Wysheid vir die tong
‘AS EK maar net my woorde kon terugtrek!’ Het jy dit al ooit vir jouself gesê? Ja, ons almal sukkel om ons tong te beheer. Ons kan feitlik enige dier tem, sê die Bybel, “maar die tong kan geen mens tem nie” (Jakobus 3:7, 8). Moet ons dan maar net moed opgee? Nee! Kyk na ’n paar Bybelbeginsels wat ons kan help om groter beheer oor hierdie klein maar kragtige lid van die liggaam te kry.
● “In die oorvloed van woorde ontbreek die oortreding nie, maar wie sy lippe in toom hou, tree verstandig op” (Spreuke 10:19). Hoe meer ons praat, hoe groter is die moontlikheid dat ons iets sal sê wat dwaas of selfs skadelik is. Ja, die tong wat nie in toom gehou word nie, kan soos ’n vuur wees en skadelike skinderpraatjies en laster vinnig versprei (Jakobus 3:5, 6). Maar wanneer ons ons “lippe in toom hou”, of dink voordat ons praat, neem ons in ag watter uitwerking ons woorde kan hê. Sodoende verwerf ons die reputasie dat ons verstandig is en sal ander ons respekteer en vertrou.
● “Elke mens moet gou wees om te hoor, stadig om te praat, stadig om toornig te word” (Jakobus 1:19). Ander waardeer dit wanneer ons aandagtig na hulle luister, want so toon ons nie net dat ons in hulle belangstel nie, maar ook dat ons respekvol is. Maar gestel iemand sê iets wat ons seermaak of ons uitlok? Dan moet ons probeer om “stadig [te wees] om toornig te word” deur hom nie in gelyke munt terug te betaal nie. Wie weet? Die persoon was dalk om die een of ander rede ontsteld en sal moontlik selfs om verskoning vra vir sy onbedagsame opmerking. Vind jy dit moeilik om “stadig [te wees] om toornig te word”? Bid dan tot God vir selfbeheersing. Hy sal nie sulke opregte versoeke ignoreer nie.—Lukas 11:13.
● “’n Sagte tong kan die gebeente breek” (Spreuke 25:15). In teenstelling met wat die meeste mense dink, skuil daar krag agter sagmoedigheid. ’n Sagte antwoord kan byvoorbeeld teenstand oorkom wat lyk asof dit so hard en onbuigsaam is soos been, dalk weens woede of vooroordeel. Dit kan beslis ’n uitdaging wees om sagmoedigheid te openbaar, veral wanneer gemoedere hoog loop. Dink dus aan die voordele wat dit inhou om te doen wat die Bybel sê en die moontlike gevolge as ’n mens dit nie doen nie.
Bybelbeginsels is waarlik “wysheid van bo” (Jakobus 3:17). Wanneer ons hierdie wysheid op ons spraak toepas, word ons woorde aangenaam, innemend en opbouend—soos “goue appels in silwersnywerk”, net reg vir die geleentheid.—Spreuke 25:11.