DIE jaar 2017 het begin met ’n droewige aankondiging deur die wetenskaplike gemeenskap. In Januarie het ’n groep wetenskaplikes verklaar dat die wêreld nou nader is aan die ergste ramp wat die mens nog gesien het. Wetenskaplikes gebruik die simboliese Oordeelsdaghorlosie om te wys hoe naby die mensdom aan ’n wêreldramp is. Hulle het die minuutwyser van die horlosie 30 sekondes aangeskuif, en nou staan die Oordeelsdaghorlosie op twee en ’n half minute voor middernag. Dit wil sê in die afgelope 60 jaar was ons nog nooit so na aan ’n wêreldramp gewees nie!

Wetenskaplikes wil in 2018 weer probeer vasstel hoe naby ons is aan die einde van die wêreld. Sal die Oordeelsdaghorlosie dan nog steeds vir ons aandui of ons op die punt staan van die grootste ramp in die mens se geskiedenis? Wat dink jy? Is die wêreld buite beheer? Jy vind dit dalk moeilik om hierdie vraag te beantwoord. Selfs kenners op dié gebied stem nie hieroor saam nie. Nie almal glo dat die wêreld tot ’n einde sal kom nie.

Daar is miljoene mense wat in ’n blink toekoms glo. Volgens hulle is daar bewyse dat die mensdom en ons planeet vir ewig sal bestaan en dat ons lewensgehalte sal verbeter. Kan ons hierdie bewyse vertrou? Is die wêreld buite beheer of nie?

AS JY angstig of bang is omdat jy so baie slegte nuus hoor, is jy nie alleen nie. Barack Obama het in 2014, toe hy die president van die Verenigde State was, gesê dat baie mense voel “dat die wêreld vinnig draai en niemand dit kan beheer nie” weens al die slegte dinge wat in die nuus verskyn.

Maar kort nadat hy dit gesê het, het hy met entoesiasme gepraat oor huidige strategieë om baie van die wêreld se probleme op te los. Hy het sekere regeringsinisiatiewe “goeie nuus” genoem, en het gesê dat hy “vol hoop” en “uiters positief” is. Met ander woorde, hy het gesê dat ons deur middel van opregte mensepogings die wêreld onder beheer kan bring en ’n wêreldramp kan vermy.

Baie voel net so positief soos hy. Party stel byvoorbeeld hulle vertroue in die wetenskap, en hulle voorspel dat tegnologie wat belowe om die wêreld se probleme op te los, vinnig vooruitgang sal maak. Een kenner op die gebied van digitale tegnologie en ontwikkeling het vol vertroue voorspel dat “ons tegnologie teen 2030 ’n duisend keer beter sal wees en teen 2045 ’n miljoen keer beter”. Hy sê ook: “Ons doen nogal goed. Ons probleme was nog nooit so groot nie, maar nou het ons die vermoë om hulle vinniger op te los as wat hulle opduik.”

Hoe sleg is wêreldtoestande eintlik? Staan ons regtig aan die randjie van ’n groot wêreldramp? Al verkondig sommige wetenskaplikes en politieke leiers ’n boodskap van hoop, voel baie nog steeds onseker oor die toekoms. Hoekom?

WAPENS VIR MASSAVERNIETIGING. Ondanks al die pogings van die Verenigde Nasies en ander organisasies, is kernoorlog nog steeds ’n bedreiging. En opstandige leiers steur hulle nie aan wette oor wapens nie. Lande met ’n geskiedenis van kernwapens is druk besig om hulle ou bomme op te gradeer en om nuwe bomme te maak wat dodeliker is. Lande wat voorheen geen wapens vir massavernietiging besit het nie, het nou die vermoë om ’n baie groot aantal mense uit te wis.

Die feit dat nasies nou meer as ooit tevore gereed is vir kernoorlog, maak die wêreld ’n baie gevaarlike plek, selfs wanneer daar tye van “vrede” is. “Dodelike wapenstelsels wat sonder menslike toesig of leiding besluite kan neem, sou veral kommerwekkend wees”, waarsku die Bulletin of the Atomic Scientists.

ONS GESONDHEID WORD BEDREIG. Daar is net soveel wat die wetenskap kan doen om ons met ons gesondheid te help. Dinge wat tot siekte bydra, soos hoë bloeddruk, vetsug, lugbesoedeling en dwelmmisbruik, is besig om toe te neem. Meer mense sterf nou aan nie-oordraagbare siektes, soos kanker, hartkwale en diabetes as ooit tevore. Al hoe meer mense ly aan ander siektes, insluitende verstandelike siektes. En ons het in onlangse jare gesien hoe gevaarlike siektes soos die Ebola- en die Zika-virus onverwags uitbreek. Die slotsom: Mense kry dit nie reg om siekte te beheer nie, en dit lyk asof daar geen einde in sig is nie!

DIE MENS SE AANVAL OP DIE NATUUR. Fabrieke hou aan om die aarde se atmosfeer te besoedel. Miljoene mense sterf elke jaar omdat hulle besoedelde lug inasem.

Individue, gemeenskappe en maatskappye wat dienste vir die regering lewer, is nog steeds besig om oseane te besoedel met mediese en landbou-afval, riool, plastiek en ander besoedelende stowwe. “Hierdie gifstowwe vergiftig seediere en plante sowel as die mense wat besoedelde seelewe eet”, sê die Encyclopedia of Marine Science.

Ons varswater raak ook vinnig op. Die Britse wetenskapskrywer Robin McKie gee hierdie gepaste waarskuwing: “Die wêreld word deur ’n waterkrisis in die gesig gestaar wat elke deel van die aarde sal raak.” Politieke leiers erken dat waterskaarste hoofsaaklik ’n mensgemaakte probleem is en dat dit ’n groot bedreiging inhou.

DIE NATUUR SE AANVAL OP DIE MENS. Storms, orkane, tornado’s, tifone en aardbewings veroorsaak vernietigende vloede en grondverskuiwings, asook ander vorme van verwoesting. Daar was nog nooit soveel mense wat weens hierdie natuurkragte gesterf het of wat daardeur skade gely het nie. ’n Studie wat deur die Amerikaanse Nasionale Lugvaart- en Ruimte-administrasie gepubliseer is, toon dat daar ’n groot moontlikheid is vir “hewiger storms, dodelike hittegolwe en erger tye van droogtes en vloede”. Sal die natuur die mens uitwis?

Heel moontlik kan jy aan ander dinge dink wat ernstige gevare vir ons oorlewing inhou. Nogtans sal jy nie bevredigende antwoorde oor die toekoms vind deur al die slegte dinge wat vandag gebeur te ondersoek nie. Daar is ook mense wat sê dat die opinies van politieke leiers en wetenskaplikes ook nie bevredigend is nie. Maar soos in die vorige artikel genoem is, het baie mense oortuigende antwoorde gevind op vrae oor wêreldtoestande en die toekoms. Waar kan ons hierdie antwoorde vind?

Kyk byvoorbeeld na die volgende profesieë in die Bybel:

• “Nasie sal teen nasie opstaan en koninkryk teen koninkryk, en daar sal voedseltekorte en aardbewings op die een plek na die ander wees.”—Matteus 24:7.

• “Maar weet dít, dat daar in die laaste dae kritieke tye sal wees wat moeilik is om deur te kom. Want mense sal liefhebbers van hulleself wees, liefhebbers van geld, aanmatigend, hoogmoedig, lasteraars, ongehoorsaam aan ouers, ondankbaar, dislojaal, sonder natuurlike geneentheid, nie bereid tot enige ooreenkoms nie, kwaadsprekers, sonder selfbeheersing, wreedaardig, sonder liefde vir die goeie, verraaiers, eiesinnig, opgeblase van trots, liefhebbers van genot eerder as liefhebbers van God.”—2 Timoteus 3:1-4.

Hierdie profesieë beskryf ’n wêreld wat party sou sê besig is om hand uit te ruk. In ’n sekere sin is ons wêreld buite beheer—buite die beheer van mense. Volgens die Bybel het mense eenvoudig nie die wysheid en vermoë om ’n permanente oplossing te vind nie. Dit word in die volgende verse beklemtoon:

• “Daar is ’n weg wat vir ’n mens reg lyk, maar die einde daarvan is later die weë van die dood.”—Spreuke 14:12.

• ‘Die mens het oor die mens geheers tot sy nadeel.’—Prediker 8:9.

• “Dit behoort nie aan die mens wat loop om sy voetstappe te rig nie.”—Jeremia 10:23.

As mense aanhou doen net wat hulle wil, sal die mensdom heel moontlik voor ’n wêreldramp te staan kom. Maar dit gaan nie gebeur nie! Hoekom nie? Want die Bybel sê:

• God “het die aarde op sy vaste plekke gegrondves; tot onbepaalde tyd of tot in ewigheid sal niks dit laat wankel nie”.—Psalm 104:5.

• “’n Geslag gaan, en ’n geslag kom; maar die aarde bly tot onbepaalde tyd staan.”—Prediker 1:4.

• “Die regverdiges sal die aarde besit, en hulle sal vir ewig daarop woon.”—Psalm 37:29.

• “Daar sal volop graan op die aarde wees; op die top van die berge sal daar ’n oorvloed wees.”—Psalm 72:16.

Hierdie Bybelverse gee ons duidelike antwoorde. Die mens sal nie uitsterf weens besoedeling, ’n tekort aan kos en water of ’n siekte wat oor die hele wêreld versprei nie. Die wêreld sal nie deur kernwapens vernietig word nie. Hoekom nie? God is in beheer van die planeet se toekoms. God het mense wel toegelaat om hulle eie besluite te neem, maar hulle sal die gevolge van hulle besluite dra (Galasiërs 6:7). Die wêreld is nie soos ’n wegholtrein wat heeltemal buite beheer is en op ’n ramp afstuur nie. God het perke gestel op hoeveel skade die mens oor homself kan bring.—Psalm 83:18; Hebreërs 4:13.

Maar God sal selfs meer doen. Hy sal sorg dat daar ’n “oorvloed van vrede” is (Psalm 37:11). Die positiewe uitkyk wat in hierdie artikel uitgebeeld word, is net ’n voorsmakie van die wonderlike toekoms waaroor miljoene van Jehovah se Getuies deur ’n studie van die Bybel geleer het.

Jehovah se Getuies is ’n wêreldwye gemeenskap van mans en vrouens wat uit verskillende ouderdomsgroepe en etniese agtergronde kom. Hulle aanbid die enigste ware God. Die Bybel leer dat sy naam Jehovah is. Hulle is nie bang vir wat die toekoms inhou nie, want die Bybel sê: “Só het Jehovah gesê, die Skepper van die hemele, Hy, die ware God, die Formeerder van die aarde en die Maker daarvan, Hy, wat dit stewig gevestig het, wat dit nie verniet geskep het nie, wat dit gevorm het om bewoon te word: ‘Ek is Jehovah, en daar is geen ander nie.’”—Jesaja 45:18.