Sy het meer bereik as wat sy verwag het
“EK HET geweet dat my geskiedenisonderwyser nie van Jehovah se Getuies hou nie, maar ek het nie geweet waarom nie,” sê die 17-jarige Rebekka van Duitsland. Rebekka het dus gehuiwer toe die onderwyser gevra het wie bereid was om ’n toespraak voor die klas te hou. Sy het nietemin die moed bymekaargeskraap en sy toestemming gevra om ’n toespraak te hou oor die vervolging van Jehovah se Getuies onder die Nazi-regime gedurende die Tweede Wêreldoorlog. Die onderwyser het van haar voorstel gehou.
Die klas het Rebekka se aanbieding geniet en altesaam 44 tydskrifte en boekies oor die onderwerp geneem. Later het Rebekka haar navorsingsmateriaal vir haar onderwyser gegee, insluitende ’n aantal boeke en video’s wat uitgegee is deur mense wat nie Getuies is nie. Een video het gehandel oor die vervolging van Jehovah se Getuies in Oos-Duitsland tydens die Koue Oorlog. Die onderwyser het veral hierin belanggestel, aangesien hy nie met die onderwerp vertroud was nie.
Rebekka het toe uitgevind waarom haar onderwyser nie van Jehovah se Getuies hou nie. Hy het verduidelik dat hy saam met een van Jehovah se Getuies op skool was. Die jong man het min gesê oor sy geloof en oor sy lewe as ’n Getuie. Die onderwyser het dus tot die gevolgtrekking gekom dat Getuies eienaardige mense is en het besluit dat hy niks met hulle te doen wou hê nie. Maar Rebekka se aanbieding het sy beskouing verander. “Ek kom nou baie beter met my onderwyser oor die weg”, sê sy. “Ek het ook geleer dat ons as jongmense openliker met ander oor ons geloof behoort te praat.”
Maar dit was nie die einde van die saak nie. Die onderwyser het sy kollegas van Rebekka se uitstekende toespraak vertel. ’n Paar dae later het die etiekonderwyser Rebekka gevra om nog ’n toespraak te hou, nie net voor die klas nie, maar by ’n baie spesiale geleentheid—die skool se jaarlikse herdenking van die bevryding van die konsentrasiekamp by Auschwitz aan die einde van die Tweede Wêreldoorlog. Ongeveer 360 leerlinge en sowat tien onderwysers het dit bygewoon. Ná die toespraak het dié wat teenwoordig was 50 boekies geneem, en die skool het nog 150 eksemplare gevra om later te versprei.
Baie meer is bereik as wat Rebekka verwag het. Sy het nie net vir haar klas nie, maar ook vir die hele skool ’n goeie getuienis oor haar geloof gegee. En haar onderwyser het nie meer bedenkinge oor die Getuies gehad nie.
[Prent op bladsy 14]
Heinrich Fundis is deur die Nazi’s onthoof. Honderde ander Getuies is ook tereggestel
[Prent op bladsy 14]
Baie van Jehovah se Getuies is hulle vryheid aangebied as hulle hierdie dokument onderteken het waardeur hulle hulle geloof sou verloën
[Erkenning]
Courtesy of United States Holocaust Memorial Museum
[Prent op bladsy 15]
Kinders soos Berthold Mewes is van hulle ouers af weggeneem
[Prent op bladsy 15]
Hierdie video vertel van die moed van Jehovah se Getuies in Nazi-Duitsland
[Prent op bladsy 15]
’n Pers driehoek is aan die gevangenes se klere gewerk om hulle as Jehovah se Getuies te identifiseer