Aardbewings, Bybelprofesie en jy

VOOR sy dood het Jesus gebeure en situasies voorspel wat sou aandui dat hierdie wêreld in “die voleinding van die stelsel van dinge” is. Hy het gesê dat dié tydperk deur dinge soos pessiektes, voedseltekorte en grootskaalse oorlogvoering gekenmerk sou word. Hy het ook “groot aardbewings” genoem wat “op die een plek na die ander” sou voorkom (Matteus 24:3, 7; Lukas 21:10, 11). Het Jesus na ons dag verwys?

Baie sê nee. Hulle beweer dat die aantal aardbewings nie in onlangse dekades wesenlik toegeneem het nie. Trouens, volgens die Amerikaanse Nasionale Aardbewinginligtingsentrum het die aantal aardbewings met ’n lesing van 7,0 en hoër gedurende die 20ste eeu “redelik bestendig” gebly.a

Maar let daarop dat die vervulling van Jesus se profesie nie vereis dat daar ’n toename in die aantal of krag van aardbewings moet wees nie. Jesus het net gesê dat daar groot aardbewings op die een plek na die ander sou wees. Verder het hy gesê dat hierdie gebeurtenisse die “begin van weë van benoudheid” sou aandui (Matteus 24:8). Benoudheid word nie gemeet aan die aantal aardbewings of die lesing daarvan op die Richterskaal nie, maar aan die uitwerking wat dit op mense het.

Aardbewings het inderdaad in ons tyd baie benoudheid veroorsaak. Trouens, gedurende die 20ste eeu het miljoene hulle lewens of huise in hierdie rampe verloor. Deskundiges sê dat baie van hierdie sterftes voorkom kon gewees het. “In ontwikkelende lande”, berig BBC News, “word bouverordeninge dikwels minder belangrik geag as die vraag na goedkoop behuising wat gou gebou word om in die behoeftes van vinnige verstedeliking te voorsien.” Ben Wisner, ’n deskundige op die gebied van stedelike rampe, lewer kommentaar oor twee onlangse tragedies en sê: “Dit was nie aardbewings wat hierdie mense se dood veroorsaak het nie. Dit was ’n kombinasie van menslike foute, onverskilligheid, korrupsie en hebsug.”

Ja, soms is die dodelikste faktore by ’n aardbewing mense se selfsug en nalatigheid. Dit is interessant dat hierdie eienskappe in ’n ander Bybelprofesie oor “die laaste dae” van hierdie stelsel na vore kom. Die Bybel sê dat mense gedurende dié tyd “egosentries, liefhebbers van geld” en “gevoelloos” sal wees (2 Timoteus 3:1-5, The Amplified Bible). Saam met Jesus se woorde oor die voleinding van die stelsel van dinge voorsien hierdie profesie duidelike bewys dat ons die tyd nader wanneer God vir die geteisterde mensdom verligting sal bring van alles wat nou pyn en lyding veroorsaak—met inbegrip van groot aardbewings.—Psalm 37:11.

Wil jy graag meer omtrent hierdie Bybelse hoop leer? Kom gerus in aanraking met Jehovah se Getuies in jou gebied, of skryf na die gepaste adres op bladsy 5.

[Voetnoot]