Die Bybel in Georgies

GEORGIES is een van die eerste tale waarin die Bybel vertaal is. Dit is ook in Armeens, Kopties, Latyn, Siries en ander tale vertaal. Ou Georgiese manuskripte van die Evangelies, die briewe van Paulus en die Psalms dateer uit die middel van die vyfde eeu HJ of selfs vroeër. Ná die vyfde eeu het die vertaling en kopiëring van die Bybel in Georgies toegeneem, wat tot verskeie weergawes gelei het.a

Die Bybel het ’n sterk invloed gehad op geskrewe werke en die tradisies en waardes van die Georgiese volk. Byvoorbeeld, die tragiese storie van koningin Sjoesjanik, moontlik laat in die vyfde eeu geskryf, sluit aanhalings uit die Bybel in en verwys na verskeie dele daarvan. Die digter Sjota Roestaweli het ongeveer in die jaar 1220 die gedig Vepkhvistqaosani (Die ridder in die swart luiperd se vel) geskryf. In hierdie epiese gedig het hy na Christelike waardes verwys. Hy het geskryf oor vriendskap, vrygewigheid en liefde teenoor vreemdelinge—waardes wat die Georgiese volk nog steeds nastreef.