en het ’n jaar lank spesiale skoonheidsbehandeling ontvang. Sy was elke dag in die geselskap van ander jong vroue wat van oral in die Persiese Ryk bymekaargebring is en meegeding het om die koning se guns te verkry. Maar sy het respekvol en nederig gebly. Selfs nadat die koning haar gekies het om sy koningin te word, het sy nie hoogmoedig of onbeskeie geword nie.—Est. 2:9, 12, 15, 17.
Sy het opgekom vir God se volk
15 Toe die tyd aangebreek het vir Ester om voor die koning te verskyn, is sy toegelaat om enigiets te kies wat sy gedink het sy nodig het, moontlik om haarself nog mooier te maak. Maar uit beskeidenheid het sy niks meer gevra as wat Hegai vir haar genoem het nie (Est. 2:15). Sy het waarskynlik besef dat skoonheid alleen nie die koning se hart sou wen nie; ’n beskeie en nederige gees sou ’n baie seldsamer eienskap in daardie hof wees. Was sy reg?
Jy kan beskeie bly—Selfs wanneer dit moeilik is
12 As ons beskeie is, sal ons kleredrag, persoonsversorging en gedrag altyd gepas wees en toon dat ons ander respekteer. Ons besef dat mense vir ons lief word as ons ’n “stille en sagmoedige gees” openbaar en nie as ons spog of die aandag onnodig op onsself vestig nie. (Lees 1 Petrus 3:3, 4; Jer. 9:23, 24.) As ons te veel van onsself dink, sal dit uiteindelik in ons dade na vore kom. Byvoorbeeld, ons probeer dalk die indruk skep dat ons belangrik is omdat ons spesiale voorregte geniet, vertroulike inligting het of verantwoordelike broers goed ken. Of ons laat dit dalk lyk asof ons iets belangriks op ons eie gedoen het, al het ander dalk daarmee gehelp. Jesus het weer eens ’n wonderlike voorbeeld gestel. Hy het dikwels na die Hebreeuse Geskrifte verwys of daaruit aangehaal. Omdat hy beskeie was, wou hy hê dat mense moes weet dat sy woorde van Jehovah kom. Dit was nie sy eie wysheid of iets wat hy self uitgedink het nie.—Joh. 8:28.
Geestelike skatte
Het jy geweet?
Navorsers het ’n Persiese spykerskrifteks gevind wat ’n man noem met die naam Marduka (Afrikaans Mordegai). Hy het as ’n administrateur, moontlik ’n rekenmeester, in Susan gewerk. Arthur Ungnad, ’n deskundige in Oosterse geskiedenis, het gesê dat hierdie spykerskrif op daardie stadium “die enigste ekstra Bybelse verwysing na Mordegai” was.
Ná Ungnad se verslag het geleerdes duisende ander Persiese spykerskriftekste vertaal. Onder hulle is die Persepolis-tablette, wat in die ruïnes van die Skatkamer naby die stadspoorte gevind is. Hierdie tablette kom uit die tydperk toe Xerxes I koning was. Dit is in die Elamitiese taal en bevat ’n hele paar name wat in die boek Ester gevind word.
’n Hele paar Persepolis-tablette noem die naam Marduka, wat as ’n sekretaris vir die koning by die paleis in Susan gewerk het toe Xerxes I koning was. Een tablet beskryf Marduka as ’n vertaler. Dit pas by die Bybelse beskrywing van Mordegai. Hy was ’n amptenaar in die hof van koning Ahasveros (Xerxes I), en hy het ten minste twee tale gepraat. Mordegai het gereeld in die koning se poort by die paleis in Susan gesit (Est. 2:19, 21; 3:3). Hierdie koninklike poort was ’n groot gebou waar paleisamptenare gewerk het.
Daar is interessante ooreenkomste tussen Marduka wat in die tablette genoem word en Mordegai wat in die Bybel genoem word. Hulle het op dieselfde tyd gelewe en op dieselfde plek gebly en het by dieselfde plek as amptenare gewerk. Dit lyk of al hierdie feite wys dat Marduka en Mordegai wat in die boek Ester genoem word dieselfde persoon is.
11-17 SEPTEMBER
SKATTE UIT GOD SE WOORD | ESTER 3-5
“Help ander om hulle volle potensiaal te bereik”
it-2-E 431 ¶7
Mordegai
Weier om voor Haman neer te buig. Ahasveros het Haman die Agagiet daarna eerste minister gemaak, en het almal wat in die koning se poort was, beveel om voor Haman neer te buig as gevolg van sy nuwe, hoër posisie. Mordegai het volstrek geweier om dit te doen en het gesê dat dit is omdat hy ’n Jood is (Est 3:1-4). Die feit dat Mordegai hierdie rede gebruik het, bewys dat sy besluit te doen gehad het met sy verhouding met sy God, Jehovah, omdat hy ’n toegewyde Jood was. In die verlede het Israeliete hulle wel voor belangrike mense neergebuig om te wys dat hulle erken dat daardie persone ’n hoër posisie as heerser het, maar Mordegai het geweet dat meer as dit daarby betrokke sou wees as hy hom voor Haman sou neerbuig (2Sa 14:4; 18:28; 1Kn 1:16). In Haman se geval was daar goeie rede hoekom Mordegai nie neergebuig het nie. Haman was waarskynlik ’n Amalekiet, en Jehovah het gesê dat Hy “van geslag tot geslag” teen Amalek sal oorlog voer. (Eks 17:16; sien HAMAN in it-1-E.) Dit was vir Mordegai ’n kwessie van integriteit aan God, en nie ’n politieke kwessie nie.
it-2-E 431 ¶9
Mordegai
Gebruik om Israel te verlos. Toe daar beveel is dat al die Jode in die ryk vernietig moet word, het Mordegai vir Ester gesê dat hy glo dat sy juis nou koningin geword het sodat die Jode verlos kan word. Hy het vir Ester daarop gewys watter groot verantwoordelikheid sy het om die koning te gaan smeek vir sy guns en sy hulp. Al het dit Ester se lewe in gevaar gestel, het sy ingestem om dit te doen. – Est 4:7–5:2.
Sy het opgekom vir God se volk
22 Ester se hart het sekerlik in haar skoene gesak toe sy hierdie boodskap hoor. Hier was die grootste toets van haar geloof. Sy was bang, en sy het dit openlik erken in haar antwoord aan Mordegai. Sy het hom aan die koning se wet herinner. Om voor die koning te verskyn sonder om ontbied te word, het ’n doodsvonnis beteken. Slegs as die koning sy goue septer uitgesteek het, is die oortreder gespaar. En het Ester enige rede gehad om sulke genade te verwag, veral met die oog op wat met Vasti gebeur het toe sy die koning se bevel om voor hom te verskyn, geïgnoreer het? Ester het vir Mordegai gesê dat dit al 30 dae is sedert die koning haar genooi het om na hom toe te kom! Hierdie gebrek aan aandag het haar genoeg rede gegee om te wonder of sy die wispelturige monarg se guns verloor het.—Est. 4:9-11.
23 Mordegai het ferm geantwoord om Ester se geloof te versterk. Hy het haar verseker dat as sy niks doen nie, redding vir die Jode uit ’n ander oord sou kom. Maar hoe kon sy verwag om gespaar te word wanneer die vervolging toeneem? Hier het Mordegai sy vaste geloof in Jehovah getoon, wat nooit sou toelaat dat Sy volk uitgewis word en Sy beloftes onvervuld bly nie (Jos. 23:14). Toe het Mordegai vir Ester gevra: “Wie weet of jy nie met die oog op ’n tyd soos hierdie tot koninklike waardigheid gekom het nie?” (Est. 4:12-14). Is Mordegai nie ’n navolgenswaardige voorbeeld nie? Hy het ten volle op sy God, Jehovah, vertrou. Doen ons dit?—Spr. 3:5, 6.
Geestelike skatte
Die stryd om godsdiensvryheid
14 Soos Ester en Mordegai van ouds, stry Jehovah se hedendaagse volk vir die vryheid om Jehovah te aanbid op die manier wat hy beveel het (Est. 4:13-16). Kan jy ’n deelname hieraan hê? Ja. Jy kan gereeld bid vir jou geestelike broers en susters wat tans weens wetlike onregte ly. Sulke gebede kan ’n groot hulp wees vir ons broers en susters wat ontberinge en vervolging verduur. (Lees Jakobus 5:16.) Beweeg sulke gebede Jehovah om op te tree? Ons oorwinnings in die hof gee te kenne dat dit beslis die geval is!—Heb. 13:18, 19.
18-24 SEPTEMBER
SKATTE UIT GOD SE WOORD | ESTER 6-8
“’n Les in goeie kommunikasie”
Sy het verstandig, moedig en onselfsugtig opgetree
15 Omdat Ester geduldig was en daardie een dag langer gewag het om haar versoek tot die koning te rig, is Haman tyd gegee om die grondslag vir sy eie ondergang te lê. En was Jehovah God nie dalk verantwoordelik vir die koning se slapeloosheid nie? (Spr. 21:1). Geen wonder dat God se Woord ons aanspoor om ’n “wagtende houding” in te neem nie! (Lees Miga 7:7.) Wanneer ons op God wag, vind ons moontlik dat sy oplossings vir ons probleme baie beter is as enigiets waarmee ons dalk self vorendag sou gekom het.
Sy het haar moedig uitgespreek
16 Ester kon dit nie waag om die koning se geduld verder op die proef te stel nie; by haar tweede feesmaal moes sy met alles uitkom. Maar hoe? Wel, die koning het haar die geleentheid gegee toe hy haar weer vra wat haar versoek is (Est. 7:2). Ester se “tyd om te praat”, het aangebreek.
Sy het verstandig, moedig en onselfsugtig opgetree
17 Ons kan dink dat Ester moontlik ’n stille gebed tot haar God gedoen het voordat sy gesê het: “As ek guns in u oë gevind het, o koning, en as die koning dit goedvind, laat my siel aan my gegee word op my bede en my volk op my versoek” (Est. 7:3). Let op dat sy die koning verseker het dat sy sy oordeelsvermoë respekteer. Hoe het Ester tog verskil van Vasti, die koning se vorige vrou, wat haar man opsetlik verneder het! (Est. 1:10-12). Ester het die koning ook nie gekritiseer omdat hy so dwaas was om Haman te vertrou nie. Sy het die koning eerder gesmeek om haar lewe te beskerm.
Sy het verstandig, moedig en onselfsugtig opgetree
18 Hierdie versoek moes sekerlik die koning se hart geraak het, en dit moes hom ook verbaas het. Wie sou dit waag om sy koningin se lewe te bedreig? Ester het verder gesê: “Ons is verkoop, ek en my volk, om verdelg, doodgemaak en uitgeroei te word. En as ons as blote slawe en as blote diensmeisies verkoop is, sou ek stilgebly het. Maar die benoudheid is nie gepas wanneer dit met skade vir die koning gepaardgaan nie” (Est. 7:4). Let op dat Ester reguit gesê het wat die probleem is, maar bygevoeg het dat sy sou stilgebly het as die gevaar bloot slawerny was. Maar omdat hierdie volksmoord die koning self te veel sou kos, kon sy nie stilbly nie.
19 Ester se voorbeeld leer ons baie oor die oorredingskuns. As jy ooit ’n ernstige probleem onder die aandag van ’n geliefde of selfs iemand in ’n gesagsposisie moet bring, kan ’n kombinasie van geduld, respek en openhartigheid grootliks help.—Spr. 16:21, 23.
Geestelike skatte
Glanspunte uit die boek Ester
7:4—Hoe sou ’n uitwissing van die Jode “skade vir die koning” beteken? Deur taktvol die moontlikheid te noem dat die Jode as slawe verkoop kon word, het Ester getoon hoe dit skade vir die koning kon beteken as hulle doodgemaak word. Die 10 000 silwerstukke wat Haman belowe het, was baie minder winsgewend vir die koning se skatkis as die groot inkomste wat dit kon ingebring het as Haman beplan het om die Jode as slawe te verkoop. Die uitvoering van die plan sou ook die verlies van die koningin beteken het.
25 SEPTEMBER–1 OKTOBER
SKATTE UIT GOD SE WOORD | ESTER 9-10
“Hy het sy gesag gebruik om sy volk te help”
it-2-E 432 ¶2
Mordegai
Mordegai het nou in Haman se plek eerste minister geword en het die koning se eie seëlring gekry om regeringsdokumente te verseël. Die koning het vir Ester die huis van Haman gegee, en sy het Mordegai daaroor aangestel. Mordegai het toe met die koning se toestemming ’n nuwe bevel gegee wat die Jode die wettige reg gegee het om hulleself te verdedig. Vir die Jode was dit ’n lig van verlossing en blydskap. Baie mense in die Persiese Ryk het die Jode ondersteun, en op 13 Adar, die dag waarop die wette in werking sou tree, was die Jode gereed. As gevolg van Mordegai se hoë posisie het hulle die regering se ondersteuning gehad. In Susan het die geveg ’n dag langer aangehou. Meer as 75 000 van die Jode se vyande in die Persiese Ryk is vernietig, en dit sluit Haman se tien seuns in (Est 8:1–9:18). Met Ester se bevestiging het Mordegai beveel dat die fees van die 14de en 15de dag van die maand Adar, die “dae van die Purim”, elke jaar gevier moet word sodat die mense bly kon wees en fees kon vier en vir mekaar en vir die armes geskenke kon gee. Die Jode het hierdie fees aanvaar en van hulle nakomelinge en almal wat by hulle aangesluit het, verwag om dit te vier. As die tweede belangrikste persoon in die ryk, is Mordegai deur God se toegewyde volk, die Jode, gerespekteer en het hy aangehou om na hulle belange om te sien. – Est 9:19-22, 27-32; 10:2, 3.
it-2-E 716 ¶5
Purim
Doel. Hoewel party kommentators sê dat die Fees van die Purim soos die Jode dit vandag vier, meer sekulêr as godsdienstig van aard is en dat dit soms oordoen word, was dit nie so toe die viering ingestel is en mense in Bybelse tye dit gevier het nie. Mordegai en Ester was albei knegte van die ware God, Jehovah, en die fees is ingestel om Hom te eer. Die verlossing van die Jode op daardie tyd kan aan Jehovah God toegeskryf word, want hierdie geskil het ontstaan as gevolg van Mordegai se integriteit en sy uitsluitlike aanbidding van Jehovah. Haman was waarskynlik ’n Amalekiet, en daardie nasie is spesifiek deur Jehovah vervloek en tot vernietiging veroordeel. Mordegai het God se bevel gerespekteer en geweier om hom voor Haman neer te buig (Est 3:2, 5; Eks 17:14-16). En Mordegai se woorde aan Ester (Est 4:14) wys dat hy op ’n hoër mag vertrou het om die Jode te verlos, en die feit dat Ester gevas het voordat sy met haar eerste versoek, ’n uitnodiging na ’n feesmaal, voor die koning verskyn het, het gewys dat sy God om hulp gevra het. – Est 4:16.
‘Word ’n navolger van God’ in jou gebruik van mag
12 Jehovah het opsieners voorsien om die leiding in die Christengemeente te neem (Hebreërs 13:17). Hierdie bekwame manne moet hulle godgegewe gesag gebruik om die nodige hulp te voorsien en die welsyn van die kudde te bevorder. Gee ouermanne se posisie hulle die reg om oor hulle medegelowiges baas te speel? Glad nie! Ouermanne moet ’n gebalanseerde, nederige beskouing van hulle rol in die gemeente hê (1 Petrus 5:2, 3). Die Bybel sê vir opsieners om “herders te wees vir die gemeente van God, wat hy met die bloed van sy eie Seun gekoop het” (Handelinge 20:28). Dit bied ’n kragtige rede om elke lid van die kudde met teerheid te behandel.
13 Ons kan dit soos volg toelig. ’n Intieme vriend vra jou om ’n waardevolle besitting op te pas. Jy weet dat jou vriend baie vir die artikel betaal het. Sal jy dit nie baie versigtig, met groot sorg hanteer nie? God het eweneens aan ouermanne die verantwoordelikheid toevertrou om ’n baie waardevolle besitting op te pas: die gemeente, waarvan die lede met skape vergelyk word (Johannes 21:16, 17). Jehovah het sy skape lief – ja, so lief dat hy hulle met die kosbare bloed van sy eniggebore Seun, Jesus Christus, gekoop het. Jehovah kon nie ’n hoër prys vir sy skape betaal het nie. Nederige ouermanne hou dit in gedagte en behandel Jehovah se skape dienooreenkomstig.
Geestelike skatte
Glanspunte uit die boek Ester
9:10, 15, 16—Waarom het die Jode nie die buit geplunder nie, hoewel die verordening dit gemagtig het? Hulle weiering het geen twyfel gelaat dat hulle beweegrede selfbehoud was, nie selfverryking nie.
2-8 OKTOBER
SKATTE UIT GOD SE WOORD | JOB 1-3
“Hou aan wys hoe baie jy Jehovah liefhet”
Volg Noag, Daniël en Job se gehoorsaamheid en geloof na
16 Uitdagings wat Job gehad het. Job het goeie en slegte tye in sy lewe ervaar. Hy was eers “die grootste van al die Oosterlinge” (Job 1:3). Hy was ryk, en almal het hom geken en gerespekteer (Job 29:7-16). Maar Job het nooit gedink dat hy beter as ander is of dat hy God nie nodig het nie. Jehovah het hom eerder “my kneg” genoem en gesê dat hy “’n onberispelike en regskape man [is], wat God vrees en afwyk van die kwaad”. — Job 1:8.
17 In ’n baie kort tydjie het Job se lewe drasties verander. Hy het alles verloor en het so depressief geword dat hy wou sterf. Ons weet dat Satan die een was wat Job se probleme veroorsaak het. Hy het gesê dat Job God net om selfsugtige redes dien. (Lees Job 1:9, 10.) Jehovah het nie hierdie goddelose aantyging geïgnoreer nie. Jehovah het Job die geleentheid gegee om sy lojaliteit te bewys en om te wys dat sy aanbidding uit die hart gekom het en nie selfsugtig was nie.
Behou jou onkreukbaarheid!
10 Satan maak dieselfde aantyging oor elkeen van ons. Hoe is jy daarby betrokke? Satan sê eintlik dat jy Jehovah God nie regtig liefhet nie, dat jy God sal ophou dien om jou eie lewe te red en dat jy jou onkreukbaarheid sal prysgee! (Job 2:4, 5; Op. 12:10). Hoe laat dit jou voel? Dit maak ’n mens seer, nie waar nie? Maar dink hieraan: Jehovah het soveel vertroue in jou dat hy jou ’n wonderlike geleentheid gee. Jehovah laat Satan toe om jou onkreukbaarheid te toets. Jehovah het die vertroue dat jy jou onkreukbaarheid sal behou en sal help om te bewys dat Satan ’n leuenaar is. En Hy belowe dat hy jou sal help om dit te doen (Heb. 13:6). Dit is beslis ’n voorreg om deur die Soewerein van die heelal vertrou te word! Kan jy sien hoekom onkreukbaarheid so belangrik is? Dit help ons om Satan ’n leuenaar te bewys, om ons Vader se goeie naam te verdedig en om sy manier van regeer te ondersteun. Wat kan ons doen om ons onkreukbaarheid te behou?
Geestelike skatte
Lesse uit Jesus se laaste woorde
9 Wat het Jesus gesê? Kort voor sy dood het Jesus uitgeroep: “My God, my God, waarom het u my verlaat?” (Matt. 27:46). Die Bybel sê nie vir ons hoekom Jesus dit gesê het nie. Maar kom ons kyk wat ons uit hierdie woorde kan leer. Eerstens, toe Jesus hierdie woorde gesê het, het hy die profesie in Psalm 22:1 vervul. En hierdie woorde maak dit duidelik dat Jehovah nie “’n beskermende muur” om sy seun geplaas het nie (Job 1:10). Jesus het geweet dat sy Vader sy vyande toegelaat het om sy geloof tot die dood toe te toets – soos geen mens al ooit getoets was nie. Hierdie woorde bewys ook dat hy nie ’n misdaad gepleeg het waarvoor hy die doodstraf moes kry nie.
9-15 OKTOBER
SKATTE UIT GOD SE WOORD | JOB 4-5
“Pasop vir valse inligting”
it-1-E 713 ¶11
Elifas
2. Een van Job se drie metgeselle (Job 2:11). Hy was Temaniet wat waarskynlik ’n nakomeling van nr. 1 hierbo was, wat hom dus ’n nakomeling van Abraham en ’n verre familielid van Job gemaak het. Hy en sy nageslag het gespog oor hulle wysheid (Jer 49:7). Elifas staan uit as die belangrikste en invloedrykste van die drie “vertroosters”, wat die idee gee dat hy dalk ook die oudste was. Hy praat eerste in al drie besprekings en hy praat die langste.
Weerstaan verkeerde denke!
Elifas het verwys na ’n bonatuurlike ondervinding wat hy eenkeer gehad het en gesê: “’n Gees het voor my aangesig verbygegaan; die hare van my vlees het regop begin staan. Hy het stil gaan staan, maar ek het sy voorkoms nie herken nie; ’n gedaante was voor my oë; daar was ’n kalmte, en toe het ek ’n stem gehoor” (Job 4:15, 16). Watter soort gees het Elifas se denke beïnvloed? Die kritiese toon van die woorde wat gevolg het, toon dat die gees beslis nie een van God se regverdige engele was nie (Job 4:17, 18). Dit was ’n bose geesskepsel. Waarom anders sou Jehovah vir Elifas en sy twee metgeselle tereggewys het vir die leuens wat hulle vertel het? (Job 42:7). Ja, Elifas is deur ’n demoon beïnvloed. Sy opmerkings het goddelose denke weerspieël.
Weerstaan sataniese propaganda
Satan het Elifas, een van Job se drie besoekende metgeselle, gebruik om aan te voer dat die mens hopeloos swak is. Hy het na mense verwys as “dié wat in kleihuise woon” en vir Job gesê: “[Hulle] fondament [is] in die stof . . . ! ’n Mens verbrysel hulle gouer as ’n mot. Van die oggend tot die aand word hulle verbrysel; hulle vergaan vir ewig sonder dat iemand dit ter harte neem.”—Job 4:19, 20.
Elders in die Skrif word ons vergelyk met “erdehouers”—breekbare potte wat van klei gemaak is (2 Kor. 4:7). Ons is swak weens oorgeërfde sonde en onvolmaaktheid (Rom. 5:12). Op ons eie is ons kwesbaar vir Satan se aanvalle. Maar as Christene is ons nie sonder hulp nie. Ten spyte van ons swakhede is ons kosbaar in God se oë (Jes. 43:4). Verder gee Jehovah heilige gees aan dié wat hom vra (Luk. 11:13). Sy gees kan ons “die krag wat bo die normale is”, gee en ons in staat stel om opgewasse te wees teen enige teëspoed wat Satan oor ons bring (2 Kor. 4:7; Fil. 4:13). As ons die Duiwel weerstaan, “vas in die geloof”, sal God ons standvastig en sterk maak (1 Pet. 5:8-10). Daarom hoef ons nie Satan die Duiwel te vrees nie.
Beskerm jouself teen valse inligting
● Kyk waar dit vandaan kom en wat die inhoud daarvan is
Wat die Bybel sê: “Maak seker van alles.” – 1 Tessalonisense 5:21.
Voordat jy ’n storie glo of aanstuur, selfs ’n storie wat gewild is of herhaaldelik in die nuus is, moet jy seker maak dat dit waar is. Hoe?
Stel vas hoe betroubaar die bron is. Nuusmedia-maatskappye en ander organisasies kan ’n storie aanpas om by hulle kommersiële of politieke standpunt te pas. Vergelyk dit wat jy in een nuusbron sien met ander bronne. Partykeer kan vriende onopsetlik valse inligting aanstuur deur e-posse of deur sosiale media. Daarom moet jy nie ’n nuus-item vertrou tensy jy kan uitvind waar dit vandaan kom nie.
Maak seker dat die inhoud nuut en akkuraat is. Soek na datums, feite wat bevestig kan word en sterk bewyse wat die inhoud ondersteun. Wees veral versigtig as dit lyk asof ingewikkelde inligting op ’n baie eenvoudige manier verduidelik word of as die berig so geskryf is dat dit ’n emosionele reaksie uitlok.
Geestelike skatte
Bly standvastig, en seëvier in die wedloop om die lewe
Om deel van die wêreldwye organisasie van ware aanbidders te wees, kan ’n kragtige stabiliserende invloed op ons hê. Wat ’n seën is dit tog om met so ’n liefdevolle, wêreldwye broederskap om te gaan! (1 Petrus 2:17). En ons kan ’n stabiliserende invloed op ons medegelowiges hê.
Dink aan die opregte man Job se pogings om ander te help. Selfs die valse vertrooster Elifas moes noodgedwonge erken: “Jou woorde het enigiemand wat struikel, opgerig; en jy het knakkende knieë sterk gemaak” (Job 4:4). Hoe vaar ons in hierdie opsig? Elkeen van ons het die verantwoordelikheid om ons geestelike broers en susters te help om in God se diens te volhard. Ons kan ooreenkomstig die gees van hierdie woorde met hulle handel: “Versterk die swak hande en maak die wankelende knieë sterk” (Jesaja 35:3). Stel jou dit gerus ten doel om by elke vergadering een of twee mede-Christene te versterk en aan te moedig (Hebreërs 10:24, 25). Bemoedigende woorde van lof en waardering vir hulle volgehoue pogings om Jehovah te behaag, kan hulle werklik help om standvastig te bly sodat hulle in die wedloop om die lewe kan seëvier.
16-22 OKTOBER
SKATTE UIT GOD SE WOORD | JOB 6-7
“Wanneer jy voel dat die lewe te moeilik is”
Glanspunte uit die boek Job
7:1; 14:14—Wat word met “dwangarbeid” bedoel? Job se ellende was so erg dat hy die lewe as veeleisende, moeilike dwangarbeid beskou het (Job 10:17, voetnoot in NW). Aangesien ’n mens geen beheer het oor die tyd wat jy in Sjeool deurbring nie—van die tyd van jou dood tot die opstanding—het Job daardie tyd met dwangarbeid vergelyk.
“Jehovah . . . red dié wat mismoedig is”
SOMS dink ons dalk aan die feit dat die lewe kort is en ons dae “vol probleme” is (Job 14:1). So dit is verstaanbaar dat ons soms mismoedig voel. ’n Hele paar van Jehovah se knegte van die verlede het so gevoel. Party wou selfs sterf (1 Kon. 19:2-4; Job 3:1-3, 11; 7:15, 16). Maar Jehovah – die God op wie hulle vertrou het – het hulle oor en oor vertroos en versterk. Hierdie verhale is in die Bybel neergeskryf om ons te vertroos en sodat ons daaruit kan leer. – Rom. 15:4.
Wanneer jy net ’n einde aan alles wil maak
Al lyk jou situasie miskien hopeloos, moet jy in gedagte hou dat jy nie alleen is nie en dat byna almal vandag ongelukkig met die een of ander probleem te kampe het. Die Bybel sê dat “die hele skepping tot nou toe voortdurend saam kreun en saam pyn ly” (Romeine 8:22). Al lyk dit asof daar nie in die nabye toekoms ’n oplossing vir jou probleem sal wees nie, moet jy onthou dat dinge dikwels met verloop van tyd verbeter. Maar wat kan jou intussen help?
Bespreek jou gevoelens met ’n geestelik volwasse vriend wat jy vertrou. Die Bybel sê: “’n Ware metgesel het te alle tye lief en is ’n broer wat gebore word vir die tyd wanneer daar benoudheid is” (Spreuke 17:17). Die regverdige man Job, wat in die Bybel gemeld word, het gedurende sy beproewinge vir ander vertel hoe hy voel. Toe hy gevoel het dat hy “’n weersin in [sy] lewe” het, het hy gesê: “Ek sal uiting gee aan my besorgdheid oor myself. Ek sal in die bitterheid van my siel praat!” (Job 10:1). As jy ander in jou vertroue neem, kan dit jou emosies laat bedaar, en dit kan jou help om jou probleme in ’n ander lig te sien.
Stort jou hart voor God uit in gebed. Party dink dat gebed net ’n emosionele kruk is, maar dit is nie wat die Bybel sê nie. Psalm 65:2 noem Jehovah God die “Hoorder van die gebed”, en 1 Petrus 5:7 sê: “Hy sorg vir julle.” Die Bybel beklemtoon herhaaldelik dat dit belangrik is om op God te vertrou. Byvoorbeeld:
“Vertrou op Jehovah met jou hele hart en moenie op jou eie begrip steun nie. Slaan ag op hom in al jou weë, en hy sal jou paaie reguit maak.”—SPREUKE 3:5, 6.
“Aan die begeerte van dié wat [Jehovah] vrees, sal hy voldoen, en hulle hulpgeroep sal hy hoor, en hy sal hulle red.”—PSALM 145:19.
“Dít is die vertroue wat ons teenoor hom het, dat hy ons hoor, ongeag wat ons volgens sy wil vra.”—1 JOHANNES 5:14.
“Jehovah is ver van die goddeloses af, maar die gebed van die regverdiges hoor hy.”—SPREUKE 15:29.
As jy met God praat oor die probleme wat jy ondervind, sal hy hulp voorsien. Dit is met goeie rede dat die Bybel jou aanspoor: “Vertrou te alle tye op hom . . . Stort [jou] hart voor hom uit.”—Psalm 62:8.
Geestelike skatte
Luister, leer en wys dat jy meegevoel het
10 Ons kan Jehovah navolg deur ons broers en susters te probeer verstaan. Leer ken jou broers en susters beter. Praat met hulle voor en ná die vergaderinge, werk saam met hulle in die bediening, en as dit moontlik is, nooi hulle oor vir ’n ete. Wanneer jy dit doen, vind jy dalk uit dat ’n suster wat onvriendelik lyk, eintlik skaam is, ’n broer wat jy gedink het materialisties is, gasvry is of dat ’n gesin wat gewoonlik laat by die vergaderinge aankom, vervolg word (Job 6:29). Ons moet natuurlik nie ‘in ander mense se sake inmeng’ nie (1 Tim. 5:13). Maar dit is goed om iets oor ons broers en susters en hulle omstandighede te leer. Dit kan ons help om hulle beter te verstaan.
23-29 OKTOBER
SKATTE UIT GOD SE WOORD | JOB 8-10
“God se lojale liefde beskerm ons teen Satan se leuens”
Kan ons werklik God se hart bly maak?
Job het ’n hele paar persoonlike ontberinge deurgemaak wat vir hom onregverdig gelyk het. Hy het verkeerdelik tot die gevolgtrekking gekom dat God nie omgee of hy aan Hom getrou bly of nie (Job 9:20-22). Job was so oortuig van sy eie regverdigheid dat dit vir ander geklink het asof hy homself regverdiger as God ag.—Job 32:1, 2; 35:1, 2.
Wat beteken Jehovah se lojale liefde vir jou?
14 Jehovah se lojale liefde beskerm ons geestelik. Dawid het vir Jehovah in gebed gesê: “U is ’n skuilplek vir my. U sal my beskerm teen groot moeilikheid. U sal my omring met vreugdevolle uitroepe van redding. . . . Die een wat op Jehovah vertrou, word deur Sy lojale liefde omring” (Ps. 32:7, 10). In Bybeltye het die mure van ’n stad die mense daarin teen hulle vyande beskerm. Net so omring Jehovah se lojale liefde ons. Dit beskerm ons teen enige iets wat ons verhouding met hom kan beskadig. En Jehovah se lojale liefde beweeg hom om ons na hom toe te trek. – Jer. 31:3.
Geestelike skatte
“Wie het die denke van Jehovah leer ken?”
19 Wat het ons oor “die denke van Jehovah” geleer? Ons moet toelaat dat God se Woord ons begrip van Jehovah se denke vorm. Ons moet nooit dink dat Jehovah dieselfde beperkings as ons het nie, en ons moet hom nooit volgens ons standaarde en denkwyse oordeel nie. Job het gesê: “[God] is nie ’n man soos ek dat ek hom sou antwoord nie, dat ons saam na die gereg sou gaan nie” (Job 9:32). Wanneer ons die denke van Jehovah begin verstaan, kan ons nie anders nie as om soos Job uit te roep: “Kyk! Dít is die rande van sy weë, en wat ’n fluistering van ’n saak is omtrent hom gehoor! Maar wie kan sy magtige donder verstaan?”—Job 26:14.
20 Wat moet ons doen as ons ’n gedeelte in die Skrif lees wat moeilik is om te verstaan, veral as dit met Jehovah se denke verband hou? As ons navorsing gedoen het en nog steeds nie ’n duidelike antwoord gekry het nie, kan ons dit as ’n toets van ons vertroue op Jehovah beskou. Onthou dat sekere dinge wat ons in die Bybel lees, ons soms die geleentheid bied om ons geloof in Jehovah se eienskappe te toon. Ons moet nederig erken dat ons nie alles verstaan wat hy doen nie (Pred. 11:5). Ons sal dus beweeg word om saam te stem met hierdie woorde van die apostel Paulus: “O die diepte van God se rykdom en wysheid en kennis! Hoe ondeurgrondelik is sy oordele en hoe onnaspeurlik sy weë! Want ‘wie het Jehovah se denke leer ken, of wie het sy raadgewer geword?’ Of: ‘Wie het eers iets vir hom gegee, sodat hy daarvoor vergoed moet word?’ Want uit hom en deur hom en vir hom is alles. Aan hom die heerlikheid tot in ewigheid. Amen.”—Rom. 11:33-36.
30 OKTOBER–5 NOVEMBER
SKATTE UIT GOD SE WOORD | JOB 11-12
“Drie maniere om wysheid te kry en daardeur gehelp te word”
Job het Jehovah se naam hooggehou
17 Wat het Job gehelp om sy onkreukbaarheid te handhaaf? Dit is duidelik dat hy reeds ’n hegte verhouding met Jehovah opgebou het voordat die rampspoed hom getref het. Hoewel ons geen bewyse het dat hy geweet het dat Satan Jehovah uitgedaag het nie, was Job vasbeslote om lojaal te bly. Hy het gesê: “Totdat ek sterf, sal ek my onkreukbaarheid nie prysgee nie!” (Job 27:5). Hoe het Job hierdie hegte verhouding opgebou? Hy het ongetwyfeld alles wat hy gehoor het omtrent God se handelinge met Abraham, Isak en Jakob, wat ver langs familie van hom was, gekoester. En deur na die skepping te kyk, kon Job baie van Jehovah se eienskappe onderskei.—Lees Job 12:7-9, 13, 16.
Met Jehovah is jy nooit alleen nie
10 Maak vriende met getroue Christene. Maak vriende met broers en susters in die gemeente by wie jy kan leer, al is hulle nie van dieselfde ouderdomsgroep of agtergrond as jy nie. Die Bybel sê vir ons dat ‘wysheid by die bejaardes gevind word’ (Job 12:12). Ouer mense kan ook baie by getroue jongmense leer. Al was Dawid baie jonger as Jonatan, het hulle nog steeds ’n sterk vriendskap gehad (1 Sam. 18:1). Dawid en Jonatan het mekaar gehelp om Jehovah te dien, selfs onder baie moeilike omstandighede (1 Sam. 23:16-18). Irina, wat alleen in die waarheid is, sê: “Ons broers en susters kan regtig ons geestelike familie word. Jehovah kan hulle gebruik om die familie te wees wat ons nodig het.”
11 Dit kan moeilik wees om nuwe vriende te maak, veral as jy skaam is. Ratna, ’n skaam suster wat die waarheid geleer het al was sy teëgestaan, sê: “Ek moes die feit aanvaar dat ek die hulp en ondersteuning van my broers en susters nodig het.” Dit kan moeilik wees om vir iemand te sê hoe jy voel, maar dit is baie belangrik as jy ’n goeie vriend van daardie persoon wil wees. Jou vriende wil jou aanmoedig en ondersteun, maar jy moet vir hulle sê hoe hulle dit kan doen.
12 Een van die beste maniere om vriende te maak, is deur velddiens saam met ander te doen. Carol, wat vroeër genoem is, sê: “Ek het baie goeie vriende gemaak deur tyd saam met susters in die bediening te spandeer en deur ander dinge in Jehovah se diens saam met hulle te doen. Jehovah het my oor die jare deur middel van hierdie vriende ondersteun.” Dit is beslis die moeite werd om vriende te maak met getroue Christene. Jehovah gebruik sulke vriende om jou aan te moedig wanneer jy mismoedig of eensaam voel. – Spr. 17:17.
it-2-E 1190 ¶2
Wysheid
Goddelike wysheid. Wysheid in die volste sin van die woord behoort aan Jehovah God, want in hierdie opsig is hy “alleen wys” (Ro 16:27; Op 7 :12). Kennis is gebaseer op feite, en aangesien Jehovah die Skepper is, wat “van ewigheid tot ewigheid is” (Ps 90:1, 2), weet hy alles wat daar is om te weet oor die heelal, oor hoe dit gemaak is, oor wat alles daarin is en oor die geskiedenis daarvan tot nou toe. Die fisiese wette, siklusse en standaarde waarop mense staatmaak vir hulle navorsing en uitvindings, en waarsonder hulle hulpeloos sou wees en geen grondslag sou hê waarop hulle kon bou nie, is alles deur Hom gemaak (Job 38:34-38; Ps 104:24; Spr 3:19; Jer 10:12, 13). Dit maak dan net sin dat sy sedelike standaarde selfs nog belangriker is vir stabiliteit in ons lewe, om goeie besluite te kan maak en om ’n suksesvolle lewe te kan lei. (De 32:4-6; sien JEHOVAH [A God of moral standards] in it-2-E.) Daar is niks wat hy nie verstaan nie (Jes 40:13, 14). Hy laat dalk toe dat dinge wat nie met sy regverdige standaarde ooreenstem nie, ontwikkel en selfs vir ’n kort tydjie suksesvol is, maar die toekoms berus op die ou end by hom en sal presies volgens sy wil uitwerk, en die dinge wat hy gesê het, “sal beslis [sy] doel bereik”. – Jes 55:8-11; 46:9-11.
Geestelike skatte
Kommunikasie met adolessente
▪ ‘Verstaan ek die boodskap agter die woorde?’ Job 12:11 sê: “Toets die oor nie woorde soos die verhemelte voedsel proe nie?” Meer as ooit tevore moet jy nou “toets” wat jou seun of dogter sê. Adolessente oordryf dikwels. Byvoorbeeld, jou seun of dogter sê dalk: “Julle behandel my altyd soos ’n kind!” of “Julle luister nooit na my nie!” Pleks van hare te kloof oor die tegniese onjuistheid van “altyd” en “nooit”, moet jy eerder besef dat jou kind dit waarskynlik nie letterlik bedoel nie. Byvoorbeeld, “Julle behandel my altyd soos ’n kind” kan beteken: “Dit voel of julle my nie vertrou nie”, en “Julle luister nooit na my nie” beteken dalk: “Ek wil verduidelik hoe ek regtig voel.” Probeer om die boodskap agter die woorde te verstaan.