Geloof – ’n Eienskap wat ons help om sterk te wees

GELOOF het groot krag. Al wil Satan ons byvoorbeeld geestelik doodmaak, help geloof ons om “al die brandende pyle van die bose [te] blus” (Ef. 6:16). As ons geloof het, kan ons probleme verduur wat soos ’n berg voor ons lê. Jesus het vir sy dissipels gesê: “As julle geloof het so groot soos ’n mosterdsaadjie, sal julle vir hierdie berg sê: ‘Gaan weg hiervandaan daarnatoe’, en hy sal weggaan” (Matt. 17:20). Aangesien geloof ons geestelik kan versterk, sal dit goed wees as ons oor hierdie vrae nadink: Wat is geloof? Watter uitwerking het ons hartstoestand op ons geloof? Hoe kan ons ons geloof versterk? En in wie moet ons geloof stel? – Rom. 4:3.

WAT IS GELOOF?

Om geloof te hê behels meer as om net die waarheid te glo of te erken, want selfs “die demone [glo dat God bestaan] en sidder” (Jak. 2:19). Wat is geloof dan?

Die Bybel definieer geloof as ’n eienskap met twee aspekte. Eerstens, “geloof is die gewaarborgde verwagting van dinge waarop gehoop word” (Heb. 11:1a). As jy geloof het, is jy vas oortuig dat alles wat Jehovah sê, waar is en vervul sal word. Jehovah het byvoorbeeld vir die Israeliete gesê: “As julle my verbond van die dag en my verbond van die nag kon verbreek, ja, sodat dag en nag nie op hulle tyd kom nie, sou ook my verbond met my kneg Dawid verbreek kon word” (Jer. 33:20, 21). Is jy ooit bang dat die son nie meer sal opkom en ondergaan nie en daar dan nie meer dag en nag sal wees nie? Jy twyfel nie in die fisiese wette wat sorg dat die aarde om sy as draai en om die son wentel nie; moet jy dan twyfel dat die Skepper van hierdie wette sy woord kan vervul? Natuurlik nie! – Jes. 55:10, 11; Matt. 5:18.

Tweedens, geloof is “die duidelike bewys van werklikhede hoewel hulle nie gesien word nie” (Heb. 11:1b). In watter opsig? Sê nou ’n kind vra jou: ‘Hoe weet jy dat lug bestaan?’ Al het jy nog nooit lug gesien nie, sal jy die kind waarskynlik help om te redeneer oor dinge wat bewys dat lug bestaan – asemhaling, die uitwerking van die wind, ensovoorts. Wanneer die kind oortuig is van die bewyse, aanvaar hy dat iets werklik kan bestaan, al kan dit nie gesien word nie. Net so is geloof op oortuigende bewyse gebaseer. – Rom. 1:20.

DIE REGTE HARTSTOESTAND IS NODIG

Voordat iemand geloof kan hê, moet hy eers “juiste kennis van die waarheid” verkry, aangesien geloof op bewyse gebaseer is (1 Tim. 2:4). Maar dit is nie genoeg nie. Die apostel Paulus het geskryf: “Met die hart beoefen ’n mens geloof tot regverdigheid” (Rom. 10:10). Iemand moenie net die waarheid glo nie, maar dit moet ook vir hom kosbaar wees. Slegs dan sal hy beweeg word om geloof te beoefen, dit wil sê om in ooreenstemming met die waarheid op te tree (Jak. 2:20). Iemand wat nie opregte waardering vir die waarheid het nie, kan selfs oortuigende bewyse verwerp as hy hardkoppig weier om sy oortuigings te verander of as hy verskonings vir sy vleeslike begeertes maak (2 Pet. 3:3, 4; Jud. 18). Dit is waarom nie almal in Bybeltye geloof opgebou het nie, al het hulle wonderwerke sien gebeur (Num. 14:11; Joh. 12:37). God se heilige gees bring net geloof voort in mense wat die waarheid bo leuens verkies. – Gal. 5:22; 2 Tess. 2:10, 11.

HOE DAWID STERK GELOOF OPGEBOU HET

Koning Dawid was iemand wat sterk geloof gehad het (Heb. 11:32, 33). Maar nie almal in Dawid se familie het sulke sterk geloof gehad nie. Dawid se oudste broer het byvoorbeeld ’n gebrek aan geloof getoon toe hy gesê het dat Dawid slegte motiewe gehad het toe Dawid ontsteld was oor Goliat se uitdaging (1 Sam. 17:26-28). Niemand word met geloof gebore nie en ’n mens erf dit ook nie by jou ouers nie. Dawid se geloof was dus die gevolg van sy eie verhouding met God.

Dawid sê in Psalm 27 hoe hy sulke sterk geloof opgebou het (vers 1). Dawid het gepeins oor sy vorige ondervindinge en oor hoe Jehovah hom gered het van sy vyande (vers 2, 3). Hy het diep waardering gehad vir Jehovah se reëling vir aanbidding (vers 4). Dawid het God saam met medeaanbidders by die tabernakel aanbid (vers 6). Hy het opreg tot Jehovah gebid (vers 7, 8). Dawid wou ook in Jehovah se weg onderrig word (vers 11). Hierdie eienskap was so belangrik vir Dawid dat hy hierdie retoriese vraag gevra het: “Waar sou ek wees as ek nie geloof gehad het nie?” – Vers 13 (Engelse Nuwe Wêreld-vertaling).

HOE OM JOU GELOOF TE VERSTERK

Jy kan geloof soos Dawid hê as jy die denkwyse en gewoontes navolg wat in Psalm 27 beskryf word. Hoe meer jy God se Woord en Bybelpublikasies studeer, hoe makliker sal dit vir jou wees om hierdie aspek van die vrug van God se gees te toon, aangesien geloof gebaseer is op juiste kennis (Ps. 1:2, 3). Maak tyd vir bepeinsing wanneer jy studeer. Bepeinsing is die grond waarin waardering groei. Wanneer jou waardering vir Jehovah groei, sal jy ’n groter begeerte hê om geloof te beoefen deur hom by gemeentelike vergaderinge te aanbid en jou hoop aan ander te verkondig (Heb. 10:23-25). Ons bewys ook dat ons geloof het wanneer ons aanhou ‘bid en nie moed opgee nie’ (Luk. 18:1-8). Daarom moet jy ‘onophoudelik bid’ met die vertroue dat Jehovah vir jou sorg (1 Tess. 5:17; 1 Pet. 5:7). Geloof beweeg ons om te doen wat reg is, en wanneer ons doen wat reg is, word ons geloof sterker. – Jak. 2:22.

BEOEFEN GELOOF IN JESUS

Op die aand voor Jesus se dood het hy vir sy dissipels gesê: “Beoefen geloof in God, beoefen geloof ook in my” (Joh. 14:1). Ons moet dus nie net geloof in Jehovah beoefen nie, maar ook in Jesus. Hoe kan jy geloof in Jesus beoefen? Kom ons kyk na drie maniere.

Eerstens, beskou die losprys as God se persoonlike geskenk aan jou. Die apostel Paulus het gesê: “Ek [lewe] deur die geloof in die Seun van God, wat my liefgehad het en homself vir my oorgegee het” (Gal. 2:20). Wanneer jy geloof in Jesus beoefen, is jy vas oortuig dat die losprys jou kan help, die grondslag is vir vergifnis van jou sondes, jou die hoop gee op die ewige lewe en die grootste bewys is van God se liefde vir jou (Rom. 8:32, 38, 39; Ef. 1:7). Dit sal jou help om nie oorweldig te word deur enige negatiewe gevoelens wat jy oor jouself het nie. – 2 Tess. 2:16, 17.

Tweedens, kom nader aan Jehovah in gebed op die grondslag van Jesus se offerande. As gevolg van die losprys kan ons tot Jehovah bid “met vrymoedigheid van spraak . . . sodat ons barmhartigheid kan verkry en onverdiende goedhartigheid kan vind vir hulp op die regte tyd” (Heb. 4:15, 16; 10:19-22). Gebed maak ons meer vasbeslote om die versoeking om te sondig, te weerstaan. – Luk. 22:40.

Derdens, wees gehoorsaam aan Jesus. Die apostel Johannes het geskryf: “Hy wat geloof in die Seun beoefen, het die ewige lewe; hy wat aan die Seun ongehoorsaam is, sal die lewe nie sien nie, maar die gramskap van God bly op hom” (Joh. 3:36). Let op dat Johannes geloof teenoor ongehoorsaamheid gestel het. Jy beoefen dus geloof in Jesus wanneer jy aan hom gehoorsaam is. Jy is gehoorsaam aan Jesus wanneer jy “die wet van die Christus” volg, dit wil sê alles wat hy mense geleer en beveel het (Gal. 6:2). Jy is ook gehoorsaam aan Jesus wanneer jy die riglyne volg wat hy deur “die getroue en verstandige slaaf” voorsien (Matt. 24:45). Wanneer jy aan Jesus gehoorsaam is, sal jy die krag hê om stormagtige probleme te verduur. – Luk. 6:47, 48.

JULLE MOET JULLE “ALLERHEILIGSTE GELOOF OPBOU”

’n Man het eenkeer uitgeroep en vir Jesus gesê: “Ek het geloof! Help my waar ek geloof kortkom!” (Mark. 9:24). Hy het ’n mate van geloof gehad, maar hierdie man het beskeie erken dat hy meer geloof nodig het. Net soos hierdie man, sal ons almal op die een of ander stadium meer geloof nodig hê. Ons almal kan ons geloof nou versterk. Soos ons gesien het, kan ons ons geloof versterk deur God se Woord te studeer en daaroor na te dink. Dit sal ons help om meer waardering vir Jehovah te hê. Ons geloof sal ook sterker word wanneer ons – saam met medegelowiges – Jehovah aanbid, ons hoop in die openbaar bekend maak en in gebed volhard. En wanneer ons ons geloof versterk, ontvang ons die grootste beloning wat daar is. God se Woord spoor ons aan: “Geliefdes, [julle] moet julle op julle allerheiligste geloof opbou . . . en julle sodoende in God se liefde hou.” – Jud. 20, 21.