Hoofstuk 30

Is ons werklik gereed vir die huwelik?

Jy het die persoon gevind met wie jy wil trou, en julle gaan nou al lank genoeg uit om te weet dat julle mekaar liefhet. Huweliksgeluk is voor die deur. Of is dit? Noudat jy op die drumpel staan van een van die grootste besluite in die lewe, begin jy wonder . . . 

Is ons werklik gereed vir die huwelik?

KNAENDE twyfelgedagtes oor die huwelik is normaal—selfs wanneer jy vir iemand lief is. Aangesien daar soveel ongelukkige huwelike is en al hoe meer mense skei, is dit verstaanbaar dat jy versigtig wil wees wanneer jy hierdie stap, wat jou lewe drasties kan verander, oorweeg. Hoe weet jy of jy daarvoor gereed is? Jy moet nou, meer as ooit tevore, ontslae raak van enige dagdrome wat jy dalk oor die huwelik het, en dit met die werklikheid vervang. Byvoorbeeld:

DAGDROOM 1 “Ons kan van liefde en koue water lewe.”

Die werklikheid: Liefde sal nie die rekeninge betaal of finansiële probleme oplos nie. Om die waarheid te sê, navorsers het gevind dat geld ’n vername oorsaak van huweliksonenigheid en uiteindelik van egskeiding is. ’n Ongebalanseerde beskouing van geld kan geestelik en emosioneel skadelik wees, en dit kan jou verhouding met jou huweliksmaat laat verswak (1 Timoteus 6:9, 10). Die les? Moenie wag tot ná die troue om geldsake te bespreek nie!

Die Bybel sê: “Wie van julle wat ’n toring wil bou, gaan nie eers sit en die koste bereken [nie]?”—Lukas 14:28.

Wenk: Praat nou—voordat julle trou—met jou aanstaande huweliksmaat oor hoe julle julle finansies gaan reël (Spreuke 13:10). Dink oor vrae soos die volgende: Hoe sal ons ons begroting opstel? Sal ons een bankrekening of aparte rekeninge hê? Watter maat sal geldsake beter kan behartig, soos om finansiële rekords te hou en te sorg dat die rekeninge betaal word?a Hoeveel geld kan een van ons op iets bestee sonder om die ander een te raadpleeg? Dit is nou die tyd om as ’n span te begin saamwerk!—Prediker 4:9, 10.

DAGDROOM 2 “Ons gaan volmaak by mekaar pas, want ons stem oor alles saam—ons stry nooit nie!”

Die werklikheid: As julle nooit meningsverskille het nie, is dit waarskynlik omdat julle seker gemaak het dat julle sake vermy wat konflik kan veroorsaak. Maar die getroude lewe sal julle nie hierdie luukse bied nie! Die feit is dat daar nie twee onvolmaakte mense is wat volmaak by mekaar pas nie, en daarom is meningsverskille onvermydelik (Romeine 3:23; Jakobus 3:2). Julle moenie net dink aan hoe goed julle oor die weg kom nie, maar ook aan wat gebeur wanneer julle nie saamstem nie. ’n Sterk huwelik bestaan uit twee mense wat openlik kan erken dat hulle verskil en wat dan werk daarvan maak om die saak op ’n volwasse en vreedsame manier op te los.

Die Bybel sê: “Moenie kwaad bed toe gaan nie.”—Efesiërs 4:26, Contemporary English Version.

Wenk: Dink goed na oor hoe jy tot dusver konflikte met jou ouers en jou broers en susters hanteer het. Maak ’n tabel soos die een op bladsy 93 van hierdie boek of op bladsy 221 van Deel 2. Dink aan spesifieke gebeurtenisse wat tot ’n meningsverskil gelei het, wat jou reaksie was en watter reaksie dalk beter sou gewees het. As jou impulsiewe reaksie op ’n konflik byvoorbeeld was om in jou kamer in te storm en woedend die deur toe te klap, kan jy ’n beter reaksie neerskryf—een wat eerder sal help om die probleem op te los as om dit te vererger. As jy nou leer om beter op konflik te reageer, sal jy ’n vaardigheid aanleer wat noodsaaklik is vir ’n gelukkige huwelik.

DAGDROOM 3 “As ek eers getroud is, sal al my seksuele begeertes bevredig word.”

Die werklikheid: As jy getroud is, waarborg dit nie dat jy seks kan hê wanneer jy ook al wil nie. Onthou, jou huweliksmaat is ’n mens met gevoelens wat jy in ag moet neem. Om die waarheid te sê, daar sal tye wees wanneer jou maat eenvoudig nie lus is om intiem te verkeer nie. Die huwelik gee jou nie die reg om daarop aan te dring dat jou behoeftes bevredig word nie (1 Korintiërs 10:24). Die feit is dat selfbeheersing noodsaaklik is, hetsy jy ongetroud of getroud is.—Galasiërs 5:22, 23.

Die Bybel sê: “Elkeen van julle moet weet hoe om in heiliging en eer sy eie vat in besit te kry, nie in hebsugtige geslagsdrif [nie].”—1 Tessalonisense 4:4, 5.

Wenk: Dink goed na oor jou seksuele begeertes en neigings en oor die uitwerking wat dit op jou komende huwelik kan hê. Byvoorbeeld, is jy verslaaf aan die masturbasiegewoonte, ’n gewoonte wat net op jou eie begeertes gerig is? Was jy in die gewoonte om na pornografie te kyk? Het jy ’n dwalende oog en kyk jy in die geheim met wellus na lede van die teenoorgestelde geslag? Vra jou af: ‘As ek sukkel om my seksuele begeertes te beheers voordat ek trou, hoe sal ek dit kan doen wanneer ek getroud is?’ (Matteus 5:27, 28). Nog iets: Hou jy daarvan om te flirt en in die bondel te vry, met die gevolg dat jy ’n reputasie as ’n losbol of ’n flerrie gekry het onder persone van die teenoorgestelde geslag? Indien wel, hoe beplan jy om hierdie neiging te oorkom wanneer jy getroud is en jou aandag net op een persoon toegespits moet wees—jou huweliksmaat?—Spreuke 5:15-17.

DAGDROOM 4 “Die huwelik sal my gelukkig maak.”

Die werklikheid: ’n Ongelukkige ongetroude persoon word gewoonlik ’n ongelukkige getroude persoon. Waarom? Omdat geluk eerder deur ’n mens se lewensuitkyk bepaal word as deur jou omstandighede (Spreuke 15:15). Diegene wat geneig is om ’n negatiewe beskouing van hulle lot in die lewe te hê, konsentreer gewoonlik op wat in ’n verhouding ontbreek en nie op wat dit hulle bied nie. Dit is baie beter om ’n positiewe gesindheid aan te kweek en te behou terwyl jy nog ongetroud is. Wanneer jy dan eendag getroud is, sal jy die beste in jou en jou huweliksmaat na vore bring.

Die Bybel sê: “Wat die mens het, is beter as wat hy begeer.”—Prediker 6:9, Nuwe Afrikaanse Bybelvertaling.

Wenk: Soms is ’n negatiewe gesindheid die gevolg van onrealistiese verwagtinge. Skryf op ’n stuk papier twee of drie dinge neer wat jy verwag om uit die huwelik te kry. Lees dit en vra jou dan af: ‘Is my verwagtinge eerder op fantasie as op die werklikheid gebaseer? Is dit beïnvloed deur die media—dalk deur romantiese rolprente of boeke? Hou my verwagtinge hoofsaaklik verband met wat ek uit die huwelik sal kry—dat dit ’n oplossing vir my chroniese eensaamheid sal bied, my begeerte na seks sal bevredig, my meer aansien onder my portuurs sal gee?’ As dit die geval is, sal jy moet ophou dink in terme van “my” en begin dink in terme van “ons”. Om jou hiermee te help, kan jy twee of drie verwagtinge in verband met die huwelik neerskryf wat jou en jou toekomstige huweliksmaat insluit.

Die bogenoemde dagdrome kan jou geluk in die huwelik belemmer. Probeer dus hard om van sulke denke ontslae te raak en vervang dit met ’n realistiese beskouing. Die werkblad op bladsye 216 en 217 kan jou en jou toekomstige huweliksmaat help terwyl julle uitsien na een van die grootste seëninge in die lewe—’n gelukkige huwelik!—Deuteronomium 24:5; Spreuke 5:18.

[Voetnoot]

SLEUTELTEKSTE

“’n Man [sal] sy vader en sy moeder verlaat, en hy sal sy vrou aankleef en hulle sal een vlees word.”—Genesis 2:24.

WENK

Praat met ’n ervare egpaar, en vra hulle watter raad hulle ’n pasgetroude paartjie sou gee oor hoe om ’n suksesvolle huwelik te hê.—Spreuke 27:17.

HET JY GEWEET . . . ?

In ’n suksesvolle huwelik beskou die man en vrou mekaar as vriende, kommunikeer hulle goed, weet hulle hoe om meningsverskille op te los en beskou hulle hulle verhouding as ’n lewenslange verbintenis.

AKSIEPLAN!

Die eienskap waaraan ek nou gaan werk sodat ek ’n beter verhouding met my toekomstige huweliksmaat kan hê, is ․․․․․

Wat ek graag vir my ouer(s) hieroor wil vra ․․․․․

WAT DINK JY?

● In party lande loop ’n groot persentasie huwelike op ’n egskeiding uit. Waarom dink jy is dit die geval?

● Watter gevare hou dit in as ’n mens trou bloot om van ’n ongelukkige ouerhuis af weg te kom?

● Waarom is dit belangrik om Bybelbeginsels in jou huwelik toe te pas as jy eendag trou?

[Lokteks op bladsy 220]

Die huwelik is ’n groot stap. Dit is nie net belangrik om te weet waarin jy jou begewe nie, maar ook saam met wie jy dit doen.’’—Audra

[Venster/Prent op bladsye 216, 217]

Werkblad

is jy gereed om te trou?

Kyk na die vrae op die volgende twee bladsye. Jy kan hierdie bladsye selfs gebruik om hierdie saak met jou toekomstige maat te bespreek. Maak seker dat julle die teksverwysings naslaan.

finansiële sake

□ Wat is jou gesindheid teenoor geld?—Hebreërs 13:5, 6.

□ In watter opsigte toon jy reeds dat jy verantwoordelik met geld kan werk?—Matteus 6:19-21.

□ Het jy op die oomblik skuld? Indien wel, wat doen jy om dit af te betaal?—Spreuke 22:7.

□ Hoeveel sal julle troue kos? As julle skuld moet maak om daarvoor te betaal, hoeveel dink julle sal redelik wees?—Lukas 14:28.

□ Sal jy sowel as jou huweliksmaat moet werk nadat julle getrou het? Indien wel, hoe sal julle julle verskillende roosters en vervoerbehoeftes hanteer?—Spreuke 15:22.

□ Waar sal julle woon? Wat sal julle waarskynlik vir huur, kos, klere en ander dinge moet betaal, en hoe sal julle hierdie uitgawes dek?—Spreuke 24:27.

gesinsake

□ Hoe goed kom jy met jou ouers, broers en susters oor die weg?—Eksodus 20:12; Romeine 12:18.

□ Hoe los jy nou konflikte by die huis op?—Kolossense 3:13.

□ As jy ’n jong vrou is, op watter maniere toon jy dat jy ’n “stille en sagmoedige gees” het?—1 Petrus 3:4.

□ Beplan julle om kinders te hê? (Psalm 127:3). Indien nie, watter voorbehoedmiddel sal julle gebruik?

□ As jy ’n jong man is, hoe beplan jy om die leiding te neem om in jou gesin se geestelike behoeftes te voorsien?—Matteus 5:3.

eienskappe

□ In watter opsigte toon jy dat jy vlytig is?—Spreuke 6:9-11; 31:17, 19, 21, 22, 27.

□ Hoe toon jy dat jy ’n selfopofferende gees het?—Filippense 2:4.

□ As jy ’n jong man is, in watter opsigte toon jy dat jy gesag op ’n Christelike manier kan uitoefen?—Efesiërs 5:25, 28, 29.

□ As jy ’n jong vrou is, hoe het jy al bewys dat jy jou aan gesag kan onderwerp?—Efesiërs 5:22-24.

[Prent op bladsy 219]

Moenie in die huwelik inplons sonder dat jy iets weet omtrent die “waters” waarin jy jou begewe nie