Ware wysheid roep hard uit

1. Hoe reageer baie mense op die wyse raad van die Bybel? (Spreuke 1:20, 21)

IN BAIE lande het ons al baie keer gesien hoe gelukkig ons broers en susters is terwyl hulle op besige strate lektuur aanbied vir mense wat verbyloop. Het jy al ooit aan hierdie interessante vorm van die bediening deelgeneem? As jy het, het jy seker al aan die beeldspraak in die boek Spreuke gedink – die beeldspraak van wysheid wat in die openbaar uitroep sodat mense na die raad daarvan kan luister. (Lees Spreuke 1:20, 21.) Die Bybel en ons publikasies bevat “ware wysheid” – Jehovah se wysheid. Mense het hierdie wysheid nodig sodat hulle die ewige lewe kan kry. Dit maak ons baie bly wanneer iemand een van ons publikasies aanvaar. Maar nie almal doen dit nie. Party wil nie weet wat die Bybel sê nie. Ander lag vir ons. Hulle dink dat die Bybel outyds is. En ander kritiseer wat die Bybel sê oor wat reg en verkeerd is, en hulle sê dat dié wat dit volg, krities en nie liefdevol is nie. Maar Jehovah hou aan om ware wysheid liefdevol aan almal beskikbaar te maak. Op watter maniere?

2. Hoe word ware wysheid vandag beskikbaar gemaak, maar wat kies die meeste mense om te doen?

² Een manier hoe Jehovah ware wysheid beskikbaar maak, is deur middel van sy Woord, die Bybel. Daardie boek is aan amper almal beskikbaar. En wat van ons Bybelse publikasies? As gevolg van Jehovah se seëning is dit in meer as 1 000 tale beskikbaar. Dié wat luister, dit wil sê wat lees en toepas wat hulle leer, sal daarby baat vind. Maar die meeste mense kies om die stem van ware wysheid te ignoreer. Wanneer hulle besluite moet maak, verkies hulle om op hulleself te vertrou of om na ander mense te luister. Hulle kyk dalk selfs neer op ons omdat ons kies om te volg wat die Bybel sê. Hierdie artikel sal bespreek hoekom mense op hierdie manier reageer. Maar kom ons bespreek eers hoe ons wysheid van Jehovah kan verkry.

KENNIS VAN JEHOVAH LEI TOT WYSHEID

3. Wat moet ons doen om regtig wys te word?

³ Wysheid kan verwys na die vermoë om te gebruik wat ons weet om goeie besluite te maak. Maar ware wysheid behels meer. Die Bybel sê: “Vrees vir Jehovah is die begin van wysheid, en kennis van die Allerheiligste lei tot insig” (Spr. 9:10). So wanneer ons ’n belangrike besluit moet maak, moet ons Jehovah se denke – “kennis van die Allerheiligste” – die grondslag vir ons besluit maak. Ons kan dit doen deur die Bybel en Bybelse publikasies te studeer. Wanneer ons dit doen, wys ons ware wysheid. – Spr. 2:5-7.

4. Hoekom is Jehovah die enigste een wat vir ons ware wysheid kan gee?

⁴ Jehovah is die enigste een wat vir ons ware wysheid kan gee (Rom. 16:27). Hoekom is hy die Bron van wysheid? Eerstens, as die Skepper, het hy onbeperkte kennis en begrip van sy skepping (Ps. 104:24). Tweedens, alles wat Jehovah doen, wys dat hy wys is (Rom. 11:33). Derdens, Jehovah se wyse raad sal dié wat dit toepas, altyd help (Spr. 2:10-12). As ons ware wysheid wil verkry, moet ons hierdie basiese waarhede aanvaar en toelaat dat dit ons besluite en ons dade rig.

5. Wat gebeur wanneer mense weier om Jehovah te erken as die Bron van ware wysheid?

⁵ Baie mense wat ons in die bediening ontmoet, erken dat dinge in die natuur op ’n wonderlike manier ontwerp is, maar hulle ontken dat daar ’n Skepper is en hulle sê dat alles as gevolg van evolusie ontstaan het. En ander sê dat hulle in God glo, maar hulle beskou die Bybel se standaarde as outyds, en hulle kies om te lewe soos hulle wil. Wat is die gevolg? Is die wêreld ’n beter plek omdat mense op hulle eie wysheid staatmaak eerder as op God s’n? Het hulle ware geluk of ’n vaste hoop vir die toekoms gevind? Wat ons om ons sien, oortuig ons van hierdie waarheid: “Daar is geen wysheid, geen insig en geen raad teen Jehovah nie” (Spr. 21:30). Dit motiveer ons om aan te hou om Jehovah te vra om vir ons ware wysheid te gee! Ongelukkig doen die meeste mense dit nie. Hoekom nie?

HOEKOM MENSE WARE WYSHEID VERWERP

6. Wie wil nie na Jehovah se wysheid luister nie, volgens Spreuke 1:22-25?

⁶ Baie wil nie luister wanneer ware wysheid ‘in die straat uitroep’ nie. Volgens die Bybel is daar drie groepe mense wat wysheid verwerp: “onervarenes,” “spotters” en “dwase”. (Lees Spreuke 1:22-25.) Kom ons bespreek hoekom hierdie mense God se wysheid verwerp, en kom ons kyk ook hoe ons dit kan vermy om soos hulle te word.

7. Hoekom kies party om “onervarenes” te bly?

⁷ Die “onervarenes” is dié wat alles glo wat hulle hoor en wat maklik mislei kan word (Spr. 14:15). Ons ontmoet gereeld sulke persone in ons bediening. Dink byvoorbeeld aan die miljoene mense wat mislei word deur godsdiens- en politieke leiers. Party is geskok wanneer hulle uitvind dat daardie leiers vir hulle gelieg het. Maar dié wat in Spreuke 1:22 genoem word, besluit om onervare te bly omdat hulle dit so verkies (Jer. 5:31). Hulle doen wat hulle wil en wil nie leer wat die Bybel sê of gehoorsaam wees aan die wette daarin nie. Baie voel soos een baie godsdienstige vrou in Quebec, Kanada, wat vir ’n Getuie gesê het: “As ons priester ons mislei het, is dit sy skuld nie ons s’n nie!” Ons wil beslis nie dié navolg wat doelbewus onervare is nie! – Spr. 1:32; 27:12.

8. Wat sal ons help om die regte soort ervaring op te bou?

⁸ Die Bybel moedig ons met goeie rede aan om nie onervare te bly nie, maar om “volwasse in [ons] denke” te word (1 Kor. 14:20). Ons verkry die regte soort ervaring deur Bybelbeginsels in ons lewe toe te pas. As ons dit doen, sal ons sien hoe die Bybel ons help om probleme te vermy en wyse besluite te maak. Dit sal goed wees om te kyk hoe ons in hierdie verband vorder. As ons die Bybel al ’n ruk lank studeer en vergaderinge bywoon, kan ons dalk onsself afvra hoekom ons nog nie onsself aan Jehovah toegewy het en laat doop het nie. As ons gedoop is, maak ons vordering as ’n prediker en onderrigter van die goeie nuus? Wys ons besluite dat ons deur Bybelbeginsels gerig word? Weerspieël ons Christelike eienskappe wanneer ons met ander te doen het? As ons sien dat ons in hierdie verband kan verbeter, moet ons aandag skenk aan Jehovah se herinneringe, wat ‘die onervarene wys maak’. – Ps. 19:7.

9. Hoe wys “spotters” dat hulle wysheid verwerp?

⁹ Die tweede groep mense wat God se wysheid ignoreer, is die “spotters”. Soms ontmoet ons sulke mense in ons predikingswerk. Hulle geniet dit om ander te spot (Ps. 123:4). Die Bybel het gewaarsku dat daar in die laaste dae baie spotters sou wees (2 Pet. 3:3, 4). Soos die regverdige Lot se skoonseuns skenk party mense vandag nie aandag aan God se waarskuwings nie (Gen. 19:14). Baie lag vir dié wat volgens Bybelbeginsels lewe. Die spotters word gemotiveer deur “hulle eie goddelose begeertes” (Jud. 7, 17, 18). Die Bybel se beskrywing van spotters pas goed by afvalliges en ander wat Jehovah verwerp het!

10. Hoe kan ons dit vermy om spotters te word, volgens Psalm 1:1?

¹⁰ Hoe kan ons seker maak dat ons nie spotters word nie? Een manier is om nie met dié te assosieer wat ’n kritiese gesindheid het nie. (Lees Psalm 1:1.) Dit beteken dat ons nie enige iets lees of na enige iets luister wat van afvalliges kom nie. Ons besef dat as ons nie versigtig is nie ons maklik ’n kritiese gesindheid kan ontwikkel en in Jehovah en die leiding wat ons deur sy organisasie ontvang, kan begin twyfel. Om dit te vermy, kan ons onsself afvra: ‘Het ek gewoonlik iets negatiefs om te sê wanneer ons nuwe riglyne of verduidelikings kry? Vind ek gewoonlik fout met dié wat die leiding neem?’ Wanneer ons vinnig optree om sulke neigings reg te stel, sal dit Jehovah gelukkig maak. – Spr. 3:34, 35.

11. Hoe beskou die “dwase” Jehovah se sedelike standaarde?

¹¹ Die derde groep mense wat wysheid verwerp, is die “dwase”. Hulle is dwaas omdat hulle weier om volgens God se sedelike wette te lewe. Hulle doen wat reg is in hulle eie oë (Spr. 12:15). Sulke mense verwerp Jehovah, die Bron van wysheid (Ps. 53:1). Wanneer ons hulle in die predikingswerk ontmoet, kritiseer hulle ons dikwels omdat ons Bybelstandaarde respekteer, maar hulle het niks beters om ons te bied nie. Die Bybel sê: “’n Dwaas kan nie ware wysheid verkry nie. In die stadspoort het hy niks om te sê nie” (Spr. 24:7). Die dwase kan nie vir ons enige wyse raad gee nie. Dit is geen wonder dat Jehovah ons hierdie raad gee nie: “Bly weg van die dwaas”! – Spr. 14:7.

12. Wat sal ons help om nie soos die dwase te wees nie?

¹² Ons is nie soos dié wat God se raad haat nie. Ons leer eerder om lief te word vir hoe God dink, insluitende vir al sy wette. Ons kan daardie liefde versterk deur die resultate van gehoorsaamheid te vergelyk met dié van ongehoorsaamheid. Kyk na die soort probleme wat mense oor hulleself bring omdat hulle dwaas is en Jehovah se wyse raad verwerp. Kyk dan hoeveel beter jou lewe is omdat jy gehoorsaam is aan God. – Ps. 32:8, 10.

13. Forseer Jehovah ons om sy wyse raad te gehoorsaam?

¹³ Jehovah maak wyse raad beskikbaar aan almal, maar hy forseer niemand om dit te aanvaar nie. Hy sê wel wat gebeur wanneer mense nie na sy wysheid luister nie (Spr. 1:29-32). Dié wat kies om ongehoorsaam aan Jehovah te wees, sal “die gevolge van hulle dade dra”. Op die ou end sal hulle leefstyl net vir hulle probleme veroorsaak, en uiteindelik sal hulle vernietig word. Maar hierdie belofte word gemaak aan dié wat na Jehovah se wyse raad luister en toepas wat dit sê: “Maar die een wat na my luister, sal in veiligheid woon en sal nie vir rampspoed bang wees nie.” – Spr. 1:33.

WARE WYSHEID HELP ONS

14-15. Wat leer ons uit Spreuke 4:23?

¹⁴ Wanneer ons God se wysheid toepas, help dit ons altyd. Soos ons bespreek het, maak Jehovah wyse raad beskikbaar aan almal. Byvoorbeeld, in die boek Spreuke gee Jehovah praktiese raad wat altyd sal werk en wat ons lewens sal verbeter as ons dit toepas. Kom ons kyk nou na net vier voorbeelde van sulke wyse raad.

¹⁵ Beskerm jou figuurlike hart. Die Bybel sê: “Beskerm jou hart meer as enigiets anders wat jy beskerm, want jou lewe hang af van wat in jou hart is” (Spr. 4:23). Dink net aan wat dit alles behels om ons letterlike hart te beskerm. Ons moet gesonde kos eet, genoeg oefening kry en slegte gewoontes vermy. Ons doen iets soortgelyks om ons figuurlike hart te beskerm. Ons word elke dag deur God se Woord gevoed. Ons berei voor vir Christelike vergaderinge, woon dit by en neem deel daaraan. Ons bly bedrywig deur gereeld aan die bediening deel te neem. En ons vermy slegte gewoontes deur weg te bly van enige iets wat ’n slegte uitwerking op ons denke kan hê, soos onsedelike vermaak en slegte assosiasie.

16. Hoekom is Spreuke 23:4, 5 vandag so prakties?

¹⁶ Wees tevrede met wat jy het. Die Bybel gee hierdie raad: “Moenie jouself uitput om rykdom te verkry nie. . . . Terwyl jy nog daarna kyk, verdwyn dit, want dit sal vlerke kry soos dié van ’n arend en wegvlieg” (Spr. 23:4, 5). Materiële rykdom gaan nie vir ewig hou nie. Maar vandag is ryk en arm mense behep daarmee om geld te maak. Dit is hoekom hulle dikwels dinge doen wat hulle reputasie, hulle verhoudings en selfs hulle gesondheid beskadig (Spr. 28:20; 1 Tim. 6:9, 10). Maar wysheid help ons om ’n gebalanseerde beskouing van geld te hê. So ’n beskouing beskerm ons teen gierigheid en lei tot tevredenheid en geluk. – Pred. 7:12.

17. Hoe kan ons “die tong van die wyses” verkry, soos in Spreuke 12:18 genoem word?

¹⁷ Dink voordat jy praat. As ons nie versigtig is nie, kan ons woorde baie skade veroorsaak. Die Bybel sê: “As ’n mens praat sonder om te dink, sal jou woorde soos swaardsteke wees, maar die tong van die wyses is genesend” (Spr. 12:18). Ons help om die vrede te bewaar wanneer ons nie oor ander se foute skinder nie (Spr. 20:19). As ons wil hê dat ons woorde ander moet vertroos en nie moet seermaak nie, moet ons God se Woord gereeld lees en daaroor nadink (Luk. 6:45). Wanneer ons nadink oor wat die Bybel sê, kan ons woorde soos “’n fontein van wysheid” word wat ander verfris. – Spr. 18:4.

18. Hoe kan Spreuke 24:6 ons help om suksesvol in die bediening te wees?

¹⁸ Volg die instruksies van die organisasie. Die Bybel gee die volgende praktiese raad: “Voer jou oorlog met wyse leiding. Met baie raadgewers sal jy suksesvol wees” (Spr. 24:6, vtn.). Kyk hoe hierdie beginsel ons help om suksesvol te wees in ons predikings- en onderrigtingswerk. Eerder as om die bediening op ons eie manier te doen, probeer ons om die voorstelle te volg wat ons kry. Ons kry wyse leiding by ons Christelike vergaderinge, waar ervare broers en susters Bybelse toesprake en aanbiedings gee om ons op te lei. En Jehovah se organisasie voorsien effektiewe hulpmiddele – publikasies en video’s – wat mense kan help om die Bybel te verstaan. Leer jy om hierdie hulpmiddele op ’n effektiewe manier te gebruik?

19. Hoe voel jy oor die wysheid wat Jehovah voorsien? (Spreuke 3:13-18)

¹⁹ Lees Spreuke 3:13-18. Ons is baie dankbaar vir die goeie raad in God se Woord! Waar sou ons sonder daardie raad gewees het! In hierdie artikel het ons voorbeelde van praktiese wysheid in Spreuke bespreek. Jehovah het natuurlik wyse woorde regdeur die Bybel voorsien. Laat ons vasbeslote wees om altyd die wysheid toe te pas wat Jehovah voorsien. Hoe die wêreld sulke wysheid beskou, is nie vir ons belangrik nie. Ons is oortuig dat “dié wat [wysheid] stewig vashou, . . . gelukkig genoem [sal] word”.