Tou—’n simbool van sterkte
DIE skrywer van Prediker het gesê: “’n Driedubbele lyn word nie gou verbreek nie” (Prediker 4:12). As ’n kabel wat uit drie toue bestaan, losgedraai word, kan elke afsonderlike tou gou gebreek word. Maar as hulle gevleg word, kan daardie “driedubbele lyn” nie maklik in twee gebreek word nie. God se knegte wat as ’t ware met mekaar ineengevleg is omdat hulle eensgesind is wat opvattings en voornemens betref, is eweneens geestelik sterker wanneer hulle byvoorbeeld teëstand die hoof moet bied.
Toe Dawid verwys het na ’n tyd toe dit gelyk het of hy ’n gewelddadige dood sou sterf en Sjeool beslis vir hom gewag het, het hy gesê “bande van die dood het my omring” en “bande van die doderyk was rondom my”. Dit het klaarblyklik vir hom gevoel asof toue om hom gewerp is en dat dit hom in die graf afgetrek het sodat hy tot in die dood en Sjeool gesleep word.—Psalm 18:5, 6.
Jesaja het gesê: “Wee hulle wat die ongeregtigheid nader trek met koorde van goddeloosheid, en die sonde soos met wa-toue”, en daardeur het hy miskien hulle verkleefdheid aan dwaling en die sonde aangedui wat soortgelyk was aan die manier waarop diere met toue of koorde aan waens vasgemaak is wat hulle agter hulle aan getrek het.—Jesaja 5:18.
Die oorwonne Siriërs het, klaarblyklik as ’n simbool van hulle volslae onderworpenheid en vernedering, “hulle rouklere om hul heupe vasgegord en bande om hul hoofde en na die koning van Israel gekom”. Elkeen het waarskynlik ’n tou as ’n band om sy kop of nek gedra.—1 Konings 20:31-34.
Net soos heidense heersers en nasies wat nie slawe van die Israeliete wou word nie in die ou tyd teen God en sy gesalfde versamel het, so het die Messiaanse profesieë voorspel, sou die konings van die aarde en die hoë amptenare soos een saamspan “teen die HERE en teen sy Gesalfde en sê: Laat ons hulle bande stukkend ruk en hulle toue van ons afwerp!” Enige beperkings wat Jehovah en sy Gesalfde op hulle sou lê, sou deur die heersers en die nasies teëgestaan word. Maar hulle pogings om sulke bande stukkend te ruk en sulke toue af te werp, sou vergeefs wees.—Psalm 2:1-9.
Tenttoue wat in twee geskeur het en wat dus nie meer ’n tent regop kan hou nie, word figuurlik gebruik om verwoesting te beskryf (Jeremia 10:20). Maar presies die teenoorgestelde, naamlik herstel en Jehovah se guns, word profeties met dié woorde belowe: “Aanskou Sion, die stad van ons feestelike samekoms! Jou oë sal Jerusalem sien as veilige woonplek, as tent wat nie wegtrek nie, waarvan die penne nooit meer uitgeruk word nie en geeneen van sy toue ooit losgeskeur word nie.”—Jesaja 33:20.
As jy enige vrae oor die Bybel het nadat jy hierdie tydskrif gelees het, kan jy gerus met Jehovah se Getuies by ’n Koninkryksaal in jou omgewing in aanraking kom of aan die uitgewers van hierdie tydskrif skryf. (Sien bladsy 5.)