“Hy het dit in die koerant geplaas”
Dit is wat ’n meisie van Kanada met waardering in ’n dankbrief aan die Wagtoringgenootskap gesê het. Sy het deelgeneem aan ’n redenaarskompetisie by die skool, en een van die beoordelaars op die paneel het haar toespraak so geniet dat hy toestemming gevra het om dit in die plaaslike koerant te plaas.
Hoe het die meisie haar onderwerp gekies? “Ons klas, veral die meisies, het baie geskinder”, het sy verduidelik. Sy het gevolglik haar toespraak op inligting gebaseer wat sy in die Ontwaak! gelees het. Dele van haar toespraak is in The Review, ’n plaaslike koerant van Niagara Falls, Ontario, geplaas onder die opskrif “Skinderpraatjies kan ander seermaak; Hoe sou jy voel?”
Wat het die beoordelaar op die paneel so beïndruk? Hier volg ’n paar uittreksels uit die meisie se toespraak: “In vandag se samelewing is skinderpraatjies baie algemeen. Dit kan ons baie kopsere, slapelose nagte en bowenal seergemaakte gevoelens besorg. . . .
“Dit is onmoontlik om skinderpraatjies te keer, want dit is deel van die menslike natuur om te praat. Wat ons wel kan doen, is om dit te beheers. Hier is ’n paar wenke oor hoe om dit te doen: 1. Moenie olie op die vuur gooi nie. 2. Moenie na die skinderpraatjies luister nie. . . . As jy na die skinderpraatjies luister, kan dit lyk asof jy saamstem met wat gesê word. 3. Skadelike skinderpraatjies kan ook ’n leuenaar van jou maak. 4. Die heel belangrikste raad is om te dink voor jy praat! Vra jou af: ‘Hoe sou ek gevoel het indien dit van my gesê is?’”
“Pas hierdie vier stappe toe”, het die meisie afgesluit, “en jy sal heel waarskynlik ’n beter mens word.”
Watter praktiese raad is dit tog vir almal, nie net vir jongmense op skool nie! Ontwaak! streef daarna om verslag te lewer oor tydige en aktuele inligting wat ’n groot verskeidenheid onderwerpe dek. As jy graag meer inligting wil hê oor hoe jy hierdie tydskrif gereeld kan ontvang, kan jy gerus een van Jehovah se Getuies vra wanneer hulle jou weer besoek of na die gepaste adres op bladsy 5 skryf.