Hoofstuk 29

Hoe weet ek of dit ware liefde is?

Beantwoord die volgende vrae:

1. Hoe sal jy “liefde” definieer? ․․․․․

2. Hoe sal jy “verliefdheid” definieer? ․․․․․

3. Wat dink jy is die verskil tussen die twee? ․․․․․

DIT was seker nie vir jou moeilik om die vrae hierbo te beantwoord nie. Dit is immers maklik om die verskil tussen liefde en verliefdheid te sien wanneer jy net aan ’n denkbeeldige situasie dink.

Maar die oomblik dat jy die ou of meisie van jou drome sien, kan dit heeltemal verander. Skielik het jy jou hart verloor, en niks anders maak saak nie. Jy is tot oor jou ore verlief. Maar is dit werklik liefde—of is dit maar net verliefdheid? Hoe sal jy weet? Om dit te beantwoord, kan ons eers kyk hoe jou beskouing van die teenoorgestelde geslag waarskynlik in onlangse jare verander het. Kyk byvoorbeeld na die volgende vrae:

● Hoe het jy oor die teenoorgestelde geslag gevoel toe jy vyf jaar oud was?

● Wat dink jy nou van die teenoorgestelde geslag?

Jou antwoorde toon waarskynlik dat jy ’n heel nuwe beskouing van die teenoorgestelde geslag gekry het toe jy puberteit bereik het. “Ek het opgelet dat meisies ’n bietjie mooier is as wat hulle altyd was”, sê die 12-jarige Brian. Elaine, 16, vertel van ’n verandering wat ’n paar jaar vroeër plaasgevind het. “Al my vriendinne het oor seuns begin praat”, sê sy, “en ek kon maklik op enige seun verlief raak.”

Noudat jy die teenoorgestelde geslag begin raaksien, ervaar jy kragtige gevoelens. Hoe kan jy dit hanteer? Pleks van te maak asof dit nie bestaan nie—’n besliste manier om dit te versterk—kan jy hierdie tyd as ’n wonderlike geleentheid beskou om iets te leer omtrent aantrekking, verliefdheid en liefde. As jy hierdie drie aspekte van romantiese gevoelens verstaan, kan dit jou onnodige hartseer spaar en jou help om mettertyd ware liefde te vind.

AANTREKKING → Wat jy sien

“Ek en my vriende praat heeltyd oor meisies. Ons probeer om oor ander dinge te praat, maar sodra ’n mooi meisie verbyloop, vergeet ons waaroor ons gepraat het!”—Alex.

“’n Jong man wat oogkontak maak, ’n mooi glimlag het en op ’n vasberade manier stap, sal my aandag trek.”—Laurie.

Dit is normaal om aangetrokke te voel tot iemand wat mooi of aantreklik is. Maar die probleem is: nie alles wat blink, is goud nie. Hoe so? Want mense se uiterlike kan misleidend wees. Die Bybel sê: “Soos ’n goue neusring in die snoet van ’n vark, so is ’n vrou wat mooi is maar wat haar van verstandigheid afkeer” (Spreuke 11:22). Dieselfde beginsel geld natuurlik vir seuns.

VERLIEFDHEID → Wat jy voel

“Ek was smoorverlief op ’n seun toe ek 12 was, en toe dit oorgewaai het, het ek besef waarom ek van hom gehou het. Dit was net omdat al my vriendinne in seuns belanggestel het—en hy was ’n seun. Dis al wat dit was!”—Elaine.

“Ek was al baie keer verlief, maar ek het meestal net op die meisie se uiterlike gefokus. Wanneer ek uitgevind het watter soort persoon sy werklik is, het ek besef dat ons nie so goed by mekaar pas as wat ek gedink het nie.”—Mark.

Verliefdheid voel soos liefde. Om die waarheid te sê, liefde sluit wel romantiese gevoelens in. Maar verliefdheid en liefde is op heeltemal verskillende dinge gebaseer. Verliefdheid is ’n impulsiewe reaksie wat gebaseer is op ’n oppervlakkige kennis van die persoon. Dit is ook blind vir die ander persoon se swak punte en oordryf sy of haar sterk punte. Daarom is verliefdheid omtrent so blywend soos ’n sandkasteel. “Dit hou nie lank nie”, sê ’n meisie met die naam Fiona. “Die een dag kan jy aangetrokke voel tot een persoon, en ’n maand later voel jy weer so—maar tot ’n ander persoon!”

LIEFDE → Wat jy weet

“Ek dink wanneer dit liefde is, het jy ’n rede om tot die persoon aangetrokke te voel—’n goeie rede, nie ’n selfsugtige rede nie.”—David.

“Vir my voel dit of ware liefde oor ’n tydperk moet groei. In die begin is julle goeie vriende. Dan, stadig maar seker, begin jy hou van die dinge wat jy omtrent die ander persoon leer ken, en jy begin gevoelens ontwikkel wat jy nooit tevore gehad het nie.”—Judith.

Liefde is gebaseer op ’n deeglike kennis van ’n persoon se sterk punte en swak punte. Dit is dus nie verbasend dat die Bybel liefde as veel meer as net ’n gevoel beskryf nie. Dit sê dat liefde, onder andere, “lankmoedig en goedhartig [is]. . . . Dit verdra alles, glo alles, hoop alles, verduur alles. Die liefde faal nooit nie” (1 Korintiërs 13:4, 7, 8). En liefde laat ’n persoon so optree omdat dit op kennis gebaseer is—nie op goedgelowigheid of onkunde nie.

’n Voorbeeld van ware liefde

Die Bybelverslag van Jakob en Ragel is ’n pragtige voorbeeld van wat ware liefde is. Hierdie paartjie het by ’n put ontmoet, waar Ragel haar pa se skape laat water drink het. Jakob het onmiddellik tot haar aangetrokke gevoel. Waarom? Om maar een ding te noem, sy was “mooi gebou [en] beeldskoon”.—Genesis 29:17, Nuwe Afrikaanse Bybelvertaling.

Maar onthou dat ware liefde nie net op iemand se fisiese voorkoms gebaseer is nie. Jakob het gevind dat Ragel nie net ’n mooi meisie is nie. Om die waarheid te sê, die Bybel toon dat Jakob kort voor lank meer as net aangetrokke tot haar was. Hy het “Ragel liefgehad”.—Genesis 29:18, Ou Afrikaanse Bybelvertaling.

’n Romantiese einde? Nee—want dit was nog glad nie die einde van die verhaal nie. Ragel se pa het Jakob sewe jaar laat wag voordat hy met haar kon trou. Of dit nou regverdig was of nie, Jakob se liefde is getoets. As dit maar net verliefdheid was, sou Jakob nie vir Ragel gewag het nie. Slegs ware liefde kan die toets van die tyd deurstaan. Wat het gebeur? Die Bybel sê: “Jakob het sewe jaar vir Ragel gedien, maar weens sy liefde vir haar was dit soos ’n paar dae in sy oë.”—Genesis 29:20.

Wat kan jy uit die voorbeeld van Jakob en Ragel leer? Dat ware liefde die toets van die tyd kan deurstaan. Dit is ook nie uitsluitlik op fisiese voorkoms gebaseer nie. Die feit is dat ’n potensiële huweliksmaat dalk nie iemand sal wees wat jy met die eerste oogopslag verskriklik aantreklik vind nie. Barbara erken byvoorbeeld dat sy, toe sy ’n jong man met die naam Stephen ontmoet het, eers nie baie aangetrokke tot hom gevoel het nie. “Maar toe ek hom beter leer ken het”, vertel sy, “het dinge verander. Ek het gesien hoe besorg Stephen oor ander mense is en hoe hy altyd ander se belange voor sy eie stel. Ek het geweet dat iemand met hierdie eienskappe ’n goeie man sal wees. Dit het my tot hom aangetrek, en ek het vir hom lief geword.” Dit het op ’n goeie huwelik uitgeloop.

Sê nou jy is volwasse genoeg om met iemand uit te gaan met die voorneme om te trou—hoe sal jy weet wanneer jy ware liefde gevind het? Jou hart sê dalk een ding, maar luister eerder na jou Bybelopgeleide verstand. Moenie net op die persoon se uiterlike konsentreer nie, maar leer ook sy innerlike eienskappe ken. Gee die verhouding tyd om te groei. Onthou, verliefdheid waai dikwels gou oor. Ware liefde word met die tyd sterker en word “’n volmaakte band van eenheid”.—Kolossense 3:14.

Jy kan seker wees dat jy hierdie soort liefde kan vind—as jy leer om verder te kyk as aantrekking (wat jy sien) en verliefdheid (wat jy voel). Die volgende drie bladsye sal jou help om dit te doen.

LEES MEER OOR HIERDIE ONDERWERP IN DEEL 2, HOOFSTUKKE 1 EN 3

SLEUTELTEKSTE

“Baie waters kan die liefde nie blus nie, en ook kan riviere dit nie wegspoel nie.”—Hooglied 8:7.

WENK

Om uit te vind of jy iemand tot wie jy aangetrokke voel, werklik goed ken, kan jy die vrae beantwoord op die werkblad in Deel 2, op bladsy 39 (vir meisies) en bladsy 40 (vir seuns).

HET JY GEWEET . . . ?

Jongmense wat romantiese verhoudings sommer net begin en beëindig, “oefen” as ’t ware vir egskeiding.

AKSIEPLAN!

Om my te help om vas te stel of die gevoelens wat ek vir iemand het, verliefdheid of liefde is, sal ek ․․․․․

Wat ek graag vir my ouer(s) hieroor wil vra ․․․․․

WAT DINK JY?

● Waarom het God so ’n sterk aantrekkingskrag tussen persone van die teenoorgestelde geslag geskep?

● Waarom misluk soveel “liefdesverhoudings” tussen tieners?

[Lokteks op bladsy 207]

Liefde kan struikelblokke oorkom, terwyl verliefdheid gewoonlik oorwaai sodra omstandighede verander of probleme opduik. Tyd is nodig vir ware liefde om te ontwikkel.’’—Daniella

[Venster op bladsy 209]

Werkblad

wat sou jy doen?

Michael en Judy gaan al drie maande uit, en Judy sê dat sy “smoorverlief” is. Michael is behep met haar—hy sê selfs vir haar hoe om aan te trek en met wie sy mag en nie mag assosieer nie. Hy het haar soos ’n prinses behandel—tot verlede week. Michael het Judy geklap nadat hy haar “gevang” het terwyl sy met ’n ander seun gesels het.

Hy sê: “Judy behoort te weet dat ek doodbang is om haar te verloor. Net die idee dat ’n ander ou my meisie kan afvat, maak my mal! Ek voel sleg dat ek Judy geklap het. Maar dit wys dat ek dit nie kan verdra as sy selfs net vir iemand anders kyk nie. En ek hét tog om verskoning gevra!”

Sy sê: “My ouers sê dat Mike dominerend is, maar hy het net hoë standaarde. Ek bedoel, hy het my nog nooit probeer dwing om enigiets seksueels te doen nie. En toe hy my geklap het—iets waarvan ek my ouers nie vertel het nie—was ek besig om met ’n ander ou te gesels. En Mike raak jaloers, wat soms vir my vleiend is. In elk geval, hy het gesê dat hy jammer is, en hy het belowe om dit nooit weer te doen nie.”

Jou beurt: Sien jy gevaartekens in hierdie verhouding? Indien wel, watter gevaartekens? ․․․․․

Wat moet Judy doen? ․․․․․

Wat sou jy doen? ․․․․․

[Venster op bladsy 210]

Werkblad

wat sou jy doen?

Ethan gaan twee maande met Alyssa uit, en hy het al gesien hoe skoorsoekerig sy kan wees, veral met haar ouers. Om die waarheid te sê, Alyssa stry heeltyd met haar ouers, en sy kry gewoonlik haar sin. Sy het die “kuns” bemeester om viervoet vas te steek totdat haar ouers moedeloos toegee. Alyssa het by Ethan gespog dat sy haar ouers “om haar pinkie kan draai”.

Hy sê: “Alyssa sê presies wat sy dink. Sy gee vir niemand in nie—selfs nie vir haar ouers nie. Haar pa kan irriterend wees, en dis geen wonder dat sy haar humeur met hom verloor nie. Maar sy skel nie net nie. Alyssa kan huil, haar lip laat hang of die vriendelikheid self wees—wat ook al nodig is om haar sin by haar pa en ma te kry.”

Sy sê: “Ek gee nie om wie of wat jy is of watter posisie jy het nie, ek sê wat ek wil en draai nie doekies om nie. My kêrel, Ethan, ken my so. Hy het gesien hoe ek met my ouers praat.”

Jou beurt: Sien jy gevaartekens in hierdie verhouding? Indien wel, watter gevaartekens? ․․․․․

Wat moet Ethan doen? ․․․․․

Wat sou jy doen? ․․․․․

[Venster op bladsy 211]

Werkblad

is dit liefde of net verliefdheid?

Probeer raai watter woord in die sinne hieronder ontbreek. Skryf dan die woord liefde of die woord verliefdheid in die oop spasies in.

1. “․․․․․․․․․․․․․․․․․․․․․․․․․․․․․․ is blind en wil graag so bly. Dit hou nie van die werklikheid nie.”—Calvin.

2. “As ek my persoonlikheid moet verander wanneer ek by ’n meisie is tot wie ek aangetrokke voel, is dit ․․․․․․․․․․․․․․․․․․․․․․․․․․․․․․.”—Thomas.

3. “Iets omtrent die persoon irriteer jou dalk. Maar as dit ․․․․․․․․․․․․․․․․․․․․․․․․․․․․․․ is, wil jy nog steeds by die persoon wees en die probleem probeer oplos.”—Ryan.

4. “As dit ․․․․․․․․․․․․․․․․․․․․․․․․․․․․․․ is, dink jy net aan die dinge wat julle in gemeen het.”—Claudia.

5. “As dit ․․․․․․․․․․․․․․․․․․․․․․․․․․․․․․ is, probeer jy nie voorgee dat jy iemand anders is nie.”—Eve.

6. “․․․․․․․․․․․․․․․․․․․․․․․․․․․․․․ is dikwels ’n selfsugtige emosie—dalk wil jy net kan sê dat jy ’n kêrel het.”—Allison.

7. “․․․․․․․․․․․․․․․․․․․․․․․․․․․․․․ sien die foute en snaaksighede van die ander persoon raak, maar kan nog steeds daarmee saamlewe.”—April.

8. “As dit ․․․․․․․․․․․․․․․․․․․․․․․․․․․․․․ is, kan jy nie sê waarom jy tot iemand aangetrokke voel nie—jy voel net so.”—David.

9. “As dit ․․․․․․․․․․․․․․․․․․․․․․․․․․․․․․ is, kan die ander persoon niks verkeerds doen nie.”—Chelsea.

10. “As dit ․․․․․․․․․․․․․․․․․․․․․․․․․․․․․․ is, het jy nie dieselfde belangstelling in persone van die teenoorgestelde geslag as voorheen nie, want jy voel dat jy lojaal wil wees.”—Daniel.

Antwoorde: Verliefdheid: 1, 2, 4, 6, 8, 9. Liefde: 3, 5, 7, 10.

[Prent op bladsye 206, 207]

Verliefdheid is omtrent so blywend soos ’n sandkasteel wat gou wegspoel