Jy het die waarheid geleer deur middel van jou studie van die Bybel saam met Jehovah se Getuies. Wat jy geleer het, het jou sekerlik gehelp om ’n goeie verhouding met God te hê. Dit het jou ook die hoop gegee om in die toekoms op ’n paradysaarde onder God se Koninkryk te lewe. Jou geloof in God se Woord is versterk, en jy het reeds baie seëninge ontvang omdat jy met die Christengemeente assosieer. Jy het gesien hoe Jehovah teenoor sy volk in ons tyd optree. – Sag. 8:23.

As deel van jou voorbereiding om gedoop te word, sal die gemeentelike ouermanne basiese Christelike oortuigings saam met jou hersien (Heb. 6:1-3). Mag Jehovah aanhou om al jou pogings te seën om hom te leer ken, en mag hy jou die beloofde beloning gee. – Joh. 17:3.

1. Hoekom wil jy gedoop word?

2. Wie is Jehovah?

• “Jehovah die ware God is in die hemel daar bo en op die aarde hier onder. Daar is geen ander nie.” – Deut. 4:39.

• “U, wie se naam Jehovah is, u alleen [is] die Allerhoogste oor die hele aarde.” – Ps. 83:18.

3. Hoekom is dit belangrik dat jy God se persoonlike naam gebruik?

• “Julle moet dan só bid: ‘Ons Vader in die hemel, laat u naam geheilig word.’” – Matt. 6:9.

• “Elkeen wat die naam van Jehovah aanroep, sal gered word.” – Rom. 10:13.

4. Watter woorde gebruik die Bybel om Jehovah te beskryf?

• “Jehovah, die Skepper van die eindes van die aarde, is God tot in alle ewigheid.” – Jes. 40:28.

• “Ons Vader in die hemel.” – Matt. 6:9.

• “God is liefde.” – 1 Joh. 4:8.

5. Wat kan jy vir Jehovah God gee?

• “Jy moet Jehovah jou God liefhê met jou hele hart en met jou hele siel en met jou hele verstand en met al jou krag.” – Mark. 12:30.

• “Jy moet Jehovah jou God aanbid en hom alleen dien.” – Luk. 4:8.

6. Hoekom wil jy lojaal wees aan Jehovah?

• “Wees wys, my seun, en maak my hart bly, sodat ek hom wat my uittart, ’n antwoord kan gee.” – Spr. 27:11.

7. Tot wie bid jy, en in wie se naam bid jy?

• “Ek [Jesus] verseker julle: As julle die Vader enigiets vra, sal hy dit vir julle in my naam gee.” – Joh. 16:23.

8. Wat is party van die dinge waarvoor jy kan bid?

• “Julle moet dan só bid: ‘Ons Vader in die hemel, laat u naam geheilig word. Laat u Koninkryk kom. Laat u wil plaasvind op die aarde, net soos in die hemel. Gee ons vandag ons brood vir hierdie dag, en vergewe ons ons sondes, soos ons ook die mense vergewe het wat teen ons gesondig het. En moet ons nie in versoeking bring nie, maar verlos ons van die Duiwel.’” – Matt. 6:9-13.

• “Ons het die vertroue dat hy ons hoor, ongeag wat ons volgens sy wil vra.” – 1 Joh. 5:14.

9. Hoekom sou Jehovah nie na ’n persoon se gebede luister nie?

• “Hulle [sal] tot Jehovah om hulp roep, maar hy sal hulle nie antwoord nie . . . as gevolg van hulle goddelose dade.” – Miga 3:4.

• “Die oë van Jehovah is op die regverdiges, en sy ore luister na hulle smeekgebede, maar Jehovah is teen dié wat slegte dinge doen.” – 1 Pet. 3:12.

10. Wie is Jesus Christus?

• “Simon Petrus het geantwoord: ‘U is die Christus, die Seun van die lewende God.’” – Matt. 16:16.

11. Hoekom het Jesus aarde toe gekom?

• “Die Seun van die mens [het] gekom, nie om gedien te word nie, maar om te dien en om sy lewe te gee as ’n losprys in ruil vir baie.” – Matt. 20:28.

• “Ek [Jesus] moet die goeie nuus van die Koninkryk van God ook aan ander stede bekend maak, want dit is waarvoor ek gestuur is.” – Luk. 4:43.

12. Hoe kan jy wys dat jy Jesus se offerande waardeer?

• “Hy het vir almal gesterf sodat dié wat lewe, nie langer vir hulleself moet lewe nie, maar vir hom wat vir hulle gesterf het en opgewek is.” – 2 Kor. 5:15.

13. Watter gesag het Jesus?

• “Alle gesag in die hemel en op die aarde is aan my gegee.” – Matt. 28:18.

• “God [het] hom ook ’n hoër posisie gegee en hom uit sy goedheid die naam gegee wat bo elke ander naam is.” – Fil. 2:9.

14. Glo jy dat die Bestuursliggaam van Jehovah se Getuies “die getroue en verstandige slaaf” is wat deur Jesus aangestel is?

• “Wie is werklik die getroue en verstandige slaaf wat deur sy meester oor sy huisknegte aangestel is om hulle hulle voedsel op die regte tyd te gee?” – Matt. 24:45.

15. Is die heilige gees ’n persoon?

• “Die engel het geantwoord en vir haar gesê: ‘Heilige gees en krag van die Allerhoogste sal oor jou kom. Daarom sal die een wat gebore word, heilig wees en God se Seun genoem word.’” – Luk. 1:35.

• “As julle wat goddeloos is, dan weet hoe om goeie dinge vir julle kinders te gee, hoeveel te meer sal die Vader in die hemel heilige gees gee vir dié wat hom vra!” – Luk. 11:13.

16. Hoe het Jehovah sy heilige gees gebruik?

• “Deur die woord van Jehovah is die hemel gemaak, en alles daarin deur die gees van sy mond.” – Ps. 33:6.

• “Julle sal krag ontvang wanneer die heilige gees op julle kom, en julle sal getuies van my wees . . . tot in die mees afgeleë deel van die aarde.” – Hand. 1:8.

• “Geen profesie in die Skrif is gebaseer op enige persoonlike idees nie. Want profesieë het nooit deur die wil van ’n mens ontstaan nie, maar mense het God se woorde bekend gemaak terwyl hulle deur heilige gees gelei is.” – 2 Pet. 1:20, 21.

17. Wat is God se Koninkryk?

• “Die God van die hemel [sal] ’n koninkryk oprig wat nooit vernietig sal word nie. En hierdie koninkryk sal nie aan ’n ander volk oorgedra word nie. Dit sal al daardie koninkryke vernietig en ’n einde aan hulle maak, en dit alleen sal vir ewig bestaan.” – Dan. 2:44.

18. Hoe sal God se Koninkryk jou help?

• “God sal elke traan van hulle oë afvee, en die dood sal nie meer daar wees nie. Daar sal geen getreur, geen gehuil en geen pyn meer wees nie. Die vorige dinge is verby.” – Op. 21:4.

19. Hoe weet jy dat Koninkrykseëninge binnekort sal gebeur?

• “Die dissipels [het] alleen na hom toe gekom en gevra: ‘Sê vir ons: Wanneer sal hierdie dinge gebeur, en wat sal die teken wees van u teenwoordigheid en dat die einde van die wêreldstelsel naby is?’ Jesus het hulle geantwoord en gesê: ‘. . . Nasie sal teen nasie opstaan en koninkryk teen koninkryk, en daar sal voedseltekorte en aardbewings op die een plek ná die ander wees. Hierdie goeie nuus van die Koninkryk sal oor die hele bewoonde aarde verkondig word as ’n getuienis vir al die nasies, en dan sal die einde kom.’” – Matt. 24:3, 4, 7, 14.

• “In die laaste dae [sal daar] swaar tye . . . wees wat moeilik is om deur te kom. Want mense sal selfsugtig wees, geldgierig, trots en hoogmoedig. Hulle sal beledigende dinge sê. Hulle sal ongehoorsaam wees aan hulle ouers. Hulle sal ondankbaar en dislojaal wees. Hulle sal geen natuurlike liefde hê nie en nie bereid wees om tot enigiets in te stem nie. Hulle sal slegte dinge van mense sê en geen selfbeheersing hê nie. Hulle sal wreed wees en sonder liefde vir wat goed is. Hulle sal verraaiers wees, hardkoppig, opgeblase van trots en lief vir plesier eerder as vir God. Dit sal lyk asof hulle God dien, maar hulle sal nie lewe soos mense wat God dien nie.” – 2 Tim. 3:1-5.

20. Hoe wys jy dat die Koninkryk vir jou belangrik is?

• “Hou dan aan om eers die Koninkryk en sy regverdigheid te soek.” – Matt. 6:33.

• “Toe het Jesus vir sy dissipels gesê: ‘As iemand my volgeling wil word, moet hy ophou om vir homself te lewe en sy folterpaal optel en aanhou om my te volg.’” – Matt. 16:24.

21. Wie is Satan en die demone?

• “Julle is van julle vader die Duiwel . . . Hy was ’n moordenaar van die begin af.” – Joh. 8:44.

• “Toe is die groot draak neergegooi, die oorspronklike slang, die een wat Duiwel en Satan genoem word, wat die hele aarde mislei. Hy is na die aarde neergegooi, en sy engele is saam met hom neergegooi.” – Op. 12:9.

22. Waarvan het Satan Jehovah en almal wat Hom aanbid, beskuldig?

• “Die vrou [het] vir die slang gesê: ‘Ons mag van die vrugte van die bome van die tuin eet. Maar van die vrugte van die boom wat in die middel van die tuin is, het God gesê: “Julle mag nie daarvan eet nie, nee, julle mag nie daaraan raak nie, anders sal julle sterf.”’ Hierop het die slang vir die vrou gesê: ‘Julle sal beslis nie sterf nie. Want God weet dat die dag as julle daarvan eet, julle oë geopen sal word en julle soos God sal wees omdat julle kennis sal hê van wat goed en wat sleg is.’” – Gen. 3:2-5.

• “Satan het Jehovah geantwoord en gesê: ‘Vel vir vel. ’n Mens sal alles gee wat hy het in ruil vir sy lewe.’” – Job 2:4.

23. Hoe kan jy wys dat Satan se beskuldigings vals is?

• “Jy moet [God] met jou hele hart . . . dien.” – 1 Kron. 28:9.

• “Totdat ek sterf, sal ek nie my integriteit prysgee nie!” – Job 27:5.

24. Hoekom sterf mense?

• “Sonde het dus deur een mens in die wêreld ingekom en die dood deur die sonde, en die dood het so na alle mense versprei omdat hulle almal gesondig het.” – Rom. 5:12.

25. Wat gebeur ná die dood?

• “Die lewendes weet dat hulle sal sterf, maar die dooies weet absoluut niks nie.” – Pred. 9:5.

26. Watter hoop is daar vir mense wat gesterf het?

• “Daar [sal] ’n opstanding van die regverdiges en die onregverdiges . . . wees.” – Hand. 24:15.

27. Hoeveel mense gaan hemel toe om saam met Jesus te regeer?

• “Toe het ek die Lam op die berg Sion sien staan, en saam met hom 144 000 met sy naam en die naam van sy Vader op hulle voorkoppe geskryf.” – Op. 14:1.

In jou studie van die Bybel het jy geleer wat Jehovah van jou verwag en hoe om volgens sy regverdige standaarde te lewe. In reaksie op wat jy geleer het, het jy moontlik ’n hele paar veranderinge in jou gedrag en jou beskouing van die lewe gemaak. Noudat jy jou voorgeneem het om volgens Jehovah se regverdige standaarde te lewe, is jy in ’n posisie om as ’n bedienaar van die goeie nuus aanvaarbare diens te doen.

’n Hersiening van die volgende vrae sal jou ’n duidelike oorsig van Jehovah se regverdige vereistes gee. Dit sal jou ook herinner aan van die dinge wat jy kan doen om een van sy goedgekeurde knegte te word. Hierdie inligting sal jou help om te besef hoe belangrik dit is om alles met ’n goeie gewete en tot eer van Jehovah te doen. – 2 Kor. 1:12; 1 Tim. 1:19; 1 Pet. 3:16, 21.

Noudat jy hierdie punt in jou studie bereik het, wil jy seker graag onderdanig aan Jehovah se heerskappy wees en deel van sy organisasie word. Die vrae en Bybelaanhalings sal jou help om te sien of jy verstaan wat dit beteken om onderdanig aan Jehovah se reëling te wees as dit kom by die gemeente, in die gesin of die politiek van hierdie wêreldstelsel. Jy sal selfs meer waardering hê vir Jehovah se reëling om sy volk geestelik te leer en op te bou. Dit sluit gemeentelike vergaderinge in wat jy moet bywoon en aan deelneem as jou omstandighede dit toelaat.

Hierdie deel sal ook wys hoe belangrik dit is om gereeld aan die Koninkrykspredikingswerk deel te neem. Hierdie werk help ander om Jehovah te leer ken en leer mense wat hy vir die mensdom doen (Matt. 24:14; 28:19, 20). Dit sal jou uiteindelik laat besef hoe ernstig jou toewyding aan Jehovah God en jou doop is. Jy kan seker wees dat dit wat jy doen in reaksie op Jehovah se onverdiende goedhartigheid deur hom waardeer word.

1. Wat is die Christelike standaard vir die huwelik? Wat is die enigste skriftuurlike rede vir egskeiding?

• “Het julle nie gelees dat die Een wat mense geskep het, hulle van die begin af man en vrou gemaak het nie? Hy het gesê: ‘Daarom sal ’n man sy pa en sy ma verlaat en sy vrou aankleef, en die twee sal een vlees wees.’ Hulle is dus nie meer twee nie, maar een vlees. Wat God dan onder een juk saamgevoeg het, mag geen mens skei nie. . . . Elkeen wat van sy vrou skei, behalwe op grond van seksuele onsedelikheid, en met iemand anders trou, [pleeg] egbreuk.” – Matt. 19:4-6, 9.

2. Hoekom moet ’n man en vrou wat saamwoon, wettig getroud wees? As jy getroud is, is jy seker dat jou huwelik wettig is en deur die regering erken word?

• “Hou aan om hulle daaraan te herinner om onderdanig en gehoorsaam te wees aan regerings en owerhede.” – Tit. 3:1.

• “Die huwelik moet vir almal eerbaar wees en die huweliksbed moet rein bly, want God sal seksueel onsedelike mense en egbrekers oordeel.” – Heb. 13:4.

3. Wat is jou rol in die gesin?

• “Luister, my seun, na die dissipline van jou pa, en moenie die onderrigting van jou ma verwerp nie.” – Spr. 1:8.

• “’n Man is die hoof van sy vrou, net soos die Christus ook die hoof van die gemeente is . . . Mans, hou aan om julle vrouens lief te hê, net soos die Christus ook die gemeente liefgehad het.” – Ef. 5:23, 25.

• “Pa’s, moenie julle kinders irriteer nie, maar hou aan om hulle in die dissipline en riglyne van Jehovah op te voed.” – Ef. 6:4.

• “Kinders, wees in alles gehoorsaam aan julle ouers, want dit maak die Here se hart bly.” – Kol. 3:20.

• “Vrouens, [julle moet] onderdanig wees aan julle mans.” – 1 Pet. 3:1.

4. Hoekom moet ons respek vir lewe hê?

• “[God gee] self aan alle mense lewe en asem en alles . . . Deur hom het ons lewe en beweeg en bestaan ons.” – Hand. 17:25, 28.

5. Hoekom moet ons niemand doodmaak nie, insluitende ’n ongebore baba?

• “As mans met mekaar baklei en hulle ’n swanger vrou seermaak en . . . as daar ’n besering is wat tot die dood lei, moet jy lewe vir lewe gee.” – Eks. 21:22, 23.

• “U oë het my selfs as ’n embrio gesien. In u boek is al die dele daarvan neergeskryf, asook die dae toe hulle gevorm is, voordat enige van hulle bestaan het.” – Ps. 139:16.

• “Jehovah haat . . . hande wat onskuldige mense doodmaak.” – Spr. 6:16, 17.

6. Wat is God se opdrag oor bloed?

• “Weerhou julle . . . van bloed [en] van wat verwurg is.” – Hand. 15:29.

7. Hoekom moet ons lief wees vir ons Christenbroers en -susters?

• “Ek gee julle ’n nuwe gebod: Julle moet mekaar liefhê. Net soos ek julle liefgehad het, moet julle ook mekaar liefhê. So sal almal weet dat julle my dissipels is – as julle liefde vir mekaar het.” – Joh. 13:34, 35.

8. Om te keer dat ’n aansteeklike of lewensgevaarlike siekte aan ander oorgedra word: (a) Hoekom moet ’n besmette persoon nie liefdesblyke wys, soos om iemand ’n drukkie te gee of te soen nie? (b) Hoekom moet hy nie ontsteld wees wanneer party mense verkies om hom nie na hulle huis te nooi nie? (c) Hoekom moet iemand wat moontlik in kontak gekom het met ’n aansteeklike siekte, self besluit om ’n bloedtoets te laat doen voordat hy met iemand begin uitgaan? (d) Hoekom moet iemand wat ’n aansteeklike siekte het, die koördineerder van die liggaam van ouermanne daarvan vertel voordat hy gedoop word?

• “Moet niemand enigiets skuld nie, behalwe om mekaar lief te hê . . . ‘Jy moet jou naaste liefhê soos jouself.’ Iemand wat liefhet, doen niks slegs aan sy naaste nie.” – Rom. 13:8-10.

• “Terwyl julle nie net aan julle eie belange dink nie, maar ook aan die belange van ander.” – Fil. 2:4.

9. Hoekom verwag Jehovah dat ons mekaar moet vergewe?

• “Hou aan om mekaar te verdra en mekaar vryelik te vergewe, selfs al het iemand ’n rede om oor iemand anders te kla. Net soos Jehovah julle vryelik vergewe het, so moet julle ook vergewe.” – Kol. 3:13.

10. Wat moet jy doen as ’n broer teen jou laster of bedrog teen jou pleeg?

• “As jou broer ’n sonde pleeg, gaan praat alleen met hom en sê vir hom wat hy verkeerd gedoen het. As hy na jou luister, het jy jou broer gewen. Maar as hy nie luister nie, neem nog een of twee saam met jou, sodat elke saak deur twee of drie getuies bevestig kan word. As hy nie na hulle luister nie, praat met die gemeente. As hy nie eens na die gemeente luister nie, laat hom vir jou net soos ’n man van die nasies en soos ’n belastinggaarder wees.” – Matt. 18:15-17.

11. Hoe beskou Jehovah die volgende sondes?

▪ Seksuele onsedelikheid

▪ Gebruik van beelde in aanbidding

▪ Homoseksualiteit

▪ Steel

▪ Dobbelary

▪ Dronkenskap

• “Moenie mislei word nie. Mense wat seksueel onsedelik is, afgode aanbid, egbreuk pleeg, sowel as mans wat toelaat dat hulle vir homoseksuele dade gebruik word, mans wat homoseksualiteit beoefen, diewe, mense wat gierig is, dronkaards, mense wat ander uitskel en afpersers sal God se Koninkryk nie erf nie.” – 1 Kor. 6:9, 10.

12. Wat is jy vasbeslote om te doen as dit kom by seksuele onsedelikheid, wat ’n verskeidenheid seksuele dade buite die huwelik insluit?

• “Vlug vir seksuele onsedelikheid!” – 1 Kor. 6:18.

13. Hoekom moet ons die niemediese gebruik van stowwe vermy wat die brein kan affekteer of wat verslawend is?

• “[Bied] julle liggame aan . . . as ’n offerande wat lewend, heilig en vir God aanvaarbaar is. So doen julle heilige diens met julle denkvermoë. En moenie langer toelaat dat hierdie wêreld julle vorm nie, maar verander julle denkwyse sodat julle aan julleself kan bewys wat die goeie en aanvaarbare en volmaakte wil van God is.” – Rom. 12:1, 2.

14. Wat is van die demoniese gebruike wat God verbied?

• “Die volgende mag nooit onder julle gevind word nie: . . . enigiemand wat van waarsêery gebruik maak, enigiemand wat toorkuns beoefen, enigiemand wat na tekens soek, ’n towenaar, enigiemand wat ’n towerspreuk oor ander uitspreek, enigiemand wat hulp gaan soek by ’n persoon wat geeste oproep of by ’n fortuinverteller of enigiemand wat die dooies raadpleeg.” – Deut. 18:10, 11.

15. Wat moet ’n persoon dadelik doen as hy ernstig gesondig het en weer Jehovah se goedkeuring wil hê?

• “Ek [het] my sonde aan u bely. Ek het my oortreding nie weggesteek nie. Ek het gesê: ‘Ek sal my oortreding aan Jehovah bely.’” – Ps. 32:5.

• “Is iemand onder julle siek? Laat hom die ouermanne van die gemeente na hom toe roep, en laat hulle oor hom bid en in die naam van Jehovah olie aan hom smeer. Die gebed van geloof sal die een wat siek is, gesond maak, en Jehovah sal hom laat opstaan. En as hy sondes gepleeg het, sal hy vergewe word.” – Jak. 5:14, 15.

16. Wat moet jy doen as jy weet dat ’n mede-Christen ernstig gesondig het?

• “As iemand sondig omdat hy ’n openbare oproep gehoor het om getuienis af te lê en hy ’n getuie is of iets gesien het of van iets uitgevind het en hy dit nie rapporteer nie, sal hy die gevolge dra van sy oortreding.” – Lev. 5:1.

17. Hoe moet ons iemand behandel as ’n aankondiging gemaak is dat hy nie meer een van Jehovah se Getuies is nie?

• Hou op om te “assosieer met enigeen wat ’n broer genoem word maar wat seksueel onsedelik of gierig is of wat afgode aanbid of ander uitskel of wat ’n dronkaard of ’n afperser is. Moenie eers saam met so iemand eet nie.” – 1 Kor. 5:11.

• “As iemand na julle toe kom en nie hierdie leringe bring nie, moet julle hom nie in julle huise ontvang of hom groet nie.” – 2 Joh. 10.

18. Hoekom moet jy vriende wees met mense wat lief is vir Jehovah?

• “Die een wat met wyse persone assosieer, sal wys word, maar dit sal sleg gaan met die een wat met dwase te doen het.” – Spr. 13:20.

• “Moenie mislei word nie. Slegte assosiasie bederf goeie gewoontes.” – 1 Kor. 15:33.

19. Hoekom is Jehovah se Getuies polities neutraal?

• “Hulle is geen deel van die wêreld nie, net soos ek [Jesus] geen deel van die wêreld is nie.” – Joh. 17:16.

20. Hoekom moet jy gehoorsaam wees aan die regering?

• “Laat elkeen onderdanig wees aan die hoër owerhede, want daar is geen gesag wat nie van God af kom nie. Die bestaande owerhede is deur God in hulle relatiewe posisies geplaas.” – Rom. 13:1.

21. Wat moet jy doen as ’n menslike wet in stryd is met God se wet?

• “Ons moet eerder aan God as heerser gehoorsaam wees as aan mense.” – Hand. 5:29.

22. Watter tekste kan jou help om ’n werk te kies sodat jy nie deel van die wêreld sal wees nie?

• “Nasie sal nie teen nasie die swaard opneem nie, en hulle sal ook nie meer leer om oorlog te voer nie.” – Miga 4:3.

• “Gaan uit haar [Babilon die Grote] uit, my volk, as julle nie met haar in haar sondes wil deel nie en as julle nie deel van haar plae wil ontvang nie.” – Op. 18:4.

23. Watter soort ontspanning en vermaak sal jy kies, en wat sal jy verwerp?

• “Jehovah . . . haat elkeen wat geweld liefhet.” – Ps. 11:5.

• “Haat wat goddeloos is, hou vas aan wat goed is.” – Rom. 12:9.

• “Hou aan om te dink aan alles wat waar is, alles wat werklik belangrik is, alles wat regverdig is, alles wat rein is, alles wat lieflik is, alles waarvan goed gepraat word, alles wat goed is en alles wat prysenswaardig is.” – Fil. 4:8.

24. Hoekom aanbid Jehovah se Getuies nie saam met ander godsdiensgroepe nie?

• “Julle kan nie aan ‘die tafel van Jehovah’ en aan die tafel van demone eet nie.” – 1 Kor. 10:21.

• “‘Gaan . . . onder hulle uit en sonder julle af,’ sê Jehovah, ‘en hou op om te raak aan wat onrein is’; ‘en ek sal julle inneem.’” – 2 Kor. 6:17.

25. Watter beginsels sal jou help om te besluit of jy aan ’n viering moet deelneem?

• “Hulle het met die nasies gemeng en hulle weë aangeleer. Hulle het hulle afgode bly dien, en dit het vir hulle ’n strik geword.” – Ps. 106:35, 36.

• “Die dooies weet absoluut niks nie.” – Pred. 9:5.

• “Hulle is geen deel van die wêreld nie, net soos ek geen deel van die wêreld is nie.” – Joh. 17:16.

• “In die verlede het julle lank genoeg die wil van die nasies gedoen toe julle julle oorgegee het aan skaamtelose gedrag, onbeheerste begeertes, dronkenskap, wilde partytjies, drinkpartytjies en walglike afgodediens.” – 1 Pet. 4:3.

26. Hoe help voorbeelde in die Bybel jou om te besluit of jy verjaarsdae moet vier?

• “Op die derde dag was dit Farao se verjaarsdag, en hy het ’n feesmaal vir al sy knegte voorberei, en hy het die hoofskinker sowel as die hoofbakker in die teenwoordigheid van sy knegte uitgebring. Hy het die hoofskinker in sy amp herstel . . . Maar hy het die hoofbakker gehang.” – Gen. 40:20-22.

• “Toe Herodes se verjaarsdag gevier is, het die dogter van Herodias by die geleentheid gedans, en Herodes het dit so geniet dat hy met ’n eed belowe het om vir haar enigiets te gee waarvoor sy vra. Toe het sy, nadat haar ma haar opgesteek het, gesê: ‘Gee vir my die kop van Johannes die Doper op ’n skinkbord.’ Hy het toe iemand gestuur en Johannes se kop in die tronk laat afkap.” – Matt. 14:6-8, 10.

27. Hoekom wil jy na die ouermanne se riglyne luister?

• “Wees gehoorsaam aan dié wat die leiding onder julle neem en wees onderdanig, want hulle waak oor julle en sal daarvoor aanspreeklik gehou word. As julle dit doen, sal hulle hulle werk met vreugde kan doen sonder om te sug, want anders sal dit vir julle skadelik wees.” – Heb. 13:17.

28. Hoekom is dit vir jou en jou gesin belangrik om gereeld tyd te maak om die Bybel te lees en te studeer?

• “Hy vind vreugde in die wet van Jehovah, en dag en nag lees hy Sy wet en dink hy daaroor na. Hy sal soos ’n boom wees wat by waterstrome geplant is, ’n boom wat vrugte op die regte tyd gee, waarvan die blare nie verlep nie. Alles wat hy doen, sal suksesvol wees.” – Ps. 1:2, 3.

29. Hoekom hou jy daarvan om vergaderinge by te woon en daaraan deel te neem?

• “Ek sal u naam aan my broers bekend maak. Ek sal u in die gemeente loof.” – Ps. 22:22.

• “Laat ons aandag skenk aan mekaar sodat ons mekaar tot liefde en goeie werke kan aanspoor. Ons moenie ons vergaderingbywoning verwaarloos, soos party die gewoonte het nie, maar ons moet mekaar aanmoedig, en ons moet dit al hoe meer doen terwyl ons die dag sien nader kom.” – Heb. 10:24, 25.

30. Wat is die belangrikste werk wat Jesus ons gegee het om te doen?

• “Gaan dus en maak dissipels van mense van al die nasies, en doop hulle . . . en leer hulle om alles te gehoorsaam wat ek julle beveel het.” – Matt. 28:19, 20.

31. Watter gesindheid maak Jehovah bly wanneer ons donasies gee vir die Koninkrykswerk of ons broers en susters help?

• “Eer Jehovah met jou waardevolle dinge.” – Spr. 3:9.

• “Laat elkeen gee net soos hy in sy hart besluit het, nie teësinnig of omdat hy gedwing word nie, want God is lief vir iemand wat met vreugde gee.” – 2 Kor. 9:7.

32. Watter uitdagings verwag Christene?

• “Gelukkig is dié wat ter wille van regverdigheid vervolg is, want die Koninkryk van die hemel behoort aan hulle. Gelukkig is julle wanneer mense julle beledig en julle vervolg en julle valslik beskuldig van allerhande slegte dinge omdat julle my volgelinge is. Wees bly en vreugdevol omdat julle beloning groot is in die hemel, want so het hulle die profete voor julle vervolg.” – Matt. 5:10-12.

33. Hoekom is dit ’n spesiale voorreg om as een van Jehovah se Getuies gedoop te word?

• “U woord het vir my die vreugde en die blydskap van my hart geword, want u naam is oor my uitgeroep, o Jehovah, God.” – Jer. 15:16.

Mense word gewoonlik by byeenkomste van Jehovah se Getuies gedoop. Aan die einde van die dooptoespraak vra die spreker die doopkandidate om te staan en die volgende twee vrae met ’n harde stem te antwoord:

1. Het jy berou oor jou sondes, jou aan Jehovah toegewy en Jesus Christus as Sy middel tot redding aanvaar?

2. Verstaan jy dat jou doop jou as een van Jehovah se Getuies identifiseer en dat dit jou deel maak van Jehovah se organisasie?

Wanneer die doopkandidate “ja” antwoord op hierdie vrae, ‘maak hulle in die openbaar bekend’ dat hulle geloof in die losprys het en dat hulle hulle sonder enige voorwaardes aan Jehovah toegewy het (Rom. 10:9, 10). Doopkandidate sal vooraf biddend oor hierdie vrae wil nadink sodat hulle in ooreenstemming met hulle persoonlike oortuiging kan antwoord.

Het jy jouself aan Jehovah in gebed toegewy en belowe om hom alleen te aanbid en dat dit die belangrikste ding in jou lewe sal wees om sy wil te doen?

Is jy nou heeltemal daarvan oortuig dat jy by die eerste moontlike geleentheid gedoop moet word?

Wat is gepaste klere om in gedoop te word? (1 Tim. 2:9, 10; Joh. 15:19; Fil. 1:10).

Ons moet “beskeidenheid en gesonde verstand” hê wanneer ons ons klere kies, want dit wys dat ons “aan God toegewyd is”. Daarom sal mense wat gedoop word, nie swemklere dra wat te veel wys of klere dra met sêgoed of woorde daarop nie. Hulle moet op ’n manier aantrek wat netjies, skoon en in goeie smaak is. Dit moet ook pas by die geleentheid.

Hoe moet ’n persoon hom gedra wanneer hy gedoop word? (Luk. 3:21, 22).

Jesus se doop het die voorbeeld vir Christelike doop in ons dag gestel. Hy het besef dat doop ’n ernstige stap is, en dit kon in sy gesindheid en dade gesien word. Wanneer ’n mens gedoop word, sal dit nie gepas wees om grappe te maak, te swem of enigiets anders te doen wat die aandag aftrek van hoe ernstig die geleentheid is nie. En ’n nuwe Christen sal hom ook nie gedra asof hy ’n groot prys gewen het nie. Hoewel doop ’n gelukkige geleentheid is, moet hierdie geluk op ’n waardige manier gewys word.

Hoe sal dit jou help om jou toewyding aan Jehovah uit te leef as jy gereeld vergaderinge bywoon en met die gemeente assosieer?

Hoekom sal dit selfs ná jou doop vir jou belangrik wees om ’n goeie rooster vir persoonlike studie te volg en gereeld velddiens te doen?