’n Ouer artikel raak harte

BY ’N skool in Suwałki, in die noordooste van Pole, het ’n onderwyseres leerlinge gevra om voor te berei vir ’n bespreking oor aborsie. Die 16-jarige Justyna het inligting uit die publikasies van Jehovah se Getuies gekry. Op die dag van die bespreking het die onderwyseres die leerlinge ’n geleentheid gegee om hulle menings uit te spreek.

“Ek het na die onderwyseres toe gegaan en vir haar die artikel ‘Die dagboek van ’n ongebore kind’ in die Ontwaak! van 8 September 1980 gewys”, sê Justyna. Sy het vir haar onderwyseres gesê: “Juffrou sal sien dat dit geskryf is uit die oogpunt van ’n kind, ’n fetus, op wie ’n aborsie gedoen gaan word. Ek dink dit is baie interessant.” Die onderwyseres het die dagboek hardop begin lees. Die leerlinge was doodstil, en almal het aandagtig geluister.

Selfs nog voordat die onderwyseres die artikel halfpad gelees het, het sy een van die leerlinge gevra om dit te lees, want sy kon nie voortgaan nie. Die onderwyseres het gaan sit en begin huil. Nadat die dagboek gelees is, het ’n interessante bespreking gevolg, en ’n paar leerlinge het vir ’n afskrif van die artikel gevra. “Die klas het hulle gesindheid verander teenoor die lektuur wat deur Jehovah se Getuies gepubliseer word”, sê Justyna. “Hulle het eers ’n negatiewe beskouing gehad, maar nou het hulle ’n gunstige beskouing. Een seun het selfs die Ontwaak! gereeld begin lees.”

Net soos Justyna ’n artikel in ’n Ontwaak! wat meer as 20 jaar oud is, suksesvol gebruik het, kan jy ook “’n sak vol wysheid” in ouer nommers van hierdie tydskrif vind (Job 28:18). Wanneer jy vergaderinge by die plaaslike Koninkryksaal van Jehovah se Getuies bywoon, kan jy deur die bundels van die Ontwaak! kyk wat in die biblioteek beskikbaar is. Jy sal dit geniet om nuttige artikels te lees wat met die verloop van tyd nie hulle waarde verloor nie. Jy kan ook die jongste eksemplaar van die Ontwaak! by Jehovah se Getuies in jou omgewing kry.

[Prent op bladsy 31]

Justyna gedurende haar skooljare