Elke jaar laat baie jongmense wat as Jehovah se Getuies grootgemaak word hulle doop. Dink jy daaraan om jou te laat doop? As dit die geval is, moet jy eers verstaan wat toewyding en doop beteken.

• Wat is doop?

• Wat is toewyding?

• Hoekom is doop belangrik?

• Wat ander jongmense sê

• Mites en feite

Wat is doop?

Die doop waarvan die Bybel praat, beteken dat ’n mens heeltemal onderdompel word in water – nie net dat daar water op jou gesprinkel word nie – en dit simboliseer iets baie belangriks.

• Wanneer jy tydens jou doop onder die water gaan, wys jy in die openbaar dat jy nie meer net vir jouself sal lewe nie.

• Wanneer jy uit die water opkom, wys dit dat jy ’n nuwe lewe begin wat daarop gefokus is om God se hart bly te maak.

Wanneer jy jou laat doop, erken jy in die openbaar dat Jehovah die gesag het om te besluit wat reg en wat verkeerd is. So wys jy ook vir ander mense dat jy belowe om vrywillig te doen wat Hy van jou vra.

Iets om oor te dink: Hoekom sal jy vir ander mense wil wys dat jy belowe het om ’n lewe van gehoorsaamheid aan Jehovah te lei? Sien 1 Johannes 4:19 en Openbaring 4:11.

Wat is toewyding?

Voordat jy jou laat doop, moet jy jou in ’n private gebed aan Jehovah toewy. Hoe?

In ’n persoonlike gebed sê jy vir Jehovah dat jy belowe om hom vir ewig te dien en dat jy sal doen wat hy van jou vra, maak nie saak wat gebeur of wat ander mense kies om te doen nie.

Wanneer jy jou laat doop, wys jy vir ander dat jy hierdie private toewyding gemaak het. Dit sê vir ander dat jy opgehou het om vir jouself te lewe en nou aan Jehovah behoort. – Matteus 16:24.

Iets om oor te dink: Hoekom word jou lewe beter wanneer jy aan Jehovah behoort? Sien Jesaja 48:17, 18 en Hebreërs 11:6.

Hoekom is doop belangrik?

Jesus het gesê dat doop ’n vereiste is vir sy dissipels (Matteus 28:19, 20). Daarom is doop nog steeds ’n vereiste vir Christene. Om die waarheid te sê, volgens die Bybel is doop nodig om gered te word. – 1 Petrus 3:21.

Maar jou motief moet reg wees – jy moet gedoop word omdat jy Jehovah liefhet en hom waardeer. Jou gesindheid moet soos dié van die psalmis wees, wat geskryf het: “Waarmee sal ek Jehovah terugbetaal vir al die goeie dinge wat hy vir my gedoen het? . . . Ek sal die naam van Jehovah aanroep. Ek sal my geloftes aan Jehovah betaal.” – Psalm 116:12-14.

Iets om oor te dink: Watter goeie dinge het Jehovah vir jou gedoen, en hoe kan jy hom terugbetaal? Sien Deuteronomium 10:12, 13 en Romeine 12:1.

As jy volgens die Bybel se standaarde lewe en ’n vriendskap met God opbou, dink jy heel waarskynlik daaraan om gedoop te word. Hoe weet jy of jy gereed is daarvoor?a

In hierdie artikel

• Wat moet ek alles weet?

• Wat moet ek alles doen?

• Wat ander jongmense sê

Wat moet ek alles weet?

Voorbereiding vir doop is nie soos ’n skooleksamen waarvoor jy ’n hele klomp goed uit jou kop moet leer om te slaag nie. Maar jy sal jou “denkvermoë” moet gebruik om jou oortuiging sterker te maak dat dít wat die Bybel leer die waarheid is (Romeine 12:1). Byvoorbeeld:

• Glo jy regtig dat God bestaan en dat hy verdien dat jy hom aanbid?

  Die Bybel sê: “As iemand God wil nader, moet hy glo dat hy bestaan en dat hy die beloner word van dié wat hom ernstig soek.” – Hebreërs 11:6.

  Vra jou af: ‘Hoekom glo ek in God?’ (Hebreërs 3:4). ‘Hoekom verdien hy dat ek hom aanbid?’ – Openbaring 4:11.

  Het jy hulp nodig? Sien “Skepping of evolusie?—Deel 1: Waarom moet ek aan God glo?”

• Glo jy regtig dat die Bybel se boodskap van God af kom?

  Die Bybel sê: “Die hele Skrif is deur God geïnspireer en is nuttig om te onderrig, om tereg te wys, om dinge reg te stel, om in regverdigheid te dissiplineer.” – 2 Timoteus 3:16.

  Vra jou af: ‘Hoekom glo ek dat die Bybel nie net ’n boek is wat vol is van mense se idees nie?’ – Jesaja 46:10; 1 Tessalonisense 2:13.

  Het jy hulp nodig? Sien “Hoe kan die Bybel my help? — Deel 1: Leer ken jou Bybel”.

• Glo jy regtig dat Jehovah die Christengemeente gebruik om sy wil uit te voer?

  Die Bybel sê: “[God] verdien . . . die eer deur middel van die gemeente en deur middel van Christus Jesus tot in alle geslagte, vir ewig en altyd.” – Efesiërs 3:21.

  Vra jou af: ‘Dink ek dat die dinge wat ek by Christelike vergaderinge uit die Bybel leer van mense of van Jehovah af kom?’ (Matteus 24:45). ‘Woon ek die vergaderinge by selfs wanneer my ouers nie daar kan wees nie (as hulle jou toelaat om dit te doen)?’ – Hebreërs 10:24, 25.

  Het jy hulp nodig? Sien “Hoekom vergaderinge by die Koninkryksaal bywoon?”

Wat moet ek alles doen?

Jy hoef nie volmaak te wees om gedoop te kan word nie. Maar jy moet wys jy wil regtig “[wegdraai] van wat sleg is en doen wat goed is” (Psalm 34:14). Byvoorbeeld:

• Lewe jy in ooreenstemming met Jehovah se standaarde?

  Die Bybel sê: “Behou ’n goeie gewete.” – 1 Petrus 3:16.

  Vra jou af: ‘Hoe het ek al gewys dat ek my “denkvermoë geoefen het” om te “onderskei wat reg en wat verkeerd is”?’ (Hebreërs 5:14). ‘Kan ek aan spesifieke kere dink toe ek negatiewe groepsdruk weerstaan het? Moedig my vriende my aan om te doen wat reg is?’ – Spreuke 13:20.

  Het jy hulp nodig? Sien “Hoe kan ek my gewete oplei?”

• Aanvaar jy verantwoordelikheid vir jou dade?

  Die Bybel sê: “God sal . . . elkeen van ons volgens ons dade oordeel.” – Romeine 14:12.

  Vra jou af: ‘Hoe eerlik is ek, met myself en met ander?’ (Hebreërs 13:18). ‘Erken ek my foute of is ek geneig om dit weg te steek of ander die skuld daarvoor te gee?’ – Spreuke 28:13.

  Het jy hulp nodig? Sien “Wat moet ek doen wanneer ek foute maak?”

• Hou jy jou vriendskap met Jehovah sterk?

  Die Bybel sê: “Kom nader aan God, en hy sal nader aan julle kom.” – Jakobus 4:8.

  Vra jou af: ‘Op watter maniere kom ek nader aan Jehovah?’ Byvoorbeeld: ‘Hoe gereeld lees ek die Bybel?’ (Psalm 1:1, 2). ‘Bid ek gereeld?’ (1 Tessalonisense 5:17). ‘Hoe spesifiek is ek wanneer ek bid? Is my vriende Jehovah se vriende?’ – Psalm 15:1, 4.

  Het jy hulp nodig? Sien “Hoe kan die Bybel my help? — Deel 2: Maak Bybellees lekker” en “Hoekom moet ek bid?”

WENK: Om jou te help om jou vir doop voor te berei, kan jy hoofstuk 37 lees van die boek Vrae wat jongmense vra—Antwoorde wat werk, Deel 2. Kyk veral na die werkblad op bladsy 308 en 309.

Raak jy senuweeagtig as jy daaraan dink om jou aan Jehovah toe te wy en gedoop te word? As dit die geval is, sal hierdie artikel jou help om nie so bang te voel nie.

In hierdie artikel

• Sê nou ek maak ’n ernstige fout nadat ek gedoop is?

• Sê nou ek is bang vir die verantwoordelikheid daarvan om gedoop te word?

• Sê nou ek voel dat ek nie goed genoeg is om Jehovah te dien nie?

• Wat ander jongmense sê

Sê nou ek maak ’n ernstige fout nadat ek gedoop is?

Hoekom jy dalk bekommerd is: Dalk ken jy iemand wat ernstig gesondig het en nie meer deel van die gemeente kon wees nie (1 Korintiërs 5:11-13). Jy is dalk bang dat dieselfde met jou sal gebeur.

“Toe ek daaraan begin dink het om gedoop te word, was ek bang dat ek daarna dalk iets verkeerds sou doen. Ek kon my net voorstel in watter slegte lig dit my ouers sou stel.” – Rebekah.

Sleutelteks: “Laat die goddelose sy weg verlaat. . . . Laat hom na Jehovah terugkeer, wat genade aan hom sal betoon, na ons God, want hy sal ryklik vergewe.” – Jesaja 55:7.

Dink goed daaroor na: Al word onberouvolle sondaars uit die gemeente verwyder, bewys Jehovah genade teenoor dié wat nederig berou toon en regstelling aanvaar. – Psalm 103:13, 14; 2 Korintiërs 7:11.

Maar die feit bly staan: Selfs al is jy onvolmaak, met God se hulp kan jy versoeking weerstaan (1 Korintiërs 10:13). Buitendien, wie besluit wat jy gaan doen? Jy? Of iemand anders?

“Ek was bang dat ek ná my doop dalk ’n ernstige fout sou maak, maar toe het ek besef dat dit ’n fout sou wees om te huiwer om gedoop te word. Ek het besef dat ek nie moes toelaat dat die sê-nou-maars van môre keer dat ek vandag iets doen nie.” – Karen.

Die slotsom: Jy hoef nie ernstig te sondig nie – dis jou keuse. Die meeste van Jehovah se knegte kry dit reg om getrou te bly. – Filippense 2:12.

Het jy meer hulp nodig? Sien “Hoe kan ek versoeking weerstaan?”

Sê nou ek is bang vir die verantwoordelikheid daarvan om gedoop te word?

Hoekom jy dalk bekommerd is: Jy weet dalk van jongmense wat ver van hulle gesin en vriende af weggetrek het om meer in Jehovah se diens te kan doen. Jy is bekommerd dat mense sal verwag dat jy dieselfde moet doen.

“’n Gedoopte Christen kan meer voorregte in Jehovah se diens geniet, maar party mense is net nie gereed om hulleself beskikbaar te stel nie of hulle omstandighede laat hulle nie toe om dit te doen nie.” – Marie.

Sleutelteks: “Laat elkeen sy eie dade ondersoek, en dan sal hy ’n rede hê om bly te wees oor wat hy self doen en nie omdat hy homself met ander vergelyk nie.” – Galasiërs 6:4.

Dink goed daaroor na: Moenie jouself met ander vergelyk nie; fokus eerder op die woorde in Markus 12:30: “Jy moet Jehovah jou God liefhê met jou hele hart.”

Dit sê dat jy Jehovah met jou hele hart moet dien – nie met iemand anders s’n nie. As jy regtig lief is vir Jehovah sal jy maniere vind om hom die beste te gee wat jy hom kan gee.

“Doop is nou wel ’n ernstige stap, maar dit is nie ’n swaar las nie. As jy jouself met mense omring wat goeie assosiasie is, sal hulle jou help. As jy met verloop van tyd meer verantwoordelikhede aanvaar, sal dit jou eintlik gelukkiger maak. Maar as jy huiwer om gedoop te word, doen jy jouself nie ’n guns nie.” – Julia.

Die slotsom: Vergroot jou waardering vir die liefde wat Jehovah vir jou gewys het. Dan sal jy gemotiveer wees om vir hom jou beste te gee. – 1 Johannes 4:19.

Het jy meer hulp nodig? Sien “Hoe verantwoordelik is ek?”

Sê nou ek voel dat ek nie goed genoeg is om Jehovah te dien nie?

Hoekom jy dalk bekommerd is: Jehovah is die Soewerein van die heelal; in vergelyking met hom is mense niks! Jy wonder dalk of Jehovah ooit weet dat jy bestaan.

“Omdat my ouers Jehovah se Getuies is, was ek bekommerd dat ek my vriendskap met Jehovah net by hulle ‘geërf’ het en dat Jehovah my nie persoonlik na hom toe getrek het nie.” – Natalie.

Sleutelteks: “Geen mens kan na my toe kom tensy die Vader, wat my gestuur het, hom trek nie.” – Johannes 6:44.

Dink goed daaroor na: Die feit dat jy daaraan dink om gedoop te word is dalk bewys daarvan dat Jehovah jou trek sodat jy selfs ’n beter vriend van hom kan word. Sal dit dan nie die regte ding wees om daardie uitnodiging te aanvaar nie?

Jy moet ook onthou dat Jehovah – en nie jy of enige iemand anders nie – die standaard stel van wie hy sal trek. En sy Woord verseker jou as jy ‘nader aan God kom, sal hy nader aan jou kom’. – Jakobus 4:8.

“Die feit dat jy Jehovah ken en dat hy jou na hom toe getrek het, bewys dat hy jou liefhet. So, wanneer jy dink dat jy nie goed genoeg is om hom te dien nie, moet jy jouself daaraan herinner dat hy nie daarmee saamstem nie. En Jehovah is altyd reg.” – Selina.

Die slotsom: As jy doen wat die Bybel van jou verwag om gedoop te kan word, dan kwalifiseer jy om Jehovah te aanbid. En onthou, hy verdien dat jy hom aanbid. – Openbaring 4:11.

Het jy meer hulp nodig? Sien “Hoekom moet ek bid?”