127ste Gileadgraduering
Sendelinge word uitgestuur “tot in die mees afgeleë deel van die aarde”
JESUS het sy dissipels die opdrag gegee om getuies te wees “tot in die mees afgeleë deel van die aarde” (Handelinge 1:8). Jehovah se Getuies neem hierdie opdrag ernstig op.
Trouens, oor die afgelope 65 jaar het sendelinge wat by die Wagtoring-Bybelskool Gilead opgelei is, gehelp om in meer as 200 lande die voortou met hierdie predikingswerk te neem. Op Saterdag 12 September 2009 het nog 56 bekwame bedienaars ná vyf maande van opleiding by die sendingskool in Patterson, New York, VSA, gegradueer.
Die krag van die verbeelding
Stephen Lett, ’n lid van die Bestuursliggaam van Jehovah se Getuies en die voorsitter van die gradueringsprogram, het die klas toegespreek oor die onderwerp “Gebruik jou verbeelding wyslik”. Hy het die gegradueerdes eers gewaarsku teen vier maniere waarop hulle nie hulle verbeelding moet gebruik nie. Die eerste drie was: (1) Moet julle nie verbeel dat materiële dinge blywende beskerming kan bied nie; (2) vermy dit om oor onsedelike dade te fantaseer en (3) moet julle nie oormatig kwel en julle voorstel hoe sleg môre moontlik sal wees nie (Spreuke 18:11; Matteus 5:28; 6:34). Aangaande die derde punt het die spreker gesê dat iemand wat hom oormatig kwel, gister se sorge op vandag s’n laai en dan môre se sorge gaan haal en dit ook by vandag s’n voeg. “Dis ’n swaar vrag om te dra”, het broer Lett gesê. Wat was die vierde punt? Die klas is gewaarsku om nie te dink dat hulle lewe beter was voordat hulle hulle sendingtoewysing aanvaar het nie. Dít sal hulle die vreugdes laat misloop wat hulle nuwe tuiste hulle kan bied.
Broer Lett het die klas toe aangespoor om hulle verbeelding op vier positiewe maniere te gebruik. Hy het gesê: (1) Probeer om vooruit te sien watter situasies geestelik of fisies gevaarlik kan wees, en vermy die rampspoed; (2) visualiseer die tonele wat julle in die Bybel lees en stel julle voor dat julle deel van die gebeurtenis is; (3) stel julle voor dat elke persoon met wie julle in julle nuwe toewysing praat, ’n potensiële aanbidder van Jehovah is en (4) kweek empatie aan deur julle in die plek te stel van diegene vir wie julle preek.—Spreuke 22:3.
Die waarde daarvan om ander op te lei
David Splane, ’n lid van die Bestuursliggaam, het die tema “Vertrou dit aan getroue mense toe” ontwikkel, wat op 2 Timoteus 2:2 gebaseer is. Toe die apostel Paulus vir Timoteus die opdrag gegee het om getroue mense op te lei, wou Paulus hê dat Timoteus nie net bevestigde waarhede aan daardie manne moes leer nie, maar dat hy hulle ook moes aanmoedig om ander op te lei. Die spreker het vir die klas gesê dat daar ’n groot behoefte is aan manne wat die leiding in Christelike bedrywighede kan neem. Wanneer en hoe sal hulle opgelei word? Broer Splane het die klas aangespoor om met die opleiding van hierdie manne te begin sodra die sendelinge die Bybel met hulle begin studeer.
Presies hoe kan sendelinge Bybelstudente oplei om ’n getroue voorbeeld vir ander te wees? Die spreker het verskeie maniere uiteengesit. Sendelinge moet hulle leer om goed vir hulle Bybelstudie voor te berei. Wanneer die studente dan gemeentelike vergaderinge begin bywoon, moet hulle leer hoe om die Bybelpublikasies wat by die vergaderinge bespreek word, op hulle eie voor te berei. “As iemand die Bybel nie op sy eie kan bestudeer nie”, het die spreker geredeneer, “sal hy nooit ander kan leer nie.” Broer Splane het ook gesê dat sendelinge nuwelinge kan help om stiptelik te wees, die predikingswerk finansieel te ondersteun en gehoorsaam te wees aan dié wat tans die leiding neem. Hy het gesê dat die beste manier om hierdie lesse aan ander te leer, is deur ’n goeie voorbeeld te stel.
Die voorreg om Getuies te wees
Guy Pierce, ook ’n lid van die Bestuursliggaam, het gepraat oor ’n tema wat gebaseer is op Jesus se woorde, soos opgeteken in Handelinge 1:8: “Julle sal getuies van my wees.” Hy het die klas daaraan herinner dat die nasie Israel in die eerste eeu HJ die voorreg verloor het om getuies vir Jehovah te wees. Daardie voorreg is gegee aan ’n nasie wat Koninkryksvrugte voortbring (Matteus 21:43). Die gemeente van gesalfde Christene is daardie nasie. Die spreker het die apostel Petrus aangehaal, wat gesê het dat die “heilige nasie” van gesalfde Christene die voortreflikhede van Jehovah “alom bekend sou maak” (1 Petrus 2:6-9). Jesus het dus nie gesê dat Christene net getuies van hom sou wees en nie meer van Jehovah nie. Jesus word immers “die Getroue Getuie” genoem (Openbaring 1:5; 3:14). Hy is die vernaamste Getuie van Jehovah en die voorbeeld wat ons navolg.—1 Petrus 2:21.
Die spreker het vir die klas gesê dat Jesus se woorde in Handelinge 1:8 vandag groter betekenis aangeneem het. Waarom? ’n Belangrike profesie, wat in Openbaring 11:15 opgeteken is, is vervul! God se Messiaanse Koninkryk is opgerig. Nou word die getuieniswerk letterlik “tot in die mees afgeleë deel van die aarde” gedoen (Handelinge 1:8). Broer Pierce het beklemtoon dat sendelinge getuig van Jehovah en sy Koninkryk, nie van hulleself of van hulle vorige lewenstyl, kultuur of land nie. Hy het die klas aangemoedig om “soveel mense moontlik in die tyd wat oor is”, te leer.
Ander glanspunte van die program
Alex Reinmueller, ’n helper van die Uitgewerskomitee, het oor die tema “Jehovah sal julle moed gee” gepraat. As die sendelinge op Jehovah se krag steun, het hy gesê, sal Hy hulle help om te besef wat hulle sterk punte is, hulle swakhede te aanvaar, hulle vrese te bowe te kom en hulle beste aan God te gee.
Twee van die instrukteurs in die Teokratiese Skole-afdeling, Sam Roberson en William Samuelson, het ook die studente toegespreek. Broer Roberson het gepraat oor die onderwerp “Ek is met jou”, gebaseer op Jesaja 41:10. Hy het gesê dat die sendelinge baie vreugdes sal ervaar. Hulle sal ook probleme ondervind. Hulle kan dit die hoof bied as hulle koning Dawid navolg, wat sy liefdevolle Vader in gebed aangeroep het.—Psalm 34:4, 6, 17, 19.
Broer Samuelson se toespraak het beklemtoon hoe belangrik dit is om aan te hou om ons denkvermoë te ontwikkel. Sendelinge wat dit doen, sal daarin slaag om nie negatief te reageer op onvriendelike aanmerkings en om nie maklik aanstoot te neem nie.—Spreuke 2:10, 11.
Jim Mantz, ’n helper van die Skryfkomitee, het ’n onderhoud gevoer met Takkomiteelede van die Republiek van Georgië en Honduras sowel as ’n Landskomiteelid van die Republiek van Tadjikistan. Hierdie ervare broers het die sendelinge raad gegee oor hoe om vriende te maak met potensieel vyandige mense deur “die kwaad met die goeie te oorwin” (Romeine 12:21). Mark Noumair, nog ’n klasinstrukteur, het ’n lewendige bespreking aangebied oor die ondervindinge wat die studente gedurende hulle Gileadopleiding in die predikingswerk gehad het. Dié deel het die gedagteprikkelende tema “Ja, hoe kan ek help?” gehad.
Die voorsitter het die program afgesluit deur lirieke aan te haal uit die nuwe lied “Sien jouself wanneer alles nuut is”. Toe die 6 509 wat teenwoordig was, daar weggaan, was hulle meer vasbeslote as ooit tevore om tot in die mees afgeleë deel van die aarde oor Jehovah en sy Seun te getuig.
[Tabel/Kaart op bladsy 31]
KLASSTATISTIEK
8 lande verteenwoordig
56 studente
28 egpare
33,6 gemiddelde ouderdom
18,3 gemiddelde jare gedoop
13,6 gemiddelde jare in die voltydse bediening
[Kaart]
(Sien publikasie vir oorspronklike teksuitleg)
Die klas is na die 22 lande hieronder gestuur
SENDINGTOEWYSINGS
JAMAIKA
HAÏTI
NICARAGUA
COSTA RICA
PANAMA
CURAÇAO
GUYANA
PERU
BOLIVIA
PARAGUAY
CHILI
MOLDOWA
SERWIË
ALBANIË
IVOORKUS
KONGO, DEM. REP.
UGANDA
BURUNDI
TANZANIË
MOSAMBIEK
NEPAL
KAMBODJA
[Prent op bladsy 31]
127ste Gradueringsklas van die Wagtoring-Bybelskool Gilead
In die lys hieronder word die rye van voor na agter genommer en word die name van links na regs in elke ry aangegee.
(1) Marshall, T.; Prudent, L.; Mashburn, A.; Rosenström, S.; Testa, A.; Takejama, M.; Sisk, M.
(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.
(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.
(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.
(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.
(6) Takejama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.
(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.