’n Nadere ondersoek van die nopal
Deur Ontwaak!-medewerker in Mexiko
Die nopalplant is ’n onaantreklike kaktus wat al eeue lank deel is van die lewe in Mexiko. Dit word in ander lande in die Amerikas aangetref—asook in droë gebiede oor die hele wêreld—maar dit is weens sy doringagtige voorkoms dalk nie baie duidelik watter nut dit het nie. Die plant kan tot vyf meter hoog groei. Dit het afgeplatte ovaalvormige stingels vol dorings en dit dra turksvye wat ’n soet smaak het.
Milpa Alta, naby Mexiko-stad, het die ideale ligging om nopalplante te kweek, en plaaslike boere voer dit lank reeds na ander wêrelddele uit. Milpa Alta hou selfs ’n jaarlikse kermis, wat mense die geleentheid gee om ’n groot verskeidenheid produkte te proe wat met nopal berei word.
In Mexiko kan iemand wat inkopies doen, nopalstingels gewoonlik op klein markte sowel as in moderne supermarkte koop. Die stingels wat daar verkoop word, is reeds skoongemaak en gereed vir gebruik.
Oor die algemeen moet dit vars en sag wees om as voedsel gebruik te word. Mexikane berei dit op baie maniere voor en bedien dit saam met ’n verskeidenheid vleisgeregte. Die algemeenste gereg is geroosterde nopalstingels wat met biefstuk bedien word, terwyl roereiers met gekapte nopal ’n heerlike ontbytkos is.
Daarbenewens kan ’n smaaklike slaai gemaak word deur gekookte nopalstingels in klein blokkies te kap, fyngekapte rou tamaties, uie en koljander by te voeg en hierdie mengsel saam met olyfolie, asyn en sout in ’n bak te meng. Hoewel nopalstingels aanvanklik smaakloos lyk—weens die glibberige tekstuur selfs onaantreklik—smaak dit heel lekker wanneer dit met geurige Mexikaanse souse gekrui word.
Ervare boere kan nopalstingels baie vinnig en behendig afsny en skoonmaak. As jy besluit om dit self te doen, moet jy versigtig wees vir al die dorings. Dit sal raadsaam wees om plastiekhandskoene te dra.
Die nopalplant het blykbaar ook geneeskragtige waarde. Mexiko se Nasionale Instituut vir Voeding het die gesondheidsvoordele daarvan beskryf en onder meer gesê dat dit ’n mens se totale cholesterol en LDL-lipoproteïne kan verlaag. Sommige het aanbeveel dat dit gebruik word om suikersiekte onder beheer te help hou. Terwyl wetenskaplikes voortgaan om die nederige nopalplant te bestudeer, sal ander gesondheidsvoordele dalk nog gevind word.
Intussen kan jy gerus ’n tradisionele Mexikaanse ete probeer wat van die nopalplant gemaak is. Jy sal dalk vind dat dit baie beter smaak as wat dit lyk.