Verkry beheer oor jou tyd

“Vir alles is daar ’n vasgestelde tyd.”—Prediker 3:1.

JY MOET weet watter dinge werklik belangrik is, voordat jy tyd daarvoor kan maak. Dit sal makliker wees as jy presies weet waaraan jy waarde heg, wat jou doelwitte is en watter spesifieke bedrywighede hierdie dinge ondersteun.

Stel dus eers vas aan watter dinge jy waarde heg. Jy kan al die dinge wat by jou opkom, probeer neerskryf, soos gesin, vriendskap, harde werk, opvoeding, prestasies, ’n goeie voorkoms, geld, geluk, die huwelik, goedhartigheid, fisiese gesondheid, geestelike gesondheid. Vra jou dan af: ‘Watter van hierdie dinge is vir my die belangrikste?’

Dink vervolgens aan al die doelwitte wat jy graag in die lewe wil bereik. Wat is die verskil tussen jou doelwitte en dit waaraan jy waarde heg? In die konteks van hierdie bespreking kan ons sê dat dit waaraan jy waarde heg, blywend is, terwyl doelwitte op die een of ander stadium bereik en as afgehandel beskou kan word.

Watter doelwitte kan jy vir jou stel? Wil jy graag meer tyd saam met jou gesin deurbring? ’n Werk vind wat jou beter pas? ’n Gunstelingstokperdjie met groter vaardigheid beoefen? ’n Nuwe stokperdjie vind? ’n Sekere eienskap aankweek? Met vakansie gaan? ’n Boek lees? ’n Boek skryf?

Besluit hierna watter van hierdie doelwitte vir jou die belangrikste is. Maak seker dat dit versoenbaar is met die dinge waaraan jy waarde heg. As jy dit byvoorbeeld jou doelwit maak om skatryk te word, sal dit waarskynlik tot botsende belange lei.

Dink nou aan ’n paar bedrywighede wat jou sal help om elkeen van jou doelwitte te bereik. As jy jou byvoorbeeld ten doel gestel het om ’n sekere hoeveelheid gewig te verloor, is oefening ’n bedrywigheid wat jou kan help om dit te doen.

Hoe kan hierdie ontleding jou help?

As jou doelwitte ooreenstem met die dinge waaraan jy waarde heg en jy aan die bedrywighede deelneem wat jou help om jou doelwitte te bereik, sal jou lewe in ’n bepaalde rigting beweeg. Jy sal vind dat jy meer tyd bestee aan wat vir jou saak maak. Dit beteken natuurlik nie dat jy ongevoelig moet wees wat die behoeftes en begeertes van ander betref nie (Filippense 2:4). Dit beteken wel dat dit vir jou makliker sal wees om geleenthede te identifiseer wat glad nie verband hou met wat werklik belangrik is nie en om dit van die hand te wys.

Daar sal natuurlik uitdagings wees. Party take is dalk betreklik onbelangrik, maar nietemin nodig. Dit kan jou hele dag in beslag neem, sodat daar min of geen tyd oorbly vir wat vir jou die belangrikste is nie. Noodgevalle kan ontstaan. En veranderinge in jou lewe kan jou rooster omverwerp. Maar deur praktiese stappe te doen om meer tyd te bestee aan die dinge wat saak maak, sal jy groter beheer hê oor hoe jy jou tyd deurbring en hoe jy jou lewe lei.

[Venster/Prent op bladsy 6]

SPAAR ELEKTRONIESE DAGBEPLANNERS TYD?

Dit spaar tyd vir party, maar mors tyd vir ander. ’n Persoonlike digitale assistent, oftewel PDA, kan byvoorbeeld ’n kalender insluit, asook ’n lys telefoonnommers en adresse, ’n lys van wat gedoen moet word, ’n woordverwerker, ’n notaboek, ’n kamera en toegang tot e-pos en die Internet. Jy kan so ’n toestel gebruik om tyd te spaar as jy dit op datum hou en dit saam met jou dra. Maar jy kan maklik tyd mors as jy dikwels doelloos op die Internet rondsnuffel, met die toestel peuter, dit volgens jou voorkeure bly aanpas, onnodige bykomstighede koop of toelaat dat jou gebruik daarvan ’n negatiewe uitwerking het op belangrike verhoudings en verantwoordelikhede.

Wenk: Doen navorsing voordat jy koop. As jy dikwels probleme met ’n elektroniese toestel ondervind, sal dit baie tyd verg om dit te laat regmaak. Ook is enige elektroniese toestel maar net so goed soos die een wat dit gebruik. As jy een het, moet jy dit dus gebruik om tyd te spaar, nie om tyd te mors nie.

[Prent op bladsy 4, 5]

Kan jy tyd maak vir dinge wat belangrik is?