Knip uit en bêre

20 maniere om meer tyd te skep

“Gaan voort om in wysheid te wandel . . . , terwyl julle die geleë tyd vir julleself uitkoop.”—Kolossense 4:5.

NOUDAT jy die bedrywighede geïdentifiseer het waarmee jy jou dae en ure wil vul, staan jy voor die uitdaging om optimistiese teorie prakties toe te pas. Die volgende wenke kan jou help om dit te doen.

1 MAAK ELKE DAG ’N LYS VAN WAT JY MOET DOEN. Nommer items in die volgorde waarin jy dit sal afhandel. Merk die items waaraan jy gerus meer tyd kan bestee. Merk elke item af wanneer dit voltooi is. Dra onafgehandelde take oor na môre se lys.

2 SINCHRONISEER JOU KALENDERS. Moenie die risiko loop om van ’n afspraak te vergeet omdat dit net op ’n ander kalender is nie. As jy ’n kalender op jou rekenaar en ’n ander een op ’n handtoestel het, probeer die twee sinchroniseer.

3 SKRYF ’N “AKSIEPLAN” NEER waarin al die stappe van ’n projek uiteengesit word, en plaas die stappe in die regte volgorde.

4 BEPLAN AS ’N REËL OM JOU BELANGRIKSTE TAKE EERSTE TE DOEN. Dit sal makliker wees om tyd vir die minder belangrike dinge te vind.

5 STEL DOELWITTE WAAROOR JY ’N GROOT MATE VAN BEHEER HET. Jy het meer beheer daaroor om jou vaardigheid in ’n sekere werk te verbeter as om president van jou maatskappy te word.

6 AANVAAR DAT JY NIE TYD VIR ALLES SAL HÊ NIE. Gee voorkeur aan bedrywighede wat die belangrikste resultate oplewer. Wat van ander take wat dringend is of wat eenvoudig gedoen moet word? As jy dit nie kan uitskakel of delegeer nie, kyk of jy minder tyd daaraan kan bestee. Party onbelangrike take kan maande lank wag indien nodig, of dit hoef dalk glad nie gedoen te word nie. Sit soveel tyd as moontlik opsy vir die bedrywighede wat verband hou met dit wat vir jou, met die oog op jou doelwitte, werklik die moeite werd is.

7 HOU BOEK VAN JOU TYD. Hou een of twee weke lank boek van jou tyd om uit te vind waaraan jy dit bestee. Gaan baie tyd verlore as gevolg van onbelangrike bedrywighede? Kom die meeste van jou onderbrekings van dieselfde een of twee persone? Ondervind jy onderbrekings hoofsaaklik gedurende ’n sekere deel van die dag of week? Skakel tydrowende bedrywighede uit wat ingesluip het.

8 BEPLAN MINDER DINGE. As jy beplan om inkopies te doen, die motor reg te maak, vriende oor te nooi, ’n rolprent te kyk en jou leeswerk in te haal—alles in een dag—sal jy gejaagd voel en waarskynlik niks geniet nie.

9 BEPERK ONDERBREKINGS. Sit ’n deel van elke dag opsy waartydens jy nie onderbreek moet word nie tensy dit absoluut noodsaaklik is. Skakel, indien moontlik, jou telefoon gedurende hierdie tyd af. Skakel ook elektroniese opspringvenstertjies af as dit gewoonlik jou werk onderbreek.

10 BEPLAN DIE MOEILIKSTE WERK VIR DIE TYD VAN DIE DAG WANNEER JY DIE MEESTE ENERGIE HET EN OP EN WAKKER IS.

11 DOEN DIE ONAANGENAAMSTE TAAK SO GOU AS MOONTLIK. As dit eers afgehandel is, sal jy meer gemotiveerd voel om die makliker take aan te pak.

12 LAAT TYD TOE VIR ONVOORSIENE GEBEURTENISSE. As jy dink dat jy binne sowat 15 minute by ’n plek kan wees, belowe om binne 25 minute daar te wees. As jy dink dat ’n afspraak ’n uur sal neem, sit ’n uur en 20 minute daarvoor opsy. Moenie iets vir elke minuut van jou dag beplan nie.

13 BENUT TYD TUSSEN TAKE. Luister na die nuus of ’n opname terwyl jy skeer. Lees terwyl jy vir ’n trein wag of met die trein ry. Jy kan natuurlik hierdie tyd gebruik om te ontspan. Maar moenie dit mors en jou dan later verknies oor die verlore tyd nie.

14 PAS DIE 80/20-REËL TOE.a Is omtrent 2 uit 10 van die items op jou lys belangriker as die res? Sal ’n sekere taak dalk so te sê afgehandel wees nadat jy aan net die belangrikste aspekte daarvan aandag geskenk het?

15 WANNEER JY VOEL DAT JY OORLAAI IS MET WERK, skryf elke taak op ’n indekskaartjie neer. Verdeel dan die kaartjies in twee groepe: “Vandag se take” en “Môre se take”. Doen môre dieselfde.

16 NEEM VAN TYD TOT TYD ’N BIETJIE VERLOF OM JOU KRAG TE HERWIN. Om terug te gaan werk toe met ’n verkwikte verstand en liggaam, sal dalk beter resultate oplewer as ure se oortyd.

17 DINK OP PAPIER. Skryf ’n probleem neer, verduidelik waarom dit jou pla en maak ’n lys van soveel oplossings as waaraan jy kan dink.

18 MOENIE ’N PERFEKSIONIS WEES NIE. Weet wanneer dit tyd is om op te hou en met die volgende belangrike bedrywigheid te begin.

19 WEES PROFESSIONEEL. Moenie wag vir die regte bui nie. Begin net werk.

20 WEES AANPASBAAR. Dit is wenke, nie vasgestelde reëls nie. Eksperimenteer, vind uit wat werk en pas die idees by jou omstandighede en behoeftes aan.

[Voetnoot]