Kom nader aan God

‘U sal lojaal handel’

2 SAMUEL 22:26

MIN dinge kan ons so seer maak as wanneer iemand wat ons vertrou, ons teleurstel of ons vertroue skend. Sulke teleurstellings is baie algemeen in hierdie dislojale wêreld (2 Timoteus 3:1-5). Is daar enigiemand op wie ons kan reken wat heeltemal lojaal aan ons sal bly? Kom ons kyk na die getuienis van koning Dawid van eertydse Israel.

Gedurende sy leeftyd het Dawid die ergste soort ontrouheid ondervind. Die jaloerse Saul, Israel se eerste koning, het hom ten onregte gedwing om as ’n voortvlugtige te lewe en het hom vervolg. In sy eie gesin het Migal, Dawid se vrou, nie aan haar man lojaal gebly nie, maar hom “in haar hart begin verag” (2 Samuel 6:16). Agitofel, Dawid se vertroude raadgewer, het ’n verraaier geword en hom by ’n opstand teen Dawid aangesluit. Wie was die leier van hierdie sameswering? Niemand anders nie as Absalom, Dawid se eie seun! Het Dawid, nadat sy vertroue herhaaldelik geskend is, moed opgegee en tot die slotsom gekom dat daar niemand is wat onwrikbaar in hulle lojaliteit is nie?

Ons vind die antwoord in die woorde van Dawid soos opgeteken in 2 Samuel 22:26. Dawid, ’n man van onwankelbare geloof, sê in ’n digterlike lied oor Jehovah God: “Met iemand wat lojaal is, sal u lojaal handel.” Dawid was vol vertroue dat Jehovah lojaal aan hom sou bly, ongeag hoe ander mense hom dalk sou teleurstel.

Kom ons kyk van naderby na Dawid se woorde. Die Hebreeuse term wat as “lojaal handel” vertaal word, kan ook as “met liefderyke goedhartigheid handel” vertaal word. Ware lojaliteit is gegrond op liefde. Jehovah heg hom liefdevol aan diegene wat lojaal aan hom is.a

Let ook op dat lojaliteit meer is as net ’n gevoel; dit is aktief, nie passief nie. Jehovah handel lojaal, soos Dawid eerstehands uitgevind het. Gedurende die donkerste tye van Dawid se lewe het Jehovah ten behoewe van hom opgetree deur die getroue koning lojaal te beskerm en te lei. ’n Dankbare Dawid het Jehovah die eer daarvoor gegee dat hy hom “uit die palm van al sy vyande” verlos het.—2 Samuel 22:1.

Wat beteken Dawid se woorde vir ons? Jehovah is nie wisselvallig nie en verander nie (Jakobus 1:17). Hy bly getrou by sy standaarde en hou altyd sy beloftes. In een van Dawid se ander psalms het hy geskryf: “Jehovah . . . sal sy lojales nie verlaat nie.”—Psalm 37:28.

Jehovah waardeer ons lojaliteit. Hy stel ons lojale gehoorsaamheid aan hom hoog op prys en hy spoor ons aan om hom na te volg deur lojaliteit te openbaar in ons handelinge met ander (Efesiërs 4:24; 5:1). As ons op hierdie maniere lojaliteit aan die dag lê, kan ons die vertroue hê dat hy ons nooit sal verlaat nie. Ongeag hoe ander ons moontlik teleurstel, ons kan op Jehovah staatmaak om lojaal ten behoewe van ons op te tree en ons te help om enige beproewinge op ons weg suksesvol die hoof te bied. Beweeg dit jou om nader te kom aan Jehovah, “die Een wat lojaal is”?—Openbaring 16:5.

[Voetnoot]